སྤྲུལ་སྐུ་བློ་ལྡན་སྙིང་པོའི་རྣམ་ཐར་ཉུང་འདུས།

ན་མོ་གུ་རུ། གསང་མཆོག་རྒྱལ་པོ་རིག་པ་ཁུ་བྱུག་སྐུ། ཨོ་རྒྱན་པདྨ་ཐུགས་ཀྱི་སྤྲུལ་པའི་སྲས། དྲན་པ་ནམ་མཁའི་སྲོལ་འཛིན་འགྲོ་བ་འདུལ། སྤྲུལ་སྐུ་བློ་ལྡན་སྙིང་པོའི་ཞབས་ལ་འདུད། རྔུལ་རྫ་བར་མཚམས་ཚ་བ་སྒང་སྟོད་དུ། གཤེ་མ་གཤེན་ཚ་ཉི་མ་རང་ཤར་དུ། ཡབ་ནི་དབྲ་རིགས་ཚུལ་ཁྲིམས་སེང་གེ་དང་། ཡུམ་ནི་གདོང་རིགས་རིན་ཆེན་མཚོ་གཉིས་ལ། སྤྲུལ་པའི་སྐུ་མཆོག་ནམ་མཁའ་རིན་ཆེན་ཉིད། ལོ་རྒྱལ་ལྕགས་བྱི་ཡར་ཚེས་བཟང་པོར་འཁྲུངས། ལོ་ལྔ་ལོན་ནས་ཡིག་རྩིས་སློབ་བྱས་ནས། ལོ་བདུན་ཐོག་ནས་བྲི་འདོན་ཐོགས་པ་མེད། རིག་པའི་གནས་ལ་མ་སློབ་རང་རྡོལ་བྱུང་། རིན་ཆེན་གཡུང་དྲུང་རྒྱལ་མཚན་ཞལ་སྔ་ནས། གཙང་ཁྲིམས་བཞེས་ནས་ནམ་མཁའ་རིན་ཆེན་གསོལ། འཁྲུལ་ཞིག་ཡོན་ཏན་ཅུ་ར་འོད་ཟེར་དང་། ཞལ་མཇལ་ངོས་བཟུང་པདྨ་འབྱུང་དུ་གྲགས། དྲན་པ་ཡབ་སྲས་དམུ་ཙ་གྱེར་མེད་དང་། ཞི་བ་འོད་ལྡན་རིག་འཛིན་མཁའ་འགྲོ་ཡིས། ལུང་དུ་བསྟན་ནས་བོན་རྣམས་སྙན་དུ་བརྒྱུད། ཨོ་རྒྱན་གནས་སུ་དབང་ལུང་མན་ངག་ནོས། གསང་གྲགས་གནས་སུ་ཟབ་མོ་སྙན་དུ་བརྒྱུད། བཀྲ་ཤིས་ཕྱུག་མོར་མན་ངག་བཀའ་རྒྱ་དཀྲོལ། གྱིམ་ཤོད་མཐིལ་དུ་སྙན་བརྒྱུད་གཏན་ལ་ཕབས། ཤེལ་བྲག་རྫོང་དུ་བསྙེན་སྒྲུབ་ལྷ་ཞལ་ཁུམས། ཚ་བ་སྒང་དུ་བཀའ་རྒྱུད་བསྟན་པ་སྤེལ། མཐའ་ཁོབ་གནས་སུ་སྦས་མངོན་འགྲོ་དོན་མཛད། བསྟན་པ་རྫོགས་ནས་དགུང་ལོ་ཞེ་བདུན་དུས། ཁྱི་ལོ་སྟོན་ཟླ་ཐ་ཆུང་ཚེས་བརྒྱད་ལ། ཟོ་དོར་བཙན་བྲག་ལྷ་རྒྱལ་མདུན་དྲུང་དུ། གཞའ་ཚོན་གུར་ཕུབ་མེ་ཏོག་ཆར་བབ་གཤེགས། ཐུགས་ལྗགས་སྤྱན་གསུམ་སྐུ་གཟུགས་རིང་བསྲེལ་དང་། དཀྱིལ་འཁོར་ཡིག་འབྲུ་རྟེན་གསུམ་གྲངས་མང་བཞུགས། རྗེས་འབྲེང་སློབ་མ་ལས་ལྡན་ཐམས་ཅད་ཀྱིས། སྐུ་གདུང་བརྩིགས་ཤིང་སྐུ་གཟུགས་གསུང་རབ་བཞེངས། ཕྱི་རབས་དྭངས་འདྲེན་དག་སྣང་ཕྱོགས་མེད་རྒྱས། དཔག་མེད་འགྲོ་དོན་མཐའ་རུ་ཕྱིན་པར་ཤོག ། བཀྲ་ཤིས། །

རྣམ་ཐར་འདི་ལོ་འགའི་སྔོན་ལྷོ་རོང་བ་ཤོད་གྲོང་ནས་རྙེད་སོན་བྱུང་བའི་ཡིག་རྙིང་ལག་བྲིས་ཅན་ཞིག་ཏུ་ལགས་སོ། །