མཆོད་ཚིག་རྟགས་བརྒྱད་རི་མོ།།
དུས་གསུམ་རྒྱལ་བའི་དགོངས་སྤྱོད་ཟབ་མོའི་རྩལ།།
མ་ལུས་བཅུད་འཕོས་ཐུགས་ཉིད་བུམ་བཟང་ཆེ།།
ཕྱི་ནང་གསང་བའི་དབང་གཏེར་མཛོད་འཛིན་པ།།
ཞྭ་དཀར་བསྟན་པའི་གཙུག་རྒྱན་སྨན་རི་བ།།
བཅུ་ཕྲག་གནས་དང་མདོ་སྔགས་བླ་མེད་བོན།།
ཟབ་མཐའ་མངོན་དཀའ་མུ་མེད་རྒྱ་མཚའི་འཇིང་།།
རབ་གསལ་བློ་གྲོས་གསེར་ཉའི་གཤོག་རྩལ་ཅན།།
མཁྱེན་པའི་སྟོབས་རྫོགས་རྗེ་གཅིག་སྨན་རི་བ།།
གསར་རྙིང་དུས་འགྱུར་བུ་ཡུག་འཚུབ་པའི་ཁྲོད།།
ཡིད་འོང་རྣམ་བཀྲའི་མཚར་སྡུག་མ་གུད་པ།།
སོ་ཐར་བསྙེན་རྫོགས་རབ་དཀར་པད་མ་ཆེ།།
བསྟན་པའི་རྒྱན་དུ་བཞད་པའི་སྨན་རི་བ།།
ཕྱོགས་མེད་སྐལ་ལྡན་གསེར་ཞལ་མངོན་ཐོབ་གང་།།
བསླབ་སྡོམ་ཟབ་མོའི་མན་ངག་དུང་ཆེན་དབྱངས།།
ཐོས་འཛིན་བཅུད་དུ་འབུད་པའི་མཛད་བཞེས་བ།།
ཚུལ་ཁྲིམས་མངའ་བདག་དྲང་སྲོང་སྨན་རི་བ།།
བདེ་ལེགས་དཔལ་ཤར་ཕྱི་ནང་གསང་གསུམ་བོན།།
མ་འགག་རྣམ་བཀྲ་རིན་ཆེན་ཟ་འོག་གདུགས།།
སྐྱེ་རྒུའི་གཙུག་རྒྱན་འབུབས་པའི་ཕྲིན་ལས་ཅན།།
ཟླ་མེད་བཀའ་དྲིན་ཅན་གཅིག་སྨན་རི་བ།།
ཡང་ཟབ་བོན་སྒོ་བརྒྱད་ཁྲི་བཞི་སྟོང་ལས།།
ལུང་རྟོགས་བསྟན་པ་གསེར་གྱི་འཁོར་ལོ་ཆེ།།
སྲིད་མཐའི་བར་དུ་དབང་སྒྱུར་ཐེག་སྟོབས་ཅན།།
བསྟན་འགྲོའི་དཔལ་གཅིག་རྒྱལ་བ་སྨན་རི་བ།།
རབ་རྨོངས་ཕྱོགས་འཛིན་མུན་ནག་འཁོར་ཡུག་ཁྲོད།།
གྱེར་བསྟན་ཡར་ངོའི་ཟླ་གཞོན་གཟི་འོད་འབུམ།།
མི་ནུབ་རྒྱལ་མཚན་མཁའ་དབྱིངས་མངོན་བྱེད་པོ།།
བསྟན་པའི་སྲོག་ཤིང་འགྲན་བྲལ་སྨན་རི་བ།།
ཉེར་གནས་བུ་སློབ་རིག་པའི་རྩལ་འདབ་གྲོལ།།
ཉམས་དགའི་འདུ་གནས་ངོ་མཚར་དཔལ་བེའུ་བཀྲ།།
ལོངས་སྤྱོད་མི་དམན་ཀླུ་རྒྱལ་བང་མཛོད་ཅན།།
འདོད་འབྱུང་གཏེར་དབང་རྒྱལ་བ་སྨན་རི་བ།།
