༄དད་གདུང་གི་སྨྲེ་ངག།།

ཁྲོམ་.གནམ་ཐོག །

   ༧ སྤྱིར་ཞྭ་དཀར་བསྟན་པའི་མཛེས་རྒྱན་དང་། །

དགོས་ཁྱུང་སྟེང་འགྲོ་བའི་བསོད་སྐལ་དུ། །

སྐུ་མཚན་དཔེའི་དཀྱིལ་འཁོར་མངོན་ཤར་བའི། །

སྐྱབས་ཁྱུ༵ང་ཡུ༵ལ་བསྟ༵ན་པ༵འི་གཙུ༵ག་རྒྱན༵་མཁྱེན། །

གདུང་རིགས་རྒྱུད་དབྲ་སེར་ཁྱུང་ལས་གྲོལ། །

སྐུ་སྐྱེ་བ་ཟླ་གྲགས་ལྔ་པའི་མཚན། །

ཐུགས་དགོངས་ཉམས་མདོ་སྔགས་སེམས་ཀྱིས་ཕྱུག །

དོན་དངོས་ཀྱི་བླ་མ་ཁྱེད་མིན་སུ། །

རྗེ་ཁྱེད་ཀྱིས་ཐུགས་བསྐྱེད་བྱིན་བརླབས་མཐུས། །

ཁྱུང་སྟོད་སྨད་སྡེ་དགོན་གང་དག་ལ། །

དུས་བདེ་སྐྱིད་ཉི་མ་ཤར་བཞིན་པར། །

སྤྲིན་ནག་པོས་གློ་བུར་སྒྲིབ་འདི་སྐྱོ། །

ཁྱེད་བསྟན་འགྲོའི་དོན་ཆེན་འགྲུབ་པ་དང་། །

བདག་རྟག་འཛིན་ཅན་རྣམས་སུན་དབྱུང་ཕྱིར། །

སྐུ་མི་རྟག་འདའ་ཚུལ་བསྟན་ཆོག་མོད། །

ཤུལ་ལུས་པའི་འཁོར་ལ་མི་གཟིགས་སམ། །

ཐུགས་དགོངས་པ་གཞན་དུ་གཟིགས་པའི་ཉིན། །

འབངས་དད་ལྡན་ཕོ་མོའི་ངུ་སྒྲ་དང་། །

འཁོར་སློབ་བུས་གསོལ་འདེབས་སྨྲེ་ངག་སོགས། །

རྗེ་ཁྱེད་ཀྱིས་སྙན་ལ་མི་གསན་ནམ། །

བསྟན་ཐུགས་ལ་བཅང་བའི་བླ་སྤྲུལ་དང་། །

བོན་སྐྱབས་སུ་འཛིན་པའི་འབངས་ཀུན་ནས། །

སྤྱི་ཡོངས་ལ་གྱོང་གུད་ཐེབ་སོང་ཞེས། །

མགྲིན་གཅིག་གིས་བོས་པ་མི་དགོངས་སམ། །

དཔལ་ཀོ་རྒྱལ་ཀུན་གྲགས་གླིང་ཉིད་དུ། །

མང་བཤད་སྒྲུབ་འདུས་ཚོགས་རྒྱས་ན་ཡང་། །

རྗེ་བླ་མ་གཤེགས་པའི་ཚུལ་མཐོང་ན། །

མིག་འཆི་མས་མི་རླན་རང་དབང་ཅི། །

དུས་སྙིགས་མའི་རང་འཚང་ཕྱིར་མངོན་སྐབས། །

བསྟན་འཛིན་སྐྱོང་སྤེལ་བའི་བཤེས་གཉེན་རྣམས། །

བདུད་ཉེར་འཚེའི་བར་ཆོད་བརྩམས་པ་ལ། །

ལས་གཡེལ་བར་བཟོད་དམ་བསྟན་སྲུང་ཚོགས། །

སྤྱིར་བསྟན་དང་འགྲོ་བའི་བསོད་ནམས་ཀྱིས། །

ཅུང་མ་འདངས་ཚུལ་གྱིས་གློ་བུར་དུ། །

ཞིང་མཁའ་སྤྱོད་འཚོགས་གྲལ་ཕེབས་པ་འདིས། །

འཁོར་སློབ་བུས་སེམས་རྩ་ཆུ་ལས་གྲང་། །

ལུས་གུས་པས་ཐལ་མོ་ཁྱེད་ལ་སྦྱར། །

ངག་གདུང་བས་འོ་དོད་ཁྱེད་ལ་འབོད། །

ཡིད་སྐྱོ་བས་གསོལ་སྨོན་ཁྱེད་ལ་འདེབས། །

ཚོམ་གཅིག་འཁོད་རེ་འབོད་ཁྱེད་ལ་ཞུ། །

སྐུ་མཚན་དཔེ་རེ་ཞིག་བསྡུས་ན་ཡང་། །

ཐུགས་དགོངས་པས་འགྲོ་བ་མི་འདོར་ཕྱིར། །

འཁོར་དད་འབངས་ཡོངས་ཀྱི་རེ་ལྟོས་བཞིན། །

སླར་ཡང་སྲིད་གནས་འདིར་བྱོན་ཤིག་ཀྱེེ། །

སྐྱབས་མཆོག་གསུམ་བསླུ་མེད་བདེན་སྟོབས་དང་། །

དད་སྒོ་གསུམ་མོས་གུས་གསོལ་བཏབས་འཐུས། །

བདག་འདི་ནས་སྲིད་འཁོར་མ་སྟོང་བར། །

མགོན་ཁྱེད་ཀྱི་རྗེས་སུ་འཛིན་ནུས་ཤོག། །

༢༠༡༢ / ༤ / ༤ ཉིན་

གནམ་མཐོང་ཟླ་བའི་རྩེ་ནས་

དད་གདུང་འཆི་མས་

                   མིག་མཐའ་འཁོར་བཞིན་བྲིས་སོ།།