གངས་གཡག་ཅེས་ཞེ་སྡང་ལང་ནས་འདུག   

                             (ཞོགས་འོད)

ཉི་མས་ངུ་སྐད་འདོན་པའི་ཁ་རྩང་ཡང་། །
ཟླ་བས་སྨྲེང་གཏམ་བརྗོད་པའི་དེ་རིང་ཡང་། །
གངས་ཀྱི་ལྗོངས་ན་གངས་གཡག་སྨྱོས་ནས་འདུག །
གངས་རིའི་ཡུལ་ན་གངས་གཡག་ཉོག་ནས་འདུག །
 
མཚན་སྙན་གོ་བབ་མཐོན་པོར་སྙེག་ན་ཡང་། །
ཡིག་ནོར་མོད་པོས་ཡིད་ཁ་བརྫད་ནས་འདུག །
ཡིན་ཡིན་མཐུན་མཐུན་གླེང་བར་མོས་ན་ཡང་། །
ཚིག་ཉོག་མང་པོས་སུན་པ་བསླང་ནས་འདུག །
 
སྐད་ཆའི་སྙན་པ་ཏིལ་ཙམ་མེད་ན་ཡང་། །
དེ་འདྲ་མང་བས་གླེང་བར་མི་བྱའོ། །
ཚིག་གི་སྡེབ་ཕྲེང་ཉོག་ནས་ཡོད་ན་ཡང་། །
གོ་མེད་གངས་གཡག་ཅེས་པས་ཨུ་ཚུགས་འཛིན། །
 
ནོར་དང་མ་ནོར་ཞེས་པ་སྐྱིད་པོ་ཞིག །
མཐོ་དམན་མཁས་བླུན་ཀུན་གྱིས་གླེང་བྱ་རེད། །
ཡིན་དང་མ་ཡིན་ཞེས་པ་སྡུག་པོ་ཞིག །
གངས་གཡག་ཁྲོས་པའི་ཚུལ་གྱིས་ར་སྤྲོད་ཐུབ། །
 
གངས་གཡག་ཅེས་པ་རླུང་ཁའི་དར་ལྕོག་རེད། །
རླུང་བུ་གང་སར་རྒྱུ་ན་དེ་སར་བསྐྱོད། །
གངས་གཡག་ཅེས་པ་གོ་མེད་གླེན་པ་ཞིག །
ནོར་བ་གླེང་ན་དབུགས་རྒོད་རབ་ཏུ་འཚང་། །
 
དེ་འདྲ་གླེང་རྒྱུ་བཤད་རྒྱུ་མོད་ན་ཡང་། །
གཡག་ལ་གླེང་ན་བརྡ་སྤྲོད་ཐུབ་མི་འདུག །
གངས་གཡག་ཅེས་པའང་དེ་ལས་མ་འདས་པས། །
བར་སྐབས་ཚིགས་སུ་བཅད་པ་འདི་ལས་འཇོག །