གློ་བུར་དུ་རྙེད་པའི་སྙན་ངག་་་་གྲོགས་ལ་ཕུལ།།
           


ཕྱི་ནས་དཀར་དཀར་ཡིན་ཁུལ།།
ནང་ནས་ནག་ནག་ཡིན་ཁུལ།།
བརྩེ་བ་ཁྲ་ཁྲ་ཡིན་ཁུལ།།
ཡིད་ལ་དྲན་ཙམ་མ་མྱོང་།

ཁ་གསར་ཨ་གསར་མ་ཡིན།།
ཁ་ངོ་དཀར་དཀར་སྟོན་ཡོད།།
ཁོག་པ་དམར་དམར་བྱས་ཡོད།།
ཁ་ཁོག་གཉིས་ཀྱི་གྲོགས་ཡིན།།

བརྩེ་བ་སེམས་ལ་ཉར་ཡོད།།
དུང་བ་ལུས་ལ་ཐིམ་ཡོད།།
ཁ་དང་ཁོག་པའི་གདིང་ནས།།
ཡོད་ཚད་ཁྱེད་ལ་བཅོལ་ཡོད།།

ཉིན་གྲངས་ཞག་གྲངས་མ་ཡིན།།
ཟླ་གྲངས་ལོ་གྲངས་མ་ཡིན།།
བསྐལ་པ་མ་འཇིག་བར་དུ།།
གྲོགས་ལ་བརྩེ་བ་བཅིང་ཡོད།།

ས་ཐག་ཇེ་རིང་ཇེ་རིང་།།
མཛའ་བརྩེ་ཇེ་ཟབ་ཇེ་ཟབ།།
རྒྱང་ཐག་རིང་བའི་གྲོགས་ལ།།
དུང་བ་ཡིད་ལ་ཐིམ་ཡོད།།

ང་དང་གྲོགས་པོའི་བརྩེ་བ།།
མ་ཕམ་མཚོ་ལས་ཟབ་ཡོད།།
ཁྱེད་དང་ངེད་གཉིས་སེམས་པ།།
ཏི་སེའི་གངས་ལས་དཀར་ཡོད།།

བརྩེ་དུང་འོ་ཆུ་འདྲེས་འདྲ།།
ཕྱི་ཐག་ཆུ་ལས་རིང་བ།།
རང་གཤིས་བལ་ལས་འཇམ་པ།།
གྲོགས་ལ་སེམས་པ་དཀར་ཡོད།།

༢༠༡༥/༡/༡༢/ཉིན།