རྒྱལ་ཐེབས་དམ་པ་༧ཐེག་མཆོག་འོད་ཟེར་རྒྱལ་མཚན་རིན་པོ་ཆེའི་

མཛད་ཕྲིན་མདོར་བསྡུས།   

དེ་ཡང་དམ་པ་ཁོང་བོད་མེ་སྤྲེལ་༡༩༥༦ལོར་ཁྱུང་ཡུལ་གྲུབ་ཐོབ་འབྱུང་གནས་ཀྱི་ཆར།   སྟག་ཤོད་ཟལ་མོའི་རི་རྒྱུད་མཁས་བཞིའི་གདན་ས་དཀྱིལ་འཁོར་ཐང་སྒོམ་པ་ཚང་དུ་ཡབ་བསོད་ནམས་དང་ཡུམ་མཐོན་པོ་ལྷ་འཛོམ་གཉིས་ཀྱི་སྲས་སུ་འཁྲུངས།   ཡུམ་གྱི་མངལ་དུ་སྦྲུམ་པ་ནས་བྱ་བཏང་ཚེ་དབང་འགྱུར་མེད་ནས་མཁའ་འགྲོ་ཨ་ལིའི་སྐུ་སྐྱེ་རུ་ངོས་འཛིན་མཛད།   དགུང་ལོ་༧ཐོག་བྱ་བཏང་གང་དེའི་སྦྲིང་ཡིག་ལྟར་རྩེ་དགོན་དུ་ཁྲི་འདོན་ལམ་ལུགས་ཞུས།   ཚེ་དབང་ཕུན་ཚོགས་མདུན་ཡི་གེ་ཀློག་འདོན་ལ་སྦྱང་བ་བྱས།   དགུང་ལོ་༡༤ཐོག་མི་དམངས་ཀུང་ཧྲེའི་ནང་ཞུགས་ཏེ་དེ་གར་རྩིས་པ་དང་།   དམངས་སློབ་དགེ་རྒན་གྱི་འོས་འགན་རིམ་པར་བཞེས།   དགུང་ལོ་༢༥ལྕགས་སྤྲེལ་ལོའི་ཐོག་རྩེ་བླ་རིན་ཆེན་རྒྱལ་མཚན་མཆོག་དགོངས་བཞེད་བཞིན་དམ་པ་གང་དེའི་དྲུང་ནས་རབ་ཏུ་བྱུང་ཞིང་།   དུས་འགྱུར་ནང་གཏོར་བའི་རྟེན་གསུམ་འཕར་ཆེ་ཆུང་དང་ཇོ་བོ་གསུང་བྱོན།   རྩ་ཆེའི་སྦུབ་ཆོལ་འགའ་བཅས་ཁོང་དང་བླ་རྒན་རིན་རྒྱལ་ཟུང་འབྲེལ་གྱིས་སླར་ཡང་ཕྱག་སོན་ཐུབ་པ་བྱུང་།    ༡༩༨༢ལོར་རྩེ་དགོན་ཉམས་གསོའི་སྐབས་ཀྲུའུ་རིན་གཞོན་པའི་ཐུགས་འགན་བཞེས་སྟེ་འདུ་ཁང་དང་།   གསེར་གདུང་ཁང་།   སྒྲུབ་གྲྭ་ཁང་།   འཁོར་ཁང་སོགས་བཞེངས་བཀོད་བྱ་བར་མཉམ་རུབ་ཀྱིས་འབད་པ་ཧུར་ཐག་མཛད།   སྔ་གཞུག་ཏུ་ཁོང་གིས་སྐྱབས་རྗེ་སྨན་རི་བ་མཆོག་དང་།   ཡོངས་འཛིན་རིན་པོ་ཆེ།    རྩེ་བླ་རིན་རྒྱལ་རིན་པོ་ཆེ།   འཇའ་ལུས་པ་གཙུག་ཕུད་འོད་གསལ།   ཁྲ་རྒན་མཁན་སྐལ་བཟང་གཡུང་དྲུང་།   ཞེ་གཡུང་དྲུང་ཕུན་ཚོགས།   ཨ་མདོ་སྐལ་བཟང་དར་རྒྱས།   སྣང་ཞིག་རྒྱལ་འོབས།   མདའ་ཆེན་རྟོགས་ལྡན་རྣམ་གཉིས།   བླ་མ་ཨ་གཡུང་།   རྟོགས་ལྡན་ཁམས་དབང་བསྟན་འཛིན།   རྟོགས་ལྡན་ཁྲི་བ།   ཚུལ་ཆེན།   ཨ་ལག་བོན་བརྒྱ།   ཉག་བླ་དཀོན་མཆོག་བསྟན་འཛིན་དབང་རྒྱལ།  བྲག་མགོ་བླ་མ་ཟླ་གྲགས།  སྤྲུལ་སྐུ་དཀོན་མཆོག་བསྟན་འཛིན།   དབྲ་སྤྲུལ་ནམ་མཁའ།   བླ་མ་ཨ་རྒྱ།   ཁའོ་རྟོགས་ལྡན།   བླ་རྒན་ཡེ་ཤེས་བློ་གྲོས།   ནག་རུ་མཁན་བསོད་ནམས་སྐལ་བཟང་།   སྐྱང་སྤྲུལ་དྲི་མེད་འོད་ཟེར།   བླ་རྒན་བཀྲ་ཤིས་རྣམ་རྒྱལ།   མཚམས་རྒན་ཡེ་ཤེས་རྒྱལ་མཚན།   གྲྭ་རྒན་ཨོ་རྒྱན་སོགས་དཔོན་གསས་བཅུ་ཕྲག་གཉིས་ལས་བརྒལ་བར་ཞབས་སེན་སྤྱི་བོར་བཏུད་དེ།   གཡུང་དྲུང་བོན་གྱི་མདོ་སྔགས་སེམས་སྡེའི་དཀྱིལ་འཁོར་ཕལ་ཆེར་དང་།   ཁྱད་པར་མཉམ་མེད་ཤེས་རབ་རྒྱལ་མཚན།   ཀུན་མཁྱེན་ཤར་རྫ་བ།   བདེ་གླིང་སོགས་མཁས་གྲུབ་དུ་མའི་གསུང་གསང་ཇི་སྙེད་དང་།   དག་སྙན་ངག་བཅས་པར་གསན་བསམ་གྱིས་དབང་ལུང་མན་ངག་ཁྲིད་དང་བཅས་པའི་ཐུགས་ཀྱི་ཡོལ་གོར་ཡོངས་སུ་ཕྱུག་པར་མཛད། 

