༄༅།། བརྡ་སྤྲོད་སྲིད་པའི་སྒྲོན་མེ་ལས་འཕྲོས་པའི་དྲིས་ལན་
གསར་བུའི་བློ་རྡེག།
༡༽དྲི་བ། ཐོག་མར་གཞུང་འདིའི་མཚན་དོན་རགས་ཙམ་ཞིག་འགྲེལ་དང་། ལན། དེ་ནི་མ་རྟོགས་སེམས་ཅན་ཚིག་གིས་མ་ཁྲིད་ན། །མུན་པའི་མཛུབ་གཡུག་དེས་ནི་བརྡ་མི་འཕྲོད། །ཅེས་གསུངས་པ་ལྟར། སྲིད་པ་འཁོར་བ་དང་ཞི་བ་མྱང་འདས་ཏེ་ལུགས་ཆེན་པོ་གཉིས་ཀྱི་རྣམ་བཞག་གང་ལ་ཞུགས་ཀྱང་ཐོག་མར་བརྡ་ཞེས་སྐྱེས་བུའི་བྱེད་རྩོལ་ལས་བྱུང་བའི་མིང་ཚིག་ཡི་གེའི་སྦྱོར་སྟངས་འདི་ལ་བརྟེན་ནས་ངོ་སྤྲོད་དེ་ཤེས་དགོས་ལ་དེ་འདྲའི་བརྡ་སྦྱོར་གྱི་གཞུང་འགྲེལ་ཇི་སྙེད་ཅིག་བཞུགས་པ་ལས། དེ་དག་ཀུན་གྱི་སྙིང་པོ་སྟེ་ཚིག་ཉུང་དོན་འདུས་ཕྱོགས་གཅིག་ཏུ་བསྡུས་པ། དཔེ་ཇི་ལྟར་ན་སྲིད་པའི་སྒྲོན་མེ་ཞེས་རྒྱ་མཚོའི་བཅུད་ལས་ཐོན་པའི་ཉི་མས་ཀྱང་གླིང་བཞིའི་མུན་པ་སེལ་ཞིང་བརྟན་གཡོ་ཀུན་སྣང་བར་བྱེད་ལ། དོན་ནི་གཞུང་འདིས་བློ་རྨོངས་ནང་གི་མུན་པ་བསལ་ཅིང་ཤེས་བྱ་ཀུན་གྱི་ཡིན་ལུགས་གསལ་བར་སྟོན་པས་ན་བྱེད་ལས་བོན་མཚུངས་ཀྱི་སྒོ་ནས་བཞུགས་ཞེས་འདིར་བསྟན་པའོ།།
༢༽ དྲི་བ། འབྱུང་བ་ཆེ་ཆུང་ལས་འཕྲུལ་ཡིག་བཞི་བཅུ་བྱུང་དོན་དང་དེ་ལྟར་ངེས་པའི་རྒྱུ་མཚན་གང་ཡིན། ལན། དེ་ནི་ལུང་ལས། སྒྲ་ཡི་རྒྱུ་ནི་འབྱུང་བ་བཞི་ཡིན་ལ་རྐྱེན་ནི་སེམས་ཡིན་པས་འབྱུང་རྒྱུ་དབང་པོའི་རྐྱེན་འཛོམས་པའོ། ཞེས་གསུངས་པ་ལྟར། སྤྱིར་སྒྲ་ཐམས་ཅད་འབྱུང་བའི་ཁམས་ལས་གྲུབ་ཅིང་དེ་ལས་དཔའ་བོ་འབྲུ་ལྔ་ནི་སོ་སོར་འབྱུང་བ་ལྔ་དང་འབྲེལ་སྟབས་དེ་དག་ལས་འཕྲོས་པའི་ཡི་གེ་རྣམས་ཀྱང་རྒྱུ་འབྱུང་བ་དང་རྐྱེན་ཀུན་སློང་གི་འཕྲོད་སྦྱོར་འདྲ་མིན་ལ་བརྟེན་སྒྲ་གདངས་དྲག་ཞན་སོགས་དེ་མཚུངས་སུ་དབྱེ་བ་ནི་ཐུན་མིན་ཞང་བོད་ཡི་གེའི་བྱུང་ཁུངས་རྣལ་མའོ།། ༣༽ དྲི་བ། སྤྱིར་དབྱངས་དང་གསལ་བྱེད་གཉིས་པོ་ཁྱད་པར་གང་གིས་འབྱེད་དགོས། ལན། དབྱངས་ནི་རང་གི་ཐུན་མིན་གནས་དང་བྱེད་པ་མི་གསལ་ལ་སྒྲ་ཡི་གདངས་སམ་ང་རོ་ཤས་ཆེ་བའི་སྒོ་ནས་དང་། གསལ་བྱེད་ནི་གནས་དང་བྱེད་པ་གསལ་ལ་རང་གྲོགས་དབྱངས་དང་སྦྱར་ཚེ་བརྗོད་དོན་གསལ་བར་སྟོན་པ་ཞིག་སྟེ་དེ་གཉིས་རྟེན་དང་བརྟེན་པའི་ཚུལ་དུ་གནས་པའོ།། ༤༽དྲི་བ། འགའ་ཞིག་གིས་དབྱངས་བཞིར་བཤད་མོད་འདིར་བརྒྱད་ཙམ་གསུངས་པའི་དོན་གང་ཡིན་ནམ། ལན། ཡི་གེ་འབྲི་སྦྱོར་སྐབས་ལུས་སམ་རྩ་བའི་རང་བཞིན་ཅན་ལ་གསལ་བྱེད་དང་། དེའི་རྒྱན་ལྟར་གྱུར་ཅིང་ཡན་ལག་གི་རང་བཞིན་ཅན་ལ་དབྱངས་ཞེས་འཇོག་ཚུལ་ཡོད་པ་ལྟར་འདིར་དབྱངས་བརྒྱད་དུ་འཐད་པའོ།། ༥༽ དྲི་བ། བོད་བརྡ་ལ་སྲོག་མེད་ཡི་གེ་མེད་ན་འདིར་དབྱངས་གཅིག་པུར་སྲོག་གི་ཡི་གེར་ངོས་འཛིན་མཛད་དོན་གང་ཡིན། ལན། མིང་ཚིག་མཚམས་སྦྱོར་གྱི་སྐབས་དབྱངས་ཨི་སོགས་ཀྱིས་བྱ་བ་གསལ་བར་སྟོན་པའི་ཆ་ནས་སྲོག་ཅེས་དང་། དེའི་རྟེན་གཞི་ཀ་སོགས་དཔེར་ན་སྐྱེས་བུའི་ལུས་ལྟར་ཤེས་པའི་ཆེད་དུ་དབྱངས་ལ་སྲོག་ཡིག་ཏུ་སྨོས་པ་ལས་དབྱངས་ཁོ་ན་སྲོག་ལྡན་ཡིན་པའི་དོན་མ་ཡིན་ནོ།། ༦༽ དྲི་བ། གཞན་སྡེས་དབྱངས་གསལ་སོ་བཞིར་འཇོག་ལ་འདིར་འཕྲུལ་ཡིག་བཞི་བཅུར་འཇོག་པ་གཉིས་ཀ་འཐད་དམ། ལན། དང་པོ་ནི་བསྡུས་ཚུལ་གཙོར་བསྟན་གྱི་སྒོ་ནས་དང་ཕྱི་མ་ནི་རྒྱུད་གཞུང་དངོས་ཀྱི་དགོངས་དོན་གཤའ་མ་ཡིན་པས་དེ་ལྟར་འཆད་པ་ནི་ལེགས་པའི་རྣམ་བཞག་གོ། ༧༽ དྲི་བ། ཨ་ནི་ཀུན་གྱི་སྲོག་ཏུ་ཞུགས། །དབྱངས་དང་གསལ་བྱེད་གཉིས་ཀའང་ཡིན། །ཞེས་པའི་དོན་ཇི་ལྟར་འགྲེལ། ལན། མིང་ཚིག་སོགས་ཐ་སྙད་གང་བརྗོད་ཀྱང་ངམ་ངམ་ཤུགས་ཀྱིས་ཨ་སྒྲ་ཞིག་ཐོན་མི་ཐོན་པ་མེད་སྟབས་ཨ་ནི་ཀུན་གྱི་སྲོག་སྟེ་སྒྲ་ཀུན་ལ་ཞུགས་པས་དང་། དེ་བཞིན་བརྗོད་པ་ཐ་དད་ལ་ལྟོས་ཏེ་རེས་འགའ་ལུས་དང་རེས་འགའ་དབྱངས་ཀྱི་ནུས་པ་ཐོན་པའི་ཆ་ནས་དེ་གཉིས་ཀ་ལ་བཞེད་པ་འདྲའོ།། ༨ ༽ དྲི་བ། དཔེ་ཆ་འགར་ད་ལ་ཡ་སྟ་ཅན་མཐོང་མོད་འདིར་མི་བསྟན་པ་གང་ཡིན་ནམ། ལན། ད་ལ་ཡ་སྟ་འབྲི་བའི་སྲོལ་དེ་བྲིས་པ་དག་གིས་རྒྱ་དང་སྒྲ་འདྲ་མཚུངས་ཀྱི་སྒོ་ནས་སླ་འབྲི་བྱས་པ་ཡིན་འདུག་ཅིང་དེ་དང་འདྲ་བ་དཔེར་ན་ཐུགས་ལ་ཐྱ་དང་། གཟུགས་ལ་ཟྱ། གཉིས་ལ་༢་སོགས་བྲིས་པ་ལྟར་དང་། འདིར་མ་བསྟན་པ་ནི་མཁའ་འགྲོ་རིན་ཆེན་ཕྲེང་རྒྱུད་ལས། ཀྱ་ཁྱ་གྱ་པྱ་ཕྱ་བྱ་མྱ། །མ་འཁྱིལ་ཡ་སྟ་ཐོབ་བྱེད་བདུན། །ཞེས་སོགས་རྒྱུད་གཞུང་དག་གི་དགོངས་དོན་ལྟར་འཐད་པ་ཡིན་ནོ།། ༩༽ དྲི་བ། འདིར་ཉྭ་ནི་ལུས་ཀྱི་བྱེ་བྲག་ཡིན། །ཞེས་དང་། བརྡ་སྤྲོད་གཞན་དུ། ཆུ་ནང་ཉ་མོ་ཉ་རྐྱང་ལ། །རྐང་པའི་ཉྭ་ལ་ཝ་ཟུར་ཡོད། །ཅེས་གསལ་མོད། དཔེ་ཆ་འགར་ཆུ་ཡི་ཉྭ་ལ་ཝ་ཟུར་བཏགས་པ་མཐོང་བས་དེ་འགྲིག་གམ། ལན། གོང་གསལ་ལྟར་སྤྱིར་ན་རྐང་པའི་ཉྭ་ལ་ཝ་ཟུར་འདོགས་པ་ཡོངས་སུ་གྲགས་ཤིང་དེའི་དགོས་པ་ཡང་ཆུ་ཡི་ཉ་དང་མི་ནོར་བའི་ཆེད་ཡིན་པར་གསུངས་ཤིང་ས་ཆ་འགར་དེ་ལས་ལྡོག་པར་བྱེད་པའི་རྒྱུ་མཚན་གསལ་བར་མ་ཤེས་མོད། གང་ལྟར་ལག་ལེན་དངོས་ཀྱི་ཁྲོད་དུ་རྐང་པའི་ཉྭ་ལ་ཝ་ཟུར་བྱས་ན་ཡོངས་གྲགས་ལྟར་གོ་སྟབས་བདེ་བས་དེ་བཞིན་འཐད་དོ།། ༡༠༽ དྲི་བ། ཀ་སོགས་སུམ་ཅུ་པོ་འབྱུང་བའམ་རྟགས་ཀྱི་དབྱེ་ཚུལ་དང་དེ་དག་རྒྱུ་མཚན་གང་གིས་ངེས། ལན། དེ་ལ་ས་ཆུ་མེ་གསུམ་དང་། མེ་ཡི་མེ། མེ་ཙམ་དང་ལྔ་རུ་དབྱེ་བ་བརྡ་སྤྲོད་ཉེར་བདུན་སོགས་ཀྱི་བཞེད་པ་དང་། ཕོ་མོ་མ་ནིང་ཤིན་ཏུ་མོ་མོ་གཤམ་དང་ལྔ་རུ་དབྱེ་བ་མཁའ་འགྲོ་རིན་ཆེན་ཕྲེང་རྒྱུད་སོགས་ཀྱི་དགོངས་པ་གཉིས་སུ་ཡོད་ཀྱང་དོན་གྱི་འབབ་ས་གཅིག་ཏུ་ངེས་ལ་དེ་ལྟར་དབྱེ་བའི་རྒྱུ་མཚན་ཡང་རང་རང་མིང་གཞིར་འཇུག་སྐབས་སྔོན་རྗེས་སོགས་ཀྱི་འཇུག་གཞིར་སྒྲ་གདངས་ལྕི་ཡང་ངམ་དྲག་ཞན་གྱི་སྒོ་ནས་ཕྱེས་པ་སྟེ། དེ་ལྟར་གྱི་སྒྲ་དྲག་པ་སའམ་ཕོ། སྒྲ་རན་པ་སྟེ་འབྲིང་བ་ལ་ཆུའམ་མ་ནིང་། སྒྲ་ཞན་པ་ལ་མེའམ་མོ། སྒྲ་ཅུང་ཟད་ཞན་པ་ལ་མེ་ཡི་མེའམ་ཤིན་ཏུ་མོ། སྒྲ་ཤིན་ཏུ་ཞན་པ་ལ་མེ་ཙམ་མམ་མོ་གཤམ་གྱི་ཡི་གེར་བཞག་པ་ཡིན་ནོ།། ༡༡༽ དྲི་བ། སྔོན་འཇུག་ལྔ་པོ་ནང་གསེས་ཀྱི་འཇུག་ཚུལ་ཕོ་མོ་སོགས་དབྱེ་བའི་རྒྱུ་མཚན་གང་ཡིན། ལན། དེ་ཡང་གོང་ལྟར་རང་འཇུག་ཡུལ་མིང་གཞི་དང་སྦྱར་ཏེ་ཀློག་ཚེ་སྒྲ་གདངས་ཐོན་ཚུལ་གྱི་སྒོ་ནས་བཞི་རུ་ཕྱེས་པ་ཡིན་ནོ།། ༡༢༽ དྲི་བ། གཞུང་ལས་མི་འཇུག་ངེས་པ་བསྟན་པ་དེ་རྣམས་རྒྱུ་མཚན་གང་གིས་འཇོག ལན། གཙོ་བོ་སྒྲ་དེ་ལྟར་བོད་སྐད་ལ་མེད་པར་མ་ཟད་སྦྱར་ཡང་ཀློག་ཐབས་མི་འབྱུང་ལ་དོན་ཅི་ཡང་སྟོན་མི་ནུས་པས་དེ་ལྟར་གསུངས་ཤིང་། དམིགས་བསལ་ཡིག་རྙིང་འགར་བཆད་གཐོར་ལྟ་བུར་འབྱུང་བ་སོགས་ནི་རྒྱུ་མཚན་གཞན་དབང་གིས་ཡིན་ནོ།། ༡༣༽དྲི་བ། འདིར་བསྟན་དངོས་པོ་བདག་གཞན་དང་དུས་གསུམ་གྱི་གོ་དོན་དམིགས་བསལ་བ་བཤད་རྒྱུ་ཡོད་དམ། ལན། ཡོད་དེ་གཞུང་ལས། ལས་གང་བྱེད་པ་པོ་ལ་བདག །ཅེས་བསྟན་པ་ལྟར། ལས་གང་ཞིག་ཡིན་རུང་བྱེད་པ་པོ་གཞན་དང་དངོས་སུ་འབྲེལ་བའི་དབང་དུ་བྱས་ནས་བྱེད་མཁན་དང་། བྱེད་པའི་དངོས་པོ། དེ་ཡི་བྱེད་པ་བཅས་ལ་དངོས་པོ་བདག་དང་། བྱ་བའི་ཡུལ་ལ་གཞན་ཞེས་བསྟན་པ་ལྟར། བྱ་བ་གང་ཡང་བསྒྲུབ་བྱའམ་བསྒྲུབ་རྒྱའི་དངོས་པོ་དང་། བྱ་བ་དེ་བསྒྲུབ་ཡུལ། དེ་འབྲེལ་བྱ་ལས་བཅས་ལ་དངོས་པོ་གཞན། བྱེད་པོ་གཞན་དངོས་སུ་ཡོད་དམ་མེད་ཀྱང་བྱ་བ་གང་ཞིག་བྱས་ཟིན་པའམ་བྱས་ཚར་བ་ནི་དུས་འདས་པ། དེ་འདྲའི་བྱ་བ་གཞི་ནས་བསྒྲུབ་དགོས་རྒྱུའམ་བྱ་རྒྱུ་ནི་དུས་མ་འོངས་པ། དེ་འདྲའི་བྱ་བ་བྱེད་བཞིན་པའམ་བྱེད་སྒང་ནི་དུས་ད་ལྟ་བ་ཞེས་ངོས་འཛིན་དགོས་སོ།། ༡༤༽དྲི་བ། འདིར་སྔོན་འཇུག་ལྔ་པོ་བྱ་ཚིག་ཁོ་ན་ལས་མིང་རྐྱང་ལ་འཇུག་ཚུལ་ཞིབ་གསལ་མི་བསྟན་པའི་རྒྱུ་མཚན་གང་ཡིན། ལན། རྟགས་འཇུག་བསླབ་པའི་དགོས་པ་གཙོ་བོ་བྱ་ཚིག་གི་རྣམ་དབྱེ་ལ་མཁས་པའི་ཆེད་ཡིན་སྟབས། དེ་མཚུངས་འདིར་སྐབས་བབ་བྱ་ཚིག་གི་རྣམ་བཞག་མཛད་ལ་འཕུལ་ལྔ་པོ་མིང་རྐྱང་ལ་འཇུག་ཚུལ་མིང་གཞིའི་སྐོར་ཟུར་དུ་བཤད་ཅིང་དེ་ལྟར་མིང་ཚིག་དང་བྱ་ཚིག་གཉིས་ཁྱད་པར་འབྱེད་བདེ་བའི་ཕྱིར་དུ་སོ་སོར་བསྟན་པའོ།། ༡༥༽ དྲི་བ། འོ་ན་བྱ་ཚིག་དང་མིང་ཚིག་གཉིས་ཀས་དོན་གྱི་ངོ་བོ་རེ་སྟོན་མོད། དེ་གཉིས་ཀྱི་ཁྱད་པར་གང་གིས་འབྱེད་དགོས། ལན། དེ་ནི་བརྡ་སྤྲོད་གཞུང་གི་དཀའ་གནད་ཅིག་ཡིན་ལ། སྤྱིར་ན་མིང་ཚིག་དང་བྱ་ཚིག་ཚང་མས་རང་རང་གི་བརྗོད་བྱའི་དོན་གྱི་ངོ་བོ་རེ་སྟོན་པའི་ཆ་ནས་མིང་ཡིན་མོད། འདིར་མིང་ཚིག་ཅེས་པ་ཐ་སྙད་ཀུན་ལ་མ་ཁྱབ་པའི་བརྗོད་བྱ་དེའི་འགྱུར་ལྡོག་གམ་དུས་གསུམ་གྱི་ཁྱད་པར་མི་སྟོན་པའི་མིང་རྐྱང་ཙམ་ཁོ་ན་སྟེ། དཔེར་ན། ཀ་བ། གླང་ཆེན། ལྕགས་རྟ། ཆུ་ཞེས་པ་ལྟ་བུ་ཡིན་ལ། བྱ་ཚིག་ནི་དེ་ཙམ་མ་ཡིན་པར་བརྗོད་བྱ་དེའི་འགྱུར་ལྡོག་གམ་དུས་གསུམ་སོགས་གསལ་བར་སྟོན་པའི་ཐ་སྙད་དེ། དཔེར་ན། འདོགས་པ། གདགས་པ། འཁྱུད་པ། འཐབ་པ་ལྟ་བུ་ཡིན་ཅིང་དེ་དག་ལ་བདག་སྒྲ་སྦྱར་ཚེ་འདོགས་པ་པོ། འཁྱུད་པ་པོ། འཐབ་པ་པོ་ལྟ་བུ་གང་ཟག་ལ་གོ་བ་དང་། གོང་གི་མིང་རྐྱང་དེ་རིགས་ལ་བདག་སྒྲ་སྦྱར་ན་ཀ་བ་པོ། གླང་ཆེན་པོ། ལྕགས་རྟ་པོ་ལྟ་བུ་འཁྱལ་གཏམ་ལས་མི་འབྱུང་བས་གཙོ་བོའི་ཁྱད་པར་དེ་དག་གིས་འབྱེད་དགོས།། ༡༦༽ དྲི་བ། འདིར་བསྟན་གྱི་བྱེད་པ་པོ་ཡིན་ན་གང་ཟག་ཡིན་ཨེ་དགོས། ལན། མི་དགོས་ཏེ། གཞུང་ལས། གང་ཟག་ཤེས་ཆ་བེམ་གསུམ་དབྱེ། །ཞེས་གསུངས་པ་ལྟར་དཔེར་ན། རྟ་ཡིས་རྩྭ་ཟོས། མིག་ཤེས་ཀྱིས་མཐོང་། ཐོ་བས་བརྡུང་ལྟ་བུར་རྟ་དང་མིག་ཤེས་ཐོ་བ་བཅས་རིམ་བཞིན་བྱ་བ་བྱེད་པས་ན་བྱེད་པ་པོ་ལ་འཇོག་པར་སྣང་ངོ་།། ༡༧༽ དྲི་བ། བྱ་ཡུལ་དང་བྱ་བའི་ཡུལ་གཉིས་ལ་ཁྱད་ཅི་ཡོད། ལན། བྱ་ཡུལ་ནི་བྱ་བ་གང་ཞིག་སྒྲུབ་ཚེ་བྱ་བ་དེ་ཉིད་བསྒྲུབ་སའི་གནས་ལ་གོ་བ་དཔེར་ན་གནས་གསེབ་ཏུ་ཤིང་གཅོད་ཚེ་ནགས་གསེབ་ལྟ་བུ་ལ་འཇོག་པ་དང་། བྱ་བའི་ཡུལ་ནི་བྱ་བ་བསྒྲུབ་རྒྱུ་གང་ཡིན་པ་དེ་ལ་གོ་བ་དཔེར་ན་ཤིང་གཅོད་ཚེ་གཅོད་རྒྱུའི་ཤིང་དེ་ཡིནན་སྟབས་དེ་གཉིས་རྟེན་དང་བརྟེན་པ་ཡིན་པས་ངོ་བའི་ཁྱད་པར་ཡོད་དོ།། ༡༨༽ དྲི་བ། བྱེད་པ་པོ་ཞིག་གིས་བྱ་བའི་ཡུལ་ལ་བྱ་བ་བྱེད་པའི་དཔེར་བརྗོད་ཅིག་བྲིས་ཏེ་དེར་བདག་གཞན་དུས་སོགས་ཆ་ཚང་ཞིག་ཕྱེས་དང་། ལན། དེ་ནི་དཔེར་ན། སློབ་དཔོན་གྱི་དགོངས་པས་གཞུང་དོན་འགྲེལ་བར་བྱེད། ཅེས་པ་ལ་མཚོན་ན། འགྲེལ་བ་པོ་སློབ་དཔོན་དང་། འགྲེལ་བྱེད་དགོངས་པ། དེས་གཞུང་དོན་འགྲེལ་བར་བྱེད་པའི་བྱེད་ལས་ད་ལྟ་བ་གསུམ་ནི་དངོས་པོ་བདག་དང་། དགྲོལ་བྱའི་ལས་གཞུང་དོན་དང་། དེ་དགྲོལ་བར་བྱ་བའི་བྱ་ལས་མ་འོངས་པ་གཉིས་ནི་དངོས་པོ་གཞན། དུས་གསུམ་ནི་གཙོ་བོ་བྱ་ཚིག་གི་ཐོག་ནས་འབྱེད་པ་སྟེ། དགྲོལ་བར་འགྱུར་བ་ནི་མ་འོངས་པ། འགྲེལ་བཞིན་པ་ནི་ད་ལྟ་བ། བཀྲལ་ཟིན་པ་ནི་དུས་འདས་པ་སྟོན་པ་ཡིན། སྐབས་དེའི་འགྲེལ་བར་བྱེད་ཅེས་པ་དེ་བྱེད་ལས་ད་ལྟ་བ་ཡིན་ནོ།། ༡༩༽ དྲི་བ། འདིར་བསྟན་གྱི་བྱ་ཚིག་གམ་ལས་ཚིག་ལ་རྩ་བའི་དབྱེ་བ་གང་ཞིག་ཡོད། ལན། དེ་ལ་གཉིས་ཏེ། བྱ་རྒྱུ་རང་དང་ཐ་དད་པའི་བྱེད་པོ་གཞན་དངོས་དང་འབྲེལ་བ་སྟེ་གོ་བའི་ལས་ཚིག་ལ་བྱེད་འབྲེལ་ལས་ཚིག་ཅེས་པ་དཔེར་ན། བསྟན། བཤད། བསད་ལྟ་བུ་སྟེ་དེ་དག་གྲུབ་ཆར་བྱས་པའི་ཚིག་ཀ་ཆ་ཚང་བཀོད་ཚེ་གཙོ་ཚིག་དང་ལས་ཚིག་བར་དུ་བྱེད་སྒྲའི་ཕྲད་འཇུག་པ་བླ་མས་བསྟན། དཔོན་གྱིས་བཤད། གྲི་ཡིས་བསད་ལྟ་བུར་འབྱུང་ལ། བྱ་རྒྱུ་རང་དང་ཐ་དད་པའི་བྱེད་པོ་གཞན་དངོས་སུ་མ་འབྲེལ་བའི་ལས་ཚིག་ལ་བྱེད་མེད་ལས་ཚིག་ཅེས་པ་དཔེར་ན། བཞུགས། སོང་། ལྷུང་ལྟ་བུ་སྟེ་དེ་དག་གྲུབ་ཆར་བྱས་པའི་ཚི་ཀ་ཆ་ཚང་བཀོད་ཚེ་གཙོ་ཚིག་དང་ལས་ཚིག་བར་བྱེད་སྒྲ་མི་འཇུག་སྟེ། བླ་མ་བཞུགས། རྟ་སོང་། མི་ལྷུང་ལྟ་བུ་ལས། བླ་མས་བཞུགས། རྟ་ཡིས་སོང་ལྟ་བུ་སྦྱོར་སྲོལ་མེད་པས་དབྱེ་བ་གཉིས་སུ་ཕྱེས་པ་ཡིན་ནོ།། ༢༠༽ དྲི་བ། གང་འདྲ་ཞིག་ལ་བྱ་བྱེད་ཐ་དད་པ་ཟེར་ཞིང་དེའི་རྒྱུ་མཚན་གང་ཡིན། ལན། བྱ་བ་གང་ཞིག་བྱེད་ཀྱང་བྱེད་མཁན་དེ་དང་བྱ་རྒྱུ་གཉིས་ངོ་བོ་སོ་སོར་ཡོད་པའི་རིགས་ཏེ་དཔེར་ན། ཞིང་པས་ལོ་ཏོག་བྲེག་ལྟ་བུར་མཚོན་ན་བྱེད་པ་པོ་ཞིང་པ་དང་བྱ་རྒྱུ་ལོ་ཏོག་གཉིས་དངོས་པོ་སོ་སོར་ཕྱེ་རྒྱུ་ཡོད་སྟབས་བདག་གཞན་གྱི་དབྱེ་བ་ཡོད་ཅིང་། བྱེད་མཁན་ལ་བྱེད་སྒྲ་ཡང་འཐོབ་པས་བྱ་བ་དེ་རིགས་ལ་བྱ་བྱེད་ཐ་དད་དུ་བཤད་པ་ཡིན་ནོ།། ༢༡༽ དྲི་བ། དེ་འདྲའི་ལས་ཚིག་ལ་ནང་གསེས་དབྱེ་བ་ག་ཚོད་ཡོད། ལན། བྱེད་པོ་སེམས་ལྡན་སྨྲ་ཤེས་དོན་གོ་ཡིས་བྱ་བ་བྱེད་པ་དཔེར་ན་མཁས་པས་བོན་བཤད་ལྟ་བུར་དབྱེ་བ་དགུ་ལྡན་གྱི་ལས་ཚིག་དང་། བྱེད་པོ་སེམས་ལྡན་ཡིན་ཡང་སྨྲ་ཤེས་དོན་མི་གོ་བས་བྱ་བ་བྱེད་པ་ལུག་གིས་ཆུ་བཏུང་ལྟ་བུ་དབྱེ་བ་བདུན་ལྡན་གྱི་ལས་ཚིག་དང་། བྱེད་པོ་སེམས་མེད་བེམ་པོས་བྱ་བ་བྱེད་པ་ཐོག་གིས་མི་བསད་ལྟ་བུ་དབྱེ་བ་བདུན་ལྡན་གྱི་ལས་ཚིག་བཅས་གསུམ་དུ་དབྱེ་བ་ཡིན་ལ་དེ་དག་བྱ་བྱེད་ཐ་དད་པ་དང་དབྱེ་བའི་དོན་སོ་སོའང་ཤུགས་ལས་ཤེས་དགོས་སོ།། ༢༢༽ དྲི་བ། འོ་ན་བྱ་བྱེད་ཐ་མི་དད་པའི་དོན་དང་དེའི་དཔེར་བརྗོད་ཅིག་བྲིས་དང་། ལན། སྤྱིར་བྱ་བ་སྟེ་དངོས་པོའིའགྱུར་ལྡོག་གང་ལ་ཡང་དེ་ལྟར་འགྲུབ་པའི་རྒྱུ་ཞིག་མེད་པ་མི་སྲིད་མོད། བྱ་བ་དེ་འགྲུབ་པའི་སྐབས་བྱེད་པོ་དངོས་སུ་མི་གསལ་བར་བྱ་བ་ཉིད་ཙམ་སྟོན་པའི་རིགས་ཏེ། དཔེར་ན་དོན་གྲུབ་གདན་ལ་བཞུགས་ལྟ་བུར་བཞུགས་མཁན་བཞུགས་རྒྱུ་གཉིས་ཀ་དོན་གྲུབ་ཡིན་སྟབས་ལས་དང་བྱེད་པོ་གཉིས་ངོ་བོ་སོ་སོར་མི་གསལ་བས་དེ་རིགས་ལ་བདག་གཞན་གྱི་དབྱེ་བ་ཡང་མེད་ཅིང་བཞུགས་མཁན་དོན་གྲུབ་ལ་བྱེད་སྒྲ་དེ་བས་ཀྱང་མི་འཐོབ་བོ།། ༢༣༽ དྲི་བ། དེ་ལ་ནང་གསེས་ཀྱི་དབྱེ་བ་ག་ཚོད་ཡོད། ལན། བྱེད་པོ་སེམས་ལྡན་སྨྲ་ཤེས་དོན་གོས་བྱ་བ་བྱེད་པ་སྐལ་བཟང་མདུན་དུ་བསྐྱོད་ལྟ་བུ་དབྱེ་བ་ལྔ་ལྡན་གྱི་ལས་ཚིག་དང་། བྱེད་པོ་སེམས་ལྡན་ཡིན་ཡང་སྨྲ་ཤེས་དོན་མི་གོ་བས་བྱ་བ་བྱེད་པ་གཅན་གཟན་ཚང་དུ་ཉལ་ལྟ་བུ་དབྱེ་བ་སུམ་ལྡན་གྱི་ལས་ཚིག་དང་། བྱ་བ་བྱེད་སྐབས་བྱེད་མཁན་མི་གསལ་བའི་སེམས་མེད་ལས་གཉིས་ངོ་བོ་གཅིག་པ་བྲིས་པའི་སྨྱུ་གུ་ཆག་ལྟ་བུ་དབྱེ་བ་སུམ་ལྡན་གྱི་ལས་ཚིག་བཅས་གསུམ་དུ་ངེས་ལ་དེ་དག་བྱ་བྱེད་ཐ་མི་དད་པའི་ཚུལ་གོང་དུ་བཤད་པ་བཞིན་ནོ།། ༢༤༽ དྲི་བ། འོ་ན་བྱ་བྱེད་ཐ་དད་ལ་འགྲོ་བའི་ལས་ཚིག་ཡིན་ན་བྱ་བྱེད་ཐ་མི་དད་ལ་མི་འགྲོ་བས་ཁྱབ་བམ། ལན། མ་ཁྱབ་སྟེ། དཔེར་ན་བསྐྱོད་ཅེས་པའི་ལས་ཚིག་དེ་དར་ལྕོག་རླུང་གིས་བསྐྱོད་ཅེས་པ་ལྟ་བུ་དང་ལྷ་དམག་གཡུལ་དུ་བསྐྱོད་ཅེས་པ་ལྟ་བུ་སྟེ་སྦྱར་གཞིའི་ཚིག་གྲོགས་དབང་གིས་དང་པོའི་སྐབས་བྱ་བྱེད་ཐ་དད་པ་དང་། ཕྱི་མའི་སྐབས་བྱ་བྱེད་ཐ་མི་དད་པ་ལ་འགྲོ་བས་དེ་ལྟར་ཁྱབ་པའི་ངེས་པ་མེད་དོ།། ༢༥༽ དྲི་བ། བྱ་བྱེད་ལས་གསུམ་ཚང་བའི་དཔེར་བརྗོད་ཅིག་བྲིས་ནས་དེར་སོ་སོར་ངོས་འཛིན་གྱིས་དང་། ལན། རིགས་ལམ་པས་ནན་ཏན་གྱིས་རྩོད་པ་བརྒྱབ། ཅེས་པ་ལྟ་བུར་མཚོན་ན་རིགས་ལམ་པ་ནི་བྱེད་པ་པོ་དང་ནན་ཏན་ནི་བྱེད་པ་སྟེ་དེ་གཉིས་བྱ་བྱེད་ལས་གསུམ་གྱི་བྱེད་ཅེས་པ་དང་། བརྒྱབ་བྱའི་རྩོད་པ་ནི་བྱ་བྱེད་ལས་གསུམ་གྱི་ལས་ཟེར་ལ། བརྒྱབ་ནི་དེ་གསུམ་ལས་བྱ་ཞེས་པར་ངོས་འཛིན་པ་ཡིན། འདི་ལ་མཁས་པ་འགའ་ཡི་བཞེད་ཚུལ་མི་འདྲ་བ་ཡང་སྣང་ངོ་།། ༢༦༽ དྲི་བ། དུས་གསུམ་སྒོས་ཀྱི་ངོས་འཛིན་ལ། །བྱེད་པོས་ཁྱབ་རུང་མ་ཁྱབ་རུང་། །བྱ་བ་ཀུན་ལ་རིས་མེད་དོ། །ཞེས་པའི་དོན་འགྲེལ་དང་། ལན། སྤྱིར་འདིའི་སྐབས་དུས་གསུམ་བཤད་པའི་དགོས་པ་གཙོ་བོ་ཡང་དངོས་པོ་བདག་གཞན་གྱིས་མ་ཁྱབ་པའི་ལས་ཚིག་རིགས་བསྡུ་བའི་ཆེད་ཡིན་པར་གསུངས་ཤིང་། དེ་ཡང་བྱེད་པོ་དངོས་གསལ་གྱི་ལས་ཚིག་གམ་དེ་མི་གསལ་བའི་ལས་ཚིག་ཀུན་ལ་དུས་གསུམ་དབྱེ་བ་ཕྱེ་རྒྱུ་ཡོད་པས། མདོར་ན་ལས་ཚིག་ཡོད་དོ་ཅོག་ལ་དུས་གསུམ་གྱི་རྣམ་བཞག་བཤད་དུ་ཡོད་པའོ།། ༢༧༽ དྲི་བ། བྱེད་འབྲེལ་ལས་ཚིག་གི་འདས་པ་རྣམས་བདག་གཞན་གང་གི་ཁོངས་སུ་འདུ་བ་ཡིན། ལན། དེ་ནི་ལས་སམ་བྱ་བ་གང་ཡིན་རུང་བསྒྲུབས་ཟིན་པའི་ཆ་ནི་བྱེད་པོ་སོགས་ཀྱི་སྟེང་དུ་མངོན་རྒྱུ་མེད་ཅིང་བྱ་བ་བྱེད་པའི་གཞི་ཡི་སྟེང་དུ་མངོན་པས་ན་འདས་སྒྲ་དེ་རིགས་གཞན་གྱི་ཁོངས་སུ་འཇོག་དགོས་པ་སྟེ། དཔེར་ན་བླ་མས་སློབ་མ་ལ་བོན་བཤད་ལྟ་བུའི་བཤད་ཟིན་པའི་ཆ་ནི་སློབ་མའི་སྟེང་ལས་བླ་མའི་སྟེང་དུ་མངོན་རྒྱུ་མེད་པ་བཞིན་ནོ།། ༢༨༽ དྲི་བ། འདིར་སྐུལ་ཚིག་མ་འོངས་པ་ལ་འདུ། །ཞེས་པའི་དོན་ཇི་ལྟར་འགྲེལ། ལན། སྤྱིར་བྱ་བ་གཞན་ལ་སྐུལ་བྱེད་ཀྱི་ཚིག་རང་ལ་བསམ་སྟེ་སྐུལ་ཚིག་ད་ལྟ་བར་འདོད་མཁན་ཡོད་མོད། འདིར་དེ་ཙམ་ལ་གོ་ན་ཁྱབ་ཆུང་བར་དགོངས་ནས་སྐུལ་ཚིག་དངོས་སྒྲུབས་ཤིག་ལྟ་བུ་ཡིན་ལ་དེ་འདྲའི་བྱ་བ་དོན་གྱི་ཆ་ནས་གཞི་ནས་བསྒྲུབ་རྒྱུ་གཞན་ལ་བཅོལ་ལས་གོ་རྒྱུ་མེད་ལ། དེ་མཚུངས་ཀྱི་བྱ་བ་ཐ་དག་འབྱུང་འགྱུར་འབའ་ཞིག་ཡིན་སྟབས་དུས་མ་འོངས་པ་ལ་བསྡུ་བ་ལས་འོས་མེད་ཅིང་སྐུལ་བྱེད་ཀྱི་ཚིག་རང་ལ་བསམ་ན་ད་ལྟ་བར་བཞག་ཀྱང་མི་ཆོག་པ་མེད་དོ། ། ༢༩༽ དྲི་བ། ལས་ཚིག་ལ་དུས་གསུམ་གཟུགས་འགྱུར་དང་གཟུགས་མི་འགྱུར་བ་གཉིས་ཡོད་པའི་དོན་དང་དཔེར་བརྗོད་རེ་བྲིས་དང་། ལན། དེ་ནི་ལས་ཚིག་འགའ་ཞིག་དུས་གསུམ་སྐུལ་ཚིག་བཅས་པར་སྔོན་རྗེས་དབྱངས་སོགས་འགྱུར་བ་སྟེ་དཔེར་ན། ཡི་གེ་བཀླགས། ཀློག བཀླག ཀློགས་ལྟ་བུ་དང་། འགའ་ཞིག་ད་ལྟ་མ་འོངས་གཉིས་གཟུགས་གཅིག་ལ་འདས་སྐུལ་གཉིས་གཟུགས་འགྱུར་བ་དཔེར་ན། མགོ་རས་ཀྱིས་གཏུམ། གཏུམ། བཏུམས། ཐུམས་ལྟ་བུ་དང་། ཡང་མ་འོངས་འདས་པ་གཉིས་གཟུགས་གཅིག་ལ་ད་ལྟ་སྐུལ་ཚིག་འགྱུར་བ་དཔེར་ན། ནོར་བ་བཅོས། བཅོས། འཆོས། ཆོས་ལྟ་བུ། ཡང་འདས་སྐུལ་གཉིས་གཟུགས་གཅིག་དང་ད་ལྟ་མ་འོངས་གཉིས་གཟུགས་འགྱུར་བ་དཔེར་ན། རི་མོ་ཕྱིས། ཕྱིས། འཕྱིད། དབྱི་ལྟ་བུ། ཡང་འདས་སྐུལ་གཉིས་གཟུགས་གཅིག་དང་བ་ལྟ་མ་འོངས་གཉིས་གཟུགས་གཅིག་ཡིན་པ་འབྲུ་རིགས་ཉོས། ཉོས། ཉོ། ཉོ་ལྟ་བུའི་རིགས་བཞི་ནི་དུས་གསུམ་གཟུགས་འགྱུར་དང་། ལས་ཚིག་འགའ་ཞིག་དེ་ལྟར་གྱི་འགྱུར་བ་མེད་པར་དུས་གསུམ་ཀ་གཟུགས་གཅིག་ཏུ་ངེས་པ་སྟེ་དཔེར་ན། མིག་བསྒྲད། སྐུ་བསྟོད། ནད་ཞི། སྒྲ་ཐོས་ལྟ་བུ་ནི་དུས་གསུམ་གཟུགས་མི་འགྱུར་བའི་ལས་ཚིག་ཡིན་ནོ།། ༣༡༽ དྲི་བ། གཟུགས་འགྱུར་གྱི་ལས་ཚིག་དེ་རིགས་དབྱེ་བ་གང་དག་གི་ཁོངས་སུ་བསྡུ་དགོས། ལན། དེ་ནི་མཁས་པ་འགའ་ཡིས་འདི་ལྟར་བཞེད་དེ། དུས་གསུམ་སྤྱི་ཙམ་པ་དང་། བྱེ་བྲག་པ། ཐོར་བུ་བ་བཅས་གསུམ་གྱི་ཁོངས་སུ་བསྡུ་བ་སྟེ། འདི་ལྟར་གཟུགས་འགྱུར་གང་ཞིག་ལ་མ་འོངས་པར་འཕུལ་ག་ད་གང་རུང་ཡིན་པ་དང་། ད་ལྟ་བ་ལ་འཕུལ་ག་འ་གང་རུང་ཡིན་པ། པ་སྡེ་ལས་གཞན་འདས་པ་ལ་འཕུལ་བ་ཡིན་པ། མིང་གཞི་མགོ་ཅན་གཏན་མེད། དེ་དག་སྒྲ་གདངས་མི་འདྲ་བའི་རིགས་ནི་དུས་གསུམ་སྤྱི་ཙམ་པ་སྟེ་དཔེར་ན། ཆུ་སོགས་འགོག དགག བགག ཁོགས། ཤིང་སོགས་གཅོད། གཅད། བཅད། ཆོད། བྱིན་སོགས་འབེབས། དབབ། ཕབ། ཕོབ་ལྟ་བུའོ།། ཡང་གཟུགས་འགྱུར་གང་ཞིག་འདས་མ་འོངས་གཉིས་ཀར་འཕུལ་བ་ཡིན་པ་དང་། ད་ལྟ་བ་ལ་ག་འ་གང་རུང་ངམ་ཡང་ན་འཕུལ་མེད། འདས་སྐུལ་གཉིས་ཀར་ཡང་འཇུག་ཡོད་པ། མིང་གཞིར་མགོ་ཅན་མང་བ་ནི་དུས་གསུམ་བྱེ་བྲག་པ་སྟེ་དཔེར་ན། ལྷ་སོགས་སྒྲུབ། བསྒྲུབ། བསྒྲུབས། སྒྲུབས། ཡིད་སོགས་འཆང་། བཅང་། བཅངས། ཆོངས། འདྲ་སོགས་སྡུར། བསྡུར། བསྡུརད། སྡུརད། རྟ་སོགས་འཁོལ། བཀོལ། བཀོལད། ཁོལད། ཤ་སོགས་གཙབ། བཙབ། བཙབས། གཙོབ་ལྟ་བུའོ།། ཡང་གོང་གསལ་གྱི་ཁྱད་བོན་དེ་དག་མ་ངེས་པའི་སྤྱི་འགྲོ་ངེས་ཅན་ཞིག་མེད་པ་གཟུགས་སྣ་ཚོགས་བསྡོམས་པ་ནི་དུས་གསུམ་ཐོར་བུ་བ་སྟེ་དཔེར་ན། གོས་སོགས་འཁྲུད། བཀྲུ། བཀྲུས། ཁྲུས། ལས་སོགས་བགྱིད། བགྱི། བགྱིས། གྱིས། ཤ་སོགས་ཟ། བཟའ། བཟས། ཟོ། འོག་སོགས་གནོན། གནན། མནནད། ནོནད། ལས་སོགས་བྱེད། བྱ། བྱས། བྱོས། སྐྱོན་སོགས་སྤོང་། སྤང་། སྤངས། སྤོངས། ཁྲིམས་སོགས་འཆའ། བཅའ། བཅས། ཆོས། ཁས་སོགས་ལེན། བླང་། བླངས། ལོངས་ལྟ་བུའོ། གོང་གསལ་དཔེར་བརྗོད་དེ་དག་རིམ་བཞིན་ད་ལྟ་བ་དང་། མ་འོངས་པ། འདས་པ། སྐུལ་ཚིག་ཡིན་ནོ།། ༣༡༽ དྲི་བ། རྗེས་འཇུག་བཅུ་བཅུ་པོ་རྟགས་ཀྱི་དབྱེ་ཚུལ་བཞེད་པ་མི་འདྲ་བ་ཡོད་པ་ལས་འདིར་དབྱེ་ཚུལ་རྒྱུ་མཚན་གང་ལ་བརྟེན་པ་ཡིན། ལན། དེ་བཅུ་པོ་རང་རང་འཇུག་སའི་མིང་གཞི་དང་སྦྱར་ནས་ཀློག་ཚེ་སྒྲ་གདངས་དྲག་འབྲིང་ཞན་གསུམ་འབྱུང་བར་བརྟེན། དེ་འདྲའི་སྒྲ་དྲག་པ་ལ་ཕོ་དང་། འབྲིང་ལ་མ་ནིང་། ཞན་པ་ལ་མོ་རུ་བཞེད་པ་ཡིན་ཞིང་དེ་རྣམས་ནང་གསེས་ཀྱི་དབྱེ་བ་ལའང་འབྱེད་ཚུལ་དེས་རིགས་འགྲེས་ཏེ་ཤེས་པར་བྱའོ།། ༣༢༽ དྲི་བ། འདིར་བསྟན་རྗེས་འཇུག་ཕོ་བཞི་དང་མོ་གསུམ་གྱི་ནང་གསེས་ཕོ་ལ་དྲག་པའི་དྲག་པ་སོགས་དགུ་དང་། མོ་ལའང་ཞན་པའི་དྲག་པ་སོགས་དྲུག་ཏུ་དབྱེ་བའི་དཔེར་བརྗོད་རེ་བྲིས་དང་།། ལན། དང་པོ་སྐྱེས་རབ་གས་བརྒྱན་གྱི་རབ་འབྲིང་ཐ་གསུམ་དཔེར་ན། བཏགས། བསྒྲིགས། འགགས་ལྟ་བུ་དང་། སྐྱེས་འབྲིང་བས་བརྒྱན་གསུམ་ནི། བཏབས། བསྒྲུབས། འདབས་ལྟ་བུ། སྐྱེས་ཐ་ག་ད་བ་སས་བརྒྱན་པ་གསུམ་ནི། བཀག བཅད། བཏབ། བཀས་ལྟ་བུ་དང་། བདག བགད། བསླབ། བསད་ལྟ་བུ། མདོག མཉེད། འདབ། འགོས་ལྟ་བུ་བཅས་ནི་དྲག་པའི་རབ་འབྲིང་ཐ་གསུམ་ལ་ནང་གསེས་ཕྱེས་པ་དགུ་དང་། དེ་བཞིན་ངས་མས་བརྒྱན་པའི་ཞན་པ་གསུམ་ནི་དཔེར་ན། འབངས། འགམས་ལྟ་བུ་ཞན་པའི་དྲག་པ་དང་། བསངས། བསྡོམས་ལྟ་བུ་འབྲིང་། བསྐངས། བརྩམས་ལྟ་བུ་ཞན་པའི་ཞན་པ་དང་། ང་མ་འ་གསུམ་གྱིས་བརྒྱན་པའི་གསུམ་ནི། མནང་། མཉམ། མནའ་ལྟ་བུ་དང་། བཤང་། བསམ། བདའ་ལྟ་བུ། བཏང་། བསྐུམ། བཙའ་ལྟ་བུ་བཅས་ནི་ཞན་པའི་རབ་འབྲིང་ཐ་བཅས་དྲུག་གོ།
ཞེས་པ་འདི་ཡང་རང་ནས་བརྡ་སྤྲོད་སྲིད་སྒྲོན་འཆད་ཁྲིད་བགྱི་བའི་ཁུར་བབ་སྐབས་རང་དང་རང་འདྲའི་གསར་བུ་དག་ལ་ཅུང་ཟད་ཕན་རེས་བསྐུལ་ཏེ་འབྲེལ་ཡོད་བརྡ་སྤྲོད་འགའ་ལས་ཟུར་དུ་ཞུ་བ་པོ་ནི་བསྟན་མིང་པ་དེའོ།།
