ཀ་ཁའི་དབྱངས་རྟ། །

ཀ་ཁའི་དབྱངས་རྟ་གླུ་རུ་གྱེར་ནས། །

ཁ་བ་བོད་པའི་སྐྱིད་སྡུག་གླེང་མཁན། །

ག་ནས་བཙལ་ཡང་གསེར་ལས་དཀོན་པས། །

ང་ཡི་བློ་སེམས་བདེ་དུས་མི་འདུག། །

ཅ་ཅོའི་གཏམ་ལ་བདེན་ཁ་བཟུང་ནས། །

ཆ་ལུགས་འདྲ་མིན་སྣ་དགུ་མ་སྒྱུརད། །

ཇ་རྒྱགས་ཆང་བཟིའི་འུར་ཟིང་ཁྲོད་ཀྱི། །

ཉ་ཉུབ་མཉམ་དུ་སྐྱིད་སྣང་མ་འཛིན། །

ཏ་ལའི་ལོ་མ་མཚོན་གྱིས་བཅད་འདྲའི། །

ཐ་སྙད་ཙམ་མིན་དོན་གྱི་སྒྲོ་འདོགས། །

ད་ལན་ཆོད་པའི་ལས་ལ་འབད་ན། །

ན་རག་གཡང་སའི་འཕྲང་ཆེན་བསྡམ་འགྲོ། །

པ་རེ་པུ་རེའི་རྗེས་འབྲངས་བྱས་ནས། །

ཕ་མེས་སྲོལ་བཟང་ཉམས་སུ་མ་བཅུག། །

བ་གླང་ལྟར་བུའི་གླེན་རྟགས་སྟོན་ནས། །

མ་རབས་ལས་ལ་གཅེས་པར་མ་བཟུང་། །

ཙ་རིར་གནས་སྐོར་འགྲོ་རྒྱུ་ཙམ་ལས། །

ཚ་བོ་ཚ་མོས་སློབ་རར་མི་འགྲིམ། །

ཛ་དྲག་དུས་ཚོད་ཡོ་ལང་ཁྲོད་དུ། །

ཝ་ལེར་ལྟོས་དང་རྗེས་ལུས་རེད་འདུག།

ཞ་ཞིས་འཇའ་ལ་ལེགས་པར་གཅེས་བཞིན། །

ཟ་ཉལ་ཁོ་ནའི་ལས་ལ་མ་བྲེལ། །

འ་ཅག་བླ་སྲོག་སྐད་དང་ཡི་གེ། །

ཡ་རྐན་ལྕེ་རྩེ་བསྡེབས་ནས་སྨྲ་རོགས། །

ར་མ་ལུག་གི་མི་རྒྱུད་མིན་པས། །

ལ་རྒྱའི་ཁ་ཕྱོགས་བརྟན་པོ་བྱེད་དགོས། །

ཤ་རུས་གཅིག་པའི་གདོང་དམར་བོད་ལ། །

ས་མཐོའི་བུ་ཡི་རེ་འབོད་ཉག་གཅིག།

ཧ་ཅང་སྙན་པའི་གླུ་ཆུང་མིན་ཡང་། །

ཨ་མའི་བུ་ཡི་ལྷག་བསམ་གསེང་ནས། །

སྦྲང་དཀར་རྩམ་པས་གསོས་ཕྲུག་རྣམས་ལ། །

ཐེངས་གཅིག་མིན་པར་ནམ་ཡང་ལེན་ངེས། །

 སྤྱི་ཟླ་ལྔ་པའི་ཚེས་བཞི་དང་ལྔ་གཉིས་ཀྱི་དགོང་མོར་བྲིས། །