༄༅།།ཐེག་ཆེན་སེམས་དཔའ་སྤྲོས་མེད་པའི་ལྟ་བའི་གལ་མདོ་
ཅུང་ཟད་གླེང་བ།།
འདིར་རྒྱལ་བའི་བཀའ་ཟབ་མོ་ཐེག་རིམ་རྩ་འགྲེལ་གཉིས་ཀྱི་རྗེས་སུ་འབྲངས་ཏེ་གཡུང་དྲུང་སེམས་དཔའ་སྤྲོས་མེད་པའི་ལྟ་བའི་གལ་མདོའི་སྐོར་ཞིག་བཤད་པ་ལ། སྤྱིར་ཐེག་པ་འདིས་ལྟ་བ་བདེན་པ་གཉིས་ཁས་ལེན་པའི་སྒོ་ནས་གཏན་ལ་འབེབས་པར་བྱེད་ཅིང་། དེ་ཡང་ཀུན་རྫོབ་བདེན་པ་ནི་ཤེས་བྱ་ལ་གནས་ཚུལ་དང་སྣང་ཚུལ་གཉིས་ལས་ཕྱི་མ་སྟེ་སྟོང་ཉིད་མ་ཡིན་པའི་བོན་རྣམས་དང་དེ་ལ་དབྱེ་ན་དག་དང་མ་དག་གི་ཀུན་རྫོབ་གཉིས་སོགས་འབྱུང་། དོན་དམ་བདེན་པ་ལ་ཡང་འཇིག་རྟེན་གྲགས་སྡེའི་དོན་དམ་དང་། ཟབ་མོ་གཏམ་གྱི་དོན་དམ་གཉིས་སུ་བཞེད་ཅིང་། དེ་གཉིས་ཡང་གནས་ལུགས་མཐར་ཐུག་གི་དོན་དམ་དང་མཐར་ཐུག་མ་ཡིན་པའི་དོན་དམ་གཉིས་ལས་དང་པོ་ནི་འདིར་བཤད་བྱའི་གཙོ་བོའི་ལྟ་བ་དེའོ། དེ་ལ་འཇིག་རྟེན་གྲགས་སྡེའི་དོན་དམ་ནི། གཅིག་དང་དུ་བྲལ་སོགས་གཏན་ཚིགས་རྣམས་ཀྱི་དགག་བྱ་བདེན་གྲུབ་བམ་རང་བཞིན་གྱིས་གྲུབ་པ་སྟེ་དེ་ཡང་འགའ་ཞིག་གིས་འདོད་པའི་སྣང་བ་ཙམ་མིན་པའི་བདེན་གྲུབ་ཡན་ག་བར་མ་ཡིན་པར་འགྲོ་མགོན་སོགས་ཀྱིས་བཞེད་པའི་སྣང་བ་དང་བདེན་པ་གཉིས་ཀས་སྟོང་པའི་མེད་དགག་གི་སྟོང་ཉིད་དེ། གཞན་དུ་རྣམ་གྲངས་པའི་སྟོང་ཉིད་ཅེས་པ་ཚོགས་སྦྱོར་སོགས་བློ་ཡི་ཡུལ་དུ་གྲུབ་པ་དེ་ལ་འདོད། དེ་ཡང་ཚོགས་སྦྱོར་གཉིས་འཇིག་རྟེན་པའི་རྒྱུད་ཀྱི་ལམ་དང་། སྟོང་ཉིད་དེ་ཡང་རྟོག་པའི་ཡུལ་དུ་གྲུབ་པས་ན་འཇིག་རྟེན་གྲགས་སྡེའི་དོན་དམ་ཞེས་སུ་གྲགས། དེ་ནི་ཐེག་པ་འདིའི་ལམ་དུ་
