སྐྱབས་རྗེ་བསྟན་འཛིན་གཙུག་ཕུད་འོད་ཟེར་རིན་པོ་ཆེའི་ཤར་ཕྱོགས་ཞིང་ཆེན་

ཁག་ཏུ་བསྟན་འགྲོའི་མཛད་ཕྲིན་བསྐྱངས་པ།

 དེ་ཡང་ཇི་སྐད་དུ་བསྟན་པའི་ལས་ནི་སྙིང་རྗེ་ཡིན། སྙིང་རྗེའི་དོན་གྱིས་སེམས་ཅན་དྲངས་ཞེས་གསུངས་པ་ལྟར་འོ་ཅག་འགྲོ་བའི་སྐྱབས་མགོན་རྗེ་བླ་མ་རྣམ་འདྲེན་༧བསྟན་འཛིན་གཙུག་ཕུད་འོད་ཟེར་རིན་པོ་ཆེ་མཆོག་རྒྱ་བོད་ཡུལ་གྲུ་ཁག་ལ་རིས་མེད་བོན་གྱི་འཁོར་ལོ་རྟག་ཏུ་བསྐོར་ཏེ་སྨིན་གྲོལ་གྱི་སྒོ་བརྒྱ་ཡངས་པོར་འབྱེད་བཞིན་པའི་མོད་ལ་བོད་ལྕགས་སྟག་ལོའི་མཇུག་སྤྱི་ལོ་༢༠༡༡ལོ་སྤྱི་ཟླ་གཉིས་པའི་ཚེས་ཉེར་དྲུག་ཉིན་ལྷོ་ཚ་བ་ཤིང་གི་རོང་རྒྱ་མོ་དངུལ་ཆུའི་ཉེ་སྐོར་ན་ཡོད་པའི་བལ་ཐོ་དགོན་ནམ་སྦས་དགོན་གཡུང་དྲུང་ལྷ་སྟེང་གི་ལྷ་སྡེ་ཡོངས་ཀྱིས་རིང་ནས་གནས་དེར་ཕེབས་རྒྱུའི་རེ་འབོད་ཡང་ཡང་བྱས་པ་དང་། དེ་བཞིན་བྲ་དགོན་གཡུང་དྲུང་བསྟན་རྒྱས་གླིང་དང་ཤོག་ལྔ་ལམ་ལྷ་དགོན་སོགས་གནའ་ནས་མཆོད་ཡོན་གྱི་འབྲེལ་བ་ཤིན་ཏུ་ཟབ་ཅིང་རྩེ་དྲུག་དགོན་གྱི་དགོན་ལག་ཏུ་གཏོགས་པའི་ལྷ་སྡེ་ཡོངས་ཀྱིས་རེ་ལྟོས་ཚད་མེད་བྱས་པར་བརྟེན་ནས་དམ་པ་གང་གི་གསེར་ཞལ་ཉི་མའི་དཀྱིལ་འཁོར་གནས་དེར་བསྒྱུར་ཞིང་། ལམ་བར་དུ་ལྷོ་རོང་རྫོང་ཐོག་དུ་ཡོད་པའི་བོན་གྱི་ལྷ་འབངས་རྣམས་དང་། བྲ་དགོན་གཡུང་དྲུང་བསྟན་རྒྱས་གླིང་གི་དབུ་བླ་དབྲ་ཁྱུང་རྣམ་སྲས་རིན་པོ་ཆེ་གཙོས་ལྷ་སྡེ་རྣམས་དང་སྦས་དགོན་གཡུང་དྲུང་ལྷ་སྟེང་དགོན་གྱི་ལྷ་སྡེ་སོགས་ཀྱིས་སྐོམ་པ་ཆུ་དང་འཕྲད་པ་ལྟ་བུའི་དགའ་དད་ཆེན་པོས་ལུས་ལ་སྔ་སྲོལ་གྱི་རྒྱན་གོས་སོགས་མཛེས་ཤིང་ལེགས་པའི་གཟབ་འཆོར་དུ་མ་བཀྲས་ཐོག་ལགས་ན་བཀྲ་ཤིས་པའི་རེ་ཁ་ཚར་དུ་དངར་བའི་ཁ་བཏག་སྣ་ཚོགས་ཐོགས་ཏེ་ཀུ་བསྭོ་དང་ལྷ་རྒྱལ་གྱི་འབོད་པ་དབྱངས་སུ་གྱེར་བཞིན་རྣམ་པར་བཀྲ་བའི་རུ་དར་སྣ་ཚོགས་ཀྱིས་མཛེས་པར་བརྒྱན་པའི་འཕྲུལ་རྟ་འམ་སྦག་སྦག་དང་ཅང་ཤེས་ཀྱི་རྟ་ཕོ་སོགས་བརྒྱ་ཕྲག་དུ་མ་ཕེབས་བསུ་དང་བཅས་ཀྱ་ཀྱོག་གི་ལམ་འཕྲང་དུ་མ་བརྒྱུད་མཐར་ཚེས་ཉེར་བརྒྱད་ཉིན་སྦས་དགོན་གཡུང་དྲུང་ལྷ་སྟེང་དགོན་དུ་ཞབས་སོར་འཁོད་པ་དང་། སྐབས་དེར་གཡུང་དྲུང་ལྷ་སྟེང་དགོན་གྱི་མཁན་རིན་པོ་ཆེ་གཡུང་དྲུང་ཉི་མ་གཙོས་འདུས་པ་ཡོངས་ཀྱིས་བཀྲ་ཤིས་པའི་རི་མོ་སྣ་ཚོགས་དང་དར་ཟབ་ཀྱི་ཕེབས་ལམ་རིང་པོར་གདིང་ཐོག་འཕེན་དར་རྒྱལ་མཚན་དང་སྙན་པའི་རོལ་མོ་སོགས་མཆོད་རྫས་དུ་མས་མདུན་བསུས་ཏེ་གཙུག་ལག་རྣམ་པར་རྒྱལ་བའི་ཁང་བཟང་གི་དབུས་སུ་མི་འཇིགས་གདོང་ལྔས་བཏེགས་པའི་ཁྲི་ལ་མངའ་གསོལ་བ་དང་མཁན་གཡུང་དྲུང་ཉི་མ་རིན་པོ་ཆེ་གཙོས་བླ་མ་མཆོད་པའི་གྱེར་དབྱངས་ངང་མན་ཌལ་སྐུ་གསུང་ཐུགས་རྟེན་རྒྱས་འབུལ་ཞུས། 

  སྤྱི་ཟླ་གསུམ་པའི་ཚེས་གཅིག་ཉིན་ངེས་པ་དོན་གྱི་རྣལ་འབྱོར་པ་རྟོགས་ལྡན་བསམ་གཏན་དགེ་ལེགས་ཞེས་ཆུང་ནས་རབ་ཏུ་བྱུང་ཞིང་དུས་འགྱུར་གྱི་ཚ་རླབས་དྲག་པོའི་མེ་འོབས་ནང་ཚུལ་ཁྲིམས་གྱི་པད་མོའི་གཟི་མདངས་མ་ཉམས་པར་ཕྱོགས་མེད་ཀྱི་མཁས་གྲུབ་དུ་མ་ངེས་མེད་དུ་བསྟེན་པའི་སྐལ་བ་བྱུང་སྟེ་ཟབ་གདམས་ཀྱི་མན་ངག་སྦྲང་མས་རྩི་ལ་རོལ་བ་བཞིན་ངོམས་པ་མེད་པར་རྒྱུན་དུ་རོལ་བ་མ་ཟད། ལྷག་པར་རྩེ་བླ་རིན་ཆེན་རྒྱལ་མཚན་དང་འཇའ་ལུས་པ་གཙུག་ཕུད་འོད་གསལ་རིན་པོ་ཆེ་རྣམ་གཉིས་རྩ་བའི་བླ་མར་བསྟེན་ཏེ་ཉམས་རྟོགས་ཀྱི་དགོངས་པ་ཐུགས་ཉམས་སུ་བསྟར་ནས་འདོད་ཆུང་ཆོག་ཤེས་ངང་སྦས་པའི་རྣལ་འབྱོར་བའི་ངང་ཚུལ་ཁོ་ནར་བྱས་ཏེ་གནས་འདིར་གཏན་བཞུགས་ཀྱིས་ཉམས་ལེན་ལ་རྩེ་གཅིག་ཏུ་གཞོལ་མཐར་གཞའ་ཚོན་གྱི་འོད་དང་བཅས་ཏེ་དགོངས་པ་བོན་གྱི་ཀློང་དུ་བསྡུས་ནས་ཡུན་རིང་མ་ལོན་པས། གང་དེའི་སྐུ་གདུང་ཞུགས་ལ་ཕུལ་ཏེ་ཀུན་རིག་ལས་བཞི་རྒྱུན་ལྔའི་སྦྱིན་སྲེག་རྒྱས་འབུལ་གནང་ཞིང་དགོང་རྫོགས་ཀྱི་མཆོད་པ་དང་ཚོགས་བསགས་རྒྱ་ཆེར་མཛད་སྐབས་མེ་ཏོག་གི་ཆར་སིལ་མར་འཐོར་བ་སོགས་རྟགས་དང་མཚན་མ་དུ་མ་ཤར་བར་བྱུང་།

