ཕྱོགས་བོན་གྱི་མཚན་ཉིད་སྐོར་གྱི་གླེང་བསླང་།

རང་ལྟ་ལ་མི་ཆགས་ཤིང་གཞན་ལྟ་ལ་མི་སྡང་བའི་གངས་ཅན་ཚད་མའི་མགོན་པོ་༧རྗེ་མཉམ་མེད་ཤེས་རབ་རྒྱལ་མཚན་གྱི་ཞབས་ལ་སྒོ་གསུམ་གུས་པ་ཆེན་པོས་ཕྱག་འཚལ་ལོ། །

ཞེས་སྐྱབས་གསོལ་སྔོན་དུ་བཏང་ནས། འདིར་གླེང་བར་བྱ་བ་ནི། ཚད་མ་རྣམ་འབྱེད་འཕྲུལ་གྱི་སྒྲོན་མེའི་ནང་གི་ཕྱོགས་བོན་གྱི་མཚན་ཉིད་དེའི་སྐོར་ནས་ཡིན། དེ་ཡང་སྔ་རྗེས་སུ་ཁོ་བོས་སློབ་དཔོན་བཟང་རྒྱལ་གྱི་རྟགས་ཀྱི་རིགས་པའི་རྣམ་བཞག་དང་། རྗེ་རིན་པོ་ཆེའི་མཛད་པའི་ཚད་མའི་གཞུང་སོགས་ལ་སློབ་སྦྱོང་ངམ་རྩོད་སྦྱོང་རོབ་ཙམ་ཞིག་བྱེད་མྱོང་མོད། དེའི་སྐབས་ཚད་མ་རྣམ་འབྱེད་རང་འགྲེལ་ལས། བསྒྲུབ་བྱའི་བོན་གྲུབ་བསལ་མེད་ཅིང་བསྒྲུབ་བྱའི་བོན་གྱི་དཔག་གཞིར་བཟུང་བ་དེ་བོན་ཅན་གྱི་མཚན་ཉིད་ཅེས་དང་། བསྒྲུབ་བྱ་སྒྲུབ་པར་བྱེད་པ་ལ་ཚུལ་གསུམ་ཡིན་པའི་གཏན་ཚིགས་དེ་རྟགས་ཀྱི་མཚན་ཉིད་ཅེས་དང་། རྟགས་ཤེས་འདོད་བོན་ཅན་ལ་ཇི་ལྟར་བཀོད་པ་བཞིན་དུ་ངེས་རུང་ངམ་དངོས་སུ་ངེས་པ་དེ། ཕྱོགས་བོན་གྱི་མཚན་ཉིད་ཅེས་སོགས་སློབ་དཔོན་བཟང་རྒྱལ་གྱི་རྟགས་རིགས་སྔོན་དུ་སྦྱངས་ཚར་བ་དེའི་ནང་གི་མཚན་ཉིད་ཀྱི་ཚིག་སྒྲོས་དང་ཅུང་ཞིག་མི་མཚུངས་པའི་ཚུལ་ཞིག་མཐོང་བྱུང་། དེའི་གྲས་ནས་གལ་ཆེ་བ་ཞིག་ནི་བཟང་རྒྱལ་མཆོག་གིས་མཚན་ཉིད་བཞག་པ་ལྟར་ན་ཕྱོགས་བོན་གྱི་མཚན་ཉིད་ཀྱི་ཟུར་གྱི་ངེས་རུང་ཞེས་པ་དེ་རྩ་བ་ཉིད་ནས་མ་སྦྱར་ན་ཡང་ཕྱོགས་བོན་གྱི་མཚན་ཉིད་འཇོག་ཐུབ་པར་འདུག