ཕ་ཡུལ་གྱི་བུ་མོ།

གཡུ་བྱུ་རུས་བརྒྱན་པའི་སྐྲ་ལོའི་ལན་བུའི་འོག་ནས་

མཛེས་སྡུག་གིས་ངོམ་པའི་བཞིན་གྱི་

མེ་ལོང་འཛུམ་མདངས་ཀྱིས་ཁེངས་བཞིན།

ནོར་ལུག་དང་ཕྱུགས་ཁྱུ་གང་བའི་ལྷས་རྭ་ནས་བསྟར་ཐག་དང་རྒྱུ་རགས་

ཐོགས་ཏེ་ཟིལ་ཆུང་འབྲི་མོའི་གཞོ་དབྱངས་འཐེན་པའི་དབྱངས་ཅན་མ།

ཕ་ཡུལ་གྱི་བུ་མོ།

མེ་ཏོག་གི་ལང་ཚོ་རྒྱས་པའི་རྩྭ་ཐང་ནས་ཟིམ་ཟིམ་གྱི་སྦྲང་ཆར་འཕོས་དུས།

སྒོ་ཕྱུགས་སྐྱོང་བའི་བྱམས་བརྩེའི་འོག་ནས་ཁུ་བྱུག་གི་དབྱངས་རྟར་འགྲན་པའི་རྫི་གླུ་ལེན་བཞིན།

ཕྱག་ཟུང་གིས་འུར་ཆར་འཇུས་ཏེ་ཕྱིང་ཞུའི་འོག་ནས་འཕྲ་ལྡེམ་གྱི་ལང་ཚོ་སྨིན་པའི་ན་ཆུང་མ།

ཕ་ཡུལ་གྱི་བུ་མོ།

ཕ་ཁུ་དང་མ་སྲུའི་ཡ་ཐོད་ཀྱི་རི་མོ་བཞེང་སའི་གཡང་ཁྱིམ་ནས་ངག་འཇམ་དང་

གཤིས་བཟང་རེ་རེས་དྲིན་ལན་གྱི་མཛད་པ་སྐྱོང་པའི་སྲིང་ཆུང་མ།

དོན་དུ་ཡར་ལུང་གཙང་པོའི་བཞུར་རྒྱུན་ལས་རིང་བའི་ངང་རྒྱུན་ཅན་ཞིག

ཕ་ཡུལ་གྱི་བུ་མོ།

ཕྱི་མར་བསམ་པའི་ཞེན་པ་དེས་མཆོག་གསུམ་ལྷ་ལ་རེ་ལྟོས་བཅོལ་བཞིན།

སྐྱབས་འགྲོའི་སྙན་དབྱངས་མགྲིན་པ་ནས་བསྒྲོན་ཏེ།

མ་ཏྲི་དང་།

གསོལ་འདེབས་ཀྱི་འཚོ་བར་དུས་ནམ་ཡང་བརྩོན་པའི་གངས་རིའི་སྲས་མོ།

༢༠༡༡ ༦ ༢༣ ཉིན་དམར་རི་ནས།