ཉིན་གཉིས་པའི་སྐབས་དེར་འཁོད་ལྷ་སྡེ་ཡོངས་ལ་ཚེ་སྒྲུབ་བྱ་རི་མའི་དབང་བསྐུར་མཛད་ཅིང་དགོན་པར་རིག་འཛིན་འདུས་པའི་སྒྲུབ་མཆོད་རྒྱུན་འཛུགས་དང་དད་ལྡན་ཕོ་མོ་རྣམས་ལ་ལོ་ལྟར་ཆག་མེད་ཀྱིས་རྩེ་དྲུག་གནས་སྐོར་འགྲོ་བའི་སྔ་སྲོལ་རྒྱུན་སྐྱོང་བྱ་དགོས་པའི་བཀའ་སློབ་གནང་ཞིང་། སྙིང་པོ་རྣམ་གསུམ་དང་ཁ་འདོན་དགེ་སྦྱོར་སོགས་ལ་རྒྱུན་དུ་འབད་དགོས་ཚུལ་བཅས་ཀྱི་དབང་དམ་སློབ་བྱ་སོགས་སེམས་རྒྱུད་ཐལ་བ་བརླན་པའི་མན་ངག་གི་སྦྲང་ཆར་སིལ་མར་ཅི་དགར་ཕབ་པས་རིང་ནས་ཡིད་ལ་བརྣག་པའི་འདོད་དོན་དངོས་སུ་སྨིན་སོང་ཞེས་ཀུན་ཀྱང་དགའ་སྤྲོ་ཆེན་པོས་དེང་ནས་བཟུང་སྡེ་དགོན་ཀུན་གྱིས་རེ་ལྟོས་བྱེད་ས་དམ་པ་གང་ཉིད་ཡིན་པས་སླད་མར་སྤྱི་སྒོས་སོ་སོའི་ལེགས་ཉེས་བདེ་སྡུག་དང་མ་ནོར་ལམ་སྟོན་གྱི་བཀའ་སློབ་ཟབ་མོ་རྒྱུན་དུ་བསྩལ་གནང་མཛད་རྒྱུའི་གསོལ་བ་ཡང་ཡང་འདེབས་པ་ལགས་ཞེས་མཁན་རིན་པོ་ཆེ་གཡུང་དྲུང་ཉི་མ་གཙོས་སྐྱ་སེར་ཀུན་གྱིས་མགྲིན་གཅིག་དབྱངས་གཅིག་ཏུ་བརྗོད་པ་མ་ཟད། དམ་པ་གང་གིས་ལྗགས་བཀོད་ཇི་བཞིན་གཡེལ་མེད་ལས་ལ་བརྩོན་པའི་ཁས་བླངས་མཛད་པ་སོགས་དད་གུས་ཚད་མེད་བྱས་ཤིང་། དམ་པ་གང་ནས་ཀྱང་ལོ་ལྟར་རིག་འདུས་སྒྲུབ་མཆོད་ཆེན་མོའི་བཅའ་འདོན་མི་སྣ་སོགས་རྩེ་དྲུག་དགོན་ནས་མངགས་གཏོང་བྱ་རྒྱུ་ཞལ་བཞེས་གནང་མཐར་འདུས་གྲྭ་ཡོངས་ལ་ན་བཟའ་དང་དངུལ་འགྱེད་སོགས་གནང་སྦྱིན་གྱ་ནོམ་པར་བསྩལ་ཞིང་།

མཁན་རིན་པོ་ཆེ་གཡུང་དྲུང་ཉི་མ་མཆོག་ལ་བསྟན་པའི་ལས་དོན་ཐད་གང་ལ་གང་དགོས་ཀྱི་རོགས་ཕན་མཛད་རྒྱུའི་ཞལ་ཏ་ཟབ་མོ་གནང་སྟེ་གཡུང་དྲུང་བོན་འཛིན་སྐྱོང་ཁྱབ་སྤེལ་ཐེབས་རྩ་ཚོགས་པར་བརྒྱུད་དངུལ་སྨར་གྱི་མཐུན་རྐྱེན་གང་ལེགས་སྦྱར་བ་དང་། ལྷ་སྡེ་མང་ཚོགས་རྣམས་ལ་ཡང་སྐུ་པར་དང་བྱིན་མདུད་ཁྲུས་གསོལ་རབ་གནས་སྙིང་པོའི་བཟླས་ལུང་ངོ་སྤྲོད་འཕོ་བ་སོགས་གང་ལ་ཅི་དགོས་ཀྱི་རེ་འདོད་ཡོངས་སུ་སྐོང་ཏེ་རྩེ་དྲུག་བླ་རབས་ནས་ཤིང་རོང་མི་རབས་བར་འབྲེལ་ལམ་ཟབ་པའི་གཤིས་བཟང་དར་དཀར་རིང་མོ་དཀར་འཇམ་ཡུག་གཅིག་ཏུ་གྱུར་པར་མཛད། ཚེས་གསུམ་ཉིན་བྲ་དགོན་གཡུང་དྲུང་བསྟན་རྒྱས་གླིང་གི་ལྷ་སྡེ་རྣམས་ཀྱིས་བསུ་བ་དུ་མ་འབྱོར་བ་དང་དབྲ་ཁྱུང་རྣམ་སྲས་རིན་པོ་ཆེ་དང་མཁན་པོ་གཡུང་དྲུང་ཉི་མ་རྣམ་གཉིས་གཙོས་བལ་ཐོ་ལྷ་སྡེ་རྣམས་ཀྱིས་ཕེབས་བསྐྱེལ་དང་ལམ་བར་དུ་བསང་དུད་ཀྱི་དུ་སྤྲིན་དགུང་དུ་འཕྱུར་ཞིང་གསོལ་སྨོན་གྱི་རེ་འདོད་དབྱངས་སུ་གྱེར་བཞིན་མི་རྟ་དང་སྦག་སྦག་སོགས་རི་ལུང་ཁེང་པའི་ངང་ཚུལ་གྱིས་མཐོང་ཐོས་དྭངས་བ་འདྲེན་པའི་གཟི་བྱིན་ངང་བྲ་དགོན་གཡུང་དྲུང་བསྟན་རྒྱས་གླིང་དུ་བདེ་བར་ཞབས་སོར་འཁོད། 

