དཔང་པོའི་གཟི་བརྗིད་གླེང་བ་དང་སྐྱོན་བརྗོད་པ། །

སྤྱིར་མི་བུ་ཕལ་ཆེ་བས་དཔང་པོའི་ཡོན་ཏན་ལས་སྐྱོན་བརྗོད་མཁན་ཉུང་ཉུང་ཡིན་ཡང་ཁོ་བོ་རང་ཉིད་ཀྱིས་བལྟས་ན་དཔང་པོ་ཡིན་ན་སྐྱོན་ཡོད་པའི་མ་ཁྱབ་ཀྱང་། དཔང་པོ་ལ་སྐྱོན་གྱིས་དབེན་པ་དེ་བས་ཀྱང་མ་མཐོང་། རྒྱུ་མཚན་དེས་ན་དཔང་པོའི་སྐྱོན་ཡོན་གཉིས་ཀྱི་ཆ་ནས་ཅུང་ཞིག་གླེང་བར་འདོད་པས་དེའི་ཕྱོགས་ལ་འགལ་འཁྲུལ་ཡོད་དོ་ཅོག་རང་འབྱུང་རིག་པའི་ལྷ་ལ་བཤགས་པར་བགྱིའོ། །ལྷ་ཕྱག་སྔོན་དུ་འཚལ་ཞིང་བཤད་བྱའི་དོན་ལ་འཇུག་པ་སྟེ། །

གཞུང་ལས།  །གང་ཞིག་དྲང་མཁན་མཆོག་གྱུར་པ།  །གོ་བས་བདེན་རྗུན་གོ་མི་ལྡོག  །རྩོད་ གཉིས་དོན་རྟོགས་གསོང་པོར་སྨྲ། །ལུང་རིགས་གཏན་ཚིག་དཔེ་ཡིས་སྒྲུབ། །དཔེ་དང་དཔང་པོ་མཆོག་ཏུ་གྱུར། ཞེས་དང་ཀུན་མཁྱེན་བསྡུས་གྲྭ་ལས། རྩོད་ངག་གི་རྗེས་བཟློས་བརྗོད་པ་དང་། དྲང་པོས་ཤན་འབྱེད་བརྗོད་པ་དང་གཉིས་སོ།། ཞེས་པས། དྲང་མཁན་མཆོག་གྱུར་གང་ཡིན་ཡང་སྐབས་ཐུག་རྒོལ་བ་གཉིས་ཀྱི་བར་ཕན་ཚུན་གོ་བརྡ་མ་འཕྲོད་པ་རྣམས་རྗེས་བཟློས་བརྗོད་དགོས་པ་དང་། དོན་གྱི་གོ་བ་ལ་བདེན་རྫུན་གོ་མ་ལྡོག་པར་རྒྱུ་མཚན་དཔེ་དང་བཅས་པའི་སྒོ་ནས་ཕྱོགས་ལྷུང་དུ་མ་སོང་བ་ཞིག་དགོས་པ་ནི་སྨོས་མེད་ལགས་ཅིང་།  ལྷག་པར་དུ། རྒོལ་བ་གཉིས་ལ་འཁྲོས་ཚིག་དང་འདྲེས་པའི་སྐྱོན་བརྗོད་རྣམས་བསྒྲགས་དུ་མི་གཅུག་ནས་དཀའ་གནད་གྱི་དོན་ལ་རྩོད་པ་འདྲ་མཛད་ཅིང་། རྒོལ་བ་གཉིས་ཀྱི་ལུས་ཀྱི་ རྣམ་འགྱུར་སོགས་མདོར་ན་སྐྱོན་རྣམས་སོ་སོ་ལ་གོ་བརྡ་སྤྲད་ཐོག དཔེ་དང་དོན་མ་ནོར་བའི་སྒོ་ནས་རྒྱལ་ཕམ་ཤན་འབྱེད་དགོས་ཏེ། འགྲོ་མགོན་ཚད་མ་ལས། དེ་ཡང་དཔེ་ལ་བརྟེན་ནས་བདེན་རྫུན་ངེས་པར་གཤག་འབྱེད་པས་ན་དཔང་པོའོ།། ཞེས་དང་། རྗེའི་ཚད་མ་ལས།   དཔང་པོས་བཟློས་དང་ཤན་ཡང་འབྱེད་ཞེས་སོགས་གསུངས་པའི་ཕྱིར། །

སྐྱོན་བརྗོད་པ། །

ཁ་ཅིག་གིས་དཔང་པོ་ལ་ཚར་གཅོད་མེད་པར་འདོད་པའི་ལུགས་ཡོད་ཀྱང་།འགྲོ་མགོན་ཚད་མ་ལས། དེ་ཡང་དཔང་པོ་དམན་པ་ནི། དམན་གྱུར་དེ་ཡིས་དཔང་བྱས་པ། ལོག་པར་ གཅོད་དང་ཇི་ནར་འཇོག   །མི་འདྲ་ལོག་པ་དཔེར་འཇོག་ཅིང་།   །དཔེ་མེད་དཔེ་ལ་ལྡབ་སྨྲ་བྱེད། །དཔེ་ལ་དཔེས་མཚོན་སྒྲུབ་བྱ་སྟོར། །དཔེ་དང་དཔང་པོར་གྱུར་མ་ཡིན། ཞེས་པ་དག་ནི་སྤང་བྱར་བསྟན་པའོ། ཞེས་དང་། རྗེའི་ཚད་མ་ལས་དཔང་པོས་ཤན་འབྱེད་ལྟར་སྣང་བརྗོད་པ་ནི་དཔང་པོ་ཚར་གཅོད་པའི་གནས་སོ།། ཞེས་པས། རྒོལ་བ་གཉིས་ཀྱི་ ཕམ་རྒྱལ་ཤན་འབྱེད་མི་བརྗོད་པ་དང་། བརྗོད་ཀྱང་ལྟར་སྣང་དང་། མེད་པའི་དཔེ་ལ་ཀ་བ་བཞག་སྟེ་དཔེ་མིན་དཔེ་རུ་བཟུང་བ་དང་།རྒོལ་བ་གཉིས་ཀྱི་རྩོད་ངག་ལ་མི་ཉན་པ་འཕྲུལ་ཆས་རིགས་ཀྱི་རྩེ་ལ་གཡེང་བ་དང་སེམས་ནང་དུ་འདུ་བ་ཕྱི་ལ་གཡེང་བ་སོགས། གང་དྲན་དྲན་བྱས་ཏེ་རྒོལ་བ་གཉིས་ཀྱིས་རྩོད་པ་བྱེད་ཕྱོགས་སུ་ཡིད་མ་གཏད་པའི་དཔང་པོ་ནི། ཚར་གཅོད་པའི་གནས་ཡིན་ཏེ། རྗེའི་ཚད་མ་ལས་དཔང་པོས་ཤན་འབྱེད་ལྟར་སྣང་བརྗོད་པ་ནི་དཔང་པོ་ཚར་གཅོད་པའི་གནས་སོ་ཞེས་སོགས་གསུངས་པའི་ཕྱིར།

དྲེ་བཙུན་སྦྱིན་པ་ནས་་་་འདི་ལོའི་སྤྱི་ཟླ་་་༡༠་་་་ཚེས་་་་་༢༥་ཉིན་བྲིས། །