དེས་ན་ངེས་རུང་ཞེས་པའི་དོན་ལ་ཚིག་རྩོད་མང་ཙམ་ཞིག་རབ་དང་རིམ་པར་བྱེད་པའི་གོ་སྐབས་ཀྱང་རགས་བྱུང་། ཡིན་ནའང་ངེས་རུང་ཞེས་པའི་དོན་དེ་འདི་ཡིན་ཞེས་ད་བར་ཁ་ཚོན་གཅོད་ནས་འཇོག་ཐུབ་པ་ཞིག་མ་བྱུང་། གྲོགས་དག་ལ་ལས་ནི་ངེས་རུང་ཞེས་པ་དེ་ནི་ཁ་གསལ་བྱེད་ཙམ་ལ་གོ་བ་སྟེ་སྒྲ་བྱས་པ་ཡིན་པར་ངེས་ཟིན་པའི་རྒོལ་བ་དེས་ཀྱང་སྒྲ་བྱས་པར་ངེས་རུང་ནས་ངེས་པ་ཡིན་པ་དེ་ཙམ་ལ་གོ་ཞེས་བརྗོད་པ་ཡང་ཐོས་ཀྱང་། དེ་ཙམ་གྱིས་ཡིད་ག་ལ་ཚིམས་སྟེ་སློབ་དཔོན་བཟང་རྒྱལ་གྱིས་རྟགས་རིགས་ལས་ངེས་རུང་ཞེས་པ་ནི་སྒྲ་བྱས་པ་ཡིན་མིན་ཐེ་ཚོམ་ཟ་བའི་རྒོལ་བ་ལྟ་བུ་ལ་དགོངས་པར་སེམས་སོ། །ཞེས་གསུངས་པ་དང་རྗེ་རིན་པོ་ཆེ་མཆོག་གིས་ཀྱང་ངེས་རུང་སྨོས་པ་ཙམ་གྱིས་མ་ཚད་པར་ངེས་རུང་ངམ་ངེས་པ་ཞེས་གདམས་ང་ལྟ་བུའི་ཚུལ་ཞིག་མཛད་པ་མིན་ནམ་སྙམ། དེ་ལྟར་སོམ་ཉིའི་རྒྱ་ལ་ཚུད་བཞིན་དུ་མི་ཤེས་ཟེར་མི་ནུས་པའི་མཚན་ཉིད་པའི་རྟུལ་ཞུགས་ལྟར་དྲེ་བཙུན་སྦྱིན་པའི་དྲི་བའི་གླིང་ཁ་ཞེས་པའི་ཟིན་ཐོ་དེར་གུས་པས་འདིའི་སྐོར་ནས་དཔྱད་པ་ཉི་ཚེ་བའི་མཆན་འགའ་ཞིག་ཀྱང་བཀོད་པ་ཡིན་ཏེ། དེ་ཡང་ངེས་རུང་ངམ་ཞེས་པའི་ངམ་དེ་གདམས་ངའི་ཚིག་ཡིན་ཞེས་བཤད་པ་ཡིན་ལ། རྗེ་དང་བཟང་རྒྱལ་གཉིས་ཀྱི་མཚན་ཉིད་འཇོག་ཚུལ་མ་མཐུན་པ་ནི། རྗེ་རིན་པོ་ཆེས་ནི་སྤྱིར་བཏང་སྟེ་སྐབས་སུ་བབ་པའི་རྒོལ་བའི་བློ་ཡི་ངེས་ཕྱོགས་ལ་ལྟོས་པ་མིན་པར་ངེས་རུང་བ་དང་ངེས་པ་གང་རུང་ཡིན་ན་ཕྱོགས་བོན་ཡིན་ཆོག་པས་ན། དེའི་མཚན་ཉིད་བཞག་པ་ཡིན་ཞིང་། བཟང་རྒྱལ་མཆོག་གིས་ཇི་ལྟར་བཀོད་པ་བཞིན་དུ་ཡོད་པ་ཉིད་དུ་དངོས་སུ་ངེས་པ་ཞེས་གསུངས་པ་ནི་སྐབས་སུ་བབ་པའི་ཕྱི་རྒོལ་གྱི་ངོར་ལྟོས་ཏེ་ཕྱོགས་བོན་གྲུབ་མ་གྲུབ་ཀྱི་མཚན་ཉིད་ནམ་ཚད་བཞག་པ་ཡིན་ཞེས་ལབ་པ་ཡིན། རང་ཉིད་ཀྱིས་དེ་ལྟར་སྨྲས་པ་དེར་རང་ཉིད་ཀྱང་ཡིད་རྟོན་མི་ཕེལ་ཏེ། དེའི་རྗེས་ཉིན་ཞིག་གི་འཆད་ཐུན་གྱི་སྐབས་སུ་འདིའི་སྐོར་གྱི་གླེང་བསླང་ཞིག་བྱས་པ་ལ། གུས་པས་གོང་དུ་དྲེ་བཙུན་སྦྱིན་པ་ལ་ལན་བཏབས་པ་ནང་བཞིན་ཡིན་ཁུལ་བརྗོད་པའི་མོད་ལ།  སློབ་གྲོགས་ཤིག་ན་རེ། དཔེར་ན་སྒྲ་བྱས་པ་ཡིན་མིན་ཐེ་ཚོམ་ཟ་བའི་རྒོལ་བའི་ངོར་བྱས་པ་བོན་ཅན། སྒྲ་མི་རྟག་པ་སྒྲུབ་པའི་རྟགས་ཡང་དག་ཡིན་པར་ཐལ། དེ་སྒྲུབ་ཀྱི་ཚུལ་གསུམ་ཡིན་པའི་གཏན་ཚིགས་ཡིན་པའི་ཕྱིར། དེར་ཐལ། དེ་སྒྲུབ་ཀྱི་ཕྱོགས་བོན་རྗེས་ཁྱབ་ལྡོག་ཁྱབ་རེ་རེ་ནས་ཡིན་པའི་ཕྱིར་དང་གཏན་ཚིགས་སུ་བཀོད་པ་ཡང་ཡིན་པའི་ཕྱིར། ཞེས་རྩོད་བྱུང་བ་དེར་ལན་ཡང་དག་པ་ཞིག་ཕོག་མ་སོང་། ཡང་སློབ་གྲོགས་གཞན་ཞིག་ནས་ངེས་རུང་ཞེས་པའི་དོན་ནི་གཞན་ཞིག་ཏུ་འགྲེལ་དགོས་པ་ལས་ཕྱོགས་བོན་གྱི་མཚན་ཉིད་དང་དམིགས་བསལ་གྱི་འགྲེལ་བ་མེད་ཚུལ་ཡང་བརྗོད་བྱུང་། དེ་ལྟར་ན་རྗེ་ཡི་ཚད་མའི་ནང་གི་ཕྱོགས་བོན་གྱི་མཚན་ཉིད་དེ་མེད་ན་མི་དགོས་པ་དང་ཉུང་ན་མི་འདུས་པའི་སྐྱོན་དང་བྲལ་བ་ཡང་མིན་ཟེར་དགོས་པར་འདུག་པས་ཅུང་ཞིག་ཡིད་ལ་འཐད་པོ་ཡང་མ་བྱུང་ཡང་དོན་ངོ་མའི་གོ་དོན་འདི་ལྟར་ཡིན་སྙམ་པ་ཞིག་མ་བྱུང་། དེ་ལྟར་བློ་མ་བདེ་ས་ལ་གླེང་གྲངས་མང་ཞེས་པའི་དཔེ་ལྟར། གྲོགས་དག་ལ་ལས་ནི་ངེས་རུང་ངམ་ངེས་པ་ཞེས་པའི་སྐབས་ཀྱི་ངམ་སྒྲ་དེ་ནི་འབྱེད་སྡུད་ཐེ་ཚོམ་དྲི་གདམས་ལྔ་ལས་སྡུད་པ་འམ་འབྱེད་པའི་དོན་ལ་འཇུག་པ་མིན་ནམ་སྙམ་པའི་སྐད་ཆ་ཡང་བྱུང་མོད། ཡིན་ན་ཡང་འབྱེད་སྡུད་ཐེ་ཚོམ་དྲི་གདམས་ལྔ་ལས་འབྱེད་པ་འམ་བསྡུས་པའི་དོན་ལ་འཇུག་ཚུལ་ཡང་མིག་སྟོང་བགྲད་ནས་བལྟས་ཀྱང་རྙེད་རྒྱུ་མི་འདུག་སྟེ། སྐུ་ནི་གསུམ་སྟེ་བོན་སྐུ་འམ་རྫོགས་སྐུ་འམ་སྤྲུལ་སྐུའོ་ལྟ་བུའི་འབྱེད་པ་ཡང་མིན་ལ། གཡག་ལུག་ར་གསུམ་ནི་གཡུང་དྭགས་སོ་ལྟ་བུའི་སྡུད་པ་ཡང་ཅིས་ཀྱང་ཡིན་ཚུལ་མེད་དོ། །དེ་གཉིས་གང་རུང་མིན་ཡང་ངེས