བོན་ཀློག་པ་ནི་བོད་ཀློག་པའང་ཡིན། །

རྩོམ་པ་པོ།  སེང་རྡོར།

བོན་ནི་དུང་ཤོག་དཀར་པོའི་གངས་ཧྲག་སྟེ། །

བོན་ནི་གཡུ་རིས་སྔོན་པོའི་བྲག་གཡམ་སྟེ། །

དམུ་རྒྱུད་ཐིམ་པ་སྐས་ཀྱི་གཡུང་དྲུང་ཁར། །

ཕྱྭ་བཟའ་ངང་བྲང་མི་ཡི་ཁྱུང་རུ་གདངས། །

གོང་དྲུག་ལྷ་རྩེ་སྲིད་པའི་བོན་སྐད་ཡིན། །

འཆང་འགག་སྦང་མ་གཤེན་གྱི་བརྡ་ཆད་ཡིན། །

རག་ཤ་སྲིན་པོའི་རིགས་ཀྱི་མགོ་ཐོག་ཏུ། །

གཏོ་རྒྱལ་བོན་གྱི་སྒོ་མོ་ངམ་གྱི་ཕྱེ། །

མགོན་བཙུན་ཕྱྭ་ཡི་ཡུལ་དུ་བེའུ་ཙེ་ཡོད། །

ཤིང་གི་གཞའ་ཚོན་འོད་འབར་ཅི་ལ་མེད། །

འོལ་མོའི་གསས་མཁར་ནང་ན་བོན་སྒོ་ཡོད། །

འཕྲུལ་གྱི་རྒྱལ་རྟགས་ཡི་གེ་ག་ལ་མེད། །

སྤུ་ལོ་རྔུལ་ཤོད་ཅེས་པ་བོན་ལས་བྱུང་། །

བརྒྱ་ཤོང་ཁ་སྤྲོད་ཞེས་ཀྱང་བོན་ལ་གྲགས། །

ཕེ་ཤ་ཨ་མའི་བོན་དྲི་ཐུལ་བ་ཡི། །

རྨང་པོའི་ངེས་ཚིག་གཟི་རྡོ་ཁྲ་བོ་འདྲ། །

སོག་ཀའི་འཇིག་རྟེན་ལྟ་བུའི་བོན་སྒོ་ལ། །

ཆབ་ཀྱི་གྲམ་པ་ཙམ་གྱི་བག་ཆགས་འཇོག །

འཁོར་བ་སྒྱིད་ལུག་ཡིན་པས་ད་དུང་བཤུམས། །

དྭངས་ཀྱི་ཐུན་སྐྱོགས་འཕེན་པ་རན་ཙམ་གྱིས། །

རྨ་བྱའི་ལྡེམ་རྒྱངས་ཅན་གྱི་བོན་སྒོ་ལ།  །

སེམས་ཉིད་གཡུང་དྲུང་གློད་དེ་འཕྲུལ་ངག་སྨྲ། །

རྒོད་ཀྱི་འཕར་འབད་ཅན་གྱི་བོན་སྒོ་ལ། །

སྣང་བ་གཡུང་དྲུང་བསྒྲིལ་ཏེ་གཤེན་སྐད་རྒྱག །

ཁྲོ་ལོ་གནམ་གྲགས་བསྐལ་བའི་མཐོ་བཅད་དང་། །

འཕར་བ་འཕར་ཆུང་འཁོར་པའི་ཟུར་བསྙལ་ཏེ།  །

གསེར་གྱི་སྦར་ཤད་ཡིན་པའི་བོན་སྒོ་ལ།  །

དངུལ་གྱི་གཟར་བུ་དེ་ཡང་ཆེད་དུ་བྱ།  །

དུང་གི་སོ་འཁོར་སྟོན་དང་ཕ་ཆོས་ལགས། །

ཡི་གེ་ཨ་ཀར་སྤྲོས་དང་མ་ཅོས་ལགས། །

ཀོང་ཡུལ་བྲེ་སྣའི་ཕྱོགས་སུ་ང་རང་ཡོད། །

ལང་ལིང་གྲོང་ཁྱེར་ཕྱོགས་སུ་ཁོ་ཡང་ཡོད། །

ང་ནི་ཁྱོད་ཀྱི་དཔྱད་བུ་ཁྲི་ཤེས་ཡིན། །

ང་ནི་ཁྱོད་ཀྱི་སངས་པོ་འབུམ་ཁྲི་ཡིན། །

གནམ་གྱི་ལྷུམས་རྩེར་གཤེགས་པའི་སྐྱིལ་ཀྲུང་དེ། །

རང་གི་གྱང་ལྡེབས་ངོས་སུ་ཕྱེད་ཙམ་འབྲི།   །

གཏོ་འདི་གཤེན་གྱི་སྦུབས་སུ་བརྫིས་པ་དང་། །

གླུད་འདི་སྲིད་པའི་བུག་ཏུ་བཅོས་པ་དང་། །

རྔ་འདི་བོན་གྱི་ཁོག་ནས་བརྡུངས་པ་སྟེ།  །

ཆོད་དང་ལམ་ཕྱོད་ཨེ་འདུག་གཕན་གྱིས་ཤོད། །

༢༠༡༠ལོའི་ཟླ་༨་པའི་ཚེས་༢༦ཉིན་ཕ་ཡུལ་དུ་བསྐྱོད་པའི་ལམ་དུ་བྲིས། །

སེང་རྡོར་ལགས་ཀྱི་༼       ཉག་གའི་ལྗང་སེར་གློག་དམར  ༽ལས་ཡིག་བཏགས་བྱས།