བོད་ཀྱི་གཅེན་གཅུང་གཉིས་མཐུན་སྒྲིལ་བྱོས།
25-07-2012
རྩོམ་པ་པོ། ས་འཛིན་དཀར་པོ།
ཁ་བ་ར་བས་བསྐོར་བའི་བསིལ་ལྗོངས་ཡུལ།།
གཤེན་རབ་མེས་པོའི་མུ་ཐག་གསེར་ཕྲེང་དང་།།
ཆོས་རྒྱལ་མེས་གསུམ་འདྲེན་པའི་ཤཱཀྱའི་བརྒྱུད།།
སྡེ་གཉིས་ཆོས་ཀྱི་འོད་མདངས་བོད་ཁམས་རྒྱས།།
གནའ་བོའི་གཤེན་རབ་ཆོས་ལ་མ་སྡང་བར།།
འཕགས་པའི་ཤཱཀྱའི་ཆོས་ལ་མ་བརྙས་དགོས།།
བན་བོན་བདེ་སྡུག་གངས་ཅན་ཡུལ་ནས་ཚར།།
ནང་དམེར་མ་སྦྱོར་ཆིག་སྒྲིལ་མདུན་སྐྱོད་བསྒྱུར།།
གནའ་བོ་མེས་པོའི་རང་གདོང་རྟོགས་དཀའ་ཡང་།།
ཉེ་དུས་མེས་པོའི་གཤིས་ལུགས་ཉམས་མེད་དགོས།།
ཡར་སྟོད་གཤེན་བརྒྱུད་བོད་ཁམས་བཙན་པོ་ཡོད།།
བར་ཁམས་བན་སྡེའི་རྒྱལ་ཁམས་བཙན་པོ་འཁྲུངས།།
བོད་ཁམས་ཟུང་གིས་ལྷད་མེད་ཞབས་རྗེས་ཡོད།།
སྡེ་གཉིས་མ་འཁྲུགས་གངས་ཅན་བདེ་སྡུག་ལྟོས།།
ལ་བ་གདོང་དམར་རང་གཤིས་གནས་ལུགས་དེ།།
ནམ་ཡང་མ་དོར་བྱམས་པའི་བརྩེ་སེམས་སྐྱོང་།།
འདས་པའི་ཡབ་མེས་ལོ་རྒྱུས་ལེགས་ཉེས་གཉིས།།
ཀླད་རྙིང་སྒེར་སྤྱོད་རིང་ལུགས་ཡོངས་སྤོང་ནས།།
དཀྱེལ་ཡངས་འདྲ་མཉམ་མི་ཡི་ཚོར་ཤེས་དགོས།།
སྦྲ་ནག་ཁྱིམ་གཞིའི་བརྒྱུད་པའི་བན་བོན་གཉིས།།
དུས་རབས་ཉི་ཤུར་གཅིག་འགྲོགས་གཤེན་སངས་གཉིས།།
གངས་ཅན་བསིལ་ལྗོངས་ཁ་དབུགས་གཅིག་ལས་བྱུང་།།
འབྱུང་བཞིའི་ཕུང་པོའི་རིགས་བརྒྱུད་གཅིག་ལས་མཆེད།།
གངས་ལྗོངས་ཡབ་མེས་ཟུངས་ཁྲག་བསླད་མེད་གཉིས།།
བན་བོན་གཉིས་ཀྱིས་ཆོས་གཤིས་བདེའི་དོན་བརྗོད།།
གངས་དཀར་གདོང་དམར་རང་གཟུགས་སྙིང་རྗེ་ཡོད།།
ཡབ་མེས་སྦྲ་ནག་གཅིག་མཆེད་གཅེན་གཅུང་གཉིས།།
རྣམ་ཀུན་མཐུན་སྒྲིལ་མ་གཏོར་གངས་ཕྲུག་གཉིས།།
གསལ་བཤད། མཚོ་སྔོན་བོད་ཡིག་ཟིན་བྲིས་ས་འཛིན་དཀར་པོའི་ཟིན་བྲིས་ལས་ནང་འདྲེན་བྱས།
འདིར་དྲྭ་གྲོགས་རྣམས་པས་མྱི་གཞི་ལ་དམའ་འབེབ་དང་ཟུར་ཟ་བྱེད་རྒྱུའི་ཡིག་སྙིགས་སྤུང་མ་ཡོང་རོགས།
