རང་སྤྱིའི་དབྱེ་འབྱེད་རང་ངོར་མེ་ལོང་མ།།

རང་མཚན་དང་སྤྱི་མཚན་བཤད་པ་གཉིས་ལས། དང་པོ། རང་མཚན་ནི་དངོས་པོ་ཐམས་ཅད་དེ། བོན་གྱི་སྤྱན་ལྡན་ཆེན་པོའི་ཚད་མ་ཀུན་བཏུས་ལས། འཛིན་པ་མ་འཁྲུལ་པ་ལ་གསར་བར་རྟོགས་པའམ་རྟོག་བྲལ་མ་འཁྲུལ་བའི་ཡུལ་དེ་སྣང་བ་དེ། དེའི་མཚན་ཉིད་དུ་གསུངས་ལ། ཀུན་མཁྱེན་ཉི་མ་བསྟན་འཛིན་དང་། ཡོངས་འཛིན་སྨྲ་བའི་སེང་གེ། སློབ་དཔོན་བཟང་རྒྱལ་སོགས་ཀྱིས། རང་འཛིན་ཤེས་པ་ལ་ཐུན་མོང་མ་ཡིན་པའི་རྣམ་པ་སྣང་དུ་རུང་བ་གང་ཞིག་སྣང་ཚུལ་དང་མཐུན་པར་དོན་བྱེད་ནུས་པ་རང་མཚན་གྱི་མཚན་ཉིད། ཅེས་གསུངས་པའི་སོ།། མཁས་དབང་དེ་རྣམས་ཀྱིས་གོང་དུ་མཚན་ཉིད་གསུངས་ཚུལ་ལ་ལྡོག་པའི་ཆ་ནས་ཐ་དད་ཡོད་ཀྱང་དོན་ལ་གཅིག་སྟེ། དཔེར་ན། ཆབ་དང་ཆུ་བཞིན་ནོ།། སྐབས་འདིར་གོང་གི་མཚན་ཉིད་དེ་ལ་ངས་འདི་ལྟར་གོ་སྟེ། སོ་སྐྱེའི་མངོན་སུམ་ཚད་མས་གསལ་བར་རྟོགས་པའམ་མངོན་སུམ་དེ་ཉིད་ལ་དོན་རང་ཚན་གྱི་རྣམ་པ་ཚུར་གཏོད་པ་ལས། རྟོག་པའི་ངོར་ལ་འཆར་བའི་སྤྱི་རྣམ་ཙམ་ཞིག་མིན་པས་ནའོ།། སྐབས་འདིར་ཐུན་མོང་མ་ཡིན་པའི་རྣམ་པ་ཞེས་པའི་དོན། རྟོག་མེད་ཤེས་པ་ལ་གསལ་བར་སྣང་བའི་རྣམ་པའམ་སྒྲ་སྤྱི་དོན་སྤྱི་གང་རུང་ལ་བརྟེན་ནས་མ་འཆར་བ་ཡུལ་དེ་རང་མཚན་གསལ་པོར་སྣང་བའི་རྣམ་པ་ཞིག་ལ་གོ།། དཔེར་ན་ཀ་འཛིན་མིག་ཤེས་ལ་ཀ་བ་ཤར་བ་ལྟར་བུའོ། །  གངས་རི་སེར་པོ་དང་ཟླ་གཅིག་ཟླ་གཉིས་སོགས་རང་འཛིན་ཤེས་པ་ལ་ཐུན་མོང་མ་ཡིན་ པའི་རྣམ་པ་སྣང་དུ་རུང་བ་ཡིན་ཡང་། སྣང་ཚུལ་དང་མཐུན་པར་དོན་བྱེད་ནུས་པ་མ་ ཡིན་པས་དངོས་པོའི་རིགས་ལ་འཐད་པར་སེམས། ཁོ་ན་རེ། མི་རྟག་པ་དངོས་པོ་མ་ཡིན་ པར་ཐལ། སོ་སྐྱེའི་མངོན་སུམ་ཚད་མས་གསལ་བར་མི་རྟོགས་པའི་ཕྱིར། དེར་ཐལ། མི་རྟག་པ་མངོན་སུམ་དུ་གསར་དུ་རྟོགས་པའི་བློ་ཐེག་དམན་མཐོང་ལམ་སྐད་ཅིག་གཉིས་པ་ནས་གསར་དུ་སྐྱེ་བའི་ཕྱིར།  