ཁྲི་སེར་འཇམ་དཔལ་གྱི༼ སྒོ་ཁྱི ༽དང་དེའི་ཕྲན་དཔྱད།
སྒོ་ཁྱི།
ཁྲི་སེར་འཇམ་དཔལ།
སྦྲ་ནག་གི་མཐའ་ཤོམ་དེ་ནས། ལུས་སྟོབས་རྒྱས།
རྣོ་ལྕགས་ཀྱི་རྒྱུན་ཐག་ཅིག་གིས། དམ་དུ་བཅིངས།
འགུལ་མེད་ཀྱི་རྟེན་ཕུར་རིང་པོར། འཁང་ར་བྱས།
གྲང་རེག་གི་འཇིག་རྟེན་ཁྲོད་དུ། ལང་ཚོ་རྫོགས།
༡༩༩༧, ༡༠, ༢༠ ཉིན་བྲིས།
༡༩༩༨ ལོའི༼གངས་རིའི་ལང་ཚོ༽སྟེང་བཀོད།
༼ཕྲན་དཔྱད་པ། ཁྲི་བློ་རྩེ༽རྩོམ་པ་པོའི་ཀུན་རྟོགས་ལས་འཕྲོས་པའི་སྙན་ངག་དམ་པའི་རྒྱན་ལྡན་འདི་ནི། དུས་རྟག་ཏུ་བསམ་བློ་དང་། ཀུན་སྤྱོད། ཚོར་འདུ། གནས་ལུགས་ལྡན་པའི་སྒུལ་ཤུགས་ཀྱིས་ཕྱུག་པའི་སྙན་ངག་དེ་ཡང་འཇིག་རྟེན་གྱི་མཐོ་ས་ཞིག་ཏུ་རྟག་བརྟན་གྱིས་འགྲེང་ཐུབ།
རྩོམ་གྲོགས་ཁྲི་སེར་འཇམ་དཔལ༼ཁྲི་ཀེང་དཀར༽གྱིས༡༩༩༧ལོར་བྲིས་པའི་སྒོ་ཁྱི་ཞེས་པའི་སྙན་ངག་འདིར་མཚོན་ན་གནས་ལུགས་དེ་དག་ལྡན་པ་ལས་སྒོ་ཁྱི་ཞེས་སྙན་ངག་འདི་ཡིག་འབྲུ་བཞི་བཅུས་གྲུབ་ཡོད།
རང་བྱུང་གི་ཁོར་ཡུག་ཁྲོད་ན་ཉེན་བརྡ་གཏོང་མཁན་ཞིག་ཡོད་པ་ནི་སྒོ་ཁྱི་ཡིན་ལ། སྒོ་ཁྱི་ལ་བརྩི་མཐོང་མེད་པ་དེའི་བདག་པོ་རེད། རྩོམ་པ་པོས་སྒོ་ཁྱི་ཡོད་དོ་ཅོག་གི་སྐྱེས་པ་ནས་འཆི་བའི་བར་གྱི་བརྒྱུད་རིམ་ཞིབ་འབྲི་བྱས་ཡོད་ལ། ཞིབ་འབྲི་བྱས་པའི་བརྒྱུད་རིམ་ཁྲོད་ནས་ང་ཚོས་ཤེས་ཐུབ་ནི་སྒོ་ཁྱིའི་སྡུག་བསྔལ་རེད།
༼སྦྲ་ནག་གི་མཐའ་ཤོམ་དེ་ནས། ལུས་སྟོབས་རྒྱས༽པ་ཧ་ཅང་སྐྱིད་པའི་སྣང་བ་རྒྱས་ན་ཡང་ཁྲེལ་མེད་བདག་པོ་དེས༼རྣོ་ལྕགས་ཀྱི་རྒྱུན་ཐག་ཅིག་གིས། དམ་དུ་བཅིངས༽པས་ཉམ་ང་དང་ཞེ་སྡུག་གི་ཀློང་ནས་འཕག་འཚག་རྒྱག་ཞོར༼འགུལ་མེད་ཀྱི་རྟེན་ཕུར་རིང་པོར། འཁང་ར་བྱས༽ཀྱང་ལས་འབྲས་ལ་རློམ་སེམས་བྲལ་བའི་བདག་པོའམ་རྔོན་པ་དེས་སྒོ་ཁྱིའི་ཁ་ཕྱོགས་ཟུར་ཙམ་ཡང་མཐོང་མ་ཐུབ།
སྒོ་ཁྱིས་བདག་པོས་གནང་བའི་མནར་གཅོད་ཁུར་ནས་ཉིན་མཚན་སྟོང་ཕྲག་གི་རྗེས་ནས༼གྲང་རེག་གི་འཇིག་རྟེན་ཁྲོད་དུ། ལང་ཚོ་རྫོགས༽སོང་། ངོ་མ་ཡ་ང་ཞིང་ཡིད་སྐྱོ་བའི་སྒོ་ཁྱིའི་སྙན་ངག་འདི་བཀླགས་རྗེས་ང་ཚོ་ཡང་བདག་པོ་དེའི་ཆོས་ཉིད་དང་བྲལ་ཏེ་ཕན་སེམས་དང་བྱམས་བརྩེ་ལྡན་པའི་མི་བུ་ཞིག་འཁྱོངས་རྒྱུ་འདིས་བརྗོད་སྙིང་གསོན་པོ་རེད།
རྩོམ་པ་པོའི་ཀུན་རྟོགས་ལས་འཕྲོས་པའི་སྒོ་ཁྱི་ནམ་ཡང་སྒོ་ཁྱི་མིན། སྒོ་ཁྱིའི་ལྡོག་གཟུགས་ལས་འཕྲོས་པའི་སེམས་ལྡན་གྱི་འཇིག་རྟེན་ཞིག་ཡིན་པས་ང་ཚོས་སྒོ་ཁྱི་ལ་དག་སྣང་བྱེད་པར་འཚལ།
༢༠༠༨, ༥, ༣ ཉིན་བྲིས།
