དགེ་མཚན་ལྡན་པའི་སྦྲ་ཆེན།

ཁ་བའི་མེ་ཏོག་འཛུམ་ཕྲེང་ངོམ་པའི་ཁྲོད།།

འཛམ་གླིང་ཁྱོན་ཀུན་མཛེས་པ་རབ་བྱེད་པའི།།

གངས་ལྗོངས་ནོར་འཛིན་དབྱིག་གི་ལྟེ་བ་རུ།།

རྨད་བྱུང་ངོ་མཚར་འབུམ་གྱི་རྣ་ཆ་སྒེག  །

སུམ་རྩེན་འཛིན་མར་བབས་འདྲའི་ཡུལ་ལྗོངས་འདི།།

འགྲན་མེད་ཉམས་ཀྱིས་ཕྱུག་པ་སྦྲ་ཆེན་ཞེས།།

ཕྱོགས་བཞིའི་སྒྲ་འཛིན་རྣ་བའི་དགའ་སྟོན་དུ།།

སྙན་པ་གླིང་བུའི་རོལ་དབྱངས་སྲིད་བཞིར་སྤྲོས།།

མཐོ་གསུམ་གངས་ཀྱི་ལངས་ཚོའི་དཔལ་ངོམ་ཞིང་།།

བར་དུ་ནགས་ཀླུང་སྟུག་པོའི་རྒྱན་ཆ་རྫོགས།།

སྨད་ཕྱོགས་བདུད་རྩི་ལྷ་ཆབ་དར་གྱིས་འཇོ།།

ཡུལ་འདི་དག་ཞིང་ཞེས་པའི་སྙན་པ་ཡོད།།

དཀར་གསུམ་མར་ཕྱུར་འོ་མཚོའི་རླབས་རིས་དོད།།

གཡང་ལྡན་རྟ་ནོར་ལུག་གི་རྩེད་འཇོ་རོལ།།

ཕུན་ཚོགས་བདེ་སྐྱིད་འཛུམ་པའི་ཁམས་ལྗོངས་འདིར།།

སྦྲ་ཆེན་འབྲོག་པའི་ཉམས་བཟང་སྨོས་པར་མཐུན།།

བདེར་གཤེགས་རྒྱལ་སྲས་འཕགས་པའི་མཛད་བཟང་སྟེ། །

འཆད་རྩོད་རྩོམ་པའི་འོད་ཀྱི་མདངས་ཆགས་ཞིང་། །

དཔག་མེད་སྐུ་གསུང་ཐུགས་བསྟན་གྲངས་འདས་པའི། །

བོན་དགོན་ཆེ་བརྒྱད་འགྲོ་བའི་དཔལ་དུ་མཛེས། །

རྒྱ་གར་འཕགས་པའི་ཡུལ་གྱི་བྱང་ཕྱོགས་སུ། །

རྟག་གཟིགས་ཤམ་བྷ་ལ་སོགས་ཉེ་བའི་ཆར། །

མདོ་སྟོད་ཁམས་ལྗོངས་རྔུལ་རྫ་སྒང་སྟོད་ཅེས། །

ཕྱོགས་བཞིའི་དཔལ་ཡོན་གཅིག་ཟླུམ་སྦྲ་ཆེན་ཡུལ། །

མཚམས་སྤྲིན་འོད་སྣང་འབར་བའི་གླིང་ཁ་ནས། །

གདུལ་བྱ་རྐང་གཉིས་མི་ཡི་ཚུལ་མཛེས་པ། །

དུ༔ཁའི་ཉོན་མོངས་བཅོམ་པའི་ཉིན་བྱེད་གང་། །

སྦྲ་ཆེན་ཡུལ་གྱི་བསོད་ནམས་ཞིང་དུ་འཁྲུངས། །

ཟིམ་ཟིམ་སྦྲང་ཆར་འཇོ་བ་དཔྱིད་ཀྱི་དུས། །

མཛེས་མཛེས་མེ་ཏོག་འབུམ་བཞད་དབྱར་ཟླ་གསུམ། །

ཟབ་ཟབ་ལོ་ལེགས་སྨིན་པ་སྟོན་ཀའི་ཉམས། །

ཁ་བའི་མདངས་ཀྱིས་བསྐྲུན་པ་དགུན་གྱི་གཤིས། །

གཡུང་དྲུང་མིང་པས་སེམས་ཀྱི་རི་གྲོང་ནས།།

སྨྱུག་འགྲོས་གར་མཁན་ལྷ་མོའི་གོམ་སྟབས་ཀྱིས།།

དཀར་གསར་མདངས་ཀྱིས་ཟོས་པའི་ཤོག་སྟེང་དུ།།

སྤྲ་ཆེན་བསྔག་པའི་སྙན་ཚིག་འདི་གྲུབ་པོ།།

                                           ༢༠༠༩ ༡༡ ༢༣་ཉིན་དམར་རི་ནས་བྲིས།