རྩོམ་སྒྲིག་པའི་གཏམ།

༧དེ་ཡང་རླབས་ཆེན་མེས་རྒྱལ་གྱི་དབུ་ཁྲིད་པ་ཆེན་མོ་ཏིང་ཞའོ་ཕིང་མཆོག་གིས་ཀྲུང་གོའི་རྩོམ་རིག་སྒྱུ་རྩལ་ཐོག་གི་སྨོན་ཚིག་གསུང་བཤད་དུ།    “ནན་ཏན་གྱི་སྒོ་ནས་རང་ཉིད་ཀྱི་རྩོམ་རིག་གིས་སྤྱི་ཚོགས་ཀྱི་ཐོག་ཕན་ནུས་ག་འདྲ་ཞིག་འདོགས་རྒྱུར་བསམ་གཞིགས་གཟབ་ནན་བྱས་ནས་གང་ཐུབ་ཅི་ཐུབ་ཀྱིས་བསམ་པའི་འབྲུ་རིགས་ཡག་ཤོས་མི་དམངས་ལ་འབུལ་དགོས། ” ཞེས་དེང་གི་སྤྱི་ཚོགས་གསར་པའི་ནང་དུ་འཚོ་ཞིང་གཞེས་པའི་སྨྱུག་ཐོགས་པ་ཀུན་གྱིས་རྩོམ་རིག་གི་སོར་རྩེ་གང་ལ་གསེག་དགོས་པ་ནི་རྒྱ་ཆེ་བའི་མི་དམངས་ཡོངས་ཀྱི་ཁེ་ཕན་གནད་ཐོག་ཏུ་སྨིན་པའི་ཅན་བཞི་མངོན་གྱུར་རམ། ཡང་ན་ཤེས་དཔལ་ཟུང་གི་ཁོར་ཡུག་ལེགས་པོ་ཞིག་བསྐྲུན་པའི་རྨང་གཞི་ཇི་ལྟར་བཟོ་བའི་ངོས་འཛིན་གནད་སྨིན་གནང་བ་དེ་ནི་རྩོམ་རིག་ཤེས་བྱའི་གནས་ལ་དུང་བ་ཟབ་པ་ཀུན་གྱིས་ཤེས་དགོས་པའི་ཁ་ཚ་དགོས་གཏུགས་ཀྱི་ཡང་དག་པའི་བགྲོད་ལམ་ཉག་གཅིག་ཡིན་པ་ནི་སུས་ཀྱང་ཁས་ལེན་འོས་པའི་དོན་ཞིག་སྟེ།  ཇི་ལྟར་ན།  དུས་སུ་བབས་པའི་ཆར་པ་དང་།  སྐབས་སུ་བབས་པའི་གཏམ་གྱི་དཔེ་དོན་གལ་ཏ་མགོ་སྦྲེལ་གྱི་རྟེན་འབྱུང་བསླུ་མེད་ཅིག་ཏུ་གྲུབ་པས་སོ།

