དགེ་སློང་དམར་པོ།

 

 

        དགེ་སློང་བསྟན་འཛིན་དབང་གྲགས་ཀྱི་རྣམ་ཐར་རོལ་པ།

 

 

ཏི་སེ་གངས་རྒན་བླ་རུ་མཐོ་ས་ནས།།

མ་པང་མཚོ་གཉན་ཟབ་ཏུ་འཁྱིལ་ས་ན།།

རི་བོ་ནག་པོ་ཟོར་དུ་བརྒྱུས་པ་ལ།།

གཤེན་རབ་བོན་པོས་སྨྲང་ཚིག་ངག་ཏུ་གྱེར།།

 

གཡས་ན་སྟག་རི་ངར་གྱིས་ཁྲོ་བགས་དང་།།

གཡོན་ན་མུ་ལེ་མཚོ་ཡིས་མཛེས་ཉམས་འཁྱུད།།

དུག་རི་མདུན་དུ་བསྐྱེང་བའི་ཟོལ་འགྱུར་དེས།།

བདུད་འདུལ་བོན་པོས་སྒྲ་བླ་མཁར་དུ་དྲངས།།

 

རྒྱུང་ཡ་གནམ་ལ་གཤེགས་པའི་མཁར་ཤུལ་དང་།།

བླ་ཆེན་རྒྱ་ལ་ཕེབས་པའི་དར་ལམ་ན།།

མ་བཞེངས་རྡོ་སྐུ་ས་ནས་འབུས་པ་དེས།།

གཤེན་བཙུན་བོན་པོས་ལས་མཐའ་འགྲུབ་པའི་རྟགས།།

 

ཁྱུང་ལུང་དངུལ་མཁར་དུད་དུ་སྦས་ཤུལ་ན།།

ཞང་ཞུང་མངའ་ཐང་རླུང་གིས་ཁྱེར་ཤུལ་ན།།

གུར་གྱམ་དགོན་པའི་གཡེར་དྲིལ་གསེང་གསེང་ཁྲོད།།

འཇིགས་མེད་ནམ་མཁའི་རྨི་ལམ་མཐའ་ནས་གསལ།།

 

ཤག་ཤག་རླུང་བུས་རྒྱང་འབོད་བྱེད་དང་གཅིག།

བྱེ་མཁར་ལྷུན་པོས་མུ་འཚམས་སྦྲེལ་དང་གཉིས།།

པུ་ཧྲེང་རྐྱང་རྒོད་གང་སར་འཕྱན་དང་གསུམ།།

ང་ཡི་ཞང་ཞུང་མིག་གིས་བལྟད་མོར་སྣང་།།

 

སྲིད་པ་ཡུལ་ལ་གྱར་བའི་དུས་ཚོད་ན།།

མ་སྲིད་སྔས་འགོར་འཇོག་པའི་ས་ཚིགས་དེར།།

ཡེ་སྲིད་ཐ་ཚིག་བགོ་བའི་རིགས་ཅན་གྲོགས།།

སོག་རུ་དགེ་སློང་མཛད་འཕྲིན་འོད་ཀྱིས་བྱུགས།།

 

དམར་པོའི་འོད་ཀྱིས་གངས་རི་བཞུ་བ་དང།།

དམར་པོའི་དཔུང་གིས་བོད་ཡུལ་འགམས་པ་ལ།།

སྐུ་ལུས་དམར་པོས་གཏུམ་པའི་དགེ་སློང་དེས།།

སེམས་ཀྱི་དམར་པོ་ཏང་དང་ཏང་ཏང་ཏང་།།

 

དེ་ནི་སེམས་ཀྱི་བསམ་པ་མིན་ན་འགྲིག།

 དེ་ནི་རིགས་ཀྱི་གྲོགས་ལ་གསང་ན་འགྲིག།

ངས་ནི་དགོས་པ་གནད་ཀྱི་ཚིག་ཏུ་མཐོང་།།

ངས་ནི་རིགས་པ་ལམ་གྱི་བརྡ་རུ་མཐོང་།།

 

གནམ་བོན་དགའ་བའི་དུངས་པ་གླེང་གི་མེད།།

མ་འཐད་ཚིག་གིས་གཤེ་བའི་ཆོ་འཁྲུལ་མེད།།

རིགས་ཀྱི་བླ་རྐང་འཚོང་བའི་ནུས་པང་མེད།།

མེད་པ་གསུམ་འདི་ཤེས་ན་དགོས་པ་ཡོད།།

 

ཆུ་བཞི་ལྷུང་ལྷུང་རྒྱུ་བའི་གཞིས་ཁ་ནས།།

སྒང་དྲུག་གྲལ་ལ་བསྟར་བའི་ལུང་གཤོག་ཏུ།།

མདོ་ཁམས་མི་ཡི་སྲས་པོས་བྲིས་པ་ཡིན།།

ཡ་བྲང་ཁྱིམ་དྲོད་ལྡེ་བའི་གཡུ་འབྲུག་པས།།

 

 

2011.10.10.ཉིན།