མཚམས་སྤྲིན་འོག་གི་སྐྱིད་གླུ།

   མདོག་དམར་སེར་མཛེས་པའི་ན་བཟའ་ཡི་འོག་ནས།།

གསུང་ཆོག་གའི་དབྱངས་རྟ་མགྲིན་ལམ་ནས་མཆེད་བཞིན།།

རྔ་སེལ་རོལ་སྙན་འགྱུར་པི་ཝཾ་དང་འགྲན་པའི།།

ནུབ་མཚམས་སྤྲིན་བཤམ་འདྲའི་འདུས་སྡེ་དེ་སྐྱིད་སོང་།།

གོང་བཤེས་གཉན་དུ་མའི་མཛའ་བརྩེ་ཡི་ཁྲོད་དུ།།

ནང་མཐུན་འབྲེལ་གསེར་ཐག་དམ་པོ་རུ་འཆིང་བའི།།

ལུང་གཏན་ཚིག་རིགས་པ་ཟུང་འབྲེལ་གྱི་ངང་ནས།།

དཔལ་འཆད་རྩོད་མོས་པའི་འདུས་སྡེ་དེ་སྐྱིད་སོང་།།

གངས་མུ་ཁྱུད་འཁོར་བའི་འཛམ་གླིང་གི་ཡོངས་རྩེའི།།

ཡུལ་སུམ་པ་གླང་གི་གྱིམ་ཤོད་ཀྱི་ཕྱོགས་སུ།།

མཚན་ཀུན་གྲགས་གླིང་ཞེས་སྙན་དབྱངས་དེ་མཆེད་པའི།།

དགོན་བཤད་སྒྲུབ་གཉིས་འཛོམས་འདུས་སྡེ་དེ་སྐྱིད་སོང་།།

                                    བཟང་དགེ་བཅུ་འཛོམས་པའི་སྨན་ལྗོངས་སུ་འཚོ་བཞིན།།

                                    ལུས་དལ་བརྒྱད་འབྱོར་བཅུའི་རྒྱན་ཆ་དེ་འཛིན་པའི།

                                    བུ་གངས་ཕྲུག་ང་ཡིའི་ལྡེམ་སྨྱུག་གི་རྩེ་ནས།།

                                      དགོན་འདི་རུ་སྐྱིད་པའི་གླུ་ཆུང་ཞིག་བྲིས་ཡོད།། 

            ༢༠༡༡ ལོར་ཕ་ཡུལ་དམར་རི་ནས།