སྲིད་པའི་རླུང་གི་འཁོར་བགྲོད་གཅིག་གི་འོག །
ཁྱེད་ཉིད་ང་ཡི་ཚེ་སྲོག་སྟེར་བའི་གཉེན། །
ལུས་སྐྱེད་དྲིན་ཆེན་ཨ་མའི་དཀའ་སྡུག་འགའ། །
སྙིང་ནས་དྲན་པའི་གདུང་བ་འདི་ན་འཕྱུར། །
སྣ་བརྒྱའི་མེ་ཏོག་འཛོམས་པའི་དབྱར་དུས་སུ། །
ཕྱུགས་ཀྱིས་འཚོ་བ་སྐྱོང་བའི་དཀའ་སྡུག་འོག །
ང་ཡི་ཨ་མ་ལྷས་ཀྱི་འདམ་རྫབ་ནང་། །
རྐང་གི་བོལ་ཚིགས་ནུབ་བཞིན་བཞོ་མ་བྱས། །
ཁ་བའི་འདབ་མ་རྒྱས་པའི་དགུན་དུས་སུ། །
ནང་སྔའི་འཁྱག་དར་སྐྱ་བོའི་བར་གསེང་ནས། །
ཆུ་སྐྱོགས་ཟོམ་ལ་གཟར་བའི་བཟོད་སྲན་གྱིས། །
ང་ཡི་ཨ་མ་ལག་པའི་ཤུན་ཁ་གས། །
སྔོ་ཆུང་རྩེ་དམར་འབུས་པའི་དཔྱིད་དུས་སུ། །
དཀར་ནག་ཕྱུགས་རིགས་མ་བུ་བཙའ་སྐྱོང་སྐབས། །
ང་ཡི་ཨ་མ་སྔ་ལངས་ཉལ་ཕྱི་ཡིས། །
གདོང་གི་ཤ་མདོག་དེ་ཡང་སྔོན་པོར་གྱུར། །
ཉེར་དགུའི་སྨག་ཆར་འཁྲིགས་པའི་དགོང་མོ་རུ། །
བྱང་གི་གཅན་སྤྱང་གདུག་པའི་མཆེ་སྡེར་འོག །
ང་ཡི་ཨ་མ་སྒོ་ཁྱི་སྤྱང་ཟུག་ལ། །
སྐྲག་སྟེ་སྦྲ་ནག་གྲིབ་ཀྱི་ལུག་སྲུང་བྱས། །
ཤེས་ཡོན་འཚོལ་སྙེགས་བྱེད་པའི་དུས་བཟང་སྐབས། །
བུ་ཕྲུག་སྙོལ་སྐྱོང་ཁྱིམ་གཞིས་འཚོ་བ་ལས། །
གནམ་འོག་འགྲན་ཟླ་བྲལ་བའི་བདེ་གནས་ཤིག །
ཉེ་བར་སྲིད་ཀྱང་བློ་ཁ་ཕྱོགས་ཐབས་བྲལ། །
ཞེས་ཨ་མའི་དཀའ་སྡུག་དྲན་པའི་དགོང་མོ་ཞིག་ཏུ་བྲིས་པ་ཡིན།
- ཟིན་ཐོ་གོང་མ།གྱ་གྱུའི་བསམ་བློ།
- ཟིན་ཐོ་འོག་མ།༄༅། སྐལ་པ་བཟང་པོའི་བསྟོད་དབྱངས།
ངེས་མེད་མི་ཡུལ་རྒྱུ་བའི་ལམ་ཁ་ནས།།ཨ་མ་དྲན་པའི་མིག་ཆུ་ཤོར་ན་འང་།།
ཁྲེལ་མེད་ལས་དབང་བཙན་པོས་བཀོད་བསྒྲིགས་འདིས།།
ང་རང་སྡུག་ལ་སྦྱར་བ་ཐེངས་གཅིག་མིན།།
དུས་ཚོད་ནས་་་་་་
མ་དྲིན་ཆེན་གྱི་དཀའ་སྡུག་གླེང་ཞོར་ངུ་ངག་འདོན་ཐུབ་པ་ཙམ་བྱུང་ན། དེ་ནི་མ་དྲིན་ཆེན་གྱི་སེམས་ཁུངས་སུ་ནམ་ཡང་མ་གཟིམ་པར་འབར་ཐུབ་པའི་མར་མེ་འོད་ཟེར་ལྟ་བུ་ཡིན་སྲིད། ཁྱེད་ལ་དེ་འདྲའི་ཤ་འདར་རྐངགཟེར་གྱི་སྙིང་རྗེ་ལྡན་པ་ནི་མ་དྲིན་ཆེན་གྱི་སེམས་ངོའི་དྲོད་ཐིགས་ཡིན་ལ་གདོང་གི་ཡལ་མེད་ཀྱི་འཛུམ་མདངས་ཀྱང་ཡིན། མ་སེམས་ཅན་ཐམས་ཅད་ཀྱི་མདུན་ནས་མགོ་བོ་དགྱེ་ཆོག་པའི་ལ་རྒྱ་ཡིན་ཞེས་བརྗོད་རུང་ལ། ཚེ་འདིར་ཁྱེད་ཀྱིས་གནང་བའི་སླད་མེད་ཀྱི་དྲིན་ལན་ཞིག་ལའང་རྩིས་ཆོག རྒྱུ་མཚན་མི་སེམས་དྲོས་བྱེད་ནི་སེམས་ཡོད་མེད་ལ་རེག་ལས་ཡོད་ལ། མི་སེམས་འཁྱག་བྱེད་ཀྱང་སེམས་ཡོད་མེད་ལ་རེག་ལསཡོད། མའི་དཀའ་སྡུག་གི་འཚོ་བ་དེ་སྨྲེ་ངག་གི་མགུར་དུ་གྱེར་ནས་དྲྭ་ངོས་སུ་ཕབ་པ་འདི་སྙིང་ཐག་པ་ནས་དགའ་འོས་པ་ཞིག་རེད།