སླར་ཡང་༡༩༨༨ལོར་རང་དགོན་དུ་བཤད་གྲྭ་བཙུགས་སྐབས་དེར་ཞུགས་ཤིང་དཔོན་སློབ་ཚུལ་ཁྲིམས་རྣམ་དག་དྲུང་ནས་བློ་རྟགས་བསྡུས་གསུམ་ཐད་འཆད་རྩོད་ལས་ལ་འབད་འབུང་མཛད།   ༡༩༩༣ལོར་དགུང་ལོ་༣༨ཐོག་རྩེ་བླ་རིན་རྒྱལ་མཆོག་གིས་ཉིད་ཀྱི་རྒྱལ་ཚབ་ཁྲི་ལ་མངའ་གསོལ་ཞིང་ཞོར་དུ་ལོ་ངོ་གསུམ་རིང་རི་ཐ་ངང་རྫོང་དགོན་དུ་གཟིགས་རྟོགས་གནང་།   ༡༩༩༤ལོར་ཁོང་དང་དམངས་བདག་ཨུ་ལྷན་ནས་དགེ་བཤེས་ལུང་རྟོགས་བསྟན་པའི་རྒྱལ་མཚན་རང་དགོན་བཤད་གྲྭའི་སློབ་དཔོན་དུ་བསྐོ་བཞག་དང་།   སློབ་གཉེར་བའི་བཅའ་ཡིག་དང་འཐུས་སྒོ་གཏན་འབེབས་བྱས།   ༢༠༠༠ལོར་མཁན་བསོད་ནམས་འགྱུར་མེད་སྒོམ་གྲྭའི་མཁན་པོར་མངའ་གསོལ་ཞིང་།   དགེ་བཤེས་ནོར་བུ་སྒྲུབ་གྲྭའི་མཁན་པོར་བསྐོ་བཞག་མཛད།    གཞན་ཡང་ཁོང་གིས་གསེར་གདུང་ཁང་དུ་འཆི་མེད་ཡབ་སྲས་གསུམ་དང་།   ཁྲོ་སྐྱབས་ལྷ་ཁང་ནང་ཟངས་གསེར་ལས་བྱས་པའི་སྐུ་བརྙན་ཐོག་རྩེགས་ཅན་བདུན།   ཚོགས་ཁང་བར་འཁྱམས་ཀྱི་ལྡིབ་རིས་སོགས་ལ་རྒྱུ་ཚེགས་གཉིས་ཆར་ནས་སྐུ་ངལ་ཚད་མེད་བསྐྱོན་ཏེ་ཕྱག་སྐོར་རྟེན་དུ་བཞེངས་སུ་གསོལ།   ཞོར་དུ་ཁོང་གིས་སྔོན་འགྲོ་དང་རྩ་རླུང་མུན་མཚམས་བཅས་པར་སྦྱང་བ་མཛད་ཐོག་ཡི་དམ་བཅུ་ཕྲག་ལྷག་གི་བསྙེན་སྒྲུབ་ཚད་སྐྱེལ་གནང་བ་དང་།   དགུང་ཞག་བརྒྱ་ཕྲག་དུ་མར་བསྙེན་བསྙུང་གི་བཅད་རྒྱ་མཛད་པ་སོགས་བསྟན་པའི་སྙིང་པོ་སྒོམ་སྒྲུབ་ཀྱི་རྣམ་ཐར་སྐྱོང་བཞིན་དབུ་སྐྱེས་དུང་བས་དཀར་བར་འཚོ་བཞེས་བཞུགས་པ་བཅས།།             གུས་པ་ལྗང་ཤེར་བསྟན་གྱིས།