གྲོགས་ལོ་རྒྱང་ལ་སྤུར་རྗེས།

དབྱར་ཚེས་འགོ་མོ་ཞིག་ལ།།  ལུས་སེམས་གཅིག་ཏུ་འདྲེས་པའི།།

མཛེས་ལྡན་ཡིད་འཕྲོག་ལྷ་མོ།།  སྟོན་གྱི་མཇུག་མ་ཡོལ་དུས།།

ཁྲེལ་མེད་ལས་དབང་བཙན་པོས།།  ཐག་རིང་རྒྱང་ལ་སྤུར་ཐལ།།

རང་སེམས་འཐད་པའི་བུ་མོ།།  ཚེ་གཅིག་འགྲོག་རྒྱུའི་རེ་བ།།

གཞན་དབང་བཙན་པོས་ཁྱེར་ཏེ།།  མིང་མེད་ཡལ་བའི་ཤུལ་ནས།།

ཟླ་བའི་ལྷ་མོ་ཞིག་ལ།།  ཞག་གསུམ་འགྲུས་འདོད་མ་བྱུང་།།

  འཛུམ་ཞལ་ཟླ་བའི་ལང་ཚོས།།  བརྩེ་འདང་ཡིད་སེམས་བརྐུས་ནས།།

ཨ་ཇོ་ཨ་ཇོ་ཟེར་བཞིན།།  ནུབ་རིའི་ཕྲག་ལ་ཡལ་ཚེ།།

ལྷ་དབང་སྲས་མོའི་བཞིན་ལ།།  ཡུད་ཅིག་བལྟ་འདོད་མ་བྱུང་།།

ཁྱོད་ཀྱིས་བཤད་པའི་སྙིང་གཏམ།།  མི་ལོ་ལྔ་ཡི་རྗེས་སུ།།

བརྗེད་མེད་སེམས་ལ་འཁྲིལ་ནས།།  ལྷང་ལྷང་ཡིད་ལ་འཁོར་བས།།

ཚངས་སྲས་བུ་མོའི་གསུང་ལ།།  སྙན་རྒྱུ་ཟེར་བ་མ་བྱུང་།།

ལྷད་མེད་བརྩེ་བའི་མདུད་རྒྱས།།  ལྷན་འཛོམ་དུས་བཟང་དེ་ལ།།

ཞིམ་མངར་འཚོ་བའི་དགྱེས་སྟོན།།  ལོངས་སྤྱོད་ནམ་དུས་ཡལ་བས།།

རྒྱལ་ཟས་ལེའུ་བཅོ་བརྒྱད།།  བྲོ་བ་མྱོང་འདོད་མ་བྱུང་།།

༢༠༡༢ལོའི་ཟླ་༥ཚེས་༢༦ཉིན་ཆབ་མདོར།