ཚངས་ཆེན་ངག་གི་རོལ་མོ་དེང་འདིར་ཁྲོལ།

 

ཤེལ་དཀར་བཞིན་ལ་གཟི་ཡི་སྤྱན་འབྲས་གཡོ།།

བྱེ་རུའི་མཆུ་ལ་མུ་ཏིག་ཚེམས་ཕྲེང་བཞད།།

གདུང་བའི་བུ་ལ་བརྩེ་བའི་དྲོད་སྦྱིན་མ།།

ཚངས་ཆེན་ངག་གི་རོལ་མོ་དེང་འདིར་ཁྲོལ།།

རྨད་བྱུང་ཕན་བདེ་སྣང་བ་དཀར་པོའི་ཆ།།

ཚེ་གཅིག་ཡུན་ལ་མ་ལུས་དབང་འབྱོར་ཞིང་།།

རྣམ་དག་བསླབ་གསུམ་བསྟན་པའི་མཛོད་འཛིན་པ།།

ཡང་དག་བཤེས་ཀྱི་བཀའ་དྲིན་རྗེས་སུ་དྲན།།

ཐོས་ན་དགའ་བའི་འཛུམ་དང་དགོད་པའི་ཉམས།།

མྱོང་ན་དགའ་བདེའི་རོ་ཡི་མཆོག་སྦྱིན་པ།།

གངས་དཀར་ལྗོངས་སུ་སྙན་ངག་རིག་པའི་གཞུང་།།

ཐོག་མ་སྒྲོག་འདི་གཙང་གཤེན་མཁས་པའི་དྲིན།།

གང་དེར་ཕང་འགྲོའི་རྒྱུད་མང་གདེང་ཀ་ལས།།

སྙན་དུ་ཕབས་པའི་སྙན་ཚིག་རིག་བྱེད་གཞུང་།།

གཅིག་ཏུ་གྲགས་པའི་ཤེལ་དཀར་མེ་ལོང་མ།།

གཙུག་ལག་རྒྱ་མཚོའི་ཀློང་ན་མངོན་པར་འཛུམ།།

ཚུལ་དེའི་རྟོགས་དཀའ་ཚིག་དང་གཞལ་དཀའི་དོན།།

ཡོངས་སུ་བཀྲ་བ་གཙང་གཤེན་དགོངས་པའི་རྒྱན།།

སྙན་ངག་གཞུང་གི་བསྟན་བཅོས་རྒྱུ་སྐར་ཁྲོད།།

སྔོན་མེད་གཟི་བྱིན་འབར་བའི་ཟླ་གཞོན་ཉིད།།

འཇིག་རྟེན་ཞིང་འདི་འཇིག་པའི་རང་བཞིན་ཏེ།།

རྟག་ཙམ་མ་ཡིན་མི་རྟག་སྒྱུ་མའི་གྲོང་།།

མི་ཚེ་མདུན་མ་མི་ལུས་ལ་བརྟེན་ནས།།

གཏན་བདེའི་ཞིང་དུ་གཏན་ནས་འགྲོ་བར་འདོད།།

འོན་ཏེ་འདི་སྣང་ཞིང་གི་འདི་དག་ཀུན།།

སྤང་སྒྱུར་གྲོལ་བའི་ལམ་ནས་སྤང་ནུས་མིན།།

དེ་ཕྱིར་ལྔ་རིག་གཙུག་ལག་རྒྱ་མཚོའི་གཞུང་།།

བདེ་བླག་འཇུག་སླད་སྡེབ་ལེགས་ཚིག་ལ་འབད།།

ལུས་བསྐྱེད་བཀའ་དྲིན་སྟོང་གསུམ་ནོར་ལས་ལྷག།

སློབ་དཔོན་གསུང་འཕྲིན་དམར་ཆུང་སེམས་ལས་ཚ།།

གང་གི་དལ་རྟེན་རིན་ཆེན་མི་ལུས་བསྐྲུན།།

ཁྱེད་ཀྱིས་འཕྲལ་ཡུན་བདེ་དགེ་ཆར་དུ་སྙིལ།།

བློ་ལྡན་སློབ་མའི་བློ་རིག་གློག་ལས་མྱུར།།

བརྩེ་ལྡན་མཁས་པའི་བརྩེ་བ་མཚོ་ལྟར་ཟབ།།

ཚུལ་ལྡན་དམ་པའི་སློབ་གསོའི་མཐུ་བྱས་ཏེ།།

ཤེས་ལྡན་གཞོན་ནུས་ས་སྟེང་གང་བར་རྩོམ།།

གང་གི་རྣམ་དཔྱོད་རྩལ་ལ་རབ་བརྟེན་ཏེ།།

མང་ཐོས་བརྩོན་པའི་ལྷུར་བ་དང་བླངས་ཤིང་།།

ཁྱེད་ཞབས་རྡུལ་གྱིས་ཟིན་པའི་སློབ་འབངས་ཡོངས།།

སྡེབ་ལེགས་ཚིག་གི་སྦྱོར་བ་ཞུམ་པ་མེད།།

སྲིད་ན་དཀོན་པའི་རིན་ཆེན་ནོར་གྱི་མཆོག།

གཅིག་ཏུ་བསྡུས་ཏེ་ཡངས་པའི་རྒྱལ་ཁམས་ཀུན།།

བཀངས་ནས་ཕུལ་ཡང་བཤེས་གཉེན་བཀའ་དྲིན་ལ།།

བསྒྲུན་དུ་མེད་པ་མཁས་པའི་ལུང་གིས་ཟིན།།

དེས་ན་ཡོངས་འཛིན་དམ་པའི་བཀའ་སློབ་དག།

ཇི་སྲིད་འཚོ་བའི་བར་དུ་མི་བརྗེད་པ།།

དྲན་དང་ཤེས་བཞིན་གཉིས་པོས་སོ་བྱས་ནས།།

སླར་ཡང་གཙུག་ལག་རྒྱ་མཚོའི་འཇིངས་ཚད་གཞལ།།

འདི་ལྟར་བསྐལ་བཟང་ཞིང་གི་སྐལ་ལྡན་ཚོགས།།

ཐོས་བརྩོན་ལེགས་པའི་ལམ་དེར་ཡོངས་བརྩོན་ཏེ།།

རྣམ་མང་ཤེས་རིག་གླིང་གི་ཤེས་རབ་ཀུན།།

ངོམས་མེད་རྒྱུད་ལ་སྦྱོར་བ་གཞན་ལ་ངོམ།།

སླད་མར་ཁྱེད་ཐུགས་སྨོན་པ་ཡིད་བཞིན་ཀུན།།

འགྲུབ་ཅིང་གངས་དཀར་རི་བོའི་ལྗོངས་ཆེན་དུ།།

ངག་ཀུན་དའི་དགའ་ཚལ་འབུམ་དགྲོལ་ཞིང་།།

ཞི་བདེ་སྣང་གསལ་འོད་ཀྱིས་ཁྱབ་གྱུར་ཅིག།

དགེན་རྫ་ཚེ་དབང་བསྟན་འཛིན་གྱིས་སྙན་གཞུང་གཙང་གཤེན་དགོངས་རྒྱན་འཆད་ཁྲིད་ལེགས་འགྲུབ་ཀྱི་ཉིན་མོར་དཀའ་དྲིན་རྗེས་སུ་དམིགས་ཏེ་སྦྱར། 2006 10 3