ཟེར་ན།  མ་ཡིན་ཏེ།   །སྡུག་བསྔལ་མི་རྟག་སྟོང་བདག་མེད།  ཅེས་པའི། ཐེག་དམན་མཐོང་ལམ་སྐད་ཅིག་གཉིས་པ་ནས་སྡུག་བསྔལ་དང་མི་རྟག་སོགས་ ཕྲ་བ་རྣམས་དེས་སྐབས་སུ་གསར་དུ་རྟོགས་པ་ཡོད་པའི་དོན་ལས། མི་རྟག་པ་རགས་པ་ རྣམས་སོ་སྐྱེའི་མངོན་སུམ་ཚད་མས་རྟོགས་ཏེ།  འཇིག་བཞིན་ཐོག་རྩེག་ཁང་བཟང་དང་།  མཛེས་ལྡན་གྱི་དབྱར་ཁའི་མེ་ཏོག་སོགས་མི་རྟག་འགྱུར་བ་ཅན་གྱི་རང་བཞིན་དུ་ཤེས་པའི་ཕྱིར། རགས་པ་འགའ་ཞིག་མི་རྟག་པ་ངེས་ན་མི་རྟག་པ་ཤེས་དགོས་ཏེ། སྤངས་ཚད་ཡ་ཐ་རྟོགས་ཚད་མ་ཐ་ཞེས་ཡོངས་གྲགས་ཡིན་པའི་ཕྱིར། སྒྲུབ་བྱེད་ཀྱང་ཡོད་དེ།  མངོན་སུམ་ཚད་མའི་རྟོགས་པར་བྱ་བ་མངོན་གྱུར་གྱི་མཚན་ཉིད། དེ་དང་དངོས་པོ་དོན་གཅིག    ཅེས་དང་། འགྲོ་མགོན་རིན་པོ་ཆེ་སོགས་ཀྱིས་གོང་དུ་མཚན་ཉིད་གསུངས་པ་དེ་རྣམས་  ལ་ལྟོས་དང་གོ་བ་འབྱུང་ངེས་ཡིན། སོ་སྐྱེ་ལ་གཞིར་བཞག་བྱེད་དགོས་ཏེ།  རྗེའི་ཚད་མ་ལས།   འདི་ཡང་སོ་སྐྱེའི་སྐབས་ཡིན་ཞེས་ནན་གྱིས་གསུངས་པའི་ཕྱིར། དེ་འདྲ་བའི་ཐེག་དམན་མཐོང་ལམ་མ་ཐོབ་གོང་དུ། མི་རྟག་པ་སོགས་འཛིན་པ་མ་འཁྲུལ་པའི་གསལ་བར་རྟོགས་ཀྱང་། རང་གྲུབ་དུས་སྐད་ཅིག་གཉིས་པ་ནས་མི་སྡོད་པའི་བོན་ཡིན་པ་མཐོང་ལམ་དུ་གསར་དུ་རྟོགས་སོ།  །ཕྱོགས་གཞན་ཞིག་ནས་བཤད་ན།  རང་འཛིན་ཤེས་པ་ལ་ཐུན་མོང་མ་ཡིན་པའི་རྣམ་པ་སྣང་དུ་རུང་བ་གང་ཞིག་སྣང་ཚུལ་དང་མཐུན་པ་དོན་བྱེད་ནུས་པ་ཞེས་པའི་དོན། སོ་སྐྱེའི་མངོན་སུམ་ཚད་མ་ཞིག་ཁྱོད་ལ་སྣང་ལ་མ་ངེས་པའི་བློ་འགྲོ་རྒྱུ་ ཡོད་པས་དོན་ནོ།། 

