༈སྤ༵་སྟོ༵ན་ཆེ༵ན་པོ༵་ཉི༵་མ༵་འབུ༵མ་གས༵ལ་གྱི་ཞལ་གདམས་ཉམས་མགུར།
༈སྐྱབས་རྒྱལ་བ་མ་ལུས་ཐམས་ཅད་ཀྱི།
ཐུགས་མཁྱེན་དགོངས་གསང་གསུམ་ངོ་བོ་གཅིག
རྗེ་བླ་མ་དྲན་ཆོག་རྣམ་བཞི་ལ།
བདག་སྒོ་གསུམ་རྩེ་གཅིག་གསོལ་བ་འདེབས།
དོན་རང་རྒྱུད་ཁྲོལ་ཞིང་གཞན་རྒྱུད་སྨིན།
ལས་དོན་གཉིས་མཐར་ཕྱིན་འགྲུབ་པར་གྱིས།
སྙན་གསོན་དང་རྗེས་སུ་འཇུག་པའི་བུ།
ལུས་གཅེས་པར་མ་འཛིན་དུར་ཁྲོད་རོ།
ཁོ་བྱ་ཁྱི་འབུ་སྲིན་གྱིས་སྟོང་རྒྱུ་ཡིན།
ནོར་ལོངས་སྤྱོད་དགྲ་བོ་འབོད་པའི་གཡབ།
དེར་འཛིན་ཆགས་མ་བྱེད་བསྐྱུར་རྒྱུ་ཡིན།
ཚེ་རྟག་འཛིན་གློ་བུར་ལོང་མེད་སོམས།
ནང་སྔ་མོར་ལ་ཁའི་ཉི་མ་འདྲ།
ཡུན་རིང་པོར་མི་གནས་འགྲིབ་རྒྱུ་ཡིན།
སྙན་གྲགས་གཡེར་བར་སྣང་སྤྲིན་འབྲུག་འདྲ།
དེ་བདག་ཏུ་མ་འཛིན་སྟོང་རྒྱུ་ཡིན།
རྒྱན་ཁ་དོག་དབྱར་ཁའི་མེ་ཏོག་དེ།
ཁོ་རྟག་འཛིན་མ་བྱེད་ཡལ་རྒྱུ་ཡིན།
གྲོགས་ཉེ་འབྲེལ་ཤིང་འགོའི་བྱེའུ་འཚོགས་བཞིན།
དེར་ཞེན་ཆགས་མ་ཆེ་བྱེར་རྒྱུ་ཡིན།
གནས་ཡུལ་མཁར་དངོས་མེད་དྲི་ཟའི་གྲོང་།
བདག་མ་འཛིན་ནམ་ཞིག་སྟོང་རྒྱུ་ཡིན།
སྡང་དགྲ་བོ་བར་སྣང་གློག་འོད་ཙམ།
ཞེ་སྡང་མེད་སྐད་ཅིག་ཡལ་རྒྱུ་ཡིན།
བ
ཟང་ཆེ་འདོད་བྲག་འགོའི་རྩ་ཚོམ་དེ།
ཟ་འདོད་ན་གཡང་སར་ལྷུང་རྒྱུ་ཡིན།
གཞན་མ་འདོད་དུག་ཚེར་ལོ་མའི་ཁྲོད།
ཡུན་རིང་འགྲོགས་འདུག་བཟོད་བྲལ་རྒྱུ་ཡིན།
ཚིག་ཐ་སྙད་སློབ་གཉེར་ཅི་མཁས་ཀྱང་།
སང་ཕ་རོལ་ཕན་མེད་བརྗེད་རྒྱུ་ཡིན།
བོན་ཀུན་ཤེས་གཅིག་ལ་སྡུག་པ་དེ།
དོན་སྙིང་པོའི་མདོ་དོན་གཏོར་རྒྱུ་ཡིན།
ཚེ་འདི་དོན་མི་ཆོས་བཟང་འདོད་དེ།
སང་ཕ་རོལ་གཏན་ཆུས་འཆོལ་རྒྱུ་ཡིན།
བོན་གང་ཤེས་ཁ་རུ་འཁྱེར་མང་ན།
ཟོབ་ཆོས་བརྒྱད་དབང་དུ་འགྲོ་རྒྱུ་ཡིན།
ཁོ་ཆོས་ཤེས་བྲལ་བའི་ནོར་རྫས་དེ།
རང་ཐ་མར་དབུལ་ཞིང་འཕོངས་རྒྱུ་ཡིན།
དེ་ཨི་བདེན་མི་བདེན་བསམ་མནོ་ཐོངས།
ད་མདོ་དོན་དྲིལ་བའི་སྙིང་པོ་ལ།
ཆོས་མི་རྟག་དགེ་བའི་བསྐུལ་མ་ཐོབ།
ཚུལ་དམན་ཆ་བཟུང་ལ་དག་སྣང་བསྐྱེད།
བློ་ཕུག་དེ་དགེ་ལ་གཏད་པར་གྱིས།
དགེ་ཕུག་དེ་སྤྲང་ལ་གཏད་ན་བཟང་།
སྤྲང་ཕུག་དེ་ཤི་ལ་གཏད་ན་དགའ།
ཤི་ཕུག་དེ་འབུ་ལ་གཏད་ན་དགེ།
རྗེ་གོང་མའི་ཞལ་གདམ་དེ་བཞིན་གྱི།
རྗེས་ནོར་མེད་འབྲེང་ན་རྣལ་འབྱོར་རབ།
སྐྱབས་བསླུ་མེད་དཀོན་མཆོག་རྣམ་གསུམ་བསྟེན།
ནོར་བསླུ་མེད་སྒོ་གསུམ་དགེ་སྦྱོར་བསགས།
གྲོགས་བསླུ་མེད་རང་རིག་ཡེ་ཤེས་དེ།
དུས་སྐད་ཅིག་མི་འབྲལ་གསལ་མདངས་གདབ།
སེམས་སྒོམ་རྒྱུ་རྡུལ་ཙམ་མ་མཆིས་ཀྱང་།
དུས་ཡུད་ཙམ་མ་གནས་ལམ་ལམ་སྣང་།
དེ་སྣང་ཙམ་ཉིད་ལ་ངོ་བོ་སྟོང་།
དོན་གསལ་སྟོང་དབྱེར་མེད་བོན་གྱི་སྐུ།
བློ་བཅོས་མེད་ངང་སྐྱོང་བྱ་ར་གྱིས།
མཐར་སངས་རྒྱས་ཐོབ་པ་གདོན་མི་ཟ།
འདི་སྐལ་ལྡན་སློབ་མ་ངང་རྒྱལ་གྱི།
བོན་བདེན་ཚིག་ཟབ་མོའི་བཀའ་འབྲེལ་གྱིས།
དགེ་བསམ་དོན་འགྲུབ་པའི་བཀྲ་ཤིས་ཤོག
ཅེས་པ་འདི་ནི༧སྤ་སྟོན་ཉི་མ་འབུམ་གསལ་ལ་དད་ལྡན་གྱི་སློབ་མ་ངང་རྒྱས་ནས་ཉམས་ལེན་གྱི་ཞལ་གདམ་ཞིག་ཞུས་པའི་ལན་དུ་མགུར་འདི་གསུངས་སོ།
