དབྱར་རྩྭ་དགུན་འབུའི་དགེ་སྐྱོན།
༡.དགེ།
དགོས་འབྱུང་ནོར་བུ་དབྱར་རྩྭ་དགུན་འབུ་སྟེ།།
ལྷ་ཡི་གཞལ་ཡས་ཁང་བཟང་ཁྱེད་ཀྱིས་བསྐྲུན།།
སངས་རྒྱས་སྟོང་གི་སྐུ་ཡང་ཁྱོད་ལས་བཞེངས།།
འདུས་སྡེའི་གསོལ་སྟོན་ལེའུ་ཁྱོད་ཀྱིས་ཕུལ།།
དགོས་འབྱུང་ནོར་བུ་དབྱར་རྩྭ་དགུན་འབུ་སྟེ།།
གླེག་བམ་སྟོང་གི་དཔེ་མཛོད་ཁྱོད་ལས་འཁྲུངས།།
བཤེས་གཉེན་རིག་པའི་གར་སྟེགས་ཁྱོད་ལ་བརྟེན།།
བུ་ཕྲུག་སློབ་གསོའི་མཐུན་རྐྱེན་ཁྱོད་ཀྱིས་སྦྱིན།།
དགོས་འབྱུང་ནོར་བུ་དབྱར་རྩྭ་དགུན་འབུ་སྟེ།།
ཡུལ་སྡེའི་མཛའ་མཐུན་འབྲེལ་བ་ལ་བརྒྱུད།།
མཉམ་འཛོམ་དགའ་བའི་དུས་སྟོན་ཁྱོད་ཀྱིས་བསུ།།
ཕན་ཚུན་ལྷག་བསམ་ཁ་བཏག་ཁྱོད་ཀྱིས་སྒྲོན།།
དགོས་འབྱུང་ནོར་བུ་དབྱར་རྩྭ་དགུན་འབུ་སྟེ།།
ན་མཉམ་གཞོན་ནུའི་བརྩེ་སེམས་ཁྱོད་ཀྱིས་མཐུད།།
ལྷན་འཛོམ་ཉིན་མཚན་ཁོར་ཡུག་ཁྱོད་ཀྱིས་སྦྲེལ།།
མ་འོངས་བདེ་སྐྱིད་འཚོ་གནས་ཁྱོད་ཀྱིས་སྦྱིན།།
༢.སྐྱོན།
དབྱར་རྩྭ་དགུན་འབུའི་དགོན་སྡེའི་འདུ་འཚོགས་ན།།
བླ་མའི་འཆད་ངག་ཁྱོད་ཀྱི་ཚོང་ར་སྟེ།།
འདུས་སྡེའི་གླེང་སློང་དེ་བཞིན་སྒོར་མོའི་ཆེད།།
ཁྱོད་ཀྱིས་ཁྲི་གཙུག་བསྟན་ལ་རྩེད་མོ་གཙེས།།
དབྱར་རྩྭ་དགུན་འབུའི་སློབ་རའི་གླིང་ཆེན་དུ།།
དགེ་རྒན་སློབ་ཁྲིད་སྦི་རག་འཐུང་གྲངས་ཤིག།
སློབ་མའི་སྦྱོང་བརྩོན་གླུ་གར་གླིང་ཆེནཏེ།།
ཁྱོད་ཀྱིས་ཤེས་རིག་དམིགས་བུ་བརྐུས་ཏེ་ཐལ།།
དབྱར་རྩྭ་དགུན་འབུའི་ཁྱིམ་མཚེས་གྲོང་པའི་ཁྲོད།།
ཀ་པས་སྟག་དང་འདྲ་བའི་རི་མོ་ངོམ།།
ཁ་པས་གཟིག་དང་མཚུངས་པའི་ང་རོ་སྒྲོག།
ཁྱོད་ཀྱིས་ཡུལ་སྡེའི་མཐུན་སྒྲིལ་རྒྱང་ལ་སྤུར།།
དབྱར་རྩྭ་དགུན་འབུའི་གཞོན་ནུའི་མཐུན་འཇུག་ན།།
ཁྱོ་གའི་བློ་ཁ་ནམ་མཁའི་སྐར་ཚོགས་བཞིན།།
ཆུང་མའི་འགྲོ་བྱེད་ཚོང་གི་དེད་དཔོན་དངོས།།
ཁྱོད་ཀྱི་འགྱུར་མེད་བརྩེ་སེམས་ཁྱེར་ཏེ་བུད།།
༢༠༡༢.༦.༣ཉིན་ཆབ་མདོར་བྲིས།