 ཉིན་གཉིས་པར་དུས་འཁོར་གྱི་གཞུང་བསྲང་སྟེ་མངའ་དབུལ་རབ་གནས་ཀྱི་ཆོ་ག་རྒྱས་འབུལ་གནང་ནས་རྟེན་འབྱུང་དགེ་བའི་ལེགས་སྨོན་རྒྱ་ཆེར་མཛད་པ་མ་ཟད། འདུས་པ་ཡོངས་ལ་དུས་འཁོར་གྱི་དཀའ་དབང་ཟབ་མོ་དང་འབྲེལ་དབང་དམ་སློབ་བྱ་སོགས་སྨིན་གྲོལ་གྱི་གནད་དུ་སྨིན་པར་མཛད། སྐབས་དེར་རབ་བྱུང་བཅུ་བདུན་པའི་ལྕགས་ཡོས་ལོའི་གནམ་ལོ་གསར་དུ་ཤར་བ་དང་དུས་ཁེལ་བས་དེར་ཡོད་འདུས་པ་ཀུན་གྱིས་བསྙེན་བཀུར་བཞེས་སྤྲོ་དང་དགའ་སྤྲོའི་སྟོན་མོ་རྒྱ་ཆེར་མཛད་པ་དང་། ལྷ་སྡེ་གཞོན་སྐྱེས་རྣམས་ཀྱིས་གཟབ་འཆོར་སྣ་ཚོགས་སྤྲས་ཏེ་ཉིན་གཅིག་གི་རིང་བྲོ་གར་གླུ་གཞས་སོགས་རྩེད་མཚར་འདྲ་མིན་གྱི་སྒོ་ནས་དགའ་སྟོན་གྱི་ཡོ་ལངས་རྒྱ་ཆེར་བྱས་པས་ཐུགས་དགྱེས་ཚོར་ཆེན་པོའི་བརྩེ་གཟིགས་ཚད་མེད་གནང་བ་དང་འབྲེལ་ལྷ་སྡེ་རྣམས་ལ་བཀའ་འབྲེལ་ཅི་དགོས་སོགས་ཀྱིས་རེ་འདོད་ཡོངས་སུ་སྐོང་བར་མཛད་ཅིང་། འདུས་པ་ཡོངས་ལ་ན་བཟའ་དང་སྐུ་འགྱེད་གནང་བ་དང་། དབྲ་ཁྱུང་རྣམ་སྲས་རིན་པོ་ཆེ་ལ་ཐེབས་རྩའི་དངུལ་སྨར་ལས་རོགས་རམ་གང་ལེགས་མཛད་དེ་སླད་ཕྱིན་བསྟན་པའི་ལས་དོན་ཐད་གང་ལ་གང་དགོས་ཀྱི་རོགས་ཕན་ཅི་ནུས་བྱ་རྒྱུ་སོགས་ཞལ་ཏ་སྨར་བར་གནང་།  

  ཚེས་བདུན་ཉིན་ཤོག་ལྔ་ལམ་ལྷ་དགོན་གྱི་བླ་མ་གཡུང་དྲུང་བསྟན་འཛིན་གཙོས་ལྷ་སྡེ་ཡོངས་ཀྱིས་རིང་ནས་གནས་དེར་འབྱོན་དགོས་པའི་རེ་བ་ནན་གྱིས་བྱས་པ་བཞིན་གནས་དེར་ཆིབས་ཁ་བསྒྱུར་ཞིང་ལམ་བར་དུ་ལམ་དགོན་ལྷ་སྡེ་རྣམས་ཀྱིས་ལེ་བར་བཅུ་ཕྲག་དུ་མའི་སར་འཕྲུལ་ཆས་ཀྱི་རྟ་མཆོག་བརྒྱ་ཕྲག་གཉིས་ལ་ཉེ་བ་ཙམ་གྱིས་ཕེབས་བསུ་དང་དགོན་པའི་ཉེ་འདབས་ནས་བླ་གྲྭ་ཀུན་གྱིས་སེར་ཕྲེང་དང་འཕེན་དར་རྒྱལ་མཚན་སོགས་ཀྱིས་སྣ་དྲངས་ཤིང་གཙུག་ལག་ཁང་དུ་བསུས། ཚེས་བརྒྱད་ཉིན་ལྷོ་རོང་དང་དཔའ་ཤོད་བཀྲ་མོག་སོགས་རྫོང་ཁག་དུ་མའི་ལྷ་སྡེ་རྣམས་དཀའ་ཚེགས་ལ་མ་འཛེམས་པར་ཉིན་ལམ་དུ་མའི་རིང་ནས་ཉིན་མཚན་ལྟོས་མེད་ཀྱིས་གང་སྐུའི་གསེར་ཞལ་འཇལ་རྒྱུའི་སྐལ་བར་རེ་ནས་འཚང་ཁ་ཤིག་ཤིག་ངང་འདུས་ཚོགས་སྟོང་ཕྲག་དུ་མ་བྱུང་བ་རྣམས་ལ་ཚེ་སྒྲུབ་བྱ་རི་མའི་དབང་དང་དགེ་སྒྲུབ་སྡིག་སྤོང་སོགས་ཀྱི་བསླབ་བྱ་གནད་ལ་ཁེལ་བ་མཛད་དེ་རྒྱུད་ལ་དགེ་བའི་བག་ཆགས་ཟབ་མོ་ཞོག་པར་མཛད།