ལར་ང་ཚོའི་རྒྱུན་ལྡན་གྱི་རྩོམ་ཚོགས་ཕལ་ཆེ་བའི་སྐོར་ལ་མནོ་བསམ་ཅུང་ཙམ་བཏང་ན་སྣང་ཚུལ་འདྲ་མིན་ཅི་རིགས་ཤིག་མངོན་ཡོང་བ་སྟེ། འགའ་ཞིག་ནི་དམིགས་བཀར་གྱི་དགོས་ཆེད་ཆེ་བའི་བརྗོད་གཞི་གང་ཞིག་ལ་བསམ་གཞིགས་བྱ་རྒྱུ་ལྟ་ཅི།   དེ་ལྟར་དགོས་པ་ཙམ་ཡང་མི་ཤེས་བཞིན་རང་ཉིད་དགའ་ཕྱོགས་ཀྱི་རྒྱུ་མཚན་ཙམ་ལ་བརྟེན་ནས་བསྟོད་ཡུལ་གང་ལ་ཆ་མི་སྙོམས་པའི་འུད་སྒྲོགས་ཀྱི་རླུང་ཡན་ཚོད་མེད་དུ་སྤུར་བའམ། དེ་བཞིན་རང་དང་ལྟ་གྲུབ་ཅུང་མི་མཐུན་པ་རྣམས་ལ་སྒྲོ་འདོགས་སམ་སྐུར་འདེབས་ཀྱི་ཚིག་མཚོན་ལྟར་སྣང་གི་རྣོ་སོ་འདོན་པ། ཡང་ན་སྔོན་ཆད་གྲུབ་ཟིན་བསྒྲུབ་པའི་ཡས་བཀྲོལ་མས་བསྡུས་ཀྱི་ཡུར་བར་ཆུ་འདྲེན་གྱི་བྲག་ཆའི་བརྟུལ་ཞུགས་ལྷུར་བཞེས། ཐ་ན་སྤྱི་སྤྱོད་བརྡ་དག་གི་འགྲོས་ཙམ་ཡང་མི་ཤེས་བཞིན་ད་དུང་མཛུབ་མོས་རི་རྒྱལ་འདེགས་པའི་ཡིག་ཉོབ་ཐང་མར་བདལ་བ་ལས། ཟབ་ཅིང་རྒྱ་ཆེ་བའི་སྲོལ་རྒྱུན་གྱི་རིག་གཞུང་རྨ་མེད་རྣམས་མ་ཉམས་གོང་འཕེལ་དང་ཉམས་པ་སོར་ཆུད་ལ་སྨན་པའི་རིན་བྲལ་གྱི་གསལ་གཤད་དང་ཞིབ་འཇུག   དེ་བཞིན་དུས་རབས་གསར་པའི་འགྱུར་འགྲོས་སམ་སྤྱི་ཚོགས་ཀྱི་གནས་བབས་དང་བསྟུན་པའི་སྔར་མེད་གསར་གཏོད་ཀྱི་སྙིང་སྟོབས།  ཡང་ན་དོགས་སློང་དང་དཔྱད་བསྡུར། དེ་བཞིན་རྩ་ཆེའི་སློབ་གསོ་སོགས་ཀྱི་འཕར་རྩ་དྲག་ཏུ་ལྡིང་བའི་རྩོམ་གྱི་དཔེ་ཚོགས་ཅུང་ཟད་ཉུང་བའི་ཕྱོགས་སུ་ལྷུང་བ་མིན་ནམ་སྙམ།   གལ་སྲིད་ལྟ་བ་དེ་ཉིད་བདེན་པའི་ཕྱོགས་སུ་གྱུར་ཚེ་མ་འོངས་པར་རང་ཉིད་ལྟོས་འཁོར་དང་བཅས་པར་ཕུང་དང་འཚེངས་བའི་འབྲས་བུ་གང་ཞིག་འབྱུང་བ་ཡང་ལོ་རྒྱུས་ཀྱི་ཉམས་མྱོང་དང་།  དུས་རབས་ཀྱི་དྲི་རྟགས་མང་པོ་ཞིག་གིས་ངོ་སྤྲད་དང་སྤྲོད་བཞིན་པ་འདི་དག་ལ་དོན་མཐུན་གྱི་དྲིས་ལན་ཅི་ཞིག་འདེབས། 

