ཆེ་བརྗོད་ངག་གི་རོལ་དབྱངས།

རྣམ་དག་ཚུལ་ཁྲིམས་གསེར་གྱི་གཞི།  །

རྣམ་དཀར་བསྟན་པའི་བ་དན་དཀར།  །

རྣམ་ཀུན་འཛིན་ལ་ངལ་མེད་པ།  །

རྣམ་གསུམ་དབང་གི་རྒྱལ་པོ་འདུད།  །

སྐུ་མཆོག་མཐོང་བ་དོན་ལྡན་དེ།  །

འགྲོ་བ་ལྷ་དང་རྐང་གཉིས་མིའི།  །

མིག་གི་དགའ་སྟོན་བྱིན་པ་ན།  །

སྲེད་མེད་བུ་ཡང་གདུང་བས་མནར།  །

གསུང་དབྱང་ཁུ་བྱུག་གྲེ་འགྱུར་གྱིས།  །

སྐལ་ལྡན་ཚོགས་ལ་རྟོགས་དཀའི་གནད།  །

ཡོངས་སུ་གདམས་པས་མཚོ་བྱུང་མའི།  །

རྒྱུད་མང་ཕང་བར་ཡིབས་པ་འདྲ།  །

བརྩེ་ཆེན་ཆུ་འཛིན་གདེངས་ཀ་ནས།  །

དོན་བཟང་བཀའ་སློབ་གྲུ་ཆར་འབུམ།  །

བློ་གསལ་རྣ་བའི་བཅུད་དུ་འཇོ།  །

མཚུངས་མེད་ཞབས་སློབ་གྲངས་འཛིན་དཀའ།  །

ལེགས་ཚོགས་ཡོན་ཏན་ཇི་སྙེད་པ།  །

ཁྱེད་ཐུགས་གཅིག་ཏུ་ལེགས་གཏམས་པས།  །

མཐའ་ཀླས་གདུལ་བྱའི་བློ་ཡིད་མུན།  །

སེལ་ལ་ངལ་བ་ཡོད་མ་ལགས།  །

མཛད་པའི་འཕྲིན་ལས་འོད་སྣང་དཀར།  །

ཕྱོགས་སུ་ཁྱབ་པའི་འདུ་བྱེད་ལས།  །

བསྐྲུན་པའི་གསར་བཞེང་སྒྲུབ་སྡེ་ནི།  །

མཁའ་ཡི་སྐར་ཚོགས་དག་ལ་འགྲན།  །

ལྔ་སྙིགས་བསྟན་པའི་ཞིང་ས་ལ།  །

ལུང་རྟོགས་འབྲུ་དགུའི་ས་བོན་བཏབས།  །

ཁྲིམས་ལྡན་བཙུན་པ་སྙེ་མའི་དོག  །

ཡང་དག་བགྲང་བར་རྒྱལ་ཀུན་ངལ།  །

ཨེ་མ་ནོར་འཛིན་བུ་མོ་ཡིས།  །

ཅི་མི་སྙམ་པའི་ངང་ཚུལ་གྱིས།  །

རིགས་བརྒྱའི་ཁྱབ་བདག་ཞབས་འཁོར་ལྷན།  །

འདེག་ལ་ངོམས་པ་མེད་འདི་མཚར།  །

ཀྱེ་མ་ཆེར་སྙིགས་ལྔ་བདོའི་དུས།  །

ལེགས་མིན་སྲིན་བྱའི་ཐན་སྐད་སྒྲོག  །

བསྟན་པ་འཛིན་རྣམ་གྲོང་དུ་ཉུལ།  །

སྲིད་དཀོན་ནོར་བུ་རླག་ལ་ཉེ།  །

དེ་བས་ཁྱེད་སྐུ་ཟག་པ་མེད།  །

བསྐལ་བརྒྱའི་བར་དུ་ཡུན་བསྲིངས་ཏེ།  །

འུ་ཅག་དད་ལྡན་སྨིན་གྲོལ་གྱི།  །

ལམ་ལ་འགོད་པའི་སྐྱབས་འཇུག་ཞུ།  །

མ་ཟད་ཁྱེད་སྐུ་ཉིན་བྱེད་དབང་།  །

ར་རིའི་དྲི་མས་མ་སླད་པ།  །

གདུལ་བྱའི་ཚོགས་གཉིས་མཁའ་ཀློང་ན།  །

ནུབ་མེད་རྟག་འཆར་གསོལ་བ་འདེབས།  །

 

དཔལ་ལྡན་བླ་མའི་ཆེ་བ་བརྗོད་པ་ངག་གི་རོལ་དབྱང་ཞེས་པ་འདི་ནི་སྐུ་ཉིད་དགུང་གྲངས༨༠ལོན་པའི་དགའ་སྟོན་དུ་ལེགས་པའི་ཤེས་ཡོན་གང་ལའང་མྱོང་གོམས་དབེན་པའི་ངག་དབང་རྣམ་རྒྱལ་གྱིས༢༠༠༦。༩。༡༦ཉིན་མདོ་སྨད་བྱང་རྒྱུད་ཁྲི་རལ་མངོན་དགའ་གླིང་ནས་མོས་པས་དྲངས་ཏེ་སྦྱར།