༄༅།།སྔགས་དངོས་བསྐྱེད་པས་བཞེད་པའི་དོན་དམ་དཀོར་བདུན་གྱི་འཇོག་ཚུལ་ཟིན་ཐོ་ཙམ་བཀོད་པ།།
༧ གདུལ་བྱའི་བློ་རིམ་མི་འདྲ་དགུར་ལྟོས་པའི།།
འདུལ་བྱེད་ཐེག་པའི་རིམ་པ་དགུ་ཕྲག་ལས།།
དངོས་བསྐྱེད་ཐུགས་རྗེ་རོལ་པའི་ཐེག་ཆེན་པའི།།
དོན་དམ་དཀོར་བདུན་བརྩི་ཚུལ་ཟུར་ཙམ་བསྟན།།
དེ་ལྟར་འདིར་གཙོ་བོ་དབུས་གཏེར་ཐེག་རིམ་རྩ་འགྲེལ་གཉིས་ལས་བསྟན་པའི་ཐེག་པ་བདུན་པ་དངོས་བསྐྱེད་པའི་ལུགས་ཀྱི་དོན་དམ་དཀོར་བདུན་བརྩི་ཚུལ་ཟིན་ཐོ་ཙམ་ཞིག་བཀོད་པ་ལ། དེ་སྔོན་གུས་པས་ཕྱོགས་བསྒྲིགས་ཞུས་ཟིན་པའི་བོན་གྱི་རྣམ་གྲངས་ལས། དངོས་བསྐྱེད་པས་འདོད་པའི་དོན་དམ་དཀོར་བདུན་ནི། ཐབས་ཤེས་གཉིས། དབྱིངས་ཤེས་གཉིས། ཀུན་རྫོབ་དོམ་དམ་གཉིས། བདག་ཉིད་ཆེན་པོ་དང་བདུན་ནམ། སྐུ། གསུང་། ཐུགས། ཡོན་ཏན། ཕྲིན་ལས། གཉིས་མེད། བདག་ཉིད་ཆེན་པོའོ། ཡང་ན་སེམས་ཉིད་རང་བཞིན་མ་བཅོས་པ། ཅི་ཡང་མ་གྲུབ་པ། མི་སྣང་བ་མ་ཡིན་པ། ཅི་ཡང་མ་ཡིན་པ་ཉིད། བོན་ཐམས་ཅད་ཀྱི་ངོ་བོ་ཉིད་དུ་རང་སྣང་བ། ཅི་ཡང་བསམ་ན་ཅིར་ཡང་སྣང་བ། གང་ལྟར་བསྒྲུབ་ན་དེ་ལྟར་འགྲུབ་པ་རྣམས་སོ། ཞེས་གསལ་བ་ལྟར་ན་བརྩི་ཚུལ་མི་འདྲ་བ་གསུམ་བཀོད་པ་དེ་དག་གི་ཁུངས་དང་རྒྱུ་མཚན་བཅས་ཅུང་ཟད་འབྲི་བར་བྱ་བ་ལ། དང་པོ་དེ་ལྟར་བརྩི་ཚུལ་མི་འདྲ་བ་གསུམ་པོ་གཞུང་གང་ཞིག་ལས་དྲངས་པར་སྙམ་ན། དང་པོ་དེ་ནི་སྒ་སྟོན་ཐེག་འགྲེལ་ལས། ལྟ་བ་ལ། དོན་དམ་ཀུན་རྫོབ་གཉིས་མེད་ཀྱི། །ལྷག་པའི་བདག་ཉིད་ཆེན་པོ་མཉམ་པ་ཉིད། །ཅེས་པ་དེ་ལ་གཉིས་༼གསུམ་སྟེ། མཆན།༽ཏེ། བཀོར་བདུན་ལྷུན་གྲུབ་དང་། དོན་དམ་རྣམ་གསུམ། ལྷག་པའི་བདེན་གསུམ་མོ། ཞེས་སོགས་དང་། དེ་བཞིན་ཡོངས་འཛིན་རིན་པོ་ཆེའི་སྔགས་རིམ་བཀའ་འགྲེལ་གསལ་བྱེད་ལས། ལྟ་བ་ལ་དཀོར་བདུན་ལྷུན་གྲུབ་ཀྱི་ལྟ་བ་དང་། དོན་དམ་རྣམ་གསུམ་གྱི་ལྟ་བ་དང་། ལྷག་པའི་བདེན་གསུམ་གྱི་ལྟ་བ་བཅས་གསུམ། དང་པོ་དཀོར་བདུན་ནི། ཐབས་ཤེས་གཉིས་དབྱིངས་ཤེས་གཉིས་ཏེ་བཞི། དོན་དམ་ཀུན་རྫོབ་གཉིས་ཏེ་དྲུག བདག་ཉིད་ཆེན་པོ་དང་བདུན་ནོ། ཞེས་པ་དེ་ཡིན་ལ། བརྩི་ཚུལ་གཉིས་པའི་ཁུངས་ནི། ཡེ་ཁྲི་གཞི་ཡི་བམ་པོ་ལས། སྐུ་དང་གསུང་དང་ཐུགས་དང་ནི། །ཡོན་ཏན་དང་ནི་ཕྲིན་ལས་དང་། །གཉིས་སུ་མེད་དང་བདག་ཉིད་ཆེ། །ཞེས་གསུངས་པ་དེ་དང་། གསུམ་པ་ནི། ལུང་རིགས་རིན་པོ་ཆེའི་མཛོད་ལས། སེམས་ཉིད་རང་བཞིན་མ་བཅོས་པ་༡། ཅི་ཡང་མ་གྲུབ་པ་༢། མི་སྣང་བ་མ་ཡིན་པ་༣། ཅི་ཡང་མ་ཡིན་པ་ཉིད་༤། བོན་ཉིད་ཐམས་ཅད་ཀྱི་ངོ་བོ་ཉིད་དུ་རང་སྣང་༥། ཇིར་ཡང་བསམ་ན་ཇིར་ཡང་སྣང་བ་༦། གང་དུ་བསྒྲུབ་ན་དེ་ལྟར་འགྲུབ་༧། དཔེར་ན་ཉི་མ་ཉི་འོད་ཟེར་དུ་ཕྱུང་བ་བཞིན་ནོ། དེའི་ཆ་ནས་དཀོར་བདུན་ལྷུན་གྱིས་གྲུབ་པ་ཉིད་དོ། ཞེས་གསུངས་པ་དེ་ཡིན་ནོ། དེ་ལྟར་དཀོར་བདུན་བརྩི་ཚུལ་གསུམ་ཙམ་འབྱུང་བའི་རྒྱུ་མཚན་ཡང་ཇི་ལྟར་སྙམ་ན། བཀའ་འགྲེལ་གསལ་བྱེད་ལས། དེ་ལྟར་དཀོར་བདུན་གྱི་གྲངས་ལ་དང་པོའི་བགྲང་ཚུལ་དེ་སྤྱིར་དངོས་བསྐྱེད་པའི་ལྟ་བའི་དབང་དུ་བྱས་པ་དང་། ཕྱི་མ་ལུགས་འདིའི་དོན་དམ་གྱི་དབང་དུ་ཡིན་པར་གསལ་ལོ། ཞེས་གོང་གི་ཐབས་ཤེས་སོགས་བདུན་པོ་དང་པོ་དང་། སྐུ་གསུང་སོགས་བདུན་པོ་ཕྱི་མ་ཡིན་ལ། དང་པོ་དེ་ལྟར་བརྩི་བའི་ཁུངས་ནི། ཐེག་འགྲེལ་ལས། དེ་ལ་ལྟ་བ་ནི། ཐབས་དང་ཤེས་རབ། དབྱིངས་དང་ཡེ་ཤེས། དོན་དམ་ཀུན་རྫོབ། གཉིས་སུ་མེད་པའི་བདག་ཉིད་ཆེན་པོར་འདོད་དེ། སེམས་ཉིད་རང་རིག་པ་ཐམས་ཅད་དུ་རྩལ་མ་འགག་པར་སྣང་བ་ནི་ཐབས། དེ་ཉིད་དངོས་སམ་ཕྱོགས་ཀྱིས་སྟོང་པ་ནི་ཤེས་རབ། དེ་ལས་བོན་སྣ་ཚོགས་པ་ཐམས་ཅད་ཀྱི་གཞི་གྲུབ་སྟེ་འབྱུང་བས་ན་དབྱིངས། དེས་བོན་ཐམས་ཅད་ཡེ་ནས་ཉིད་དུ་ཤེས་ཤིང་སྒྲིབ་པ་ཡེ་ནས་བྲལ་བས་ན་ཡེ་ཤེས། དཀོར་བདུན་ལྷུན་གྱིས་གྲུབ་པས་དོན་དམ། ཡེ་ཤེས་ཀྱི་སྣང་བ་ལྷ་དང་ལྷ་མོའི་དཀྱིལ་འཁོར་དུ་ཤར་བས་ཀུན་རྫོབ། དེ་ལྟར་ཐ་སྙད་དུ་གདགས་པ་ཐམས་ཅད་རང་གི་སེམས་ཉིད་ལས་མི་གཞན་པས་བདག་ཉིད་ཆེན་པོ་ཞེས་བྱའོ། ཞེས་པའི་བར་གྱིས་བསྟན་པ་དག་ཡིན་འདུག་ཅིང་། དེའི་དངོས་བསྟན་དུ་ཐབས་ཤེས་སོགས་གྲངས་བདུན་འདུག་ཀྱང་དེ་བདུན་ཀར་དཀོར་བདུན་གྱི་ཐ་སྙད་སྦྱར་བ་མ་ཡིན་པར་དོན་དམ་གཅིག་པུར་དཀོར་བདུན་གྱི་ཁྱད་བོན་ཅན་ཞིག་ངོས་འཛིན་པ་ཡིན་དགོས་འདུག་མོད་སྤྱིར་དེ་བདུན་ཀ་དངོས་བསྐྱེད་པའི་ལྟ་བ་ལ་ལྡན་པའི་ཁྱད་བོན་ཡིན་ཕྱིར་བྱེ་བྲག་མིང་སྤྱི་ལ་འཇུག་པའི་དབང་གིས་དེ་བཞིན་བཞེད་པ་ཡིན་ནམ་སྙམ། ཡེ་ཁྲི་ལས་དཀོར་བདུན་ཇི་ལྟར་བསྟན་ཚུལ་ཡེ་ཁྲི་གཞི་ཡི་བམ་པོའི་ལེའུ་དོན་བཞི་པ་ལས། འབྲས་བུའི་དོན་ཉིད་ངས་བཤད་དོ། །དེ་ཡང་གང་དང་གང་ཞེ་ན། །སྐུ་དང་གསུང་དང་ཐུགས་དང་ནི། །ཡོན་ཏན་དང་ནི་ཕྲིན་ལས་དང་། །གཉིས་སུ་མེད་དང་བདག་ཉིད་ཆེ། །དེ་བདུན་རྟོགས་པའི་འབྲས་བུ་ཡིན། །སྐུ་ལ་རྣམ་པ་ལྔ་རུ་བཤད། །ཞེས་སོགས་ནས། དེ་ལྟར་བདག་ཉིད་ཆེན་པོ་ཡི། །དོན་གྱི་ངོ་བོ་རྒྱས་འབྲེལ་བའི། །ཞིབ་པར་འཁོར་ཚོགས་ཁྱེད་ལ་བསྟན། །ཞེས་པའི་བར་གྱིས་རྒྱས་པར་གསུངས་ཤིང་དེ་ནི་གཙོ་བོ་འབྲས་བུའི་དབང་དུ་མཛད་ཅིང་དེ་ལ་དཀོར་བདུན་གྱི་ཐ་སྙད་ནི་སྒ་སྟོན་ཐེག་འགྲེལ་དུ་གསལ། དེ་དང་ཕྱོགས་མཚུངས་