ལོ་རྒྱུས་ཀྱིས་ང་ཚོར་སྤྲད་པའི་གཏམ།
གངས་དཀར་རི་ནས་འཁྲུངས་པ་མེས་པོའི་ཤེས་གཏེར།།
གོ་ལའི་ཁྱོན་དུ་བདལ་བའི་ཉིན་མ་དང་པོ།།
རྗེས་དྲན་གླེང་སློང་མཛད་སྒོའི་རྟེན་འབྲེལ་ངོ་མ།།
འཛམ་གླིང་རིག་པས་སྐོར་བ་མི་བུའི་ཁྱུ་ཚོ།།
མ་ཕམ་གཡུ་མཚོའི་འགྲམ་ན་ལྷན་དུ་འཛོམ་ཤོག།
སྐལ་བཟང་དགེ་བ་ཉི་མ་དཀར་མོའི་དཀྱིལ་དུ།།
རྒྱལ་བ་སྟོན་པའི་མཛད་རྣམ་ལེགས་བཤད་གླིང་དུ།།
ཁྲ་ཆུང་མིག་གི་འཇུག་པ་ཐད་ཀར་སྦྲེལ་ན།།
འགྲོ་ཀུན་འཚེ་མེད་ཞི་བདེའི་གླིང་དུ་སྐྱེལ་བའི།།
ངེས་ཤེས་གསར་པའི་བདེན་ཁ་ཁོང་ན་བཞད་ཡོང་།།
མི་ལོ་ཁྲི་སྟོང་གོང་ན་བོད་ཀྱི་མི་བུའི།།
བློ་གྲོས་རྣོན་པོས་ཤེས་རིག་སྒོ་མོ་བརྟོལ་ནས།།
ཐབས་མཁས་སྨྲ་བས་རང་སྟོབས་གཞན་ལ་སྤེལ་ཏེ།།
འབད་པ་སྟོང་གིས་གཞན་གྱི་ལེགས་པའི་ཆ་ཤས།།
ཕྱོགས་བསྡུས་གནད་ཀྱི་དམིགས་བུ་ཡི་གེར་བཏབས་བཞག།
དཔལ་འབྱོར་ཤེས་རིག་གོ་ལ་ཅན་དུ་གྱུར་ཅིང་།།
ཚན་རྩལ་བསྟན་པ་དགུང་ལ་སྙེགས་པའི་སྐབས་སུ།།
གཟུར་གནས་དཔྱོད་ལྡན་གཞོན་ནུ་འབུམ་ཕྲག་གཅིག་གིས།།
བོད་ཀྱི་ཆོས་རིག་ལོ་རྒྱུས་བདེན་ཁ་འཚོལ་བའི།།
སྨྲ་བའི་སྤོབས་པ་གངས་རིའི་རྩེ་ནས་མཆེད་སོང་།།
འདས་པའི་ལོ་ཟླ་ཕྱིར་ལོག་ཡོང་ཐབས་མེད་པས།།
གསར་དར་རིག་པ་བདུད་ཀྱི་འཕྲུལ་དུ་མ་ཟེར།།
སྲོལ་རྒྱུན་མཁོ་མེད་ལྷ་སྒྲུང་གཏམ་གླེང་མ་བརྩི།།
རང་གི་བློ་ནི་མི་བུའི་བློ་རང་ཡིན་པས།།
ཧོར་རྒྱུག་མི་དགོས་བླང་དོར་དཔྱད་ན་ཆོག་གི།།
བོད་པའི་ཆག་སྒོ་དང་པོ་བན་བོན་འཁྲུགས་སོང་།།
དེ་བཞིན་ས་སྐྱ་ཕག་གྲུ་འབྲི་གུང་གཙོས་པའི།།
ཆོས་རྒྱུད་སྲིད་དང་བསྲེས་པའི་འུར་སློང་ཞིག་གིས།།
མཁས་པ་བརྒྱ་ཡི་རིག་པའི་ཁ་ཕྱོགས་འཕྱུག་སྟེ།།
བླུན་པོ་སྟོང་གི་ལས་ལམ་ཐུར་དུ་གྱུ་སོང་།།
དགོས་པ་བརྒྱ་ཡི་རྩོམ་རིག་བང་མཛོད་དབུས་ན།།
མི་དགོས་བོན་ཆོས་ནང་པ་ཡིན་མིན་རྩོད་པ།།
སྲོང་བཙན་གོང་དུ་བོད་ཡིག་ཡོད་མེད་ཧམ་བཤད།།
ཉིན་རེ་ལིང་རེ་སྤར་ཡང་བདེན་ཁ་མི་རྙེད།།
ཤེས་རིག་གོང་འཕེལ་ཐོངས་དང་རང་བཞིན་གསལ་ཡོང་།།
གནའ་ཤུལ་བང་སོ་བསྔོགས་པའི་དཔང་རྟགས་ཁོ་ནས།།
འདས་ལོ་རིང་པོའི་ལོ་རྒྱུས་སྙན་དུ་བཏང་བའི།།
བསྐྱར་གླེང་སྟོང་གིས་བྲང་ཁོག་ཉི་མར་བསྲོས་ཏེ།།
དོན་མེད་གཡེང་ཐལ་མ་ཆེ་ཕ་བཟང་བུ་ཕོ།།
དུས་དང་འཚམས་པའི་བློ་ཁ་བསྒྱུར་ན་ལེགས་སོ།།
ཅི་བྱེད་རོགས་ལ་བལྟ་བའི་གཏམ་དཔེ་ཇི་བཞིན།།
ཡིད་གཟབས་ཤིག་གིས་མདུན་གྱི་ལམ་ལ་ཆས་དགོས།།
མི་རིགས་ཤིག་གི་ཤེས་རིག་གསབ་དོར་བྱས་ཏེ།།
མི་རིགས་རང་གཤིས་ལྡན་པའི་ཀུན་སྤྱོད་དག་མ།།
བརྟག་དཔྱད་བྱས་པའི་གསེར་བཞིན་དག་འདོན་གྱིས་ཤིག།
༢༠༡༢ལོའི་ཟླ་༥ཚེས་༢༥ཉིན་ཆབ་མདོར་བྲིས།།
