༄༅།། གཤེན་རབ་རྣམ་རྩོད་པའི་ལུགས་ཀྱི་བདེན་གཉིས་སྐོར་ཅུང་ཟད་
གླེང་བ་དཔྱོད་ལྡན་རིགས་སྨྲ་དགྱེས་པའི་ལེགས་སྐྱེས།།
༧ རྣམ༵་མཁྱེན་རྒྱལ་བའི་གསུང་ལས་དངོས་བསྟན་པའི།།
རྣམ༵་རྩོད་པ་ཡི་བདེན་གཉིས་འཇོག་པའི་ཚུལ།།
རྣམ༵་པ་སོ་སོར་གསལ་བའི་རྩོམ་ཐུང་འདིའང་།།
རྣམ༵་དག་རིགས་སྨྲ་དགྱེས་པའི་ལེགས་སྐྱེས་ཡིན།།
དེ་ལྟར་ཡང་དབུས་གཏེར་ཐེག་རིམ་རྩ་འགྲེལ་གཉིས་ཀྱི་དགོངས་དོན་རྣམ་རྩོད་པའི་ལུགས་ཀྱི་བདེན་གཉིས་སྐོར་ཅུང་ཟད་གླེང་བར་བྱ་བ་ལ་གསུམ་སྟེ། དཔྱད་གཞིའི་ཡན་ལག་ཏུ་གཞན་གྱི་ལུགས་དྲངས་པ་དང་། འཐད་ལྡན་རང་ལུགས་དངོས་བཤད་པ་དང་། དེ་ལ་ཅུང་ཟད་བསམ་པར་བྱ་བའོ། དང་པོ་ནི་གཞན་སྡེས་ཉན་ཐོས་སྡེ་པའི་བདེན་གཉིས་འཇོག་ཚུལ་འགའ་ཙམ་ཡོད་འདུག་པ་ལས་འདིར་དཔེ་མཚོན་ཙམ་དུ་ཞྭ་སེར་ཅོད་པན་འཆང་བ་རྗེ་དཀོན་མཆོག་འཇིགས་མེད་དབང་པོའི་གྲུབ་མཐའ་རིན་ཆེན་ཕྲེང་བའི་བྱེ་བྲག་སྨྲ་བའི་བདེན་གཉིས་འཆད་སྐབས་སུ། བཅོམ་པའམ་བློས་ཆ་ཤས་སོ་སོར་བསལ་བ་ན་རང་འཛིན་གྱི་བློ་འདོར་དུ་རུང་བའི་ཆོས་སུ་དམིགས་པ་དེ། ཀུན་རྫོབ་བདེན་པའི་མཚན་ཉིད། མཚན་གཞི་ནི། རྫ་བུམ་དང་ཕྲེང་བ་ལྟ་བུ་ཡིན་ཏེ། རྫ་བུམ་ཐོ་བས་བཅོམ་པ་ན་རྫ་བུམ་དུ་འཛིན་པའི་བློ་འདོར་བ་དང་། ཕྲེང་བའི་རྡོག་པོ་སོ་སོར་བསལ་བ་ན་ཕྲེང་བར་འཛིན་པའི་བློ་འདོར་བའི་ཕྱིར། བཅོམ་པའམ་བློས་ཆ་ཤས་སོ་སོར་བསལ་བ་ན་རང་འཛིན་གྱི་བློ་འདོར་དུ་མི་རུང་བའི་ཆོས་སུ་དམིགས་པ་དེ། དོན་དམ་བདེན་པའི་མཚན་ཉིད། མཚན་གཞི་ནི། རྡུལ་ཕྲན་ཕྱོགས་ཀྱི་ཆ་མེད་དང་། ཤེས་པ་སྐད་ཅིག་ཆ་མེད་དང་། འདུས་མ་བྱས་ཀྱི་ནམ་མཁའ་ལྟ་བུ་ཡིན་ཏེ། མཛོད་ལས། གང་ལ་བཅོམ་དང་བློ་ཡིས་གཞན། །བསལ་ན་དེ་བློ་མི་འཇུག་པ། །བུམ་ཆུ་བཞིན་དུ་ཀུན་རྫོབ་ཏུ། །ཡོད་དེ་དོན་དམ་ཡོད་བཞིན་ནོ། །ཞེས་གསུངས་པའི་ཕྱིར། ཞེས་དང་། ཡང་མདོ་སྡེ་བའི་བདེན་གཉིས་འཇོག་སྐབས། སྒྲ་དང་རྟོག་པས་བཏགས་པ་ལ་མ་ལྟོས་པར་རང་གི་སྡོད་ལུགས་ཀྱི་ངོས་ནས་རིགས་པས་དཔྱད་བཟོད་དུ་གྲུབ་པའི་ཆོས་དེ་དོན་དམ་བདེན་པའི་མཚན་ཉིད། དངོས་པོ་དང་། དོན་དམ་བདེན་པ་དང་། རང་མཚན་དང་། མི་རྟག་པ་དང་། འདུས་བྱས་དང་། བདེན་གྲུབ་རྣམས་དོན་གཅིག རྟོག་པས་བཏགས་པ་ཙམ་དུ་གྲུབ་པའི་ཆོས་དེ་ཀུན་རྫོབ་བདེན་པའི་མཚན་ཉིད། དངོས་མེད་ཀྱི་ཆོས་དང་། ཀུན་རྫོབ་བདེན་པ་དང་། སྤྱི་མཚན་དང་། རྟག་པ་དང་། འདུས་མ་བྱས་ཀྱི་ཆོས་དང་། བརྫུན་པར་གྲུབ་པ་རྣམས་དོན་གཅིག ཅེས་སོགས་ནས། བདེན་གཉིས་ཀྱི་འཇོག་ཚུལ་འདི་རིགས་པའི་རྗེས་འབྲང་གི་མདོ་སྡེ་བའི་ལུགས་ཡིན་ལ། ལུང་གི་རྗེས་འབྲང་གི་མདོ་སྡེ་བས། བདེན་གཉིས་ཀྱི་རྣམ་བཞག་བྱེ་སྨྲ་དང་མཐུན་པར་ཁས་ལེན་ནོ། ཞེས་གསལ་བ་ལྟར་ན་སྤྱི་ཙམ་དུ་བྱེ་མདོ་གཉིས་བདེན་གཉིས་འཇོག་ཚུལ་མཚུངས་ཀྱང་དམིགས་བསལ་རིགས་པའི་རྗེས་འབྲང་མདོ་སྡེ་བའི་ལུགས་ལ་བཞེད་པ་མི་འདྲ་ཚུལ་བསྟན། ཡང་ལུགས་དེ་ལྟར་མི་འཐད་པའི་ཚུལ་དཔལ་ས་སྐྱ་བའི་མཁས་པ་སྟག་ཚང་ལོ་ཙཱ་བའི་གྲུབ་མཐའ་ཀུན་ཤེས་ལས། གཞིག་དང་བསལ་བས་རང་བློ་འདོར་མི་འདོར། །ཡང་ན་དོན་དམ་དོན་བྱེད་ནུས་མི་ནུས། །དོན་དམ་ཀུན་རྫོབ་བདེན་པའི་མཚན་ཉིད་ཕྱིར། །འདི་གཉིས་དོན་གཅིག་ཆུ་དང་བུམ་སོགས་ཀྱིས། །དམ་པའི་དོན་དུ་དོན་བྱེད་མི་ནུས་ཏེ། །ཞེས་སོགས་ནས། དེས་ན་དངོས་པོ་ཙམ་ལ་དོན་དམ་གྱིས། །ཁྱབ་པ་མདོ་སྡེའི་ལུགས་སུ་སྨྲ་བ་ནི། །མདོ་སྡེ་བ་ལ་སྐུར་བ་འདེབས་པ་སྟེ། །བྱེ་སྨྲ་ལས་ཀྱང་ཆོས་བདག་རྒྱ་ཆེའི་ཕྱིར། །དོན་དམ་བདེན་པ་རིགས་པས་དཔྱད་བཟོད་ཀྱི། །བདེན་པར་མི་འདོད་དངོས་སྨྲ་མེད་ཕྱིར་རོ། །ཞེས་གསུངས་ཤིང་བྱེ་མདོ་གཉིས་ལ་བདེན་གཉིས་འཇོག་ཚུལ་མི་འདྲ་བ་མེད་པར་མཛོད་ཀྱི་ལུང་གོང་གསལ་ལྟར་དང་། རྣམ་འགྲེལ་ལས། དོན་དམ་དོན་བྱེད་ནུས་པ་གང་། །དེ་འདིར་དོན་དམ་ཡོད་པ་ཡིན། །གཞན་ནི་ཀུན་རྫོབ་ཡོད་པ་སྟེ། །དེ་དག་རང་སྤྱིའི་མཚན་ཉིད་བཤད། །ཅེས་པའི་ལུང་གཉིས་ཀའི་དགོངས་པ་གཅིག་ཏུ་བཞེད་པས་མཚོན། བྱེ་མདོ་གཉིས་ཀྱི་བདེན་གཉིས་འཇོག་ཚུལ་ཐད་གཞན་སྡེའི་གྲུབ་མཐའ་ཁག་གི་མཁས་པ་རྣམས་དགོངས་པ་གཅིག་གྱུར་ཞིག་ད་ཕན་མ་བྱུང་བར་སྣང་ངོ་། བཞེད་པ་དེ་དག་འདིར་དྲངས་དོན་ནི་འདི་དང་རང་ལུགས་རྣམ་བཅས་རྣམ་མེད་གཉིས་ཀྱི་བདེན་གཉིས་བཞེད་ཚུལ་ཐད་ཁྱད་པར་ཅི་ཙམ་ཡོད་མེད་དཔྱད་གཞིར་བཀོད་པ་ཡིན་པས་གཤམ་གྱི་རང་ལུགས་བསྟན་སྐབས་སུ་དྲན་པར་བྱའོ།།
གཉིས་པ་ནི། ཐེག་རིམ་རྩ་བར། ཕྱི་ཡུལ་དངོས་པོ་མེད་དེ་ནང་ཤེས་རྒྱུ་དང་འབྲས། །རྟག་ཆད་གཉིས་གྲོལ་ཡུལ་སེམས་དོན་དམ་རྫོབ། །ཅེས་རྐང་པ་དང་པོས་རང་རྟོགས་པའི་ལུགས་ཀྱི་བདེན་གཉིས་དང་ཕྱི་མས་རྣམ་རྩོད་པའི་ལུགས་ཀྱི་བདེན་གཉིས་གཙོ་བོར་བསྟན་ཅིང། དེའི་ཐད་འགྲེལ་མེ་ལོང་དགུ་སྐོར་ལས་རྣམ་རྩོད་པའི་ལྟ་བ་བསྟན་སྐབས། སྤྱིར་དེ་གཉིས་ཀའི་༼རྣམ་བཅས་པ་དང་རྣམ་མེད་པ་གཉིས། མཆན།༽ལྟ་བ་ནི། ཕྱི་དང་ནང་དུ་འདོད་དེ། དེ་གཉིས་ཀས་དོན་དམ་གྱི་ཆ་དང་། ཀུན་རྫོབ་ཀྱི་ཆར་འདོད་པའོ། ཞེས་སོགས་ཀྱིས་རྣམ་རྩོད་སྡེ་གཉིས་པོས་རྩ་བའི་བདེན་གཉིས་འཇོག་ཚུལ་ལ་མི་འདྲ་བ་མེད་པར་བསྟན་ཅིང་། ཡང་འགྲེལ་ལས། ཕྲ་བ་ཟབ་མོ་དེ་དོན་དམ་ལ་འདོད་ལུགས་མ་མཐུན་ཏེ། ཞེས་སོགས་ཀྱིས་ཕྲ་བ་ཟབ་མོ་དེ་ལས་རགས་པ་རྩོམ་ལུགས་སོགས་ལ་འདོད་ཚུལ་མི་འདྲ་བ་འགའ་ཡོད་པར་གསུངས་ཤིང་། དེ་བཞིན་ཀུན་མཁྱེན་ཉི་མའི་བསྡུས་གྲྭ་ལས། ཐེག་པ་ཆུང་ངུའི་ལུགས་ལ་བློས་བཤིག་པའམ་གཞོམ་པར་མི་ནུས་པ་སྟེ། ཤེས་པ་སྐད་ཅིག་མ་དང་། རྡུལ་ཕྲན་ལྟ་བུ་ནི། དོན་དམ་ཡིན་ལ། བློས་བཤིག་པའམ་གཞོམ་པར་ནུས་པ། ཤེས་པའི་རྒྱུན་དང་། བེམ་པོ་རགས་པ་རྣམས་ནི་ཀུན་རྫོབ་ཏུ་འདོད་པར་ཐེག་འགྲེལ་ལས་གསུངས་སོ། ཞེས་གསལ་བ་ལྟར་རྒྱུ་ཡི་ཐེག་པ་ཆུང་ངུ་རྣམ་བཅས་པ་དང་རྣམ་མེད་པ་གཉིས་ཀས་བདེན་གཉིས་འཇོག་ཚུལ་གོང་ལྟར་ཐེག་འགྲེལ་གྱི་དགོངས་པ་དང་སྦྱར་ཏེ་གསལ་བར་གསུངས། དེ་འདྲའི་དོན་དམ་བདེན་པ་ལ་དབྱེ་ན། སྨྲ་དབང་ཡོངས་འཛིན་ཆེན་མོའི་བསྡུས་གྲྭ་ལས། འདི་ལ་མཐའ་གསུམ་ཡིན་པར་གྱུར་པའི་དོན་དམ་བདེན་པ་དང་། མཐའ་གསུམ་མ་ཡིན་པར་གྱུར་པའི་དོན་དམ་བདེན་པ་གཉིས་ཡོད། མཚན་གཞི་ནི། རྡུལ་གྱི་ཆུང་མཐའ། དུས་མཐའི་སྐད་ཅིག་མ། ཡི་གེ་ཀ་སོགས་ལྟ་བུའོ། གཞན་ཡང་བྱས་མི་རྟག་སོགས་དང་། རྟག་པའི་ཁྱབ་མཉམ་ཐམས་ཅད་དོ། ཞེས་དང་། འདིའི་མཐའ་གསུམ་བསྟན་པའི་ལུང་ནི་རྣམ་རྒྱལ་བསྟོད་ཕྱག་ལས། ཕྲ་བའི་ཕྲ་བ་ཕྲ་རབ་འཇིག་བྲལ་རྡུལ། །ཟབ་པའི་ཡང་ཟབ་འཛིན་པ་སྐད་ཅིག་མ། །དོན་གཉིས་དེ་འབྲེལ་མཐར་ཐུག་ཡི་གེ་སྒྲོགས། །ཞེས་སོ།།
གསུམ་པ་ནི། དེ་ལ་འདི་ལྟར་དཔྱད་ན། རྣམ་མེད་པའི་བདེན་གཉིས་འཇོག་ཚུལ་དེ་ལྟར་ངེད་མོད་ཀྱང་། རྣམ་བཅས་པའི་བདེན་གཉིས་བཞེད་ཚུལ་དེ་དང་མི་འདྲ་བ་ཡང་ཡོད་དགོས་ཏེ། སློབ་དཔོན་ཡོན་ཏན་རྒྱ་མཚོའི་བསྡུས་གྲྭ་ལས། བྱེ་བྲག་སྨྲ་བ་དང་མདོ་སྡེ་པའི་ལུགས་ཞེས་སོ་སོར་བདེན་གཉིས་ཀྱི་མཚན་ཉིད་དང་མཚན་གཞི་མི་འདྲ་བར་གསལ་བར་གསུངས་པ་དང་། དེ་བཞིན་ཡོངས་འཛིན་བསྡུས་གྲྭ་ལས་ཀྱང་། མདོ་སྡེ་པའམ་གཤེན་རབ་རྣམ་རྩོད་རྣམ་བཅས་པའི་ལུགས་ཀྱི་བདེན་གཉིས་ལས། དང་པོ་དོན་དམ་བདེན་པའི་མཚན་ཉིད་ཡོད་དེ། དོན་དམ་པར་དོན་བྱེད་ནུས་པ་དེ་ཡིན་པའི་ཕྱིར། དེ་དང་རང་མཚན། དངོས་པོ། མི་རྟག་པ། བདེན་པར་གྲུབ་པ་རྣམས་དོན་གཅིག མཚན་གཞི་ནི་ཀ་བ་ལྟ་བུའོ། །གཉིས་པ་ཀུན་རྫོབ་བདེན་པའི་མཚན་ཉིད་ནི། དོན་དམ་པར་དོན་བྱེད་མི་ནུས་པའི་བོན་དེ་ཡིན་པའི་ཕྱིར། དེ་དང་རྟག་པ། སྤྱི་མཚན་རྣམས་དོན་གཅིག མཚན་གཞི་ནི། འདུས་མ་བྱས་པའི་ནམ་མཁའ་ལྟ་བུའོ། ཞེས་གསུངས་པ་ལྟར་མ་ཡིན་ནམ་སྙམ་ན། ཡིན་མོད་ཀྱང་དེ་ལྟར་གསུངས་པའི་དགོངས་གཞི་གཞན་ཞིག་ཡོད་པར་སྙམ་སྟེ། མདོ་སྡེ་པའམ་ཞེས་ཆེད་དུ་གསུངས་པ་ལ་དགོས་པ་ཡོད་པའི་ཕྱིར། འོ་ན་དེ་འདྲ་འདོད་མཁན་གང་ཡོད་ཅེ་ན། གོང་དུ་གྲུབ་མཐའ་རིན་ཆེན་ཕྲེང་བ་དང་། སྟག་ཚང་བའི་གྲུབ་མཐའི་ལུང་དྲངས་པ་སོགས་ལས་བསྟན་པ་དེ་ཉིད་མིན་ནམ་སྙམ། གལ་ཏེ་རང་ལུགས་ཀྱི་རྣམ་བཅས་པ་ལ་ཡང་ལུང་དང་རིགས་པའི་རྗེས་འབྲང་གཉིས་རེ་སོགས་འཇོག་རྒྱུ་ཡོད་མེད་ཇི་ལྟར་ཞེ་ན། དེ་དག་ལ་བསམ་པར་བྱ་བ་འདི་ཡོད་དེ། གཞན་སྡེ་ལྟར་ན། གྲུབ་མཐའ་རིན་ཆེན་ཕྲེང་བ་ལས། དེ་ལ་དབྱེ་ན་ལུང་གི་རྗེས་འབྲང་གི་མདོ་སྡེ་པ་དང་། རིགས་པའི་རྗེས་འབྲང་གི་མདོ་སྡེ་པ་གཉིས། དང་པོ་ནི། མངོན་པ་མཛོད་ཀྱི་རྗེས་འབྲང་གི་མདོ་སྡེ་པ་ལྟ་བུ། གཉིས་པ་ནི། ཚད་མ་སྡེ་བདུན་གྱི་རྗེས་འབྲང་གི་མདོ་སྡེ་པ་ལྟ་བུའོ། ཞེས་གསལ་བ་ལྟར་ལུང་དང་རིགས་པའི་རྗེས་འབྲང་གི་མདོ་སྡེ་བ་གཉིས་དང་། བྱེ་བྲག་སྨྲ་བ་ལ་ཡང་སྡེ་པ་བཅོ་བརྒྱད་སོགས་གྱེས་པ་རྣམས། གང་གི་རྗེས་སུ་འབྲང་བའི་ཕུགས་དང་། གང་ཟག་གང་ཞིག་འབྲང་བ། ཚུལ་ཇི་ལྟར་འབྲང་བ་སོགས་ཀྱི་དཔྱད་གཞི་ཡོད་བཟོ་འདུག་རུང་། རང་ལུགས་ཐོག་མར་སྟོན་པ་གཤེན་ལྷ་འོད་དཀར་གྱིས་འཁོར་ཐེག་ཆེན་པ་རྣམས་དང་རྗེས་སུ་གཤེན་རབ་མི་བོས་ལྷ་བོན་སྒམ་གསུམ་སོགས་ལ་རྣམ་རྩོད་པའི་ཐེག་པ་གསུངས་པ་ནས་རིམ་པར་དེ་འདྲའི་གྲུབ་མཐའ་ཆེད་དུ་གཙོར་འདོན་གནང་མཁན་གྲུབ་འཛིན་བོན་ལུགས་ཀྱི་མིང་ཅན་བྱུང་ཡོད་མེད་དང་བྱུང་ཡང་ལུང་ངམ་རིགས་པ་གང་ཞིག་གི་རྗེས་སུ་འབྲངས་ཏེ་སྡེ་པ་སོ་སོར་གྱེས་ཚུལ་ཡོད་མེད་དང་། གྱེས་ཀྱང་རྗེས་སུ་རྒྱུད་འཛིན་ག་ཚོད་ཙམ་འཕེལ་ཡོད་མེད། འཕེལ་ཡང་ད་སྐབས་དེ་དག་གི་གནས་བབ་ཅི་འདྲ་ཞིག་ཡོད་ཚུལ། ཡང་ན་དང་ཐོག་ཐེག་རིམ་རྩ་འགྲེལ་གཉིས་ལས་བསྟན་པའི་རྣམ་རྩོད་པའི་གྲུབ་མཐའ་དེ་ཉིད་རིམ་པས་རྒྱ་གར་སོགས་སུ་ཆོས་མིང་ཅན་དུ་གྱུར་ཏེ་དར་ཞིང་དེ་ལ་ལུང་དང་རིགས་པའི་རྗེས་འབྲང་སོགས་བྱུང་བའི་ཕྱིར་ན་ད་ལྟའི་བན་བོན་གཉིས་ཀྱི་ཡིག་ཆར་གྲགས་པ་རྣམས་ཐ་སྙད་ཙམ་ལས་དོན་ལ་ཁྱད་མེད་ཨེ་ཡིན། ཡང་ན་ཐེག་རིམ་ཉིད་ཀྱང་ཐེག་ཆེན་ལྟ་བ་སྤྱི་གཅོད་ཀྱི་གཞུང་ཞིག་ཡིན་ཕྱིར་དེར་བསྟན་པའི་ཐེག་དམན་རྣམས་འཇིག་རྟེན་ཁམས་སུ་འབྱུང་སྲིད་པ་སྟེ། སྔོན་བྱུང་ལོ་རྒྱུས་ཙམ་མམ་མ་འོངས་ལུང་བསྟན་གྱི་ཚུལ་དུ་དགོས་པའི་དབང་གིས་བསྟན་པ་ཙམ་ལས་དེ་དག་ཇི་བཞིན་ཉམས་སུ་བཞེས་པའི་ལྷ་བོན་སྒམ་གསུམ་སོགས་ནས་རིམ་པར་འཛིན་སྐྱོང་སྤེལ་གསུམ་གནང་མཁན་གྱི་རང་ལུགས་དངོས་ནི་མ་བྱུང་བ་ཡིན་མིན་སོགས་ནི་དཔྱད་བྱའི་ཕུགས་རིང་ཞིང་འགྲེལ་ཡོད་ཀྱི་ཡིག་ཆ་ཡང་དཀོན་སྟབས་རྩོམ་ཐུང་འདིར་ཁ་ཚོན་མ་ཆོད་པས་དཔྱད་བྱ་ཙམ་དུ་བཞག