༄༅།། བརྡ་དག་ལ་དོ་སྣང་དགོས་འདུག།
སྤྱིར་ན་མཁས་པ་རྣམས་ཀྱིས་བོད་ཀྱི་ཡི་གེ་འདི་ནི་འཛམ་གླིང་ཐོག་ལུགས་གཉིས་ཆར་བཀོལ་ཐུབ་པའི་སྔོན་ཐོན་གྱི་ཡིག་རིགས་ཤིག་ཏུ་ངོས་འཛིན་གནང་བཞིན་ཡོད་མོད་ཀྱང་། དར་ཁྱབ་ཀྱི་དབང་དུ་བྱས་ན་གཙོ་བོ་བོད་ཁུལ་ཙམ་ལས་འཛམ་གླིང་ཐོག་ཁྱབ་རྒྱ་ཆེ་བའི་ཡི་གེ་ཞིག་ཏུ་གྱུར་ཐུབ་མེད་པ་འདྲ། དེའི་རྒྱུ་རྐྱེན་མང་དུ་ཡོད་མཆི་བ་ལས་གཙོ་བོ་ཞིག་ནི་སྔོན་ནས་ད་བར་གྱི་རང་རེའི་མཁས་པ་མང་པོ་ཞིག་ནས་ཡི་གེ་འདི་ཉིད་དང་ཐོག་བོན་གྱི་སྟོན་པ་གཤེན་རབ་ཀྱིས་མཛད་པའམ་ཡང་ན་ཐུ་མིས་ཕྱིས་སུ་མཛད་པར་འདོད་པའི་ལུགས་གཉིས་བྱུང་ཞིང་དེའི་སྐོར་དགག་སྒྲུབ་གྱི་རྩོད་རྙོགས་རྒྱུན་མར་བྱུང་བ་ལས། སྤྱི་ཚོགས་ཀྱི་འགྱུར་འགྲོས་དང་བསྟུན་པའི་ཡི་གེ་དེ་ཡང་བཀོལ་སྤྱོད་བྱེད་ཚུལ་དང་ཡོངས་ཁྱབ་རང་བཞིན་གྱི་སློབ་སྦྱོང་ཚད་ལྡན་ཞིག་མ་བྱུང་བས་ལན་པ་ཡིན་ནམ་སྙམ། དེ་ཙམ་མ་ཟད་ད་སྐབས་བོད་ཁུལ་དུ་ཡང་གཙོ་བོ་དགོན་གྲོང་གསེབ་ཏུ་འཆད་རྩོམ་དང་ཆོ་ག་ཀློག་འདོན་སྐབས་སུ་བེད་སྤྱོད་ཡོད་པ་ཕུད་གཞན་གྲོང་ཁྱེར་གྱི་ལས་ཁུངས་སམ་དྲྭ་རྒྱ་སོགས་སུ་ཡིག་རིགས་གཞན་མཚུངས་ཀྱི་གོ་ས་ཟིན་ཐབས་མེད་པའི་མཚམས་སུ་སླེབས། བེད་སྤྱོད་བྱེད་པ་དག་ལ་མཚོན་ན་ཡང་ཚད་གཞི་ངེས་ཅན་ཡོད་པའི་སྤྱི་སྒེར་གྱི་རྩོམ་རིགས་དང་ཐ་ན་ཚོང་ཁང་སོགས་ཀྱི་སྒོ་བྱང་དང་མིང་ཙམ་ལ་ཡང་ལྷག་ཆད་དམ་གོ་འཛོལ་ཡོང་བའི་ཡི་གེ་ཅི་རིགས་ཐོན་བཞིན་པ་ལས་དཔེར་མཚོན་རེ་ཟུང་ཙམ་ཞིག་བཀོད་ན། ༼སྨན་ཚོང་ཁང་༽ལ་སྨད་ཚོང་ཁང་དང་། ༼མགྲོན་ཁང་༽ལ་འབྲོང་ཁང་། ༼བོད་ཐུག་༽ལ་པོད་ཐིག ༼རྒྱ་ཐུག་༽ལ་རྒྱ་ཐིག ༼ཤ་མོག༽ལ་ཤ་མོ་མོ། ༼སྦུ་སིབ་ཁུ་ནག་༽ལ་བེ་ཧྲི་གོ་ལོག ༼སློབ་གྲྭ་༽ལ་སློང་གྲྭ ༼འཛིན་གྲྭ་༽ལ་འཛོན་གྲྭ ༼སྒྲིབ་པ་༽ལ་སྒྲུབ་པ། ༼དུས་རབས་ཉི་ཤུ་༽ལ་དུས་རབས་བཅུ་དགུ། ༼ཁྱུང་དཀར་༽ལ་ང་དཀར། ༼ལྕགས་དམར་༽ལ་ལྕག་དམར། ༼གནད་ཁེལ་༽ལ་གནད་ཁེར། ༼རྩོམ་པ་པོ་༽ལ་བརྩམས་པ་པོ། ༼ཞང་བོད་ཚིག་མཛོད་༽ལ་ཞང་བོ་ཚིག་མཛོད། ༼གཅིན་པ་༽ལ་སྐྱིན་པ་ལྟ་བུ་ང་ཚོའི་མིག་ལམ་དུ་ཡ་མཚན་པའམ་ཡི་མུག་པ་ཅི་རིགས་ཤིག་ཐོན་ཡོང་གི་འདུག དེ་དག་ལས་འགའ་ཞིག་ནི་རྩ་བའི་བོད་ཀྱི་ཡི་གེ་ཇི་བཞིན་མ་ཤེས་པ་དང་། འགའ་ཞིག་ནི་ཤེས་ཀྱང་དོ་སྣང་མ་བྱས་པ། ཡང་ལ་ལ་ནི་དོ་སྣང་བྱས་ཀྱང་འབྲི་བ་དང་སྒྲིག་པའི་སྐབས་མིག་བར་ནས་ཤོར་བའི་སྐྱོན་ཡིན་པ་འདྲ། རྒྱུ་མཚན་དེ་རིགས་ལ་བསམ་ན་མི་རིགས་ཤིག་གི་ཟུངས་ཁྲག་ཏུ་གྱུར་པའི་ཡི་གེ་འདི་དང་འདིའི་བརྡ་དག་སྐོར་ལ་སེར་སྐྱ་རྒན་གཞོན་ཚང་མས་དོ་སྣང་དང་ལྷག་པར་བེད་སྤྱོད་བྱེད་སྐབས་སུ་ལྷོད་གཡེང་དང་སྣང་ཆུང་མ་ཤོར་བ་བྱེད་རྒྱུ་ནི་གལ་ཆེན་ཞིག་ཏུ་མཐོང་། འོན་ཏེ་འདི་ནི་མི་གཅིག་གི་མཐོང་ཚུལ་དང་བསམ་ཚུལ་ཙམ་ཞིག བླུན་པོས་ཚིག་གཅིག་མ་སྨྲས་ན་མཁས་པས་བློ་མི་རྙེད། ཅེས་པའི་དཔེ་ལྟར་གང་དྲན་ཡིག་ཐོག་ཏུ་བཀོད་པ་ལས་བླང་དོར་ཇི་བཞིན་བྱེད་ཐབས་རྒྱ་ཆེའི་བློ་གྲོས་ཀྱི་སྤྱན་ལྡན་རྣམས་ཀྱིས་དགོངས་དཔྱད་ཡོང་བར་མཁྱེན་ཞུ།
