རིས་མེད་པ།
ཨེ་མ་ཡ་མཚན་རྨད་བྱུང་བ།།
འཛམ་གླིང་ཏོག་ལ་ཏོག་ཅིག་ནི།།
མིག་ཟུང་མདུན་ལ་ཤར་བའི་གཏམ།།
དྲང་བརྗོད་ལམ་ནས་གསལ་བར་སྤྲོ།།
བོད་གཞུང་ཚུལ་བཞིན་ཀློག་པ་དག།
མགོ་བོ་གདུགས་ལྟར་འཁོར་བའི་དུས།།
ཚིག་མཛོད་གཞན་དག་ཏིང་འཛིན་བཞུགས།།
སྟོང་ཆའི་རེའུ་མིག་ད་བར་ལུས།།
འཛམ་གླིང་མཁས་དགུའི་སེམས་ཁོང་ནང་།།
རྟག་ཏུ་དྲན་པའི་རིན་ཆེན་ནོར།།
ཞང་བོད་ཕ་མེས་ཤེས་རིག་ལ།།
རྒྱན་དུ་གྱུར་པའི་ཚིག་མཛོད་གྲུབ།།
ད་ནི་བོད་གཞུང་འཇུག་པ་དག།
གྲངས་དང་མིང་གཞི་དཀའ་སླའི་རིགས།།
ཚིག་མཛོད་ཆེན་པོའི་ཀློང་རིམ་ལ།།
སྐྱིད་པོར་ཉར་བའི་སྐལ་བཟང་ཤར།།
རིགས་གཅིག་ཀློག་མཁན་ན་གཞོན་དག།
པོད་གསུམ་ཚིག་མཛོད་ཆེན་པོ་འདི།།
བཅུ་དྲུག་ལང་ཚོ་རྫོགས་པ་ན།།
ཤེས་རིག་གྲོགས་སུ་འགུག་ལ་བྲེལ།།
སྒོར་མོ་ཉུང་བའི་སེལ་སྣ་ལྷོད།།
ཕྱག་ལག་རིང་བའི་གཏོང་ཕོད་གྱིས།།
རྒྱལ་ཁམས་གསེར་གྱིས་མི་དོ་བ།།
རིན་ཆེན་ནོར་དེ་བླུས་ལ་ཤོག།
འདི་འདྲའི་ནོར་གྱི་མཆོག་གྱུར་ཞིག།
འཛམ་གླིང་དབུས་ནས་སྐུ་འཁྲུངས་པ།།
ཡབ་ཆེན་བཅུ་ལ་ཕྱག་ཅིག་འཚལ།།
བཀའ་དྲིན་དེ་ལ་ལན་དགུ་དྲན།།
འདི་འདྲའི་བུ་རེ་ཡོད་པ་ལ།།
བོད་མི་སྤྱི་བོ་གནམ་བསྟན་ཀུན།།
དགའ་དང་སྐྱིད་པའི་གླུ་ཞིག་ལེན།།
བཀའ་དྲིན་སྐུ་དྲིན་ཞུས་ལ་ཐོན།།
ལྷག་ཏུ་གཙོ་སྒྲིག་མཚན་ཅན་ལ།།
བཀྲ་ཤིས་བདེ་ལེགས་བསྐོར་དགུ་ཞུ།།
བཀའ་དྲིན་གཏང་རག་ཡང་ནས་མཆོད།།
ཞབས་པད་རྟག་བརྟན་བཀྲ་ཤིས་གསོལ།།
༢༠༢༡-༥-༣༡དགོང་མོར་སྤོས་ངད་ལྡན་པའི་གྲོང་ཁྱེར་ནས་རིས་མེད་པ་ཞེས་པའི་ཉམ་ཆུང་པ་དེས་ཇ་ཞོར་དུ་ཕུལ་བའོ།།