།བོན་སྐྱོང་དམ་ཅན་སྲུང་མའི་ནུས་མཐུ་དང་།

།རང་རིག་རྣམ་པར་དག་པའི་བདེན་ཚིག་གིས།

།སྨོན་པ་ཅི་བཞིན་མྱུར་དུ་འགྲུབ་འགྱུར་ཅིག

།ལོ་ཀའི་ཁམས་འདིར་མི་བདེ་འཐབ་རྩོད་འཁྲུགས།

།ནད་མཚོན་མུ་གེའི་བསྐལ་ངན་མི་བཟོད་ཀྱི།

།གདོན་ཟླས་སྣ་འདྲེན་འབྱུང་པོ་མ་རུང་སྡེ།

།ལྟ་ལོག་མཐའ་མིས་དཔུང་བསྐུལ་སྐྱེ་འགྲོ་མནར།

།འདི་དག་བསམ་པ་ཙམ་གྱིས་ཡིད་སུན་སྐྱོ།

།རྒྱལ་བ་གང་ལས་ལྷག་པའི་ཐུགས་རྗེ་ཅན།

།སྙིགས་དུས་འགྲོ་བ་སྐྱོབས་པའི་བཀའ་དྲིན་དཔལ།

།འཆི་མེད་ཡབ་སྲས་གསུམ་སོགས་བསླུ་མེད་ཚོགས།

།མ་གཡེལ་ཐུགས་རྗེའི་སྟོབས་རྩལ་མྱུར་ཕྱུང་ལ།

།འདི་འདྲའི་བསྐལ་ངན་མིང་མེད་ཞི་བར་མཛོད།

།འབྱུང་པོའི་སྟོབས་གཞོམ་མཐའ་དམག་དུས་འཁྲུགས་ཟློག

།བསྐལ་ངན་འདི་རྣམས་མིང་མེད་ཞི་བ་དང་།

།ཐམས་ཅད་བདེ་སྐྱིད་རྫོགས་ལྡན་བསྐལ་པར་བསྐྱེད།

།ཚེ་རིང་ནད་མེད་དཔལ་འབྱོར་རྟག་གནས་ཤོག

།སངས་རྒྱས་བསྟན་སྲིད་སྤྱི་དང་ཁྱད་པར་དུ།

།གྲུབ་མཐའི་རྒྱལ་པོ་གཡུང་དྲུང་བོན་བསྟན་གང་།

།མངའ་རིས་སྟོད་སྨད་ཕྱོགས་ཀུན་དར་ཞིང་རྒྱས།

།ཐུགས་མཐུན་དགེ་འདུན་རྒྱ་མཚོ་ཡོངས་འགེངས་ཤོག

།ཚུལ་ཁྲིམས་རྣམ་པར་དག་པའི་གཞི་བཟུང་ཞིང་།

།ཕྱིན་བཅུའི་ལམ་ཞུགས་དགེ་བཅུའི་མཛོད་ལ་དབང་།

།ལམ་གསུམ་རིམ་ཟིན་ཐེག་མཆོག་ནོར་བུ་ལོན།

།ཚེ་འདིར་སངས་རྒྱས་གོ་འཕང་མངོན་ཐོབ་ཤོག

།དེ་མཐུན་དུས་ཀྱི་རྒུད་པ་ཡོངས་ཞི་ཞིང་།

།བསྟན་འཛིན་སྐྱེས་བུའི་སྐུ་ཚེ་མངའ་ཐང་རྒྱས།

།བསྟན་པའི་སྦྱིན་བདག་མི་ཕྱུགས་སྲིད་པ་བསྐྱེད།

།བསྟན་དང་དགེ་ལེགས་ཡོངས་སུ་རྟག་རོལ་ཤོག

།མདོར་ན་མི་མཐུན་བྲལ་ཞིང་བསམ་པའི་དོན།

།མ་ལུས་མཐུན་རྐྱེན་འབྱོར་དྲུག་བསམ་དགུ་འཕེལ།

།དཔལ་ལྡན་བླ་མའི་ཐུགས་རྗེའི་རྗེས་བཟུང་ནས།

།ཐམས་ཅད་ཕྱམ་གཅིག་སངས་རྒྱས་ཐོབ་པར་ཤོག །

ཅེས་པ་འདི་ནི་སྤ་སྟོན་ཉི་མ་འབུམ་གསལ་ལ་དུས་རྐྱེན་འབྱུང་བཞིན་འདི་ལ་ཕན་པའི་སྨོན་ལམ་ཀུན་གྱིས་རྒྱུན་ཁྱེར་ཆོག་པ་ཉུང་བསྡུས་ཤིག་བསྩལ་དགོས་ཞུས་པས་ལན་འདི་གསུངས་སོ།