དྲན་རྟོག་ཀློང་གི་བསམ་གཞིག
༡ བསྐྱར་ཏེ་བསམ་ན།
བསམ་གཞིག་ནན་མོ་ཞིག་གི་སྒུལ་ཤུགས་ལས།
གཅེར་བཞིན་པའི་ཁྲ་ཆུང་ཟུང་།
བདེན་དོན་གྱི་ཆེད་དུ་བཞེངས་པའི་མེས་རབས་དག
ཕེབས་ཤུལ་གྱི་རྐང་རྗེས་ལ་ཕྱིར་མིག་སློག་དུས།
རྣམ་རྟོག་དང་རྣམ་རྟོག་གིས་བསློང་བའི་དངོས་པོ་ཞིག
སྲབ་མདའ་མེད་པའི་རྟ་རྒོད་ཅིག་དང་འདྲ་བར།
ཐད་ཀར་བཤར་སོང་བའི་ཕྱི་ལམ་ན།
རྨིག་བཞིས་བཏོར་བའི་ཐལ་རྡུལ།
ད་དུང་ཡང་གནམ་སའི་བར་ན་འཐུལ།
༢ ཐད་ཀར་བལྟས་ན།
བརྗོད་འདས་ཀྱི་བསམ་གཞིག་སྐོར་ཕྱོགས་ཤིག་སྟེ།
གསར་རྙིང་རིག་པ་ཟུང་གི་བར་གསེང་ན་འཛུལ་དུས།
མེ་ཆུ་ཇི་བཞིན་ཐུག་རེག་མི་འཚམ་པའི།
གངས་ཅན་པའི་མི་བུ་ཆ་ཞིག
འཁོར་བ་དང་འཁོར་བའི་ཀློང་རུམ།
མྱོང་འདས་དང་མྱོང་འདས་ཀྱི་ཀློང་ན།
ཐུན་མིན་གྱི་མི་ཚེའི་ལྟ་སྟངས་སྣ་མང་གསེང་ན།
བདེ་བའི་ཆེད་དུ་བདེན་དོན་ལ་འགྲེལ་བཤད་བྱེད་བཞིན།
ཆེས་འཁྲུགས་པའི་བསམ་བློའི་གཡུལ་ས་རུ།
ལས་དབང་ཁོ་ན་ལ་ངན་ཁག་མི་དཀྲི་བར།
བདེན་སྐྱོང་གི་ལྷ་སྲས་ངོ་མའི་གམ་དུ་བསྐྱར་ཟིན་ཚེ།
མི་རིང་བའི་དུས་ཤིག་ཏུ།
ལྷན་འཛོམ་གཉིས་མཐུན་གྱི་ལུང་བསྟན་ངོ་མཚར་ཅན་ཞིག
དྲན་རྟོག་གི་ཀློང་ན་འགོད་ཀྱང་སྲིད།
༢༠༡༢.༥.༡ཉིན་ཆབ་མདོར་བྲིས།
