བློ་འདྲི་ཞུས་ལན་གྱི་ཉམས་མགུར'

                             རྣལ་འབྱོར་པ་ཀུན་བཟང་བསྟན་འཛིན།

ཨ༔ འཁོར་འདས་གཉིས་འཁྲུལ་བྲལ་འོད་གསལ་སྦུབས།།

མཚོན་མེད་ཀྱི་རང་འབྱུང་ལྷན་ནེ་བ།།

སྐྱེ་འགག་མེད་རང་གཤིས་ཧ་རེ་སྐྱོང་།།

རྩལ་སྣ་ཚོགས་དྲན་རིག་ཤར་གྲོལ་ཀློང་།།

ཕ་རིག་འཛིན་ཚེ་དབང་ཡབ་ཡུམ་དེ།།

བུ་བདག་གི་མདུན་དུ་ལམ་མེར་བྱོན།།

གནད་རླུང་སེམས་སྒོམ་པའི་ཌ་སིལ་འཁྲོལ།།

གསུང་གདུང་དབྱངས་བརྒྱུད་ནས་འདི་སྐད་གསུང་།།

ངའི་ཐུགས་ཀྱི་བརྩེ་བའི་རྣལ་འབྱོར་བུ།།

སེམས་དྲན་བློ་མ་མང་རང་ངོར་ལྟོས།།

ཉམས་གཏད་མེད་སྐྱོང་དང་བློ་རེ་བདེ།།

ལུས་སྤྱོད་ལམ་མ་བཅོས་ཤུགས་འབྱུང་སྐྱོངས།།

རོ་སྙོམ་དུ་འདུག་ན་ཡིད་རེ་དགའ།།

ངག་མཚར་གཏམ་མ་སྨྲ་གང་དྲན་སྐྱོང་།།

ཚིག་བཟང་ངན་འཛིན་མཐའ་བྲལ་ན་དགའ།།

ད་ལྟོས་དང་རང་གི་སེམས་ལ་ལྟོས།།

སེམས་རྒྱུ་ཅན་མ་གྲུབ་ངོ་བོ་སྟོང་།།

དངོས་མཚན་མ་མི་འདུག་རང་བཞིན་གསལ།།

དོན་སྟོང་ལ་གསལ་བའི་རང་མདངས་མཇལ།།

འཁོར་འདས་གཉིས་འདི་ཡི་རང་རྩལ་ཤར།།

དངོས་སྣང་ཀུན་སྟོང་གཟུགས་རང་སྣང་སྟེ།།

སྐྱིད་སྡུག་ཀུན་གཉུག་མའི་རྩལ་ཤར་ཡིན།།

གཉིས་འཛིན་གྱི་འཁྲུལ་ཆ་ཞིག་པ་ན།།

ད་གདན་ཐོག་འདི་རུ་མངོན་སངས་རྒྱས།།

སེམས་དངོས་མེད་སྟོང་ཆེན་ནམ་མཁའ་འདྲ།།

གཅིག་རྒྱུ་དང་གཅིག་འགག་གཞའ་སྤྲིན་བཞིན།།

ཁོ་ངོ་ལ་བལྟ་བའི་གཏད་སོ་བྲལ།།

དོན་མཐའ་བྲལ་ངོ་བོ་ཉི་བཞིན་གསལ།།

རང་རིག་པའི་གནས་ལུགས་འདི་ཉིད་ཡིན།།

འདི་རང་གིས་རང་ལ་བལྟས་པའི་དུས།།

གསལ་ཧ་རེ་ཁོང་ནས་རང་གསལ་འདི།།

ཕྱི་ཡུལ་ལ་བལྟ་དུས་རང་མདངས་མཇལ།།

ནང་རྣམ་རྟོག་དྲན་དུས་རང་ངོ་མཐོང་།།

འདི་སྤྱི་གཞི་རིག་པའི་གནས་ལུགས་ཡིན།།

ད་རྣལ་འབྱོར་ཉམས་མྱོང་སྐྱོང་ལུགས་ཞུ།།

ཚེ་འདི་སྣང་ཆེད་དུ་རྩོལ་བ་སྤོངས།།

ཕྱི་ཡུལ་སྣང་གང་ཤར་ཆགས་སྡང་བྲལ།།

ནང་རྣམ་རྟོག་གང་སྐྱེས་སྐྱེ་མཁན་ལྟོས།།

སྟོང་ཁྲོལ་ལེར་གྲོལ་བའི་རང་གཤིས་འདི།།

ཆེད་འཛིན་པ་མེད་པར་རང་ངོ་སྐྱོངས།།

ཡུལ་སྣ་ཚོགས་མཐོང་སྣང་རང་སྣང་སྟེ།།

འཇའ་ཁ་དོག་ལེགས་ཀྱང་དངོས་མེད་བཞིན།།

ནང་རྣམ་རྟོག་གང་སྐྱེ་སྟོང་པའི་ཤུགས།།

དྲན་མཁན་པོ་ཁོ་རང་རང་ངོ་སྟོང་།།

བར་རྟག་ཆད་གཟུང་འཛིན་མཐའ་བརྒྱད་བྲལ།།

མཐའ་འཛིན་པ་གང་བྱུང་ཁོ་ལ་ལྟོས།།

ཆེད་འདི་ཡིན་མེད་པར་ཤིག་གེར་གྲོལ།།

འདི་རྣལ་འབྱོར་ཉམས་མྱོང་སྐྱོང་ལུགས་གྱིས།།

རྗེ་ཚེ་དབང་ཞལ་ནས་དེ་སྐད་གསུངས།།

