སློབ་གྲོགས་ལ་བཅངས་པའི་བརྩེ་སེམས།
ཚོགས་བསགས་དཔལ་ལས་དལ་དང་འབྱོར་བའི་རྟེན། །
ཅི་དགར་རྙེད་པའི་ལས་འཕྲོ་མཉམ་འཛོམས་ངང་། །
གྲོགས་ཀྱི་དྭངས་མ་ཁྱེད་རྣམས་བདག་ཡིད་ཀྱི། །
ལྷག་བསམ་གུར་ཁང་དབུས་སུ་ནམ་ཡང་ཡོད། །
གཤིས་འཇམ་བལ་གྱི་འདབ་མའི་སྦུབ་གསེང་ནས། །
ཡིད་འཕྲོག་ཚིག་གིས་དྲང་བདེན་སྟོན་མཁས་པའི། །
གཤིས་བཟང་ངུར་སྨྲིག་འཛིན་པའི་ཁྱུ་ཚོགས་ནི། །
ས་སྟེང་སྐྱེ་འགྲོ་སྟོང་གི་དཔལ་དུ་སེམས། །
ནང་དུ་བསླབ་ཁྲིམས་གཙང་མའི་བསུང་ཞིམ་འཐུལ། །
ཕྱི་རུ་ངུར་སྨྲིག་འཕུར་མའི་ན་བཟའ་མཛེས། །
ཁོང་དུ་ཐོས་བསམ་ཤེས་རབ་སྒྲོན་མེ་འབར། །
ལྷ་ཕྲུག་ཁྱོད་རྣམས་རྒྱལ་བ་མཉེས་པའི་རྫས། །
རིགས་པའི་ལམ་གྱི་གོམ་སྟབས་བསྒྱུར་བ་ལ། །
ཕྱྭ་ཡི་སྲས་ཀྱང་དོ་ཟླར་མི་འོས་པའི། །
སྐྱེས་སྦྱང་ཤེས་རབ་ཁོང་ནས་རྫོཌ་པའི་དཔལ། །
བློ་གསལ་ཁྱེད་རྣམས་སྨྲ་སེང་བཞད་པའི་ཡུལ། །
གཤིས་ལ་བཅོས་མའི་ཚུགས་ཀྱིས་མ་བསླད་ཅིང་། །
སེམས་ལ་གཡོ་སྒྱུའི་ཤུབས་ཀྱིས་མ་སྒྲིབ་པའི། །
རང་གཤིས་རྣལ་མའི་དེ་ཉིད་མངོན་གསལ་བའི། །
སློབ་གྲོགས་གང་དེ་བདག་སྙིང་གསལ་བའི་རྒྱན། །
ངུར་སྨྲིག་འདབ་མའི་ན་བཟའ་མཉམ་དུ་གོན། །
རིགས་པ་སྨྲ་བའི་མགྲིན་དབྱངས་མཉམ་དུ་འཐེན། །
ཐལ་ཕྱིར་སྒྲ་ཡིས་བློ་གྲོས་མཉམ་དུ་བསྲེ། །
དཔྱད་པ་གྲུང་པོས་མདུན་ལམ་མཉམ་དུ་འཚོལ། །
ལྕེ་རྩེ་ནར་དང་མགོ་བོ་ཞུམ་ཞུམ་སོགས། །
མི་བདེན་བརྫུ་བག་སྟོན་པའི་སྤྱོད་ལམ་ནས། །
གཡོ་གར་འཕྲུལ་གྱིས་ངོས་དགའ་ངོ་སྲུང་གིས། །
ཁྱོད་ཉིད་འགུ་བའི་འཁྲབ་སྟོན་མ་ཤེས་ཀྱང་། །
འཆད་རའི་རྩོད་སྦྱོང་བར་གྱི་དཔེ་ལྟ་དང་། །
རྒན་གྱི་ཞལ་ཁྲིད་འཚོགས་པའི་འདོན་མཆོད་སོགས། །
དགེ་བར་འབད་པའི་དུས་སྐབས་ནམ་ཚེས་སུ། །
ཁྱོད་ལ་ཕན་པའི་བདེན་སྨོན་ནམ་ཡང་འདེབས། །
༢༠༡༣－༤－༢༧ཉིན་དྲང་གིས་བྲིས།
- ཟིན་ཐོ་གོང་མ།ཁ་པར་གྱི་བསླུ་བྲིད་འོག་ཏུ་ཚུད་ན།
- ཟིན་ཐོ་འོག་མ།རྟ་རྒན་གྱི་སྡུག་ཡུས་ཁེར་ལབ།
གྲོགས་མཆེད་ལགས་ཀྱི་རྩོམ་ཉམས་ལྡན་པའི་རྩོམ་ཐུང་ཞིག་སྤེལ་བ་བཀའ་དྲིན་ཆེ་འམ་ཐུགས་རྗེ་ཆེ་ཞུ་བ་ཡིན། ཚ་བའི་ཁྱུང་སེང་ནས།གྲོགས་ལགས་ཕེབས་པར་དགའ་བསུ་ཞུ།
དོན་ཉམས་ཅན་གྱི་རྩོམ་ལེགས་པོ་བྲིས་གནང་འདུག ཡི་རངས་ཞུ་བཞིན་ཡོད། ཁྱུང་གསེར་ཞུན་ནས།