དེ་འདྲའི་དཀའ་ཁག་སྔོན་ནས་མེད་པ་ཡང་མ་ཡིན་ཏེ། དཔེར་ན་སློབ་དཔོན་ཡོན་ཏན་རྒྱ་མཚོའི་བསྡུས་གྲྭ་ལས། གྲུབ་མཐའ་སོ་སོར་ཞུགས་པའི་གང་ཟག་བསྟན་སྐབས། ཐལ་འགྱུར་བའམ་མཚན་མ་ཀུན་བྲལ་གྱི་དབུ་མ་བའི་མཚན་གཞིར། མཁས་པ་དཔལ་ཆེན་དང་། མེ་སྟོན་ཤེར་འོད་ལྟ་བུའོ། ཞེས་པ་ལས་གཞན་རྣམ་རྩོད་པ་དང་། རང་རྟོགས་པ། ཐུགས་རྗེ་སེམས་དཔའ་སོགས་ཀྱི་གྲུབ་མཐའ་སྨྲ་བའི་མཚན་གཞི་གཅིག་ཙམ་མ་བཞག་པ་འདིས་ཀྱང་གནད་ཅིག་བསྟན་པ་ཡིན། མ་གཞི་འདི་དག་སྐོར་ལ་གསལ་ཆ་དེ་ཙམ་མེད་པའི་སྣང་ཚུལ་ཞིག་འབྱུང་བ་ཡང་སྔར་འདས་ཀྱི་ལོ་རྒྱུས་ཤུལ་ལམ་རིང་མོར་བོན་བསྟན་ལ་གོད་ཆག་ཅི་རིགས་འཕྲད་པ་སོགས་གཞན་རྐྱེན་ཡང་ཧ་ཅང་ཛ་དྲག་པར་མ་ཟད། རྒྱུ་མཚན་གཞན་ཞིག་ནི་རང་ངོས་ནས་ཀྱང་ཡོད་པ་འདྲ་སྟེ། རང་རེའི་བསྟན་སྒོར་ཞུགས་པ་ཕལ་ཆེར་མཐོ་ན་ཐེག་ཆེན་པ་ཤ་སྟག་བྱེད་འདོད་ཀྱི་ཁ་ཕོ་ཐལ་ཆེ་བའམ། དེ་མིན་གྱེར་དབྱངས་བཅའ་འདོན་ཙམ་དུ་སྙིང་པོར་འཛིན་པ་ལས་བསྟན་པའི་སྙིང་པོ་ལུང་དང་རྟོགས་པའི་བོན་ལ་ཐོས་བསམ་སྒོམ་པའི་བྱ་བར་གོམ་པ་རིམ་བགྲོད་ཀྱིས་ཚུལ་བཞིན་ཞུགས་པའི་ལུགས་སྲོལ་ཚད་ལྡན་ཞིག་དཀོན་པའི་དབང་གིས་བྱུང་བར་དྭོགས་སོ།། མདོར་ན་ད་ལན་ཇི་ལྟར་བཤད་པ་འདི་དག་ནི་གཙོ་བོ་ཐེག་རིམ་ལས་བསྟན་པའི་རྣམ་རྩོད་པའི་བདེན་གཉིས་སྤྱི་ཡི་འཇོག་ཚུལ་རང་བློས་གོ་ཚོད་ཙམ་ཞིག་དཔྱད་གཞིར་བཀོད་པ་ལས་ད་དུང་འདི་དག་སྐོར་ལ་རྣམ་དཔྱོད་ཞིབ་མོའི་སྒོ་ནས་གསལ་བཤད་གནང་བའི་སྐྱེས་བུ་གང་ཞིག་བྱུང་ན་བསྟན་པའི་གསལ་བྱེད་དུ་ངེས་པས་སུས་ཀྱང་ཡི་རངས་དང་རྗེས་སུ་འཇུག་པའི་གནས་ཁོ་ནར་འདོད་དོ།། ཞེས་པ་འདི་ཡང་བསྟན་རྣམ་པ་དེས་རང་དགོན་གྱི་བཤད་གྲྭའི་ཐེག་རིམ་འཛིན་གྲྭ་རྣམས་ལ་ཐེག་འགྲེལ་མེ་ལོང་དགུ་སྐོར་གྱི་དཔེ་ཁྲིད་བྱེད་པའི་ཞོར་འཕྲོས་སུ་བྲིས་པ་དགེའོ།