བུ་སྤྲང་ཕྲུག་རང་སྣང་དགུང་ལས་མཐོ།།

སེམས་དྭངས་སྙིགས་ཕྱེད་ནས་རིག་སྟོང་སྐྱོང་།།

ཚེ་འདི་ཡི་ཕུགས་སེམས་རྒྱབ་ཏུ་འབོར།།

དགེ་རྟེན་བཞེངས་བསོད་ཚོགས་ཆེད་གཉེར་མེད།།

བསྟན་ཕ་མཁར་དགོན་གནས་ཕ་ཞིང་ཡུལ།།

བྱ་མཁའ་འཕུར་ཚང་བཞིན་བྲལ་དགོས་བསམ།།

གྲོས་འདེབས་པའི་བླ་དཔོན་མཐུན་པའི་གྲོགས།།

བློ་གཏད་ན་ཚེ་འདིའི་གོ་སར་ལྷུང་།།

ད་ངོ་སོ་བློ་གཏད་བྲལ་དགོས་བསམ།།

གཟུགས་ཕུང་ཁམས་སྨིན་མཛད་དྲིན་ཆེན་མ།།

ལུས་གཅེས་འཛིན་གཏད་སོ་རང་གི་ཁྱིམ།།

བུ་ཆུང་མ་གཉེན་འཁོར་གྲོས་འདེབས་ཅན།།

སེམས་མཐུན་པའི་བསམ་ཕུགས་མི་ཉར་བསམ།།

རྒྱུ་ལོངས་སྤྱོད་ཕྱུགས་པའི་བསྟན་སྦྱིན་དང་།།

བློ་རང་ལ་གཏད་པའི་གྲོགས་པོའི་ཚོགས།།

གྲོགས་མཐུན་ཐབས་བྱས་ན་འདི་སྣང་གོལ།།

བློ་མི་མཐུན་རྒྱང་རིང་བགྲོད་དགོས་བསམ།།

དེའི་མཉམ་དུ་སྐྱེ་བའི་མཆེད་དང་གྲོགས།།

སེམས་དགེ་སྐུལ་ཀུན་སློང་དག་པ་ཡིས།།

གྲོགས་གཅིག་མཐུན་དགེ་བཅུ་སྒྲུབ་དགོས་བསམ།།

ད་བསམ་བསམ་འཁོ་བའི་རང་གྱུས་བསམ།།

གང་དྲན་ཚད་ཆགས་སྡང་བདེ་སྡུག་བློ།།

ད་བསམ་དྲན་བྲལ་བའི་རིག་སྟོང་མཇལ།།

གང་དྲན་ཀྱང་ཁྲོལ་ལེ་ཤིག་གེ་ངང་།།

བུ་སྤྲང་ཕྲུག་གཏད་སོ་བྲལ་ན་བསམ།།

ཕྱི་ཡུལ་སྣང་སྒྱུ་མ་རྨི་ལམ་ཉམས།།

ནང་དྲན་རྟོག་དངོས་མེད་རང་འབྱུང་གཤིས།།

སྤྲང་སྐྱིད་སྡུག་གང་བྱུང་དེ་ཀར་གློད།།

ཉམས་ཐེག་ཆེན་ལྟ་བའི་རྒྱན་དུ་འཆར།།

ཕྱི་གཏད་མེད་ཡུལ་ལ་འཛིན་མེད་འཆར།།

དོན་མཐའ་བཞི་རྒྱ་གྲོལ་གསལ་སྟོང་གཤིས།།

དུས་རྟག་ཏུ་ཉམས་ལེན་བདེ་མོར་སྐྱོངས།།

ཕ་རིག་བརྒྱའི་བརྡ་དངོས་ལུང་བསྟན་དང་།།

མ་མཁའ་འགྲོའི་རྟེན་འབྲེལ་འགྲོ་དོན་གནད།།

བུ་གསོན་ཡུལ་འདིར་འདུག་དོན་ཆེན་ཀུན།།

དོན་དེ་བཞིན་འགྲུབ་པའི་བྱིན་རླབས་སྩོལ།།

སྐྱབས་འཆི་མེད་རིག་འཛིན་ཡབ་སྲས་གསུམ།།

སྤྲང་བདག་གི་སྤྱི་བོའི་ལྷ་སྐལ་ཏེ།།

ནམ་དུས་དྲུག་བླ་མའི་རྣལ་འབྱོར་སྐྱོང་།།

ཐུགས་དགོངས་སེམས་ཉག་ཐག་མ་ཆད་པར།།

དུས་ནམ་ཞིག་དབྱེར་མེད་མངོན་གྱུར་ཤོག།

ཅེས་འདི་ཉིད་ཤར་རྫ་གཡུང་དྲུང་ལྷུན་པོའི་དབེན་ཁྲོད་རྣལ་འབྱོར་ཉམས་མྱོང་སྐྱོང་བའི་ཁང་བཟང་དུ་བླ་སློབ་རྣམས་ནུབ་གཅིག་ཞེས་ཆ་མཛད་ཅིང་བཞུགས་པ་ལ་ཉམས་དགའ་དང་བཅས་ཏེ་རིག་འཛིན་ཚེ་དབང་ཡབ་ཡུམ་བདག་གི་མདུན་དུ་གསལ་བའི་སྐབས་སུ་བློ་འདྲི་ཞུས་ལེན་གྱི་ཉམས་ མགུར་འདི་ཉིད་ཐོ་ཤར་ཁྲོལ་ལེར་འདུག་པ་ཕྱིན་ཉིན་སྔ་མོར་སྟག་སྤྲུལ་ཡེ་ཤེས་ཉི་མས་ཡིག་ཐོག་ཏུ་ བྲིས་པ་འོ།།