གཉིས་པ་སྤྱི་མཚན་བསྟན་པ་ནི། དེའི་མཚན་ཉིད་དང་། ཁྱབ་མཐའ་བསྟན་པ།  ཞར་བྱུང་གཞན་བཤད་པའོ།། དང་པོ་མཚན་ཉིད་ནི། འཛིན་པ་ལ་ཐུན་མོང་གི་རྣམ་པ་སྣང་དུ་རུང་བ་གང་ཞིག་སྣང་ཚུལ་དང་མཐུན་པར་དོན་བྱེད་མི་ནུས་པ་དེ་འོ།། དེ་དང་རྟག་པ་ དང་། དོན་སྤྱི་གྱུར་པའི་གཟུང་ཡུལ། འདུས་མ་བྱས་པའི་རྟེན་འབྲེལ། དོན་བྱེད་མི་ནུས་པའི་ཤེས་བྱ་རྣམས་ཡིན་ཁྱབ་མཉམ། ཁ་ཅིག་གིས། དོན་སྤྱི་གྱུར་པའི་གཟུང་ཡུལ་ཡིན་ན་དོན་སྤྱི་ཡིན་པའི་མ་ཁྱབ་པར་ཐལ། རྟག་པ་དེ་ཡིན་པའི་ཕྱིར་ཟེར་ན། རྟག་པ་དེ་དོན་སྤྱི་གྱུར་པའི་གཟུང་ཡུལ་དང་དོན་སྤྱི་གཉིས་ཀྱི་གཞི་མཐུན་ཡིན་ནོ།། དོན་སྤྱི་མ་ཡིན་པ་ཐལ།  སུ་གང་གི་དོན་སྤྱི་མ་ཡིན་པའི་ཕྱིར་ཟེར་ན། མ་ཁྱབ། དོན་སྤྱི་ཡིན་ཏེ།  རྗེའི་ཚད་མ་ལས།  བུམ་འཛིན་རྟོག་པ་ལ་བུམ་པའི་རྣམ་པ་སྣང་བ་མཚན་གཞི། དོན་སྤྱི་ཡིན་པར་མཚོན།  འཛིན་པ་ལ་ཐུན་མོང་གི་རྣམ་པ་སྣང་རུང་ཡིན་པས་སོ།། ཞེས་དོན་སྤྱིའི་མཚན་ཉིད་ལ་ལྟོས་དང་ཤེས་ས་འདུག  རིག་པས་ཀྱང་གྲུབ་སྟེ། རྟག་པ་ལ་སོགས་ནི་རྣམ་པ་བློ་ལ་འདྲེས་ཏེ་རྟོག་པ་ལ་སྣང་ཙམ་དུ་གནས་སོ།།  དཔེར་ན། ནམ་མཁའ་ལྟར་བུ་ལ་མཚོན་ཏེ་བཤད་ན། ཁྱོད་ཞེས་པའི་སྒྲ་དང་ཐོགས་རེག་བཀག་པའི་ཆ་སོགས་ལ་བརྟེན་ནས་རྟོག་ངོར་འཆར་ཙམ་གྱི་བོན་ལས་གཞན་པའི་ནམ་མཁའ་ཞིག་མི་རྙེད་ལ། དེས་ན་རྟག་པ་ཀུན་ལ་རིགས་སྒྲེ་ཤེས་པར་མཛོད་ཅིག  ཁོ་ན་རེ།  སྟོང་གཞི་ཀ་བུམ་ལ་སོགས་ནི་རྟོག་ངོར་འཆར་བའི་རྣམ་པ་ལས་གཞན་ཡོད་ཀྱང་། ཤེས་པ་དང་ལྡན་མིན་འདུ་བྱེད་མི་རྟག་པ་སོགས་རྟོག་ངོར་ལ་འཆར་སྟོང་དང་རྟག་པ་སོགས་རྟོག་ངོར་འཆར་ཚུལ་ཧ་ཅང་འདྲ་བས་ཇི་ལྟར་འགྲེལ་ཟེར་ན། འདི་ལྟར་ཏེ། དང་པོ་ཤེས་པ་སོགས་ནི་རྣམ་པ་བློ་ལ་མ་འདྲེས་ཤིང་མངོན་སུམ་ཚད་མའི་གཟུང་ཡུལ་དུ་གྱུར་ལ། ཕྱི་མ་ནི་རྟོག་པའི་ངོར་འཆར་ཙམ་གྱི་རྗེས་དཔག་ཚད་མས་གཟུང་ཡུལ་དུ་བྱེད་པའི་ཕྱིར། ཡང་ཁོ་ན་རེ། གཞི་འདི་ན་བུམ་པ་མེད་པ་རྟག་པ་ཡིན་ཡང་མངོན་སུམ་ཚད་མས་རྟོགས་ལ།  