རྒྱུ་མཚན་དེ་དག་གི་ཕྱིར་ན་སྨྱུག་ཁའི་རོལ་རྩེད་ལ་སྤྲོ་བ་བརྟས་ཤིང་མ་འོངས་མདུན་བསྐྱོད་ལ་བློ་སྤོབས་ཅན་གྱི་མི་བུ་གང་ཞིག་ཡིན་ཀྱང་རུང། “སྔོན་ཆད་མ་བྱུང་བ་ཡང་འདིར་བརྗོད་མེད་”པའི་ལྟ་ཚུལ་སོགས་ལས་ཁད་ཅུང་འགྱང་བ་སྟེ།  རྩ་བའི་ལུགས་ཟུང་གསེར་གྱི་རྒྱ་མདུད་དང་འགལ་འཛོལ་མེད་པའི་ཐོག་མདུན་བསྐྱོད་བློ་སྤོབས་ཀྱི་ལང་ཚོའི་གསོན་ཤུགས་མངོན་པར་དོད་ཅིང་།  སྣ་ཚོགས་རིག་འཕྲུལ་གྱི་ཁོ་ལག་ཡངས་པོར་གྲོལ་བའི་རྣམ་པ་གསར་པའི་རྩོམ་རིག་གི་ལེའུ་ཞིག་ལ་འཇུག་དགོས་པ་གཞིར་བཅས།  ཡར་རྒྱས་དང་འགྲན་རྩོད། དེ་བཞིན་འགལ་མཐུན་སྣ་ཚོགས་ལས་གྲུབ་པའི་ཉེར་གཅིག་དུས་རབས་གསར་པའི་སྤྱི་ཚོགས་འདི་ཡི་ཁྲོད་ཚད་གཞི་དང་ལྡན་པའི་འགྲོ་བ་མིའི་རིགས་སུ་ཞིག་ཡིན་ཀྱང་རང་ཉིད་ཀྱི་སྐད་དམ་ཡི་གེ་གཉིས་ནི་རིན་ཐང་གཞལ་ཐབས་མེད་པའི་ནོར་བུའི་ནང་གི་ནོར་བུ་ངོ་མ་སྟེ། མི་རིགས་རང་གི་སྙིང་དབུས་སུ་རྒྱུ་བའི་ཟུངས་ཁྲག་ཉག་གཅིག་དེ་ཡིན་པ་ནི་ལུགས་གཉིས་ལ་གཟིགས་རྒྱང་རིང་བའི་མཁས་རྒུ་ཡོངས་ཀྱིས་མ་བགྲོས་དགོངས་པ་གཅིག་ཏུ་བབས་པའི་རྒྱུ་མཚན་ལ་བརྟེན།  རྩ་བའི་རྒྱལ་ཁབ་གཞུང་ནས་ཀྱང་མི་རིགས་རང་རང་གི་སྐད་ཡིག་གཉིས་ཀ་སྦྱོང་སྤྱོད་སྤེལ་གསུམ་གྱི་ལས་ཀར་མཐོང་ཆེན་གནང་དང་གནང་མུས་འདི་ལྟར་ལགས་ན། མི་རིགས་རང་ཉིད་ནས་དེ་བཞིན་གལ་ཆེ་དོན་ཆེན་དུ་འཛིན་དགོས་པ་ཡང་ལྟོ་འགྲངས་འབའ་ཞིག་དོན་དུ་གཉེར་བའི་ཤེས་མེད་དུད་འགྲོའི་བརྟུལ་ཞུགས་འཆང་བ་འདྲ་ཡིན་ན་མ་གཏོགས་སྨྲ་ཤེས་ཤིང་དོན་གོ་བའི་མི་ལུས་མཚན་ཉིད་པ་ཞིག་ཡིན་ན་ཐུགས་ལ་ས་ལེར་ཡོད་པ་འདི་ག་ལགས།