ཚེས་དགུ་ཉིན་ལམ་དགོན་བླ་གྲྭ་རྣམས་ཀྱི་འདུན་པ་བཞིན་དགེ་འདུན་ཡོངས་ལ་ཡི་དམ་དབལ་ཁྱུང་དམར་པོའི་དབང་དང་རྒྱལ་བསྟན་འཛིན་སྐྱོང་སྤེལ་གསུམ་བྱེད་ཕྱོགས་སྐོར་གྱི་བཀའ་སློབ་དང་། དགོན་དེར་སྒྲུབ་རྒྱུད་བསྟན་པའི་རྒྱལ་མཚན་མཁའ་རུ་བསྒྲེང་དགོས་པའི་བཀའ་ཆབ་སྤྱི་བོར་ཕེབས་ཏེ་སྒྲུབ་གྲྭའི་གཙུག་ལག་ཁང་བཞེངས་བྱེད་ཀྱི་འགྲོ་གྲོན་ཐེབས་རྩའི་དངུལ་སྨར་གཏོང་སྦྱིན་གནང་ཞིང་། འཆད་ཁྲིད་མཁན་པོ་མངགས་གཏོང་སོགས་ཀྱི་ཐུགས་འགན་གཙང་མར་བཞེས་རྒྱུ་ཞལ་བཞེས་གནང་བ་དང་། གྲྭ་མང་ཡོངས་ལ་མང་ཇ་དང་སྐུ་འགྱེད་སོགས་ཀྱིས་བསྙེན་བསྐུར་རྒྱ་ཆེར་མཛད་མཐར་ཕྱིར་ལྷོ་རོང་དུ་ཕེབས། ལྷོ་རོང་བསྟན་པ་སོགས་ཀྱི་ཁྱིམ་གཞིས་རྣམས་ལ་ཁྲུས་གསོལ་རབ་གནས་སོགས་གང་ལ་གང་དགོས་ཀྱི་རེ་འདོད་ཡོངས་སུ་བསྐང་ཐོག་ཚེས་བཅུ་ཉིན་པང་མདའ་གནམ་ཐང་ནས་མཁའ་ལམ་བརྒྱུད་པེ་ཅིན་ལ་བདེ་བར་ཕེབས།

པེ་ཅིན་དུ་རྒྱུན་བཞུགས་གནང་རིང་ཞིང་ཆེན་སོ་སོར་ཡོད་པའི་སློབ་མ་ཁག་གིས་མཇལ་བཅར་བཞིན་གང་དགོས་ཀྱི་སློབ་ཁྲིད་ཆད་མེད་གནང་ཞིང་། བེ་གཡང་མགྲོན་ཁང་གི་ཚོམས་ཆེན་ནང་ཆེད་གཉེར་གྱིས་སློབ་ཁྲིད་མཛད་དེ་པེ་ཅིན་སློབ་མ་རྣམས་ཀྱི་རང་རྒྱུད་བོན་དང་འདྲེས་པའི་སྐལ་བ་བཟང་པོར་སྦྱིན་པར་མཛད།

ཟླ་བ་བཞི་པའི་ཚེས་དགུ་ཉིན་ནས་བཟུང་རྟག་པར་གཟའ་སྤེན་པའི་ཉིན་མོར་སྔོ་འགྲོ་བསགས་སྦྱངས་ཟིན་པའི་སློབ་མ་ཁག་ལ་ཞི་གནས་ཉམས་སུ་ལེན་པའི་དམིགས་ཁྲིད་ཟབ་གནད་གནང་བ་དང་། དངོས་གཞི་ངོ་སྤྲོད་ཟིན་པ་རྣམས་ལ་ཁྲེག་ཆོད་དང་ཐོད་རྒལ་གྱི་ཉམས་ལེན་སྐོར་སོགས་གོ་སླ་གནད་བསྡུས་ཀྱི་སྒོ་ནས་གདམས་ཁྲིད་སྨར་བར་གནང་པས་རྒྱུད་ལ་ངེས་ཤེས་ཡང་དག་མཉེས་ཤིང་། ཉིན་ལྟར་ཐུན་བཞིའི་རྣལ་འབྱོར་ལ་བརྩོན་པའི་སློབ་ཚོགས་ཇི་སྙེད་བྱུང་། ཟླ་བ་བཞི་པའི་ཚེས་བཅུ་གསུམ་ཉིན་ཐན་ཅིན་སློབ་མ་ཁག་ཅིག་གིས་གདན་ཞུས་གྱིས་གནས་དེར་ཕེབས་ཏེ་སྐྱབས་འོག་ཏུ་འཁོད་པའི་སློབ་མ་རྣམས་ལ་ཉིན་གསུམ་གྱི་རིང་དགེ་སྡིག་སྤང་བླང་གྱི་བོན་སྦྱིན་གནང་བས་སྐྱོ་ཤས་ངེས་འབྱུང་གི་དགེ་སེམས་རབ་ཏུ་འབར་ཏེ། བོན་སྒོར་གསར་དུ་ཞུགས་པའི་སློབ་མ་ཡང་གང་མང་བྱུང་།   

