ཨ་ཁུ་འབྲོག་པའི་ཕ་ཡུལ།

དབྱར་ཟླ་འགོ་མོའི་དྲོད་ངེད་མ་བོས་མགྲོན་དུ་སླེབ།།

མཐའ་ཡས་རྩྭ་ཐང་གངས་འཁྱགས་རུམ་ནས་ཕྱིར་ལ་ཐོན།།

རི་མཐའི་ཀླུང་ཤོད་མཁའ་ལ་སྨུག་སྤྲིན་ལོང་ལོང་འཕྱུར།།

མཐོ་པོའི་རི་བོས་ཁ་བའི་ཞྭ་དཀར་ད་དུང་མ་ཕུད་ཟིག།

སྤྱི་ཟླ་བདུན་པའི་དབྱར་གྱི་དཔལ་ཡོན་བཞད་དང་ལྷན།།

ངམ་ནག་སྒེར་གཅོད་དགུན་གྱི་གྲང་རེག་མཐར་བསྐྲད་དེ།།

གཞན་ཕན་བྱང་སེམས་དབྱར་གྱི་ལྷ་མོ་གནམ་ནས་བབས།།

འགྲོ་ཀུན་ལུས་སེམས་ཡུད་ཅིག་བདེ་བའི་མལ་དུ་རོལ།།

གཡས་རི་སྤང་དང་བྲག་དཀར་འདྲེས་པའི་འགྱིང་སྐེད་ནས།།

ཀུ་ཧུའི་དབྱངས་སྙན་རྣ་བའི་གསོས་སུ་ཚུར་ཚུར་བཅར།།

གཡོན་ངོས་སྤང་རི་དྲི་ཞིམ་བ་ལུའི་ཚལ་གསེབ་ཏུ།།

སྐད་དང་སྤུ་རིས་ལེགས་པའི་འདབ་ཆགས་སྣ་ཚོགས་རྒྱུ།།

ལྷ་གཡག་ཁྱུ་ཞིག་་ངུར་ལྷབ་འུར་རྒྱང་ལྡིར་བཞིན་དུ།།

མཐོ་པོའི་རི་ལ་བརྒལ་ནས་རྫ་ཆུའི་འགྲམ་ན་འདུས།།

ཕར་ཀའི་ནེའུ་གསེང་ན་དམར་ཐང་ཆེན་བདལ་བ་ལ།།

ལྷ་རྟ་སྐོར་ཞིག་རང་བཞིན་བང་རྩལ་ཅི་ཡང་ངོམ།།

གསེར་ཞག་འཁྱིལ་བའི་སྤང་གཞོང་དཀྱིལ་འཁོར་དབུས།།

སྦྲ་གུར་སྨུག་པོའི་ཐོག་ནས་གཡུ་དུད་དགུང་ལ་སྤུར།།

འཛམ་ལྷའི་ནོར་གཡང་ཆགས་པའི་ལྷས་ར་ཆེན་མོ་དེར།།

གཡང་ཆེན་འབྲི་མོ་བརྒྱ་ཡི་རྡང་གྲལ་འཁྱིལ་ལེར་བསྐོར།།

ཡ་ཐབ་ཡར་གྱི་སྦྲ་ནག་ཆེན་མོའི་ཡར་སྦུགས་ན།།

ཡབ་མེས་ཡུམ་ཚོས་སྔ་རབས་གཏམ་གྱིས་སློབ་གསོ་སྐྱོང་།།

བུ་ཚོ་རྟ་ལ་ཞོན་ནས་རྩྭ་ཐང་ཕྱོགས་ཀུན་བཤར།།

ན་ཆུང་བུ་མོས་སྣ་ཚོགས་དཀར་རིགས་བཟའ་བཏུང་སྦྱོར།།

དེ་ཡིས་ག་ལ་ཚད་དེ་བློ་གསལ་གཞོན་བྱིས་དག།

ཞིང་ཆེན་ལྗོངས་དང་ས་ཁུལ་རྫོང་གྲོང་ཤོག་ཁག་ཏུ།།

ཆེ་འབྲིང་ཆུང་གི་མ་ཡུམ་སློབ་གླིང་འགྲིམ་དུ་ཐལ།།

སོང་ཉིན་སློབ་གསོའི་ལམ་བུ་བཤང་བའི་འཕྲིན་བཟང་འགི།།

༢༠༡༢ལོའི་ཟླ་༥་ཚེས་༢༩ཉིན་ཆབ་མདོར།།