༄༅།། ཁམས་ཀྱི་ཤོད་ཆེན་བཅོ་བརྒྱད་སྐོར་གྱི་ངོ་སྤྲོད་མདོར་བསྡུས།།
དེ་ཡང་སྤྱིར་ཁམས་ཀྱི་ས་ཆ་ལ་ཆུ་བཞི། སྒང་དྲུག ཤོད་ཆེན་བཅོ་བརྒྱད་སོགས་ཀྱི་བཤད་པ་བྱུང་བ་ལས་འདིར་ཤོད་ཆེན་བཅོ་བརྒྱད་སྐོར་ཞིག་ཞུ་བ་ལ། དེ་ཡང་ཤོད་ཅེས་པའི་དོན་རོང་ངམ་ལུང་གཤོང་དུ་གོ་བ་ནི་ཁང་པའི་ཐོག་ཤོད་དང་། རི་བོའི་ཀླུང་ཤོད་ལྟ་བུས་ཤེས་ཐུབ་ལ་དེ་ལྟ་བུའི་ཤོད་ཆེན་པོ་བཅོ་བརྒྱད་འདི་དག་གང་དང་གང་ཞིག་ཡིན་པའི་སྐོར་ལ་མཁས་རྣམས་ཀྱི་བཞེད་ཚུལ་དུ་མ་ཞིག་ཡོད་པར་ངེས་ཀྱང་འདིར་རང་གི་མཇལ་ཚོད་ཙམ་ཞིག་དཔྱད་གཞིར་བཀོད་པ་ལ་སྲིད་པ་རྒྱུད་ཀྱི་ཁ་བྱང་①ལས། མདོ་ཁམས་གླིང་གི་གླིང་ཁམས་ན། །ཤོད་ལ་ལ་༼ལ་འདི་ལྷག་པ་མིན་ནམ་བརྟག༽ཆེན་པོ་བཅོ་བརྒྱད་ཡོད། །ནག་༼གཞན་དུ་ནགས་ཞེས་འབྲི་བ་ཡང་འདུག༽ཤོད་དང་ནི་སོགས་༼གཞན་དུ་སོག་ཅེས་འབྲི་བ་ཡང་སྣང་།༽ཤོད་གཉིས། །ལྕི་ཤོད་དང་ནི་སུམ་ཤོད་བཞི། །དཀར་ཤོད་དང་ནི་དམར་ཤོད་དྲུག །གཉི་ཤོད་དང་ནི་ཟླ་ཤོད་བརྒྱད། །སྐྱི་ཤོད་ཡུག་ཤོད་གཉིས་དང་བཅུ། །དམེ་ཤོད་འཇག་ཤོད་བཅུ་གཉིས་སོ། །སྟག་ཤོད་འབྲི་ཤོད་བཅུ་བཞི་འོ། །འདན་ཤོད་རྨ་ཤོད་བཅུ་དྲུག་གོ །དྲེ་ཤོད་ཉག་ཤོད་བཅོ་བརྒྱད་དོ། །ཞེས་གསལ། ཡང་མེས་པོའི་བྱུང་བ་②ཞེས་པའི་དེབ་ལས། ༡ ནགས་ཤོད། འབྲི་རུ་རྫོང་ཁོངས་ཀྱི་ས་ཆ་ཕལ་ཆེ་བ། ༢ སོག་ཤོད། སོག་གཡག་ལའི་ཁུལ། ༣ དཀར་ཤོད། སོག་རྫོང་ཁོངས། ༤རེ་ཤོད། སོག་རྫོང་ཁོངས། ༥ རྒྱ་ཤོད། སྟོད་འབྲི་རུ་དང་སྨད་དཔལ་འབར། ༦ ས་ཤོད། དཔལ་འབར་རྫོང་ཁོངས། ༧ དཔའ་ཤོད། དཔལ་འབར་རྫོང་ཁོངས། ༨ རྒྱང་ཤོད། སྟེང་ཆེན་རྫོང་ཁོངས། ༩ གྱིམ་ཤོད། སྟེང་ཆེན་རྫོང་ཁོངས། ༡༠ རྟ་ཤོད། སྟེང་ཆེན་རྫོངས་ཁོངས། ༡༡ གཡི་ཤོད་དམ་གཡང་ཤོད་ནི་རི་བོ་ཆེའི་རྫོང་ཁོངས། ༡༢ དངུལ་ཤོད། ལྷོ་རོང་རྫོང་ཁོངས། ༡༣ རྔོད་ཤོད། མཛོ་སྒང་རྫོང་ཁོངས། ༡༤ ཟླ་ཤོད། ཆབ་མདོ་རྫོང་ཁོངས། ༡༥ ངོམས་ཤོད། ཆབ་མདོ་རྫོང་ཁོངས། ༡༦རྨེ་ཤོད། སྡེ་དགེ་རྫོང་ཁོངས། ༡༧ སྨར་ཤོད། གོ་འཇོ་རྫོང་ཁོངས། ༡༨ ཀྲེ་ཤོད། དཀར་མཛེས་རྫོང་ཁོངས། ཞེས་གསལ། དེ་གཉིས་ཀར་རྩ་བའི་ཤོད་ཆེན་བཅོ་བརྒྱད་གྲངས་འདྲེན་ཙམ་འདྲ་ཡང་གྲངས་སོ་སོར་བགྲང་ཚེ་འདྲ་དང་མི་འདྲ་བ་འགའ་ཞིག་འདུག་ཅིང་ཕྱི་མ་དེ་གཙོ་བོ་ད་སྐབས་ས་ཆ་གང་ཞིག་ལ་ཡོད་པའི་ངོས་འཛིན་མཛད་པ་ནི་ཅུང་གོ་སླ་བ་འདུག འོན་ཏེ་གོང་མ་ལྟར་གྱི་ད་ལྟའི་ས་ཆ་གང་ཞིག་ལ་ཡོད་པའི་ངོས་འཛིན་དང་དེ་ལས་གཞན་ཞལ་གསལ་བའི་དཔེ་ཆ་གང་ཡོད་ཁོ་བོས་ད་ལན་མ་ཤེས་ཀྱང་མཁྱེན་ལྡན་རྒྱུས་མངའ་ཅན་ཡོད་ན་རིམ་པས་གསལ་བཤད་གནང་བར་ཞུ་ཞུ། །
①《གཡུང་དྲུང་བོན་གྱི་བཀའ་བརྟེན་དཔེ་རྙིང་ཕྱོགས་བསྒྲིགས། 》 པོད། ༦༥ ཤོག་ངོས། ༥༤ལས་གསལ།
②《མེས་པོའི་བྱུང་བ།》 འགོམ་བསྟན་འཛིན་ཆོས་དབྱིངས་ཀྱིས་བརྩམས། ཤོག་ངོས། ༨༦ ལས་གསལ།
