ཕྱི་རྒོལ་གྱི་གཟི་བརྗིད་གླེང་བ་དང་སྐྱོན་བརྗོད་པ། །

སུན་འབྱིན་ཡང་དག་བརྗོད་པ་གཙོ་བོ་ཁས་ལེན་པའི་གང་ཟག་དེ་ཕྱི་རྒོལ་གྱི་མཚན་ཉིད་ཅེས་རྗེ་དང་ཀུན་མཁྱེན་གཉིས་ཀ་ཞལ་མཐུན་པའི་ལུགས་སོ།། དེས་ན་ཕྱི་རྒོལ་ཞེས་ཡོངས་གྲགས་ཀྱི་དམ་བཅའ་བ་དེ་ལ་གོ་དགོས་པ་སྤྱི་ལུགས་ཡིན་ཞིང་།  དེ་ཉིད་ལ་ལྡན་དགོས་པའི་ཡོན་ཏན་གྱི་ཆ་ནས་ཅུང་ཞིག་གླེང་ན། །   དཔེར་ན་སྔ་རྒོལ་གྱིས་གཞི་གྲུབ་ན་རྟགས་ཡང་དག་ཡིན་པའི་ཁྱབ་པར་ཐལ་ཞེས་དྲིས་ཚེ་རང་ཉིད་ནས་ཁྱབ་མ་ཁྱབ་ཀྱི་ལན་དེ་མ་རྒྱབ་གོང་རང་ལུགས་ཀྱི་མཁས་པ་གོང་འོག་དག་གི་རྟགས་ཡང་དག་གི་མཚན་ཉིད་བཞག་པ་སོགས་ལྷུ་སྒྲིག་ཏེ་རང་གཞན་གཉིས་ཀའི་རྒྱུད་ཀྱི་མ་རྟོགས་ལོག་རྟོག་ཐེ་ཚོམ་སོགས་ཀྱི་དྲི་མ་རྣམས་ཟླ་ངོས་ཀྱི་མུན་པ་བཞིན་མེད་པར་བྱས་ཏེ་གཉིས་ཀའི་རྒྱུད་ལ་དེ་ལྟ་བུའི་རུ་ཤན་དབྱེ་བའི་ཐབས་ཤེས་ཟབ་མོ་གཅིག་བཙལ་དགོས་པ་དེ་ནི་སོ་སོའི་འོས་འགན་ལགས་སོ།།   དེའི་སྐབས་སུ་ལུས་ངག་ཡིད་གསུམ་བྱ་བ་གང་ལ་འཇུག་པ་ཐམས་ཅད་དགེ་བ་རུ་བསམ་སྟེ།   ཀུན་སློང་རྣམ་པར་དག་པའི་སྒོ་ནས་རང་གཞན་གཉིས་ལ་སྨན་པའི་ལན་ཡང་དག་ཅིག་སྤྲོད་ཐུབ་པ་ཡིན་ན་སྐྱེས་བུ་དེ་ཉིད་དབང་པོ་རབ་ཏུ་གྱུར་པ་ཡིན་ཏེ། ལུང་ལས། གང་ཞིག་བགྲོ་རྩོད་མཆོག་གྱུར་པས།  །ཐེ་ཚོམ་གེགས་སེལ་ཞུ་ལ་བརྩོན།  །བཀའ་བགྲོ་བདེ་ཉམས་བསྡུར་ལ་མཁས།  །རྩོད་པའི་ལོག་རྟོག་འཇོམས་་པར་བྱེད།  ཅེས་གསུངས་སོ། །ཁྱད་པར་དུ་རང་ཉིད་ཀྱིས་ཁས་ལེན་སྔོན་དུ་སོང་བ་དྲན་གསོ་བྱས་ཏེ་ལུང་རིག་དང་མངོན་དུ་འགལ་བ་བྱུང་ཚེ་རྩ་བའི་དམ་བཅའ་འདོར་ དགོས་པ་དང་། ཕ་རོལ་པོས་ཚ་ངོ་ག་ཚད་སྤྲད་ཀྱང་། བློ་རྩེ་བརྟན་ཞིང་ལུས་སེམས་དལ་དུ་ཕེབས་ནས་ཞལ་གྱི་དཀྱིལ་འཁོར་འཛུམ་ལམ་མེར་བཞུགས་ཏེ་སྔ་རྒོལ་ལ་སེམས་ཀྱི་ཡིད་རང་འབུལ་ཐུབ་ན་ཅི་འདྲའི་དགའ་བ་ལ། །    