སྒྲ་ཡི་མི་རྟག་པ་རང་མཚན་ཡིན་ཡང་རྗེས་དཔག་ཚད་མས་གཟུང་དགོས་པའི་ཕྱིར་ཟེར་མཁན་ཡོད་ཀྱང་། གོང་དུ་རང་སྤྱི་གཉིས་ཀྱི་ཡིན་ཚུལ་བཤད་པ་ལ་བལྟས་ནས་འདི་ལྟར་དགོས་སམ་སྙམ། ཁ་ཅིག་ན་རེ།  རྟག་པ་ཡིན་ན། གཟུང་ཡུལ་ཡིན་པའི་ཁྱབ་ཟེར་ན། རྣལ་འབྱོར་མངོན་སུམ་གྱི་ཡུལ་དུ་གྱུར་པའི་སྟོང་ཉིད་བོན་ཅན། གཟུང་ཡུལ་ཡིན་པ་ཐལ། རྟག་པ་ཡིན་པའི་ཕྱིར།  འདོད་ན། རྣལ་འབྱོར་མངོན་སུམ་འཛིན་པ་ཡིན་པ་ཐལ་ལོ།། རྣལ་འབྱོར་མངོན་སུམ་བོན་ཅན། འཛིན་པ་མ་ཡིན་ཏེ། གཟུང་འཛིན་གཉིས་ལས་རྣམ་པར་གྲོལ་བའི་བོན་ཉིད་གཟིགས་པའི་ཕྱིར། མ་སྒྲུབ་ཟེར་ན། དེ་བོན་ཅན།  གཟུང་འཛིན་སྤངས་བའི་རྣམ་གྲོལ་ལམ་མ་ཡིན་པ་ཐལ། གཟུང་འཛིན་གཉིས་ལས་མ་གྲོལ་བའི་ཕྱིར།  གཟུང་འཛིན་གཉིས་ལས་གྲོལ་དགོས་ཏེ།  ཚད་མ་ཀུན་བཏུས་ལས། བོན་ཉིད་ཡུལ་དུ་བྱེད་པའི་རྣལ་འབྱོར་མངོན་སུམ་ཡང་ཡིན་ཟེར་བ་མ་ཡིན་ཏེ། དེ་ལྟར་ན་དེ་དག་གཟུང་འཛིན་སྤངས་ནས་རྣམ་གྲོལ་ཐོབ་པ་མ་ཡིན་པར་འགྱུར་བ་ལས། དེ་གཟུང་འཛིན་གཉིས་ལས་འདས་པར་རྣམ་གྲོལ་བོན་དབྱིངས་གཟིགས་པ་དང་། ཞེས་པའི་གསལ་ལོ།། དེས་ན། དེ་ནི་རྟོགས་བྱེད་ཙམ་ཡིན་ཡང་འཛིན་པ་མ་ཡིན་ནོ།། ཞེས་གསུངས་སོ།།

ཁོ་ན་རེ།  གཞི་གྲུབ་ན་གཟུང་ཡུལ་ཡིན་པའི་མ་ཁྱབ་པར་ཐལ།  རྣལ་འབྱོར་མངོན་སུམ་གྱི་གཟིགས་པའི་སྟོང་ཉིད་དེ་ཡིན་པའི་ཕྱིར།  ཟེར་ན།  དེ་གཟུང་ཡུལ་ཡིན་ཡང་།  རྣལ་འབྱོར་མངོན་སུམ་གྱི་གཟུང་ཡུལ་མ་ཡིན་ཏེ།    རྣལ་འབྱོར་མངོན་སུམ་འཛིན་པ་མ་ཡིན་པས་སོ།   །ཁྱབ་སྟེ།  འགྲོ་མགོན་ཚད་མ་ལས།  གཟུང་ཡུལ་རྟོགས་པ་འཛིན་པའི་མཚན་ཉིད་ཅེས་གསུངས་པའི་ཕྱིར།  འདིའི་སྐབས་སུ་གཟུང་རྟོགས་པ་འཛིན་པའི་མཚན་ཉིད་ཅེས་ཁྱོད་ཀྱི་གཟུང་ཡུལ་དེ་རྟོགས་རྒྱུ་ཡོད་པའི་དོན་ནོ།།     

ཡང་ཁོ་ན་རེ། མདུན་གྱི་གཞི་འདིར་བུམ་པ་མེད་པ་བོན་ཅན།  རྟག་པ་མ་ཡིན་པར་ཐལ།  ཁྱོད་སོ་སྐྱེའི་མངོན་སུམ་ཚད་མས་དངོས་སུ་རྟོགས་པའི་ཕྱིར། ཟེར་ན། མ་སྒྲུབ་སྟེ། ཁྱོད་མངོན་སུམ་རྟོགས་པའི་སོ་སྐྱེའི་བློ་མེད་པའི་ཕྱིར། དེར་ཐལ། ཁྱོད་དོན་བྱེད་ནུས་པ་མ་ཡིན་པའི་ཕྱིར། ཁྱབ་སྟེ། འགྲོ་མགོན་ཚད་མ་ལས། དོན་བྱེད་ནུས་པའི་དངོས་པོ་སྣང་ནས་ཡུལ་དུ་བྱེད་པ་དེ་རྟོག་བྲལ་མ་འཁྲུལ་པའི་བློ་ཡི་མཚན་ཉིད་དུ་གསུངས་པའི་ཕྱིར། འཕགས་པའི་མངོན་སུམ་དུ་རྟོགས་ཀྱང་། མི་སྐྱོན་ཏེ། འདིའི་སྐབས་སོ་སྐྱེ་ལ་གཞིར་བཞག་གོ།། དེ་ལྟར་མིན་ན་རང་མཚན་སྤྱི་མཚན་ཁྱད་པར་ཇི་ལྟར་འཇོག                                         ཡུལ་དང་དངོས་མེད་གཉིས་ལ་མུ་བཞི་ཡོད་དེ། ཡུལ་ཡིན་ལ་དངོས་མེད་མ་ཡིན་པ།  མདུན་གྱི་ཀ་བ་ལྟར་བུའོ།། དངོས་མེད་ཡིན་ལ་ཡུལ་མ་ཡིན་པ། རི་བོང་གི་རྭ་དང་བྱས་པ་ཁོ་ན་མི་རྟག་པ་ཡིན་པ་སོགས་སོ།།  གཉིས་ཀ་ཡིན་པ།  ནམ་མཁའ་དང་།  བློས་རིག་པར་བྱ་བ་ཡུལ་གྱི་མཚན་ཉིད་ཡིན་པ་སོགས་སོ།།  གཉིས་ཀ་མིན་པ་ཡང་ཡོད་དེ། མི་མགོ་རྡོ་རིལ་དང་བུམ་པ་མེད་པ་དེ་གཉིས་ཡིན་པའི་ཕྱིར། དེ་གཉིས་དངོས་མེད་ཡིན་ཡང་གཉིས་ཀ་མིན་པའོ།།  ཡང་ཤེས་བྱ་དང་ཐ་དད་པ་དང་མཚོན་བྱ་གཉིས་ལ་མུ་བཞི་ཡོད་དེ། ཤེས་བྱ་དང་ཐ་དད་པ་ཡིན་ལ་མཚོན་བྱ་མ་ཡིན་པ། མི་འཇིག་པའི་བོན་དང་། འཇིན་པ་འཁྲུལ་པ་ལ་གསལ་བར་སྣང་བ་སོགས་སོ།། མཚོན་བྱ་ཡིན་ལ་ཤེས་བྱ་དང་ཐ་དད་པ་མ་ཡིན་པ་ནི། ཤེས་བྱ་ལྟར་བུའོ།། གཉིས་ཀ་ཡིན་པ་མེད་པ་གསལ་སྣང་དུ་གྱུར་པའི་གཟུང་ཡུལ་ལྟར་བུའོ།། གཉིས་ཀ་མ་ཡིན་པ་ཤེས་བྱ་དང་དོན་སྤྱི་གཅིག་ཏུ་འཆར་རུང་དེའོ།།

དྲྭ་གྲོགས་ཚོ་བསམ་ཚུལ་ཡོད་ན་འདོན་རོགས།།