འཇུག་རིམ་གྱི་དབང་དུ་བྱས་པའི་དོན་དམ་དང་ལྟ་བར་བཞེད་ཀྱང་ལྟ་བ་མཐར་ཐུག་ནི་མ་ཡིན་ཏེ། བློ་ཡིས་འདི་ཞེས་བཟུང་བའི་ཕྱོགས་སུ་གྲུབ་པའི་ཕྱིར། འོ་ན་དེ་བསྒོམས་པས་ཅི་ཡང་མི་ཕན་ནམ་སྙམ་ནའང་མ་ཡིན་ཏེ། ཡོད་པ་མཐའ་འཛིན་གྱི་བློ་ཡི་མགོ་བོ་གནོན་ཞིང་རིམ་པར་སྤྲོས་བྲལ་ཟབ་མོ་གཏམ་གྱི་དོན་དམ་ལ་འཇུག་པའི་ཐབས་བླ་ན་མེད་པ་ཡང་ཡིན་པའི་ཕྱིར་རོ། དགོས་པའི་དབང་གིས་དོན་དམ་དེ་ཉིད་གཏན་ཚིགས་ཀྱིས་སྒྲུབ་ཚེ་ཤུགས་ལ་སྣང་བ་སྒྱུ་མ་ཙམ་ཡོངས་གཅོད་དུ་བསྒྲུབ་པ་དང་། དེ་ལྟར་མི་བསྒྲུབ་པའི་ཁྱད་པར་ལས་རོལ་པ་སྐྱེ་མཆེད་ལྟར་སྣང་བ་དང་མཚན་མ་ཀུན་བྲལ་ཅིར་མི་སྣང་བའི་དབུ་མ་བ་གཉིས་ཀྱི་དབྱེ་བ་དེ་བྱུང་། ཟབ་མོ་གཏམ་གྱི་དོན་དམ་ནི། ཡོངས་སུ་གྲགས་པའི་ཡོད་མེད་དང་དགག་སྒྲུབ་སོགས་ཀྱི་མཐའ་ཀུན་ལས་བྲལ་བས་སྒྲ་བློའི་ཡུལ་ལས་རིང་དུ་འདས་པ། མཁས་མིང་ཅན་ཕལ་རྣམས་སྐྲག་པའི་གནས་སུ་གྱུར་ཅིང་མིང་གཞན་དུ་རྣམ་གྲངས་མ་ཡིན་པའི་སྟོང་ཉིད་དུ་གྲགས་པ་སྟེ། འགྲོ་མགོན་གྱིས་དོན་དམ་བདེན་པ་ཤེས་བྱ་མ་ཡིན་ཀྱང་གཞལ་བྱ་ཡིན་ཅེས་པའི་གཞལ་བྱ་དེ་དང་། དཔལ་ཆེན་གྱིས་ཐེག་པ་ཆེན་པོ་ལྟ་བ་གབ་པ་དང་མཉམ། ཞེས་པའི་ལྟ་བ་དང་། མེ་ཡིས། དོན་དམ་མཚན་ཉིད་
རྣམ་པར་ཆད། ཅེས་པའི་དོན་དམ་དང་། རྗེ་ཡི་ཐེག་འགྲེལ་ལས། སངས་རྒྱས་འཕགས་པའི་ཇི་ལྟ་བ་རྟོགས་པའི་ཡེ་ཤེས་དང་། དེའི་ཡུལ་སྤྲོས་བྲལ་ལོ། ཞེས་པའི་ཡུལ་སྤྲོས་བྲལ་དང་། མ་རྒྱུད་ལས། སྟོང་པ་མཐའ་བྲལ་འདི་དང་མཐུན་མོད་ཀྱང་། །ཞེས་པའི་སྟོང་པ་འཐའ་བྲལ་དང་། བྱམས་འབུམ་ལས། དེ་བཞིན་ཉིད་དུ་གྱུར་པ་ལ། །སྐུ་དང་ཡེ་ཤེས་གང་ཡང་མེད། །ཅེས་པའི་དེ་བཞིན་ཉིད་རྣམས་ནི་གྲགས་པའམ་གཞན་གྱི་རྗེས་ཟློས་ཙམ་མ་ཡིན་པར་ལུང་རིགས་ཡང་དག་གིས་དཔྱད་ན་གནད་གཅིག་ཏུ་གྲུབ་པར་རྟོགས་སོ། དེ་ནི་མཉམ་བཞག་ཟབ་མོའི་ཡུལ་ལས་རྟོགས་བློ་ཕལ་གྱིས་གཞལ་བར་མི་ནུས་པས་ན་ཟབ་མོ་གཏམ་གྱི་དོན་དམ་ཞེས་སུ་གསུངས་སོ། དེ་ནི་རོལ་མཚན་གཉིས་ཀས་ལྟ་བ་མཐར་ཐུག་ཏུ་འདོད་དེ། ཐེག་འགྲེལ་ལས། དེ་གཉིས་ཟབ་མོ་གཏམ་གྱི་དོན་དམ་ལ་མཐུན་ནོ། ཞེས་གསུངས་པས་གྲུབ་པའི་ཕྱིར། དེ་ལ་ཁ་ཅིག་ན་རེ། ཁྱོད་ཀྱིས་དབུ་མའི་ལྟ་བ་བློ་འདས་སུ་འདོད་ན་དེ་སྔགས་དང་ཁྱད་པར་རྫོགས་པ་ཆེན་པོའི་ལྟ་བ་དང་ཁྱད་མེད་པར་མི་འགྱུར་རམ། ཞེས་དང་། ཡང་རེ་འགས་དེ་ལྟར་སྣང་བ་ཡང་དགག་བྱར་འདོད་ན་ཆད་པའི་མཐའ་ལྟུང་བ་མིན་ནམ། ཞེས་དང་། ཡང་། ལྟ་བ་བློའི་ཡུལ་དུ་མ་གྲུབ་ན་དེ་རྟོགས་རྒྱུ་མེད་པ་དང་། ཚིག་དང་དཔེ་ལ་བརྟེན་ནས་གོ་བརྡ་སྤྲོད་རྒྱུ་མེད་པར་ཐལ་བ་སོགས་ཀྱི་དོགས་གཞི་འགའ་བྱུང་དང་འབྱུང་ངོ་འདུག་རུང་། དོན་ལ་རང་རང་བསམ་ཚོད་ཀྱི་བློ་དོགས་
ཙམ་ལས་གཞུང་ཆེན་མོའི་གོ་དོན་གཏིང་ཚུགས་པའི་རྩོད་པ་མི་སྣང་བས་སླར་ཡང་ཚད་ལྡན་གྱི་གཞུང་ལ་བརྩོན་པ་ནན་ཏན་གྱིས་འཇུག་ན་གཟོད་སྒྲོ་སྐུར་གྱི་བཙོན་ལས་ཐར་པར་འགྱུར། གཞན་རང་རེའི་སྔ་མའི་མཁས་པ་འགའ་ཡིས་འདི་གཉིས་གཞན་སྡེའི་ཐལ་རང་གཉིས་དང་མཚུངས་པར་བཤད་པའི་རྒྱུ་མཚན་གང་ཡོད་དང་། མཚན་མ་ཀུན་བྲལ་ལ་ཡང་ནང་གསེས་དབྱེ་བ་གཉིས་འབྱུང་དོན། གཞན་ཡང་བྱམས་འབུམ་ལས་གསུངས་པའི་ཡེ་གཤེན་མིང་ཅན་གྱི་དབུ་མ་དེ་འདིར་ཇི་ལྟར་འདུས་ཚུལ། རྗེ་ཡི་ཚད་མ་ལས་དོན་དམ་བློ་ཡིས་རྟོགས་པར་གསུངས་པའི་དགོངས་གཞི་དང་དགོས་པ། དེ་བཞིན་དེང་དུས་རང་ལུགས་འཛིན་པ་དག་གིས་མཚན་མ་ཀུན་བྲལ་དང་རོལ་པ་སྐྱེ་མཆེད་གཉིས་སྤྱིར་གྱི་གོ་བ་དང་། ཟབ་མོ་གཏམ་དང་འཇིག་རྟེན་གྲགས་སྡེའི་དོན་དམ་གཉིས་ཀྱི་འཇོག་ཚུལ་སོགས་འདྲ་མིན་ཅི་རིགས་ཤིག་མཐོང་ཡང་ལན་གཅིག་དཔྱད་པའི་གཞི་ཙམ་ལས་དགོས་པ་བྱུང་ཚེ་གཞན་དུ་བཤད་པའི་འདུན་པ་བཅས་རྩོམ་ཐུང་དེ་རྫོགས་སོ།།
༢༠༡༡་༥་༨ཉིན།
