སེམས་ཁོང་ནས་མེར་བའི་ཞལ་ཏ་དྲོན་མོ།

མང་འདུས་དད་འབངས་ཀྱི་གོང་ན། །

བསྙེན་དང་བཀུར་སྟི་ཡིས་བཏེགས་པའི། །

བླ་སྤྲུལ་བཤེས་གཉེན་གྱི་ཚོགས་ཀྱིས། །

གྲུབ་མཐའི་ཕྱོགས་ཞེན་དེ་མ་བསླངས། །

ཕུ་ནུ་ནང་འཁྲུག་གི་གཞི་ཡིན། །

འདི་དང་ཕྱི་མ་ལ་ཕན་པའི། །

ཁ་ཏ་སློབ་གསོ་ཞིག་ཡོད་ན། །

དགོས་པའི་ནམ་ཟླ་ལ་སླེབས་ཀྱང་། །

ཕུ་མདའ་ལ་དཀྲུག་གི་ཆོས་བཤད། །

མི་རིགས་ཕུང་སྦྱོར་གྱི་ལས་ཡིན། །

དམར་སེར་ངུར་སྨྲིག་གིས་མཛེས་པའི། །

ཨ་ཁུ་བཙུན་ཆུང་གི་གཞོན་ནུ། །

ལང་ཚོ་བློ་རིག་དེ་བཀྲ་དུས། །

ཁྱིམ་ཐབས་འདུ་འཛི་ལ་མ་དད། །

ཟིན་མེད་སྡུག་བསྔལ་གྱི་གཞི་ཡིན། །

དམངས་ཀྱི་སྐྱིད་སྡུག་ལ་ལྟ་བའི། །

ཨོ་ལོ་སྡེ་བ་ཡི་དཔོན་པོ། །

རྒྱུ་ནོར་ལྟག་སྒོ་དེ་ཆེ་ཆུང་། །

ལས་འབྲས་ཁྱད་གསོད་རང་མ་བྱེད། །

རྒྱལ་དམངས་གཉིས་ཕུང་གི་རྐྱེན་ཡིན། །

ཞིང་འབྲོག་ན་གཞོན་གྱི་ཕོ་མོ། །

དབྱར་རྩྭ་དགུན་འབུ་དེ་ཡོད་དུས། །

ཉིན་རེ་ཆ་ལུགས་རེ་སྒྱུར་ཏེ། །

རྒྱ་གྲོང་སོ་ཉུལ་དེ་མ་བྱེད། །

བྱད་ཁ་དབུལ་འདྲེ་ཡི་གཞི་ཡིན། །

ཆེ་ཆུང་སློབ་གྲྭ་ལ་འགྲིམ་པའི། །

ཨ་མའི་བུ་ཕྲུག་གི་ཚོགས་རྣམས། །

ཨ་ཕའི་སྐད་ཡིག་དེ་བསྐྱུར་ནས། །

གཞན་རིགས་ཤེས་ཡོན་ལ་མ་བརྩོན། །

མིའི་རིགས་བླ་བཙོང་གི་ལས་ཡིན། །

དབུ་ནག་བོད་པ་ཚོའི་ཤེས་རིག །

སྐད་ཡིག་སློབ་བརྩོན་གྱི་འོས་འགན། །

ཡ་ཀི་སེར་མོ་རང་མ་བསམ། །

རྩམ་གཟན་མི་བུ་ཞིག་ཡིན་ནས། །

ཀུན་ལ་འཁྲི་བ་ཞིག་ལོས་ཡིན། །

ཁ་བ་བུ་ཡུག་གི་འཚུབ་མའི། །

ཕྱི་དགྲ་འཁྱག་རོམ་དེ་དམ་ཞིང་། །

ནང་དབྱེན་འཁུན་སྒྲ་དེ་རྒོད་པས། །

མཚམས་མེད་སྡུག་བསྔལ་གྱི་བརླབ་ཕྲེང་། །

ཡངས་པའི་རྒྱ་མཚོ་རུ་འདྲེས་སོང་། །