 གཉིས་པ་སྐྱོན་བཤད་པ་ནི། །

འགྲོ་མགོན་ཚད་མ་ལས།        །བགྲོ་རྩོད་དམན་པར་གྱུར་པ་ནི།   །གཞན་སྨད་སྙམ་ནས་ཕར་དྲིས་པ།   །རྩོད་པར་ཁས་བླངས་ཡེངས་ལ་འཇོག  །རྩོད་གཞི་མེད་པར་རྩོད་པར་བཟོ།   །དྲི་སྐབས་མེད་པར་གལ་དུ་རྩོད།   །ཐལ་རྡེབ་ཚིག་ངན་བརླང་པོ་ཡིས།   །ངན་སོང་གནས་སུ་གཞེན་འདེབས་བྱེད།    ཅེས་གསུངས་གསུངས་པ་ལྟར། རིག་ལམ་པས་ལུང་དང་རིགས་པའི་རྒྱབ་རྟེན་ཡོད་པའི་དྲི་བ་དྲིས་ཚེ་དམ་བཅའ་བས་བློ་སེམས་དེའི་ཕྱོགས་མ་གཏད་ནས་གཞན་དུ་ཡེངས་བ་དང་། དཔེར་ན་སྔ་རྒོལ་བས་སྒྲ་བོན་ཅན། བྱས་པ་ཡིན་ཏེ། ཞེས་འདྲི་བའི་ཚེ། དབང་ཕྱུག་གི་བྱས་པ་ཡིན་པའི་ཕྱིར་ཞེས་པ་ལྟ་བུ་རྒྱུ་མཚན་ལྟར་སྣང་དང་།   སྒྲ་བོན་ཅན།  མི་རྟག་སྟེ་ཞེས་དྲིས་ཚེ།  གཞི་གྲུབ་པའི་ཕྱིར་ཞེས་པ་ལྟར་བུ་ཁྱབ་མེད་ཀྱི་ལན་དང་། ཤེས་བྱ་གང་ཞིག་རྟག་པ་མ་ཡིན་པའི་ ཕྱིར་ཞེས་པ་ལྟ་བུ་གནས་སྐབས་འགྲོ་ལོ་འདུག་ལོ་ཙམ་དང་། མི་རྟག་པ་མ་ཡིན་པ་མ་ཡིན་པའི་ཕྱིར་ཞེས་པ་ལྟ་བུ་རྒྱུ་མཚན་གོ་ལོག་དང་། རང་གིས་དེའི་རྒྱུ་མཚན་འཇོག་མ་ཤེས་ནས་གཡོ་སྒྱུ་ངང་ནས་སྐད་ཆ་གཞན་ལ་འཁྲིད་པ་སོགས་བྱས་ན། རང་གཞན་གཉིས་ཀྱི་རིག་ལམ་ཡར་རྒྱས་འགྲོ་བ་ལ་གེགས་བྱེད་པའི་བཀག་རྡོ་དངོས་ཡིན། ཡང་སྔ་རྒོལ་བས་རང་གི་བློ་ལ་མ་བབས་པའི་རྟགས་གསལ་གཏོང་ཚེ་ཀུ་རེ་དང་བཞད་གད་ལ་སོགས་བྱེད་ནས་རྟགས་གསལ་ལ་གོ་ཡ་མི་འདུག་ཅེས་འཕྱ་སྨོད་བྱེད་ན་དེ་ཉིད་ཚར་གཅོད་པའི་གནས་ཡིན་ཏེ། རྣམ་འབྱེད་ལས། སྒྲུབ་དང་སུན་འབྱིན་ཤན་འབྱེད་པ། །ལྟར་སྣང་བརྗོད་པ་ཚར་གཅོད་གནས་ཅེས་དང་། ཐུན་མོང་བསྡུས་གྲྭའི་རྣམ་བཞག་ལས་ངན་ཧམ་ངན་པ་ཨུ་ཚུགས་བྱེད་པ་དང་གཡོ་སྒྱུ་ཀུ་རེ་བཞད་གད་ལ་སོགས་པས་རིག་པ་སུབ་པ་ནི། ལས་རྒྱུ་འབྲས་ལ་བློས་གཏད་མེད་པའི་བླུན་པོ་ཕལ་པའི་ལུགས་ཡིན་པའི་ཤིན་ཏུ་མི་རུང་ངོ་ཞེས་གསུངས་པའི་ཕྱིར། 

སྤྱི་ལོ  ༢༠༡༢  ཟླ་བ  ༡༠  ཚེས  ༤  དགོང་མོར་དྲེ་བཙུན་སྦྱིན་པས་བྲིས།