ཡིད་སྐྱོ་ནས་བོས་པ། །

དེང་རྩམ་གཟན་བོད་པའི་སྐྱོ་ལུགས་ལ།།

ར་རྩེའུ་རེ་བྲག་ཧྲོབ་གསེང་དུ་རྒྱབ། །

རྟ་འདོ་བ་ཁེར་རྐྱང་རི་ལ་བཀར། །

ཡིད་སྐྱོ་བའི་བྱ་བ་ཇེ་མང་རེད། །

ཁ་བདེ་མོས་བྱམས་དང་སྙིང་རྗེ་བཤད། །

ཁོག་ངན་པས་བདག་ཁེ་གཞན་ཕམ་བཟུང་། །

རྡོ་རྡེའུ་རང་སྐེ་ཚ་བྱེད་བཏགས། །

བོན་དགེ་བ་མིང་མེད་ཙམ་ལ་གཏུགས།།

རང་མི་རིགས་ནད་གཞི་ཇེ་ལྕི་རེད། །

འདོན་ཀ་ཁ་དབྱངས་མཁན་ཇེ་ཉུང་རེད།།

བཟང་ཕ་སྐད་ནམ་ལངས་སྐར་མ་རེད།།

ངས་བལྟས་ན་རྒོད་རྒོད་དགོས་ས་གདའ། །

གྲོགས་ཟ་ལའི་ཚན་རྩལ་འགའ་ངོམ་དུས།།

དེང་སྒྱུ་མའི་གློག་བརྙན་ཇེ་གསལ་རེད། །

ཕ་ཁ་འདོན་བགྲེས་པོ་མགོ་འཁོར་ནས། །

ད་དགོང་འདོན་ནང་བསང་བརྗེད་བསྡད་གདའ། །

ཡབ་དམ་པའི་སྐུ་ཚེ་ཧྲིལ་པོ་དེ། །

གཞུང་ལྔ་རིག་སྲུང་སྐྱོབ་ཆེད་དུ་ཤོར། །

དཔྱད་ཤེས་ན་བཀའ་དྲིན་སེམས་ལ་ཉོར། །

དེ་མེད་ན་དུད་འགྲོ་ནོར་ནག་རེད། །

དེང་ཅོལ་ཆུང་བྱིས་པའི་ཧམ་གཏམ་ལ། །

དྲིན་མ་ལོའི་ཞིང་རབ་གྲུ་བཞི་མ། །

རྒྱུ་ར་རིན་ཕྱག་བརྩོན་རྟ་རིན་ཞེས།།

སྐད་ཆེན་པོའི་ངང་ནས་སྤང་ལ་བསྒྱུར། །

དཔྱིད་དབྱར་རྩྭ་དགུན་འབུ་བརྐོས་ཚར་དུས།།

དབྱར་འཕྲུལ་རྟའི་འགྱར་འགྱུར་ཇེ་ཆེ་རེད། །

སྟོན་སྡོང་ལོ་སེར་པོ་སར་ལྷུང་སྐབས། །

དགུན་གྱོན་ཆས་སྟ་གོན་སྒྲུབ་བྱེད་དཀོན།།

གངས་དཀར་པོ་རི་ཡི་འདབས་མཚམས་ཀྱི།།

སྐུ་ན་སོ་གཞོན་པའི་གསར་སྐྱེས་ལ། །

ཚོད་ཚྭ་ལྟར་ཟིན་པའི་གདམས་ངག་ཅིག།

དུས་མི་འགོར་གནང་རྒྱུ་བླ་མའི་འགན།

སྤྱི་ཟླ་བཞི་པའི་ཚེས་ཉི་ཤུ་དགུ་ཉིན་གྱི་དགོང་མོར་བྲིས། །