ཚེ་སྔོན་ལས་དང་བསོད་ནམས་ཚོགས་ཆེན་བསཌ་པས།།
འཛམ་གླིང་གོ་ལའི་ཡང་རྩེ་གངས་རིའི་ལྗོངས་སྐྱེས།།
གཡུང་དྲུང་བོན་འཕྲད་སྐྱེས་པ་ཕོ་ཡི་ལུས་ཐོབ།།
ཆར་གཞི་བཀོད་སྒྲིག་མཁན་ལ་བཀའ་དྲིན་ཆེའོ།།

ཟླ་དགུ་ཞག་བཅུ་ངལ་མེད་ལྷུམས་སུ་ཁུར་ནས།།
ཉིན་མཚན་དབྱེར་མེད་རང་གི་སྙིང་ལྟར་གཅེས་པའི།།
བུ་ཕྲུག་ཆེད་དུ་དཀའ་ངལ་ཚད་མེད་མྱོང་མཁན།།
དྲིན་ཆེན་ཨ་མ་ཁྱེད་ཉིད་བཀའ་དྲིན་ཆེའོ།།

གཡང་ཁྱིམ་གྲུ་བཞི་འདི་ཡི་ཕྱི་ནང་བཀོད་པ།།
ལོངས་སྤྱོད་ཀླུ་དང་མཉམ་པའི་མཁོ་འདོན་བྱེད་མཁན།།
ལྷག་བསམ་འོ་མའི་མདངས་ཀྱིས་བརྩེ་བས་སྐྱོང་མི།།
དྲིན་ཆེན་ཨ་ཕ་རྒན་པོ་བཀའ་དྲིན་ཆེའོ།།

སྐད་དང་ཡིག་རིག་དུ་མར་འཆད་ལ་མཁས་ཤིང་།།
བློ་གསལ་གཞོན་ནུར་མི་ཚེའི་འོད་སྣང་སྟེར་མཁན།།
ཤེས་ཡོན་རིན་བྲལ་ནོར་བུ་ཕངས་མེད་སྦྱིན་མི།།
དགེ་བའི་བཤེས་གཉེན་དམ་པ་བཀའ་དྲིན་ཆེའོ།།

སྣ་མང་ཤེས་བྱའི་བདུད་རྩི་མཉམ་རོལ་བྱས་ཤིང་།།
དུང་སེམས་འོ་མའི་མཚོ་མོ་གཅིག་ཏུ་བསྡུས་པའི།།
སློབ་སྦྱོང་དགོས་པའི་སྐུལ་མ་ཡང་ཡང་གནང་མཁན།།
འགྱུར་མེད་སློབ་གྲོགས་རྣམ་པ་བཀའ་དྲིན་ཆེའོ།།

གཞུང་དྲང་གཤིས་རྒྱུད་བཟང་བའི་གངས་དཀར་ལྷ་མོ།།
ལང་ཚོའི་སྒེག་ཉམས་གཞན་གྱི་དོད་ཟླ་བྲལ་བའི།།
རང་ཚུག་བརྟན་ཅིང་འགྱུར་མེད་བརྩེ་དུང་ཟབ་པ།།
དགའ་བའི་གྲོགས་མོ་ཁྱེད་ཉིད་འཀའ་དྲིན་ཆེའོ།།

ང་ཡི་མ་འོངས་མི་ཚེའི་བགྲོད་ལམ་རིང་མོར།།
དགའ་སྐྱིད་འབུམ་ལྡན་འཚོ་ལ་རོལ་རྒྱུའི་དོན་ལ།།
ཐབས་ཤེས་གང་ལེགས་བཙལ་བའི་ཤེས་གྲོགས་དམ་པ།།
ཁ་མིན་སེམས་ཀྱི་གཏིང་ནས་བཀའ་དྲིན་ཆེའོ།།

2012.8.24ཉིན་ཆབ་མདོ་རུ་བྲིས།