དུང་སེམས་ཀྱིས་ཕུལ་བའི་ལྷ་དར།

                      རང་དགོན་གྱི་ལོ་དེབ་གངས་ལྗོངས་ཤེས་རིག་འདོན་ཐེངས་གཉིས་པ་མཐོང་རྗེས།

མཁྱེན་རབས་ཡེ་ཤེས་འབུམ་གྱི་དཔལ་མངའ་ཞིང་།།

མ་ནོར་མདུན་གྱི་ལམ་དུ་སྟོན་མཛད་པའི།།

ཞང་བོད་མེས་པོ་གོང་མའི་གསུང་གི་རྒྱུན།།

བསླབ་བྱ་བདུད་རྩིའི་ཟེགས་མ་འདི་ན་མཆིས།།

མ་རིག་རྣམ་རྟོག་བློ་ཡི་དབང་བཙན་པས།།

མི་ཤེས་སྨག་གི་རུམ་དུ་ཉུལ་བ་ཀུན།།

ཝ་ལེར་དོན་གྱི་གནས་ལུགས་མཐོང་བའི་དཔལ།།

ནང་བསྟན་རྨོངས་སེལ་སྒྲོན་མེ་འདི་ན་གསལ།།

སྔོན་བྱོན་རྒྱལ་བ་སྲས་དང་བཅས་པ་ཡི།།

ཐུགས་ཀྱི་དཔལ་འཛིན་དཔྱོད་ལྡན་དག་གིས་ཀྱང་།།

གཏན་ཚིག་ཚད་མའི་ལམ་ནས་སྟོན་མཛད་པའི།།

ལོ་རྒྱུས་འདས་དོན་མེ་ལོང་འདི་ན་བདེན།།

ཟླུམ་གཟུགས་ས་ཆེན་གོ་ལའི་ཡོངས་རྩེ་རུ།།

ཚན་འཕྲུལ་གསལ་བའི་དཔལ་ཡོན་ཆེར་འཛུམ་ཀྱང་།།

འཁྲུལ་མེད་འདམ་གྱིས་མ་གོས་ཀུན་དྷའི་ཕྲེང་།།

ལྔ་ཟུང་རིག་པའི་བང་མཛོད་འདི་ན་ཟབ།།

མ་རིག་རྣམ་རྟོག་འབུམ་གྱི་དྲྭ་བ་ལས།།

རིས་མེད་དཔྱོད་ལྡན་སྟོང་གི་སེང་སྐད་ཀྱིས།།

འཁྲུལ་བྲལ་ཟབ་མོའི་གནས་ལུགས་ཆེས་གསལ་བའི།།

དཔྱད་གཏམ་མཁས་པའི་དགའ་སྟོན་འདི་ན་རྒྱས།།

མཚན་དཔེའི་རྒྱན་བཟང་མཛེས་པ་ངག་གི་ལྷ།།

དབྱངས་ཅན་ཚང་སྲས་བུ་མོའི་གསུང་གི་བཅུད།།

སྙན་འཇིབས་སྒྲ་དབྱངས་སྟོང་གི་འགྱུར་ཁུག་ཅན།།

སྙན་རྩོམ་ངག་རིག་སྐྱེད་ཚལ་འདི་ན་མཛེས།།

ཕྱི་རབ་གནའ་བོའི་མེས་པོའི་རྗེས་བཞག་པ།།

ལྔ་ཟུང་རླབས་ཕྲེང་འཛུམས་པའི་འོ་མཚོ་ལས།།

ཐུན་མིན་ལེགས་ཚོགས་དུ་མའི་གཟི་བྱིན་ཅན།།

དམངས་ཁྲོད་སྲོལ་རྒྱུན་རིག་གནས་འདི་ན་འཛུམ།།

དྲན་རྟོག་སེམས་འགྱུ་གསར་པའི་སྒྱུ་འཕྲུལ་གྱིས།།

དཔྱོད་པའི་གཤོག་རླབས་སྔོན་དུ་ལྡིང་ཟིན་ཀྱང་།།

དུང་ཞེན་ཡིད་ཀྱི་གུར་ནས་མི་འདོར་བར།།

གསལ་གནས་མི་བརྗེད་དྲན་རྟེན་འདི་ན་ཟབ།།

དེ་ལྟར་རིན་བྲལ་ནོར་གྱི་ཕུང་པོ་ཆེ།།

གངས་ལྗོངས་ཤེས་རིག་ལྔ་ཟུང་གཏེར་གྱི་མཛོད།།

དུས་ཀུན་བློ་གྲོས་གསར་པའི་སྡང་གྲོགས་སུ།།

ཁྱེད་སྐུ་སྐྱེས་རབས་རིམ་པར་བྱོན་པ་ཤིས།།

     ༢༠༡༡ ༨ ༧ ཉིན་ཀོ་རྒྱལ་དགོན་ནས་སྤྲོ་སྣང་དང་བཅས་ཏེ་བྲིས།