ཟླ་བ་དྲུག་པའི་ཚེས་ཉེར་གཉིས་ཉིན་གང་ཤིས་དུ་གདན་ཞུས་བྱས་པ་ལྟར་དེར་ཡོད་སློབ་མ་རྣམས་ལ་ཉིན་གསུམ་གྱི་རིང་འཆད་ཁྲིད་དང་བོན་འབྲེལ་ཚད་མེད་སྤེལ་བ་དང་། ཟླ་བ་བདུན་པའི་ཚེས་གཅིག་ཉིན་ཧྲང་སྟོང་ཞིང་ཆེན་དུ་ཡོད་པའི་སློབ་མ་ཁག་ཅིག་གིས་གདན་ཞུས་བཞིན་བཀའ་དྲིན་བསྐྱངས་ཏེ་འདི་ཕྱི་གཉིས་ཕན་གྱི་གདམས་ཁྲིད་ཟབ་པར་མཛད།

ཟླ་བ་བདུན་པའི་ཚེས་ཉེར་བཞི་ཉིན་ཧོག་ཀྲོག་དུ་གདན་ཞུས་བྱས་ཏེ་འདུས་ཚོགས་སློབ་མ་རྣམས་ལ་དགེ་སྡིག་བླང་དོར་གྱི་བོན་སྦྱིན་སྦྲང་ཆར་ལེགས་པར་ཕབ་པས་སློབ་མ་རྣམས་ཀྱི་རྒྱུད་ལ་ངེས་ཤེས་ཀྱི་མྱུ་གུ་འབུས་ཤིང་ཆུ་གནས་འབུ་སྲིན་སོགས་ཀྱི་ཁ་ཟས་གཏན་ནས་སྤངས་ཏེ་སྔོན་འགྲོ་བསགས་སྦྱང་སོགས་དགེ་ལ་རབ་ཏུ་འདུན་པ་མ་ཟད། བོན་སྒོར་གསར་དུ་ཞུགས་པའི་སློབ་བུ་ཀྱང་ཤིན་ཏུ་མང་བར་བྱུང་ཏེ་གཡུང་དྲུང་བོན་གྱི་རང་སྒྲ་ཕྱོགས་བཅུར་བསྒྲགས་པར་མཛད་།   

ཟླ་བ་བརྒྱད་པའི་ཚེས་དྲུག་ཉིན་ཧྲིང་ཀྲིང་དུ་ཡོད་པའི་སློབ་མ་རྣམས་ཀྱིས་རེ་ཞུས་བཞིན་གནས་དེར་ཚོགས་བསགས་མཆོད་འབུལ་དང་། མངའ་དབུལ་རབ་གནས་བོན་འཆད་ཁྲིད་སོགས་ཀྱི་མཛད་པ་མ་ཟད། ཧྲིང་ཀྲིང་རིག་རྩལ་སྒོ་འབྱེད་ཀྱི་དུས་སྟོན་ཆེན་མོར་གདན་ཞུས་སྐབས་མི་གྲངས་སྟོང་ཕྲག་དུ་མས་དགའ་བསུ་ཚད་མེད་ཞུས་ཤིང་། སྐབས་དེར་ཆར་ཞོད་དྲག་པོར་གློ་བུར་དུ་བཅད་པ་སོགས་རྟགས་དང་མཚན་མ་ཀུན་གྱིས་མཐོང་སར་བཞག་པས། ཀུན་གྱིས་དགའ་མགུ་ཡིད་རངས་ཀྱི་མེ་ཏོག་ཆར་དུ་བསྙིལ་ཏེ། སངས་རྒྱས་གཡུང་དྲུང་བོན་གྱི་ཆེ་བའི་རྒྱལ་མཚན་ནུབ་མེད་མཁའ་རུ་བསྒྲེངས་བར་མཛད།  དེ་བཞིན་གའང་ཀྲོག་དང་ཧོའོ་ཧྲང་གཤའ་མིན་སོགས་སུ་རིམ་པར་ཕེབས་ཏེ་སློབ་ཚོགས་རྣམས་ལ་བོན་འཆད་ཁྲིད་སོགས་ཀྱིས་འགྲོ་དོན་རྒྱ་ཆེར་སྤེལ་ཞིང་།   སྐྱེ་བོ་གང་མང་ཞིག་བོན་སྒོར་གསར་དུ་ཞུགས་ཏེ་སྨིན་གྲོལ་མཛད། ཟླ་བ་དགུ་པའི་ཚེས་གཉིས་ཉིན་ཐན་ཅིན་དུ་གདན་ཞུས་ཐོག་རྒྱ་མཚོ་ཆེན་པོའི་སྟེང་གྲུ་གཟིང་དུ་བཞུགས་ཏེ་ཀླུ་བུམ་བརྒྱ་དང་རྩ་བརྒྱད་མཚོ་གཏེར་དུ་སྦས་ནས་འབྱུང་ཁམས་གཡོ་འཁྲུག་དང་ནད་ཡམས་བར་ཆད་སོགས་མི་མཐུན་ཉེར་འཚེ་ཞི་སྟེ་བརྟན་གཡོ་དགེ་ཞིང་ལེགས་པའི་ཐུགས་སྨོན་དང་ཆུ་གནས་སྲོག་ཆགས་གྲངས་མེད་ཚེ་ཐར་དང་འཆི་བསླུ་མཛད་པ་སོགས་མཐའ་ཁོབ་གཡུང་དྲུང་བོན་ལ་བསྒྱུར་བའི་མཛད་པ་བསྐྱངས་དང་སྐྱོང་མུས་སུ།  

