ནང་མ་ཁང་ཞེས་བྱ་བའི་ནང་།།
ཕྱིན་པའི་སྣང་ཚུལ་ཅུང་ཙམ་གླེང་།།
གྲོགས་པོ་འགའ་ཡི་འདོད་མོས་ལྟར།།
གླུ་གར་ཁང་ནང་མཉམ་དུ་ཕྱིན།།
ན་གཞོན་ཕོ་མོ་འགའ་ཞིག་གིས །།
བརྩེ་བའི་ལས་ལ་རོལ་བཞིན་གདའ།།
གློག་འོད་དཀར་དམར་རྒྱག་སྟངས་ལེགས།།
དེང་དུས་བྱུག་རྫས་སྦྱོར་སྡེ་བཟང་།།
འཁྲབ་སྟོན་པ་ཚོའི་གཟུགས་བྱད་ནི།།
རིས་མོ་མཁས་པས་བྲིས་འདྲ་འགི །
དབྱར་རྩ་དགུན་འབུའི་བཀའ་དྲིན་ཀྱིས།།
ཕ་ཡུལ་ཁྱུང་པོ་སྟེང་ཆེན་དུ།།
ང་འདྲའི་རྣམ་གཡེང་རོལ་གནས་སྟེ།།
གླུ་གར་ཁང་ཡང་ལྔ་ཙམ་མཆིས།།
གལ་སྟེགས་སྟེང་གི་འཁྲབ་སྟོན་པས།།
བསྐྱར་གླུ་འགའ་ཤས་ཤིན་ཏུ་སྙན།།
མཛེས་མ་དེ་ཚོའི་ཉམས་འགྱུར་ནི།།
འདྲེན་བྱེད་མིག་གི་དགའ་སྟོན་བཤམས།།
སྐད་ངག་སྙན་མིན་ཡོད་ཀྱང་རུང་།།
གདོང་དམར་བོད་ཀྱི་རྒྱུད་ཡིན་ཟེར།།
རང་རིགས་ཤ་ཞེན་ཡོད་དགོས་ལབ།།
ཀ་ཁ་སུམ་ཅུ་ཤེས་དགོས་ཟེར།།
དུས་ཚོད་རིན་ཐང་འཛིན་དགོས་ཟེར།།
ཤེས་རིག་ཡོན་ཏན་སྦྱོང་དགོས་ཟེར།།
ཆང་རག་དུ་བ་མི་བྱེད་ཟེར།།
ཕ་མའི་དྲིན་ལན་འཇལ་དགོས་ཟེར།།
ལྷ་དང་བླ་མ་དཀོན་མཆོག་ལ།།
སྐྱབས་ཡུལ་དམ་པ་ཡིན་ནོ་ཟེར།།
ལག་གཉིས་སྙིང་ཁར་སྦྱར་བཞིན་གདའ།།
མིག་གཉིས་བཙུམ་བཙུམ་བྱས་ནས་ཐལ།།
སེམས་ཆུང་ང་འདྲའི་རྣ་ལམ་དུ།།
སྐད་ཆ་དེ་ཚོ་ཤིན་ཏུ་སྙན། །
བསམ་བློ་ཞིབ་ཅིང་བཏང་བའི་ཚེ།།
དེ་ནི་དབུགས་ཀྱི་འབྱིན་རྔུབ་ཙམ།།
བཟའ་ཚང་སྣང་མཐོ་ཁ་ཤས་ཀྱིས།།
ལོ་གསུམ་མ་ལོན་བུ་ཕྲུག་ཡང་།།
ཟིང་ཆ་ཆེ་བའི་གནས་འདི་རུ།།
མཉམ་དུ་ཡོད་པ་དགོད་རེ་བྲོ།།
དབུ་སྐྲ་ཕལ་ཆེར་གངས་ལྟར་གྱུར།།
ཁ་སོ་སུམ་ཅུའི་གྲལ་དེ་ཞིག །
མི་ཚེ་སྐྱིད་སྣང་ལྡན་དགོས་ཞེས།།
རྒན་གོག་སྣང་འཁྲུལ་འགའ་ཞིག་མཆིས།།
གླུ་གར་ཁང་གི་འཁྲབ་སྟོན་པ།།
ན་ཚོད་དར་བའི་གཞོན་ནུ་དག །
བློ་རིག་གསལ་བའི་རིག་རྒོད་དངོས།།
རྣམ་གཡེང་ལས་འདི་སེམས་རེ་ཕམ།།
ན་གཞོན་འཁྲབ་སྟོན་དེ་ཚོ་ཡིས།།
ཟས་བརྗེད་གཉིད་ཆགས་འདི་ལྟ་བུའི།།
རིག་པའི་གནས་ལ་འབད་པ་ན།།
ཇི་འདྲའི་དགའ་བ་འོས་པ་ཞིག །
དར་མའི་དུས་བཟང་འདི་ལ་ཡང་།།
གླུ་ལེན་ཞབ་བྲོས་སྤྲོ་བ་སྟེར།།
ལོ་ན་མཐོ་རུ་འགྲོ་བའི་དུས།།
ཇི་ལྟར་བྱ་ཞེས་ཁེར་ལབ་བྱས།།
མི་རིགས་ཤིག་གི་རྒྱུན་འཛིན་རེད།།
མ་འོངས་མེས་རྒྱལ་བདག་པོ་རེད།།
དུས་ཚོད་གཅེས་འཛིན་ལེགས་བྱས་ཏེ།།
དོན་ཡོད་ལས་ལ་འབད་པར་ཞུ།།
མྱི་བུ་སེམས་ཆུང་ཡིན་ཀྱང་ཆོག །
དོན་མེད་ཇུས་ཏོག་ཡིན་ཡང་སྲིད།།
སེམས་འཚོར་ཅུང་ཙམ་བྲིས་པ་འདི།།
རྩམ་ཟན་ཞིག་གིས་ཁེར་གཏམ་ལགས།།
2013.1.11དགོང་མོའི་ཆུ་ཚོད་3པར་བྲིས།
