ན་ཟླ་ཚོ། 

སྐྱོང་བའི་གྲོགས་ལ་དམར་པོའི་བློ་སྣ་གཏད། །

རྒོལ་བའི་ཁྱུ་ལ་དཔའ་བའི་ལག་རྡང་གཤིབ། །

ཞི་བདེའི་ལམ་བུ་སྐད་དང་ཡིག་གེས་འཚོལ། །

དྲང་བདེན་ལས་ལ་བརྩོན་དང་ན་ཟླ་ཚོ། །

ལོ་རྒྱུས་རྣལ་མའི་ཕུགས་རྩ་མ་མཐོང་ཞིང་། །

བདེན་དོན་ལུང་གི་གཏན་ཚིག་མ་རྙེད་གོང་། །

ཨུ་ཚུག་ཁེར་ཐག་བཅད་པའི་བླུན་གཏམ་གྱིས། །

གྲུབ་མཐའི་རྣམ་བཞག་རྩོད་འདོད་ཤ་རེ་ཚ། །

མཚུངས་མེད་སློབ་དཔོན་མཆོག་གི་གདམས་དོན་དེ། །

དམར་པོའི་སྲོག་ལ་ཐུག་ཀྱང་མི་འདོར་ཞིང་། །

ལུས་སེམས་དབུགས་ཀྱི་རྒྱུ་བ་མ་ཆད་པར། །

ལྔ་རིག་གཞུང་དང་འགྲོག་པའི་དམ་བཅའ་ཡོད། །

ཞི་བདེའི་རྩ་བ་བྱམས་དང་སྙིང་རྗེ་དང་། །     

ལས་དང་རྒྱུ་འབྲས་ཕྱི་མའི་ལམ་བཟང་དངོས། །

ཐར་པའི་སྲོག་རྩ་སྲུང་སེམས་རྣམ་དག་ལ། །

ལྟ་བ་ལོག་པའི་རྟོག་སད་ཐན་དུ་མཐོང་། །

ཕྱི་མཛེས་ཚུལ་འཆོས་གཟབས་པའི་སེར་རྫུན་ལ། །

འདོད་སྲེད་དབང་གིས་ཐལ་མོ་མི་ཟླུམ་ཞིང་། །

རྒྱུ་མཚན་མ་མཐོང་གཞན་གྱི་ལད་མོ་ཡིས། །

རྨོངས་དད་ཞིག་གིས་མགོ་བོ་སྒུར་དགོས་མེད། །

ཡང་དག་དགེ་སྦྱོར་ལ་རྒྱས་འགྲུབ་པ་དཀའ། །

ལ་རྒྱའི་སེམས་ནི་རང་ཕྱོགས་ཁོ་ན་ཏེ། །

རིས་མེད་བྱམས་ལྡན་སེམས་དཔའི་སྤྱོད་པ་ཡི། །

བཏང་སྙོམས་ཚད་མེད་དོན་དང་འགལ་བར་འགྱུར། །

ཆོས་གྲལ་འགྲིམས་ཏེ་བཙུན་པའི་གོ་ས་འཛིན། །

ཁྱིམ་ལས་རྩོལ་ཞིང་འཇིག་རྟེན་དོན་དུ་གཉེར། །

བྱ་སྤྱོད་ར་མ་ལུག་གི་བླ་སྤྲུལ་འགའ། །

ཡོན་བདག་ཕུང་ལ་སྦྱོར་བའི་ཆོམ་རྐུན་དངོས། །

ཆོས་པ་འདོད་ན་ཁྱིམ་པའི་བྱ་བ་སྐྱུར། །

ཁྱིམ་པ་འདོད་ན་བཙུན་པའི་གོ་ས་དོར། །

ཆོས་དང་འཇིག་རྟེན་སྤྱོད་པ་ཤིན་དུ་འགལ། །

འདྲེས་པར་ལེན་འདོད་དོན་གཉིས་བརླག་པའི་རྒྱུ། །

ཕྱོགས་དང་རིས་ཀྱི་ཚིག་མཚོན་མི་ཕྱར་ཞིང་། །

མགོ་དང་རྣ་བ་དོན་དུ་མི་གཉེར་བའི། །

བསླབ་གསུམ་ནོར་གྱིས་སྤུད་པའི་བཤེས་གཉེན་ལ། །

དམར་ཆུང་སྙིང་གི་གཏིང་ནས་ནམ་ཡང་གུས། །

དགའ་བའི་ཕྱོགས་ལ་དགོད་པའི་འཛུམ་མདངས་དང་། །

གཟན་པའི་ཕྱོགས་ལ་ངན་པའི་རྣམ་འགྱུར་དེ། །

དོན་དུ་གཉེར་ཞིང་ཆེད་དུ་མ་བསྟན་ཡང་། །

 བཅོས་མིན་རྣམ་རྟོག་བློ་ཡི་རང་གཤིས་ཤིག །

འབྲིང་རྒྱུད་པས།།