སྤྱི་ཁོག་གི་གནས་བབ་དེ་འདྲ་ཞིག་གི་སྐུལ་འདེད་འོག་གུས་པ་ནས་ཀྱང་གཞི་རྩའི་འགན་བབ་དང་། སོ་སོའི་ཤེས་འཇོན་གྱི་ཁ་སྟབས་གཉིས་པོའི་བར་ཐག་ལ་ཚད་བཀག་ཅི་ཞིག་ཡོད་མེད་ལ་མ་ལྟོས་པར་མཁས་དབང་དགེ་ཆོས་ལགས་ཀྱིས། “རང་སྡེའི་རིགས་ལ་ཞེན་པ་དཀར་པོའི་མདངས། །རང་བྱུང་སྙིང་གི་དབུས་ན་གནས་པ་འདིས། །རང་ཡུལ་ཁ་བ་ཅན་གྱི་རྗེ་འབངས་ལ། །རང་གི་ནུས་པས་སྲི་ཞུ་ཅུང་ཟད་སྒྲུབ།” །ཅེས་པའི་གདམས་དོན་ལྟར་རང་འཁོས་དང་བསྟུན་པའི་གོམ་གང་མདུན་ཕྱོགས་སུ་བསྐྱོད་འདོད་ཀྱིས་ཀུན་ནས་བསླངས་ཏེ། ད་ལན་དཀའ་བའི་ཚེགས་དང་དཀོན་པའི་རྒྱུ་གྲོན་ཅུང་ཟད་བཏང་བའི་ཉེར་འབྲས་སུ་《ཞང་ཞུང་སྒོ་པའམ་ཁམས་ཁྱུང་པོའི་ས་ཁུལ་གྱི་ཡུལ་སྐད་སྐོར་ཞིག་ཕྱོགས་གཅིག་ཏུ་བསྡེབས་པ་ཤེས་འདོད་རེ་བ་སྐོང་བའི་མཛོད་ཆེན།》ཞེས་པའི་དེབ་ཆུང་འདི་ཡི་དམིགས་སྒོ་ཡང་ཨ་མའི་ནུ་ཞོ་མངར་མོས་ལང་ཚོའི་མྱུ་གུ་བརྟས་པར་བྱས་ཤིང་། ཕ་ཟས་ལུམ་བུ་དཀར་ཆུང་གིས་གཉོམ་ལག་བདེ་བར་བསྐྱེད་པའི་དྲིན་བཟོའི་ཆེད་ཅིག་དང་།   དེ་བཞིན་རླབས་ཆེན་ཀྲུང་ཧྭ་མི་རིགས་ཀྱི་ཤེས་བྱའི་བང་མཛོད་ཀྱི་སྐྱེད་ཚལ་དུ་རང་མི་རིགས་ཀྱི་དངོས་མིན་རིག་གནས་ཤུལ་བཞག་གི་མཛེས་སྡུག་རྣམ་པར་བཀྲ་བའི་མེ་ཏོག་ཆུན་པོ་ཞིག བོད་ཞི་བའི་བཅིངས་འགྲོལ་ཐོབ་ནས་བགྲང་བྱ་དྲུག་ཅུ་འཁོར་བའི་དགའ་སྟོན་གྱི་ཐོག་མའི་ལེགས་སྐྱེས་ཤིག    དང་པོའི་རྒྱུ་རྐང་སྙི་ལ་རང་བཞིན་གྱི་ཉག་མ་ཕྲ་བའི་རིགས་མཐུན་འགྲོ་བ་གང་དག་གི་ནང་བསམ་པའི་རྒྱགས་ཕྱེ་འདི་དག་ལ་ཁ་སྣོན་ཞིག  ལོ་རྒྱུས་ཀྱི་ཆུ་ཕུགས་རིང་ཞིང་སྣ་འཛོམས་ཀྱི་རང་བཞིན་ལྡན་པའི་ཞང་བོད་རིག་པའི་ཞིབ་འཇུག་སྤྱི་ཡི་ལས་ལ་དཔྱད་གཞིའི་ས་བོན་གཙང་མ་ཞིག་ཡོང་རེ་སོགས་ལ་དམིགས་ཏེ་ཕུལ་བ་ཡིན།

དེ་ལྟར་ནའང་རྩ་བའི་བརྗོད་བྱ་དང་བྱེད་པོའི་ཡོན་ཚད་ཀྱི་དབར་དོ་མཉམ་མ་ཡིན་པའི་འགལ་རྐྱེན་ཅི་རིགས་ཤིག་གིས་གོ་བཀག་པའི་སྟབས་ཀྱིས་ཚིག་དོན་གཉིས་ཆར་གཡག་ཁལ་ལུག་གིས་མི་ཐེག་པའི་སྐྱོན་དང་ཞན་ཆ་གང་མང་མང་ཞིག་ཡོད་པ་ཡང་བཟློག་ཐབས་མེད་པའི་གནས་ལུགས་སུ་གྲུབ་ཕྱིར།  དེར་བསྟུན་རྒྱ་ཆེ་བའི་གཟིགས་ཀློག་པ་སྤྱི་དང་ཁྱད་པར་བྱ་བ་འདི་ལ་ཐུགས་སྣང་དཀར་བའི་རིས་མེད་གཟུར་གནས་རིག་པའི་སྤྱན་ལྡན་པ་ཡོངས་ནས་སྙིགས་དོར་བཅུད་ལེན་ནམ་ཚིག་མཛོད་འདི་བཞིན་འཐུས་ཚང་དང་ཡར་རྒྱས་ལ་སྨན་པའི་མཛད་ཕྲིན་ནམ་ཡང་བསྩལ་གནང་ཡོད་པར་མཁྱེན་མཁྱེན་ཞེས་ཆེད་དུ་ཞུ་བ་བཅས།།        

གང་གི་འདུ་བྱེད་པོ་ཁྱུང་བཙུན་གཞན་ཕན་དཔལ་བཟང་ནས།   ༢༠༡༡ ལོའི་ཟླ་བ་ ༡༠ པའི་ཚེས་ ༢༨ ཉིན་མཐོ་སྒང་བོད་པའི་གྲོང་ཁྱེར་ནག་ཆུ་ཁ་ཡི་འབྲོང་ཆེན་ཐང་ལྷའི་གསོལ་མགྲོན་ཁང་དུ་ངལ་གསོའི་སྐབས་སུ་བྲིས།།

