ཕ་ཡུལ།
འཇིག་རྟེན་གྱི་མི་ཡུལ་ན་བདག་གི་ཆེས་ཐོག་མའི་རྐང་རྗེས་འཇོག་ས། ཕ་ཡུལ།
ལྟེ་ཁྲག་གི་རི་མོ་གནས་འདིར་བྲིས་པ་ནས་ངའི་སེམས་ཀྱི་འཕར་ལྡིང་རེ་རེའི་
ཁྲོད་ན་ཞེན་ཆགས་ཀྱི་དུངས་བ་ཟབ་པའི་དྭངས་གཙང་གི་གནས་གཞིས།
ཕ་ཡུལ།
བརྟན་ཞིང་བརྗིད་པའི་གངས་རི།
མཚར་སྡུག་གི་ངོ་མཚར་འབར་བའི་རྩྭ་ཐང་།
དྭངས་གཙང་གི་བཞུར་རྒྱུན་མ་ཆད་པའི་ཆུ་བོ།
མདོར་ན་སྣོད་བཅུད་ཀྱི་བཀོད་པ་སྣ་ཚོགས་གཅིག་ཏུ་
བསྡུས་པའི་གནས་གཞིས་ཆེན་མོ།
དཔའ་མཛངས་ལྡན་པའི་མི་རིགས་ཏེ།
འཛོམས་དྲུག་གི་ཕོ་རྩལ་རྫོགས་པའི་ཕ་ཁུ་དང་།
ངང་རྒྱུན་ཆུ་བོའི་རྒྱུན་ལས་རིང་བའི་མ་སྲུ་སྨན་ཆུང་ཚོ་ལས་དབང་གི་
ཁྱིམ་གཞིས་ཤིག་ནས་མཛད་བཟང་གི་འཕར་ལྡིང་མངོན་པའི།
ལུང་པ་དང་རི་བོ།
ཆུ་ཕྲན་དང་ལྷས་ར།
མདོར་ན་ཅི་འདྲའི་མཛེས་སྡུག་གིས་རྒྱན་པའི་ཡུལ་གྲུ་ཞིག།
དེ་ནི་དོན་ངོ་མ་བདག་གི་ཕ་ཡུལ་ཏེ་གསེར་ལུང་ཕྱུག་མོ།
ང་ཚོ་འགྲོ།
ལ་རྒྱ་དང་སྙིང་སྟོབས་གཙང་མ་ཞིག་གམ།
སློབ་ལ་བརྩོན་པའི་ལྷད་མེད་ཀྱི་འདུན་པ་དེ་སེམས་
ཁོང་ན་རུམ་བཞིན་ང་ཚོ་འགྲོ།
ནོར་ནག་འཁོར་བའི་ལྷས་ར་དང།
འབྲོག་ཁྱིམ་ཀྱི་གྲུ་ཟུར་ནས་ཕ་ཡུལ་བསྐྱུར་བའི་སྟ་གོན་དེ་དག་
མགྲོན་བརྡ་འམ་བསུ་བ་བྱེད་བཞིན་ང་ཚོ་འགྲོ།
དབྱངས་གསལ་སོ་བཞི་འམ།
འཕྲུལ་ཡིག་བཞི་བཅུ་ཡི་དབྱངས་འགྲོས་སྙན་པའི་གྲུ་ཁ་སྟེ་
བཤེས་གཉེན་དུ་མའི་བྱམས་བརྩེ་དང།
སློབ་བུ་སྟོང་གི་མཛའ་མཐུན་གྱི་འོད་སྣང་འབར་བའི་
ཤེས་རིག་གི་གླིང་ཁ་དེ་ན་འགྲོ།
ལྔ་ཟུང་རིག་པའི་ཉིང་བཅུད་ལ་རེ་བའི་སེམས་ཀྱི་དུངས་བ་རེ་རེ་ལས་
དབང་གི་གཏམ་རྒྱུད་འཚོལ་བཞིན།
ཤེས་རིག་གི་བག་མ་མཛའ་བཤེས་སྒྲིག་པའི་གོ་རིམ་བར་ནས་
མདུན་ལམ་གྱི་འོད་སྣང་ལ་འབོད་པ་གཏོང་བཞིན་འུ་ཚོ་འགྲོ།
འགྲོ་ཡ་མདུན་སྤྱོད་ཀྱི་གོམ་སྟབས་རེ་རེས་སྤོབས་སེམས་མ་ཞུམ་པར་འུ་ཚོ་འགྲོ།
- ཟིན་ཐོ་གོང་མ།དུས་ཀྱི་རང་གཤིས།
- ཟིན་ཐོ་འོག་མ།ཧོར་གྱི་ཚོ་པ་སུམ་ཅུ་སོ་དགུའི་སྐོར་གྱི་གཏམ་བཤད་བགྲེས་པོའི་ངག་རྟ།