སྤྱི་ཟླ་དགུ་པའི་ཚེས་དགུ་ཉིན་ཉག་རོང་བྱ་བཏང་རི་ཁྲོད་དུ་ཡུན་རིང་གདན་ཞུས་བྱས་པ་མ་ཟད་ལྷག་པར་རྒྱལ་བའི་བཀའ་རིན་པོ་ཆེའི་ལུང་རྒྱུན་སྤེལ་བའི་མཛད་སྒོ་མཇུག་གྲུབ་ལ་ཉེ་བའི་སྐབས་སུ་རེ་བ་ནན་གྱིས་ཕུལ་བ་ལྟར་གནས་དེར་ཞབས་ཀྱིས་བཅགས། སྐབས་དེར་ཉག་རོང་ལྷ་སྡེ་རྣམས་ནས་མཛེས་པའི་དར་གྱིས་བརྒྱན་པའི་རྟ་པ་གྲངས་མེད་པས་བསུ་བ་དང་ལམ་བར་དུ་བསང་དུད་ཀྱི་མཆོད་སྤྲིན་དགུང་དུ་འཕྱུར་བའི་ཀློང་ནས་ཐོག་མར་གོང་རྒྱལ་དགོན་གྱི་བླ་གྲྭ་ཡོངས་ཀྱིས་སྤོས་དང་རོལ་མོས་སྣ་དྲངས་ཏེ་མི་འཇིགས་གདོང་ལྔས་བཏེགས་པའི་ཁྲི་ལ་མངའ་གསོལ་ཞིང་།  མན་ཌལ་སྐུ་གསུང་ཐུགས་རྟེན་སོགས་འདེགས་འབུལ་ཞུས། དམ་པ་གང་ནས་ཀྱང་བསྟན་པ་འཛིན་སྐྱོང་སྤེལ་གསུམ་གྱི་ཐབས་ལམ་སྐོར་གྱི་བཀའ་མོལ་ཟབ་རྒྱས་མཛད་ཅིང་གཙུག་ལག་ཁང་རྟེན་དང་བརྟེན་པར་བཅས་ལ་མངའ་དབུལ་རབ་གནས་བྱས་ཏེ་བྱིན་རླབས་ཀྱི་ཚན་ཁ་འཕེལ་བར་མཛད།  

དེ་ནས་མཁའ་འགྲོ་གཡུང་དྲུང་ལྷ་མཆོག་དང་། ཁྲ་རྒན་མཁན་རིན་པོ་ཆེ་ཚུལ་ཁྲིམས་མཐར་ཕྱིན། མཁན་ཁྲི་གཙུག་རྒྱལ་མཚན་རྣམ་གསུམ་གཙོས་བྱ་བཏང་རི་ཁྲོད་དུ་བཀའ་འགྱུར་ལུང་འོག་ཏུ་འཁོད་པའི་ཕྱོགས་སོ་སོའི་བླ་སྤྲུལ་དང་མཁན་པོ་དགེ་བཤེས་བཙུན་པ་བཙུན་མ་སོགས་འདུས་གྲྭ་ལྔ་བརྒྱ་ལྷག་ཙམ་གྱིས་དར་ཟབ་ཀྱི་ཕེབས་ལམ་དང་མཆོད་པའི་རོལ་མོ་སོགས་ཡིད་དུ་འོང་བའི་རུ་བསྟར་གྱིས་ཕེབས་བསུ་ཞུས་ཏེ་འགྱུར་མེད་གཡུང་དྲུང་ཁྲི་ལ་མངའ་གསོལ་བ་དང་མཁའ་འགྲོ་གཡུང་དྲུང་ལྷ་མཆོག་གཙོས་པས་བླ་མ་མཆོད་པའི་གྱེར་དབྱངས་དང་ལྷན་མནྡལ་སྐུ་གསུང་ཐུགས་རྟེན་རྒྱས་འབུལ་ཞུས།  ཉིན་གཉིས་པར་འདུས་པ་ཀུན་ལ་རྒྱལ་ཡུམ་བྱམས་མ་ཆེན་མོའི་དབང་བཞི་བསྐུར་ཏེ་དབང་ཚིག་དང་འབྲེལ་བའི་ཞལ་གདམས་ཟབ་མོ་གནང་བ་མ་ཟད་ངོ་སྤྲོད་དོན་གྱི་དབང་གི་སྐབས་སུ་ནམ་མཁའ་ལ་ཤིན་ཏུ་བཀྲ་བའི་འཇའ་ཚོན་གསལ་བར་ཤར་བ་སོགས་ངེས་གསང་དོན་གྱི་དགོངས་པ་ལ་རང་བྱན་ཆུད་པའི་བརྡ་རྟགས་མངོན་གསུམ་དུ་གྱུར་པས་ཀུན་གྱིས་དགའ་དད་མོས་གསུམ་གྱི་སྒོ་ནས་ཚད་མཐོའི་གདེང་འཇོག་ཐོབ། མཁའ་འགྲོ་གཡུང་དྲུང་ལྷ་མཆོག་དང་མཁན་པོ་ཁྲི་གཙུག་རྒྱལ་མཚན་སོགས་དེར་ཡོད་འདུས་པ་ཀུན་གྱིས་མ་བསྐུལ་དང་བླང་གི་སྒོ་ནས་དམ་པ་གང་གི་སྐུ་གེགས་བར་ཆོད་སེལ་ཕྱིར་རིམ་གྲོ་དུ་དབལ་བོན་སྟག་ལ་སྤུ་གྲི་དམར་པོའི་གཞུང་འབུམ་གཅིག་དང་། བོན་སྐྱོང་སྲིད་པ་རྒྱལ་མོར་ཁྲི་ཚོགས་བཅས་ཞབས་བརྟན་འདི་གའི་སྔོན་ནས་གྲུབ་པར་ཞུས་འདུག  དམ་པ་གང་ནས་ཀྱང་འདུས་པ་ཡོངས་ལ་མང་ཇ་དང་སྐུ་འགྱེད་སོགས་ཀྱི་བསྙེན་བཀུར་ཟབ་རྒྱས་གནང་ཞིང་ཀུན་ཀྱང་འདོད་ཆུང་ཆོག་ཤེས་དང་ཞི་དུལ་ལྷོད་གསུམ་གྱིས་ཡ་རབས་སྤྱོད་བཟང་གི་ལས་ལ་འཇུག་ཅིང་། བསྟན་པ་ཀུན་གྱི་ཉིང་ཁུ་ངེས་གསང་བླ་མེད་རྫོགས་པ་ཆེན་པོར་རྒྱུན་ཏུ་བརྩོན་ཏེ་སྒྲུབ་རྒྱུད་བསྟན་པའི་རིང་ལུགས་ཀུན་མཁྱེན་འཇའ་ལུས་པའི་རྗེས་འཛིན་རྣལ་མ་ཞིག་དུ་འགྱུར་ཐབས་ཅི་ནས་ཀྱང་འབད་དགོས་ནན་གྱིས་གདམས་ཤིང་། འཚོ་གོས་གནས་མལ་སོགས་ཀྱི་མཐུན་རྐྱེན་དུ་ཐེབས་རྩའི་དངུལ་སྨར་ལས་སྒོར་ཁྲི་བཅུ་གཅིག་དང་སྐབས་དེར་བྱུང་བའི་འབྱོར་ཚོགས་ཀུན་རི་ཁྲོད་དུ་གནང་ཞིང་ལོ་ལྟར་ཆག་མེད་ཀྱི་སྒོ་ནས་འཚོ་བའི་མཐུན་སྦྱོར་གནང་རྒྱུ་ཞལ་བཞེས་གནང་།  དེ་བཞིན་གོང་རྒྱལ་དགོན་ལ་ཡང་དངུལ་སྨར་ཁྲི་གསུམ་དང་མང་ཇ་སྐུ་འགྱེད་སོགས་ཀྱི་བསྙེན་བསྐུར་མཛད་དེ་ཕྱིར་པེ་ཅིང་དུ་བདེ་བར་ཕེབས། 