གངས་རིགས་པ་སྨྲ་བ།།

༧ རྩོམ་རིག་གི་ལམ་ཆེན་ཡངས་པའི་ཐོག་ཏུ་ཤར་བསྐྱོད་ཀྱི་གོམ་སྟབས་བདེ་མོར་བསྒྱུར་བར་འདོད་པ་གང་ཞིག་ལ་མཚོན་ན་ཡང་ཐོག་མའི་རྒྱུ་རྐྱེན་གསུམ་སྟེ། རྣམ་དཔྱོད་ཀྱི་ཤེས་རབ་ཟབ་པ་དང་།  ཡང་དག་པའི་བརྩོན་འགྲུས་བཟང་བ།  གནའ་དེང་གི་ཐ་སྙད་ལ་མཁས་པའི་རྨེང་གཞི་མ་བོར་པ་ཞིག་དགོས་ངེས་པ་ནི་བསླུ་མེད་བདེན་པའི་དན་རྟགས་ཤིག་ཡིན་པ་ནི་བསྙོན་དུ་མེད་ཅིང་།  དེ་ལས་ལྡོག་སྟེ་ཨུ་ཚུགས་ཀྱིས་གཡག་སྣ་དང་ཁུ་ཚུར་གྱི་དཔེ་བཞིན་རིགས་ལམ་གུ་དོག་ཞིག་གི་ཆ་རྐྱེན་འོག་བཙན་སྦྱོར་རྡོ་ཆག་ལྷུ་སྒྲིག་བྱས་པའི་རྩོམ་དེབ་ཀྱིས་ཡངས་པའི་རྒྱལ་ཁམས་བཀང་ཡང་རང་ཉིད་བླུན་པོར་སྒྲུབ་བྱེད་ཀྱི་ནང་ཆ་ཕྱི་རུ་འདོན་པའི་ཉེར་བསྡོགས་འདྲ་དགོས་ན་ལེགས་མོད། གཞན་རིག་པའི་སྤྱན་ལྡན་དག་གིས་གདེང་འཇོག་དང་མཁས་པའི་གོ་འཕང་རྙེད་པ་ནི་ནམ་ཡང་མི་སྲིད་མོ་གཤམ་བུ་མོའི་ཟླ་བོར་འགྱུར་ངེས་ལས་བཟང་པོའི་ཕྱོགས་ཆ་གང་ཡང་མི་འབྱུང་བ་ནི་སྣང་བ་རྟེན་འབྲེལ་གྱི་གཤིས་ལུགས་ཡིན་པ་ནི་གནའ་དེང་གི་རིག་པ་སྨྲ་བ་སུ་ཞིག་ཚོམ། དེས་ན་ལང་ཚོ་གཞོན་ཞིང་དབང་པོ་གྲུང་ཚེ་ཤེས་བྱ་རིག་པའི་མཛོད་ཆེན་ལ་ཐོས་བསམ་དཔྱིད་ཕྱིན་པ་ཞིག་གི་རྨང་གཞི་བརྟན་པའི་ཐོག ད་གཟོད་རིམ་པར་རྒྱ་ཆེ་བའི་གཞུང་ལུགས་ལ་འཆད་རྩོད་རྩོམ་གསུམ་གྱི་འཚོ་བ་དངོས་སུ་རོལ་དགོས་པ་ནི་ཚུལ་ལྡན་མཁས་པ་ཀུན་གྱི་གཤེགས་ཤུལ་མ་ནོར་བ་ཡིན་ཏེ།  ཀུན་འབུམ་གོ་འབྱེད་རྩ་བའི་རྒྱུད་ལས།  རིག་པའི་གནས་ལྔར་མ་སྤྱོད་པར།  །ཐམས་ཅད་མཁྱེན་པ་མི་འགྱུར་ཏེ། །ཞེས་སོགས་དང་། མཁས་དབང་ཉི་མའི་སྡུད་གྲྭ་ལས། རྩོད་པའི་རྒྱ་མཚོ་གཏིང་ཟབ་བརྒལ་མིན་ན། །འཆད་པ་རིན་ཆེན་གླིང་དུ་མི་ཕྱིན་པས། །རྩོམ་པ་ནོར་བུའི་མཛོད་ལ་སྤྱད་བྱ་ཅི། །དེ་ཕྱིར་ཀུན་གྱིས་ཚུལ་འདིར་འཇུག་པར་རིགས། །ཞེས་པའི་བརྗོད་དོན་རྟོགས་པའི་ཚད་མ་སྔོན་སོང་གི་ཚད་མའི་སྐྱེས་ཆེན་དག་གི་ཞལ་གསུང་དྲི་མ་མེད་པ་ཡིན་པའི་ཕྱིར་རོ།།