གཞན་ཞིག་ནི་རྡོ་གྲུབ་ཆེན་གྱི་གསང་སྙིང་སྤྱི་དོན་ལས། གསང་བ་སྒྱུ་འཕྲུལ་བའི་ཐུན་མོང་མ་ཡིན་པའི་ལུགས་ཀྱི་བདེན་གཉིས་སམ་ལྷག་པའི་བདེན་གཉིས་ཏེ། ལྷག་པ་དོན་དམ་བདེན་པ་ནི། དབྱིངས་སྤྲོས་པ་དང་བྲལ་བའི་ཆ་ནས་རང་བཞིན་དོན་དམ། རང་གསལ་སྒྲིབ་གཡོགས་དང་བྲལ་བའི་ཆ་ནས་ཡེ་ཤེས་དོན་དམ། དེ་ཉིད་སྐུ་གསུང་ཐུགས་ཡོན་ཏན་ཕྲིན་ལས་ཏེ་འབྲས་ཆོས་ལྔ་ཡི་གཏེར་དུ་བཞུགས་པ་འབྲས་བུའི་དོན་དམ་སྟེ་ཕྱི་མ་ལ་ལྔར་ཕྱེ་བས་དོན་དམ་དཀོར་བདུན་ཞེས་གྲགས་སོ། ཞེས་དང་། བོད་རྒྱ་ཚིག་མཛོད་ཆེན་མོ་ལས། དོན་དམ་དཀོར་བདུན། སྔགས་རྙིང་མའི་གཞུང་ལས་གསལ་བའི་མ་ཧཱ་ཡོ་གའི་ལྟ་བ་སྟེ། དོན་དམ་པའི་བདེན་པ་ཆོས་ཐམས་ཅད་ཀྱི་རང་བཞིན་དེ་བཞིན་གཤེགས་པ་ཐམས་ཅད་གསང་བའི་མཛོད་འབྲས་ཆོས་ལྔ་དང་དབྱིངས་དང་ཡེ་ཤེས་གཉིས་ཏེ་བདུན། ཞེས་དང་། དེའི་འབྲས་ཆོས་ལྔ་ཡང་ཚིག་མཛོད་དེ་ཉིད་ལས། འབྲས་ཆོས་ཉེར་ལྔ། རྙིང་མའི་རྒྱུད་སྡེ་ལས་གསལ་བའི་སངས་རྒྱས་ཀྱི་སྐུ་ལྔ། གསུང་ལྔ། ཐུགས་ལྔ། ཡོན་ཏན་ལྔ། ཕྲིན་ལས་ལྔ་སྟེ་ཉེར་ལྔའོ། ཞེས་སྐུ་སོགས་ལྔར་དབྱེ་བ་ཡེ་ཁྲི་དང་མཐུན་མོད་མི་འདྲ་བ་ནི་ཡེ་ཁྲི་ལས་གཉིས་སུ་མེད་པ་དང་། བདག་ཉིད་ཆེན་པོ་གཉིས་སུ་གསུངས་ལ། གསང་སྙིང་སྤྱི་དོན་དང་ཚིག་མཛོད་གཉིས་ཀར་དབྱིངས་དང་ཡེ་ཤེས་གཉིས་སུ་བརྩིས་སྣང་ངོ་། ལུང་རིགས་མཛོད་དུ་བཞག་པའི་དཀོར་བདུན་གྱི་ཁུངས་ནི། ཐེག་འགྲེལ་ལས། གསང་སྔགས་འདིའི་ལུགས་ཀྱི་དོན་དམ་པ་ནི། སེམས་ཉིད་རང་བཞིན་མ་བཅོས་པ། ཅིར་ཡང་མ་གྲུབ་མི་སྣང་བ་མ་ཡིན། ཅི་ཡང་མ་ཡིན་པ་ཉིད་བོན་ཉིད་ཐམས་ཅད་ཀྱི་ངོ་བོ་ཉིད་དུ་རང་སྣང་བ། དཔེར་ན་ཉི་མ་ཉིད་འོད་ཟེར་དུ་བྱུང་བ་བཞིན་ནོ། དེའི་ཆ་ནས་དཀོར་བདུན་ལྷུན་གྱིས་གྲུབ་པ་ཉིད་དོ། ཞེས་གསུངས་པ་འདི་ཉིད་ཡིན་འདུག་ཅིང་། དེ་ཡང་བཀའ་འགྲེལ་གསལ་བྱེད་ལས། སེམས་ཉིད་རང་བཞིན་མ་བཅོས་པ། ཅིར་ཡང་མ་གྲུབ་པ། མི་སྣང་བ་མ་ཡིན་པ། ཅི་ཡང་མ་ཡིན་པ། བོན་ཐམས་ཅད་ཀྱི་ངོ་བོ་ཉིད་དུ་རང་སྣང་བ། དེ་ལྟར་ལྡོག་པའི་ཁྱད་བོན་བདུན་པོ་དེ་ལྡན་པས་ན། འགྲེལ་ལས་དེའི་ཆ་ནས་དཀོར་བདུན་ལྷུན་གྱིས་གྲུབ་པ་ཉིད་དོ། ཞེས་གསུངས་པའི་ཕྱིར། ཞེས་གསལ། འོན་ཀྱང་ལུང་རིགས་མཛོད་ལྟར་ཇིར་ཡང་བསམ་ན་ཇིར་ཡང་སྣང་བ། གང་ལྟར་བསྒྲུབ་ན་དེ་ལྟར་འགྲུབ་པ་གཉིས་མ་བརྩིས་ན་གྲངས་བདུན་མི་ཚང་ལ་དེ་གཉིས་གང་ཞིག་ལས་དྲངས་ཤེ་ན། སྒ་སྟོན་ཐེག་འགྲེལ་ལས། ཅིར་ཡང་གསལ་ནས་ཅིར་ཡང་སྣང་། གང་དུ་སྒྲུབ་ན་དེ་ལྟར་གྲུབ། ཅེས་གསུངས་པ་དེ་ཉིད་ཡིན་ནམ་སྙམ། འདིར་བཀོར་བདུན་ནམ་དཀོར་བདུན་ཞེས་འབྲི་ཚུལ་གཉིས་ཙམ་འདུག་རུང་གོང་མ་དེ་ཚིག་མཛོད་ཁག་ཏུ་མ་གསལ་མོད་དོན་ལ་ཁྱད་པར་མེད་དམ་སྙམ་སྟེ། སྤྱིར་དཀོར་ཞེས་པ་གང་ཞིག་ལ་དབང་བའམ་ཡོད་པའི་ནོར་རྫས་ཀྱི་མིང་དུ་གྲགས་པ་ལྟར་འདིར་ཡང་དོན་དམ་མམ་ལྟ་བ་ལ་ཁྱད་བོན་དེ་དག་ལྡན་པའི་ཆ་ནས་དཀོར་གྱི་ཐ་སྙད་བྱེད་པར་སྙམ་ཞིང་འདིར་དཔེ་ཆ་ཕལ་ཆེར་དཀོར་བདུན་ཞེས་བྲིས་སྣང་བས་དེ་ལྟར་བྱས་པ་ཡིན། གང་ལྟར་སྔགས་དངོས་བསྐྱེད་པས་བཞེད་པའི་རྩ་བའི་དཀོར་བདུན་གྱི་ཐ་སྙད་གདགས་གཞི་ནི་ལུགས་ཕྱི་མ་འདི་ཡིན་པར་འདོད་ཅིང་གཞན་གཉིས་ཀྱང་དེ་དང་དེ་འབྲེལ་ལས་བྱུང་བའི་བརྩི་ཚུལ་གཞན་ཞིག་མིན་ནམ་སྙམ་པ་ནི་གུས་པའི་རྟོག་འཆར་ཙམ་ཞིག་ཟིན་ཐོར་བཏབ་པ་ཡིན་ནོ།།
ཞེས་པ་འདི་ཡང་བསྟན་རྣམ་མིང་པས་རང་དགོན་དུ་དཔེ་ཁྲིད་བྱ་བའི་བར་གསེང་ཞིག་ལ་བྲིས་པའོ།།
