མཛོད་ཕུགས་ཞེས་པའི་མཚན་གྱི་གདགས་གཞིའི་
སྐོར་ཅུང་ཟད་གླེང་བ།
དེ་ཡང་འགྲོ་མགོན་མཛོད་ལས། མཚན་འདི་གདགས་པའི་གཞི་ནི་ནམ་མཁའ་བོན་ཉིད་ སེམས་ཉིད་གསུམ་ཡིན་ཏེ། སྣང་སྲིད་བོན་སྒོ་དུ་མ་ཕུང་པོ་ཁམས་དང་སྐྱེ་མཆེད་ལས་སོགས་སྐྱེས་བུའི་གནས་སྐབས་དང་ལམ་གྱིས་རྐྱེན་མ་ཚང་པ་མེད་པ་འབྱུང་བས་མཛོད་དེ་རྟོགས་པ་དཀའ་ཞིང་རིག་པར་དཀོན་པའི་དོན་དང་། དེའི་དོན་སྟོན་པའི་ཚིག་གཞུང་འདིས་སྟོན་པས་ཚིག་ཀྱང་ཡིན་པས་དཔེ་དོན་འབྲེལ་བ་གདགས་གཞིའོ། ཞེས་པའི་དོན་ནི།
<ནམ་མཁའ >མཛོད་ཀྱི་གདགས་གཞིར་བཟུང་བ་སྟེ་ཕྱི་སྣང་ཞིང་སྲིད་པས་བསྡུས་པ་ཀུན་དེ་ལས་འབྱུང་གནས་སྡུད་གསུམ་བྱེད་པའམ་མ་ཚང་བར་མེད་པར་འབྱུང་བས་དང་།
<བོན་ཉིད>་མཛོད་ཀྱི་གདགས་གཞིར་བཟུང་བ་སྟེ་བོན་ཅན་གྱི་མཚན་མ་ཕུང་པོ་ཁམས་དང་སྐྱེ་མཆེད་ཀྱིས་བསྡུས་པ་ཐམས་ཅད་དེ་ལས་འབྱུང་གནས་སྡུད་གསུམ་བྱེད་པའམ་མ་ཚང་བ་མེད་པར་འབྱུང་བས་དང་།
<སེམས་ཉིད་>མཛོད་ཀྱི་གདགས་གཞིར་བཟུང་བ་སྟེ་དམ་པའི་སྐྱེས་བུའི་གནས་སྐབས་ལམ་གྱི་ཡོན་ཏན་གྱི་ཚོགས་དང་མ་དག་ཐ་མལ་བའི་སྐབས་སུ་ཚུལ་མིན་རྣམ་རྟོག་གི་འཕྲོ་འདུ་བཅས་བདེ་སྡུག་གི་རྐྱེན་ཇི་སྙེད་དམ་སེམས་དང་སེམས་འབྱུང་གི་ཚོགས་ཐམས་ཅད་དེ་ལས་འབྱུང་གནས་སྡུད་གསུམ་བྱེད་པའམ་མ་ཚང་བར་མེད་པར་འབྱུང་བས་དང་།
<གཤེན་ཞལ་གཙང་མའི་བོན་འདི་ལའང་>མཛོད་ཀྱི་གདགས་གཞིར་བཟུང་བ་སྟེ་རྟོགས་པ་དཀའ་ཞིང་རིག་པར་དཀོན་པའི། དཔེ་དོན་རྟགས་ཀྱི་གནས་ལུགས་སྟོན་པའི་ཚིག་ཚོགས་ཀུན་འདི་ལས་འབྱུང་གནས་སྡུད་གསུམ་མམ་མ་ཚང་བར་མེད་པར་གཞུང་འདི་ཡིས་སྟོན་པས་སམ། རྒྱུད་ལུང་མན་ངག་གང་གི་ངོ་བོ་ཚང་ཞིང་འཁོར་འདས་ཀྱིས་བསྡུས་པའི་བོན་སྒོ་དུ་མར་འདི་ལས་འབྱུང་བའམ་ཐེག་སྒོ་སྣ་ཚོགས་གཞུང་འདིས་སྟོན་པས་ནའོ། ཞེས་པའི་དོན་ལྟ་བུར་ཡིན་པར་སྙམ།
ཡང་སྒ་སྟོན་གྱི་མཛོད་ལས། གཞུང་འདི་ཡི་ཚིག་གི་ཚོགས་ཡིན་ཏེ། མཚན་མཛོད་ཕུག་ལ་བརྟེན་ནས་བླང་དོར་བྱས་པ་ཡིན་པས་སོ། ཞེས་པའི་དོན་ནི། ལུང་མཚན་ཉིད་སྲིད་པའི་མཛོད་ཕུགས་ཀྱི་ཚིག་ཚོགས་འདི་ཉིད་མཚན་གྱི་གདགས་གཞིར་བཟུང་བ་སྟེ། མཚན་མཛོད་ཕུགས་ལ་བརྟེན་ནས་རང་གི་བསྟན་བྱ་བཅུ་བདུན་གནས་ཀྱི་ངོ་བོ་དང་གོ་རིམ་གྱི་རྣམ་གྲངས་སྤྲོ་སྡུད་ཀྱི་ལྡང་ཚད་སོགས་ཇི་བཞིན་སྦྱར་བའམ་བླངས་དོར་བྱས་པའི་ཕྱིར། ཞེས་པ་ལྟར་གསུངས་པའི་དོན་ཡིན་པར་སྙམ་ཡང་དོན་གཉེར་གང་གིས་དཔྱོད་པར་མཛོད་ཅིག །