༧དེ་ཡང་མཁས་པའི་བྱ་བ་གསུམ་གྱིས་ཐུགས་རྒྱུད་བརླན་ཅིང་རྣམ་ཀུན་གཞུང་ཆེན་གྱི་ལ་མོར་བགྲོད་པ་ལ་གཞན་དྲིང་མི་འཇོག་པ་བདག་གི་གཡུང་དྲུང་སྨྱུག་མཆེད་པ་༧ཁྱུང་གསེར་ཞུན་ལགས་ནི་རྩོམ་རིག་གི་རྒྱ་མཚོ་ཆེན་པོ་བརྒལ་མྱངས་བའི་སྨྱུག་ཐོགས་པ་ཞིག་དང་།  ཕ་རོལ་ལོག་རྟོག་གི་བྲག་ཆེན་བསྙིལ་མྱངས་བའི་རྩོད་པ་བ་ཞིག  སྐལ་ལྡན་བུ་སློབ་དུ་མའི་ཤེས་རྒྱུད་བཀྲོལ་མྱངས་བའི་འཆད་ཁྲིད་པ་བཅས་འཆད་རྩོད་རྩོམ་གསུམ་གྱི་བྱ་བ་བཟང་པོར་རྣམ་ཀུན་འབྲལ་མེད་ཐུགས་དམ་དུ་བསྲེལ་བ་སྟེ།   དུས་རབས་གསར་པའི་སྤྱི་ཚོགས་འདི་ཡི་ཁྲོད་མི་བུའི་སྒལ་ཚིགས་གསོན་ཉམས་དོད་པའི་ཡོན་ཏན་པ་ཞིག་ཡིན་པ་ནི།  མཐོ་སྒང་བོད་པ་ཚང་གི་རྒན་དར་གཞོན་གསུམ་གྱི་རིག་པའི་སྤྱན་ལྡན་རྣམས་ཀྱི་མདུན་སར་ཐོག་མའི་ལེགས་སྐྱེས་སུ་སྤྲིངས་ཟིན་པའི་༼ རྒྱུད་ལུང་ཀུན་ལས་བཏུས་པའི་བོན་གྱི་རྣམ་གྲངས་མདོར་བསྡུས་བློ་གསལ་རེ་བ་སྐོང་བའི་མགུལ་རྒྱན་ལེགས་བཤད་གཟི་ཡི་དོ་ཤལ། ༽ཞེས་པ་དང་།  དེ་མིན་རྒྱལ་ཕྱི་ནང་གི་དུས་དེབ་སོགས་རྩོམ་དེབ་འདྲ་མིན་ཐོག་ཏུ་བཅད་ལྷུག་སྤེལ་མའི་རྩོམ་རིགས་སྣ་ཚོགས་བསྲིངས་པ་དེར།  ཕུགས་བསམ་སྤུ་རྒྱལ་ལྷུན་པོ་ལས་དཀར་ཞིང་དམིགས་ཡུལ་དལ་མཚོའི་གཏིང་རུམ་ལས་ཟབ་པའི་སྒང་པ་བོད་ཆེན་པོའི་མཁས་མཆོག་གང་མང་ཞིག་གིས་གདེང་འཇོག་ལེགས་པོར་ཐོབ་ཅིང་རྩོམ་གྱི་ཆུ་ཚད་ཧ་ཅང་མཐོན་པོར་སླེབས་ཡོད་པའང་ཡོངས་སུ་གྲགས་ཤིང་གྲུབ་པ་ལ་ཁོ་བོས་གསལ་བཤད་ཀྱི་ངལ་བ་ཅི་ཞིག་བསྟེན།།                                                                                                                                                                                                                                                                

            ༧དེང་ཚན་རྩལ་རིག་པའི་ཉི་མས་ས་ཆེན་གོ་ལ་ཧྲིལ་པོ་ཡོངས་སུ་བཀབ་པའི་ཉེར་གཅིག་འཕྲུལ་ཆས་ཀྱི་དུས་རབས་གསར་པ་འདིར། རྒྱལ་ཕྱི་ནང་གི་སྐྱེ་བོ་ཕལ་མོ་ཆེ་རྣམས་ཟང་ཟིང་འབྱོར་ཚོགས་ལ་དབྱིངས་ཞུགས་ཤིང་སྣ་མང་འཕྲུལ་ཆས་ལ་ཅི་དགར་ལོངས་སུ་སྤྱོད་བཞིན་པའི་དུས་མཚུངས་སུ། བསྟན་འཛིན་གྱི་སྐྱེས་ཆེན་དུ་མ་ཞིག་གིས་ཀྱང་རླངས་འཁོར་བཟང་ངན་དང་། གསེར་ཁྲི་སུ་མཐོ། དཔལ་འབྱོར་རིག་པ་སུ་མཁས་གྱི་འགྲན་རྩོད་ཆེས་ཆེར་བདོ་བའི་ཞོར་སངས་རྒྱས་ཀྱི་བསྟན་དོན་གཉེར་བའི་ཁུར་བཞེས་པའི་དུས་འགྱུར་གྱི་འདུ་འཛིའི་རླུང་འཚུབ་ཁྲོད། ཁོང་ནི། ཆོག་ཤེས་དམ་པའི་ཚོད་ཅིག་མ་ཟིན་ན། །འཇིག་རྟེན་གསེར་དུ་སོང་ཡང་ངོམས་དུས་ག་ལ་ཡོད། །ཅེས་པའི་གདམས་དོན་ཐུགས་རྒྱུད་ལ་འབྱོར་བའི་ཚུལ་ལྡན་གྱི་བཤེས་གཉེན་ཆེན་མོ་ཞིག་ཡིན་པས་ན་ཟང་ཟིང་ནོར་གྱི་བསླུ་བྲིད་འོག་ཏུ་དབུ་འཁོར་བ་ག་ལ་སྲིད་དེ། སྲིད་པ་ནི་ནམ་ཡང་མ་ཡིན་ནོ།།

༧དེ་ལས་ཀྱང་ཆེས་འབུར་དུ་ཐོན་པའི་གསང་བ་གསར་པ་ཞིག་མངོན་དུ་སྨིན་པ་ནི་འཛམ་གླིང་ས་སྒང་ཡངས་པའི་ཐོག་ཏུ་འཚོ་ཞིང་གནས་པའི་མི་རིགས་སུ་འདྲ་ཞིག་ཡིན་ཀྱང་རང་རང་གི་སྐད་ཡིག་གཉིས་པོ་ཉམས་ཉེན་ཤོར་བ་ཡིན་ན་ཆབ་དཔལ་རིག་གསུམ་གང་ལའང་སྤྱོད་སྒོ་ཚང་བའི་བྱ་བ་ཡང་དག་པ་ཞིག་གཉེར་རྒྱུ་མེད་ལ་མི་རིགས་དེ་ཡི་བླ་སྲོག་ཆད་པ་ལས་ཀྱང་ཚབས་ཆེ་བའི་གཏན་ཚིགས་ལྟར། ཉེར་གཅིག་དུས་རབས་འདི་ལ་མཚོན་ན་རང་མི་རིགས་ཀྱི་སྐད་ཡིག་གཉིས་ལ་དམིགས་བསལ་གྱི་གཉན་འཕྲང་ངམ་འགྱུར་ལྡོག་འགྲོ་བཞིན་པའི་གནས་ལུགས་ཇི་ལྟར་གཟིགས་པའི་ཉེར་ལེན་འོག་ད་ལན་ཁོང་གིས་སོ་སོའི་མི་རིགས་ཀྱི་ཁྲག་རྒྱུན་ལས་གྲུབ་པའི་ཡུལ་ཆེན་ཞིག་གི་སྐད་བརྡའི་སྐོར་གྱི་རྩོམ་དེབ་སྟེ་༼ཞང་ཞུང་སྒོ་པའམ་ཁམས་ཁྱུང་པོའི་ས་ཁུལ་གྱི་ཡུལ་སྐད་སྐོར་ཞིག་ཕྱོགས་གཅིག་ཏུ་བསྡེབས་པ་ཤེས་འདོད་རེ་བ་སྐོང་བའི་མཛོད་ཆེན།༽ ཞེས་པ་འདི་ལྟར་ལེགས་གྲུབ་བྱུང་བ་ནི་ཆེས་གཟིགས་རྒྱང་རིང་ཞིང་མཁས་པའི་རྣམ་དཔྱོད་ཉག་གཅིག་ལས་འཁྲུངས་པའི་སྤྱི་རྒྱ་རླབས་ཀྱིས་གཅོད་པའི་རིག་གཞུང་སྟེ།  རིང་ལུགས་བྱེ་བྲག་པ་ཞིག་གམ།  ཡུལ་བུ་ཆུང་ངུ་ཞིག་གི་གནད་དོན་ཙམ་མ་ཡིན་པར་རི་བོ་གངས་ཅན་པ་སྤྱི་ཡི་དོན་དུ་བསྒྱེལ་བར་མི་ནུས་པའི་དུས་ཀྱི་དཀྱོགས་མཚམས་སུ་བཙུགས་པའི་རྡོ་རིང་གསར་པ་ཞིག་ཡིན་པ་ནི་གང་ཟག་བྱེ་བྲག་པ་ཁོ་བོ་གཅིག་པུའི་མཐོང་ཚུལ་ཙམ་མ་ཡིན་པར་རང་གི་རིགས་ལ་ཞེན་པ་དཀར་བའི་ཤེས་ལྡན་མི་སྣ་ཡོད་དོ་ཅོག་གིས་ཁས་ལེན་སྲིད་པ་སྟེ། ཚིག་མཛོད་འདི་ཉིད་མཐར་ཆགས་སམ་ཉམས་ཞིབ་རིམ་པར་གནང་ན་རྩོམ་གྱི་རིན་ཐང་ཇེ་ཆེར་གསལ་བ་ཡིན་གཤིས་འདིར་ཆུ་སྲིན་མགོ་མཐོང་གི་དཔེ་ཙམ་ལས་ཡིན་ལུགས་རྒྱས་བཤད་ཀྱི་སྐལ་པ་ནི་རྒྱ་ཆེའི་གཟིགས་ཀློག་པ་རང་རང་གི་ལས་དབང་ལ་ལྟོས་པར་བསམ་སྟེ་དེ་ཙམ་གྱིས་ཆོག་ཤེས་པར་བྱས་ཤིང་མདོ་དོན་ཚིགས་སུ་བཅད་པའི་ལམ་དུ་དྲངས་ན།། 

༧རྣམ་དཔྱོད་རིག་པའི་འཕྲུལ་འཁོར་སྐོར་དུས་རྣམ་རིག་ཅན་གྱི་རྩོད་པ་བ།།

གཟུར་གནས་མཁས་གྲལ་ཕྱོགས་སྔ་མཛད་དུས་གཞུང་ལུགས་ངེས་པའི་དམ་བཅའ་བ།།

རྩོམ་རིག་མཛོད་ལ་དལ་གྱིས་འཇུག་དུས་སྨྱུག་རྩེར་དབྱངས་ཅན་མ་ཡིས་གཟིགས།།

ཡོན་ཏན་གླིང་ན་ཡོན་ཏན་གྱིས་འཚོ་ཡོན་ཏན་པ་ཡི་བརྗིད་ཉམས་ལ།།

ཞེས་བྱས་ཏེ། ཇི་ལྟར་རྩོམ་དེབ་འདི་བཞིན་དེང་རབས་ཀྱི་འཕྲུལ་དཔར་དུ་དྲངས་སྐབས་རྗེས་སུ་ཡི་རང་དང་བཅས་སྔོན་གླེང་ཞིག་གི་ཚུལ་དུ་གང་གི་གཡུང་དྲུང་སྨྱུག་མཆེད་པ་ཁྱུང་བཙུན་གངས་ལྷ་དཀར་པོར་འབོད་པ་དེས་འཇིག་རྟེན་པའི་ལྷ་ཡུལ་གཉིས་པར་གྲགས་པ་མཛེས་ལྗོངས་དཔའ་བརྡའི་ཞིང་ཁམས་ནས་བྲིས།།