་རུང་ངམ་ཞེས་པའི་ངམ་སྒྲ་ནི་བརྡ་སྤྲོད་ཀྱི་འཇུག་ཚུལ་ལྟར་གྱི་གོ་བ་ཞིག་ལེན་དགོས་པ་ལས་གཞན་གང་ཡང་འགྲེལ་ཐབས་མི་རྙེད་མོད། དེས་ན་ཅིས་ཀྱང་གདམས་ང་ལ་འཇུག་པར་བསམ་ནས་དཔྱད་པ་མང་ཙམ་བཏང་ཡང་བསམ་རྒྱུ་གཅིག་ལས་མ་རྙེད་པ་ནི་ཨ་ཁུ་སྔར་མིན་སྔར་ལོག་ལྟར། ངེས་རུང་ཞེས་པའི་དོན་གྱི་འགྲེལ་ཚུལ་ནི་སྤྱིར་ཕྱོགས་བོན་གྱི་གྲུབ་ཚུལ་ཏེ། དཔེར་ན་སྒྲ་མི་རྟག་པ་ཡིན་མིན་ཐེ་ཚོམ་ཟ་བའི་རྒོལ་བས་སྒྲ་མི་རྟག་པ་ངེས་རུང་ཡིན་ཞིང་། སྒྲ་རྟག་པ་ངེས་རུང་མིན། དེ་ལྟར་ཡོད་པའི་བོན་ལ་ཐེ་ཚོམ་ཟོས་ཀྱང་ངེས་རུང་འཇོག་ཆོག་ལ། མེད་པ་ལ་ཐེ་ཚོམ་ཟོས་ཀྱང་ངེས་རུང་འཇོག་རྒྱུ་མེད་པའི་རྣམ་བཞག་འཐད་དགོས་པས། ད་ལྟའི་ཕྱོགས་བོན་གྱི་མཚན་ཉིད་ཟུར་དུ་ངེས་རུང་ངམ་ངེས་པ་ཞེས་གསུངས་པའི་དོན་ནི་སྤྱིར་ཕྱོགས་བོན་གྱི་མཚན་ཉིད་ཡིན་ཏེ། ཤེས་འདོད་བོན་ཅན་ལ་ཇི་ལྟར་བཀོད་པ་བཞིན་དུ་ངེས་རུང་ངམ་ངེས་པ་གང་རུང་ཡིན་ན་སྤྱིར་ཕྱོགས་བོན་ཡིན་པས་ཁྱབ་པའི་ཕྱིར། དེར་ཐལ་སྒྲ་མི་རྟག་པར་སྒྲུབ་པའི་ཤེས་འདོད་བོན་ཅན་ལ་ཇི་ལྟར་བཀོད་པ་བཞིན་དུ་ངེས་རུང་ངམ་ངེས་པ་གང་རུང་ཡིན་ལ་དེ་སྒྲུབ་ཀྱི་ཕྱོགས་བོན་མ་ཡིན་པ་མེད་པའི་ཕྱིར་རོ། །འོན་ཀྱང་སྐབས་སུ་བབ་པའི་རྒོལ་བའི་བློ་ངོ་ལ་ལྟོས་ཏེ་ཕྱོགས་བོན་གྲུབ་མ་གྲུབ་ཚད་འཇོག་དགོས་པས་ན་བཟང་རྒྱལ་རིན་པོ་ཆེས་དངོས་སུ་ངེས་པ་ཞེས་བཞགས་པར་སེམས་སོ། །དེ་ལྟར་གྱི་ཁྱད་པར་འབྱེད་པ་ལ་དཔྱད་གཞི་འདི་ལྟར་ཡོད་དེ། དཔེར་ན་བོན་གྱི་སྤྱན་ལྡན་ཆེན་པོ་སོགས་མཁས་པ་འགའ་ཞིག་གིས་རྟགས་ཡང་དག་ཡིན་ན་གཞི་གྲུབ་ན་དེ་སྒྲུབ་ཀྱི་མཐུན་ཕྱོགས་དང་མི་མཐུན་ཕྱོགས་གང་རུང་དུ་ཁ་ཚོན་ཆོད་དགོས་ཚུལ་དང་མ་ཆོད་ན་སྐྱོན་དུ་འགྱུར་ཚུལ་བཞེད་པ་དང་། གཞན་སྡེའི་མཁས་པ་འགའ་ཞིག་གིས་དགག་སྒྲུབ་བློ་ངོར་བྱེད་དགོས་པས་མཐུན་ཕྱོགས་དང་མི་མཐུན་ཕྱོགས་ཡང་བློ་ངོར་ལྟོས་ཏེ་འཇོག་དགོས། དེས་ན་སྒྲ་མི་རྟག་པར་སྒྲུབ་དགོས་ཀྱི་ཕྱི་རྒོལ་ཡང་དག་གི་ངོར་སྒྲ་དེ་དེ་སྒྲུབ་ཀྱི་ཕྱོགས་གཉིས་གང་རུང་མ་ཡིན་པས་གཞི་གྲུབ་ན་དེ་སྒྲུབ་ཀྱི་མཐུན་ཕྱོགས་དང་མི་མཐུན་ཕྱོགས་གང་རུང་ཁ་ཚོན་མི་ཆོད་པར་བཞེད་ལུགས་སོགས་ལ་ཟུར་བལྟས་ལེབ་མཐོང་གྱིས་ཚོད་ལྟ་ཞིག་བྱས་པས། གོང་གི་ཚད་མ་རྣམ་འབྱེད་ནས་ཕྱོགས་བོན་གྱི་མཚན་ཉིད་ཟུར་གྱི་ངེས་རུང་ངམ་ངེས་པ་ཞེས་པའི་དོན་ནི་སྤྱིར་བཏང་ཙམ་ལ་འགྲེལ་དགོས་པའམ་སྐབས་བབ་ཀྱི་རྒོལ་བ་ལ་མ་ལྟོས་པའི་ཕྱོགས་བོན་གྱི་དོན་ལྡོག་བཞག་པ་དང་། བཟང་རྒྱལ་གྱིས་མཚན་ཉིད་ཟུར་དུ་དངོས་སུ་ངེས་པ་ཞེས་པའི་དོན་ནི་སྐབས་ཀྱི་རྒོལ་བའི་བློ་ངོར་ལྟོས་ཏེ་ཕྱོགས་བོན་གྱི་མཚན་ཉིད་བཞག་པ་ཡིན་ལས་ཆེ་སྙམ་པའི་ཐེ་ཚོམ་ཞིག་ངང་ངམ་ཤུགས་ཀྱིས་བྱུང་། དེས་ན་མཁས་པ་གོང་འོག་རྣམ་གཉིས་རྒོལ་བའི་བློ་ངོ་འབའ་ཞིག་ལ་ལྟོས་པ་དང་མི་ལྟོས་པའི་ཁྱད་པར་བྱུང་ཞེས་བརྗོད་ན་འཐད་དམ་སྙམ། །ཞེས་དཔྱད་པའི་གདེང་མི་ལྡན་པར་བྱིས་པའི་གོག་འགྲོས་ལྟ་བུའི་ཚུལ་གྱིས་སྨྲས་པ་འདི་ནི་གནས་སྐབས་འགྲོ་ལོ་འདུག་ལོ་ཙམ་ལ་ཡིད་རྟོན་བྱས་པ་ཙམ་གྱིས་གོ་མ་ཆོད་པའི་གནས་ཚུལ་ལམ་དྲི་བ་རྣོན་པོ་འགའ་ཞིག་རང་ཐོག་ཏུ་སླེབས་པའི་ཉིན་དེ་ནས་རང་བློ་གཞུང་ལ་འདྲིས་པའི་སླད་དམ་ཐོས་བསམ་གྱི་གོམ་པ་ལེན་གཅིག་སྤོ་བའི་བརྩོན་སེམས་ཀྱིས་བྲིས་པ་ཡིན་པས་ལུང་རིགས་སྤྱན་ལྡན་རྣམས་ཀྱིས་ཐུགས་ཁྲེལ་མི་མཛད་པར་འཐད་མིན་གྱི་དགག་སྒྲུབ་ཅི་རིགས་གནང་བའི་གསོལ་བ་འདེབས་པ་ལགས་སོ།།

དྲང་རྒྱན་པས་སྤྱི་ལོ་༢༠༡༢། ༡༠། ༢༤ཉིན་བྲིས་པར་དགེ་ལེགས་འཕེལ་བར་ཤོག ། །