སྤྱི་ཟླ་བཅུ་པའི་ཚེས་གསུམ་ཉིན་ཧྲང་སྟོང་དུ་ཕེབས་ཐེངས་གཉིས་པ་མཛད་དེ་སློབ་མ་བརྒྱ་ཕྲག་ལ་ཉེ་བ་ཙམ་དང་ལྷན་དུ་ཀླུ་བུམ་ཉིས་བརྒྱ་ལྷག་མཚོ་གཏེར་དུ་སྦས་པ་དང་ཆུ་གནས་སྲོག་ཆགས་ཇི་སྙེད་འཆི་བསླུ་དང་ཚེ་ཐར་བཏང་བ་སོགས་དགེ་རྩ་རྒྱ་ཆེར་བསྒྲུབས།

ཚེས་བཅུ་གཅིག་ཉིན་ཆབ་མདོ་ནང་བསྟན་མཐུན་ཚོགས་ཀྱི་ཚོགས་འདུར་ཕེབས་ཤིང་། སྐབས་དེར་སྲིད་ཕྱོགས་ནས་གདེང་འཇོག་ཆེན་པོ་བྱས་ཏེ་ཁོང་ཉིད་ནང་བསྟན་མཐུན་ཚོགས་ཀྱི་ཚོགས་གཞོན་དུ་བསྐོས་བཞག་བྱས།

ཚེས་བཅུ་བདུན་ཉིན་ཕྱིར་པེ་ཅིང་དུ་ཕེབས་ཏེ་ཚེས་ཉེར་གསུམ་ཉིན་པེ་ཅིང་བོན་གྱི་ཆོས་ཚོགས་ཆེན་མོ་ཐེངས་གསུམ་པ་ཚོགས་ཏེ་ཟབ་རྒྱས་བོན་གྱི་སྦྲང་ཆར་རབ་ཏུ་ཕབ་ཅིང་སློབ་མ་བརྒྱ་ཕྲག་དུ་མ་དང་ཆབས་ཅིག་ཏུ་མ་ཏྲིའི་བསྐུལ་མ་དང་བསྔོ་བ་སྨོན་ལམ་གསུངས་ཏེ་རྒྱལ་བསྟན་དར་ཞིང་རྒྱས་པའི་ཐུགས་བསྐྱེད་དང་། དེའི་མཐུས་འགྲོ་ཁམས་བདེ་ཞིང་སྐྱིད་པའི་སྨོན་ལམ་སོགས་དགེ་རྩ་འཁོར་གསུམ་དམིགས་མེད་ངང་དུ་རྒྱས་བཏབ་པར་མཛད།