རང་མགོ་ནས་ནམ་ལངས།

དེ་ཡང་ཕྱོགས་ཀུན་ཏུ་གཟིགས་པའི་སྤྱན་དཀྱུས་ཡངས་པོར་མངའ་བ་རྗེ་རིན་པོ་ཆེ་༧ཤེས་རབ་རྒྱལ་མཚན་གྱི་ཞལ་ནས། རང་ལྟ་ལ་མི་ཆགས་ཤིང་གཞན་ལྟ་ལ་མི་སྡང་བའི་སྒོ་ནས་གྲུབ་མཐའི་རྣམ་བཞག་བྱེད་པ་ནི། ཤེས་རབ་སྐྱེ་བའི་རྒྱུ་དང་དག་སྣང་སྦྱོང་བའི་ཐབས་ཁྱད་པར་ཅན་ཡིན་པས་དམ་པའི་ལུགས་སུ་འདོད་དོ།། ཞེས་པའི་གདམས་དོན་གྱི་བྲོ་བ་ཡང་ནས་ཡང་དུ་མྱོང་གོམས་བྱས་པས་དགེ་མཚན་བྱིན་རླབས་ཀྱི་ཚན་ཁ་མ་ཉམས་པ་ལ་བརྟེན་ནས། ད་ལན་ཁོ་བོས་༼རང་མགོ་ནས་ནམ་ལངས་༽ཞེས་པའི་རང་མོས་གླེང་བརྗོད་ཅིག་འབུལ་བ་ལ། དེ་ཡང་རང་ཤོང་ཁུང་བུ་ནང་ན་འཁྲེན་པའམ་རང་ཕྱོགས་བླ་མའི་ལྟ་གྲུབ་ཁོ་ནར་ཨ་འཐས་སུ་བཟུང་བ་མ་ཡིན་པར་བློ་ཁོག་ཡངས་སུ་བཏང་སྟེ་མནོ་བསམ་ཞིབ་མོར་བཏང་བ་ཡིན་ན། འཛམ་གླིང་མི་རིགས་ཀུན་ཀྱི་མདུན་སར་ངོམ་རིན་ཆོག་པའི་ཀུན་ཕན་ལྷག་བསམ་གྱི་འོད་སྣང་དཀར་པོའི་སྣ་དྲངས་པ་ཡིན་ན། རང་ཕྱོགས་ནས་གཞན་ཕྱོགས་སུ་ཁྱབ་པའི་ཡིད་འོང་དྭངས་གཙང་གི་ཁོར་ཡུག་ཞིག་བསྐྲུན་ཐུབ་ལ་དེས་སྟེར་བའི་བདེ་སྐྱིད་ཀྱི་རོ་བྲོ་ཡང་མྱོང་ཐོབ། འཇིག་རྟེན་གྱི་གཏམ་དཔེར། མི་རང་ས། རང་མི་ས། ཞེས་པ་ལྟར། རང་གི་བདེ་བ་དང་འབྱོར་བ། དེ་བཞིན་ཤེས་ཡོན་སོགས་ཇི་ལྟར་འདོད་པ་བཞིན་དུ་གཞན་གྱིས་ཀྱང་དེ་ལྟར་འདོད་པ་བསྙོན་དུ་མེད། དེས་ན་གཞན་ལ་གནོད་མེད་ཕན་སེམས་ཀྱི་སྒོ་ནས་མཐུན་འབྲེལ་གྱི་ཨ་ལོང་ཞིག་བསྐོན་ཐུབ་ན། ད་བཟོད་རང་གིས་འདོད་པའི་དོན་བཟང་ངམ། བདེ་བ་དེ་ཡང་ཞོར་དུ་འབྱུང་བ་ལོས་ཡིན། དེས་ན་༼རང་མགོ་ནས་ནམ་ལངས་༽ཞེས་པའི་གླེང་བརྗོད་འདིའི་བརྗོད་གཞི་ནི། རང་རྒྱུད་འཚོ་བལྟ། རང་སྐྱོན་ངོས་ཟིན། རང་གཤིས་དྲང་པོ་སོགས་ཀྱི་སྒོ་ནས་གཞན་ལ་གོ་བསྐོན་སློབ་གསོ་སྤེལ་དགོས་ཞེས་པ་སོགས་ཀྱིས་མཚོན། གླེང་བརྗོད་འདི་ནི་རང་ངོར་ལྟ་ཐབས་ཀྱི་ཁམས་གཙང་ཤེལ་སྒོང་དྭངས་མ་ཞིག་ཀྱང་ཡིན་པར་སྙམ། ངས་འདི་ན་༼རང་མགོ་ནས་ནམ་ལངས༽དགོས་ཞེས་བརྗོད་པ་འདི་ནི། རྒྱ་ཆེ་བའི་ཟིན་གྲོགས་རྣམས་ལ་མཇལ་དར་དཀར་པོ་ཞིག་གི་དོད་དུ་ཕུལ་བ་ཡིན། བཀྲ་ཤིས་བདེ་ལེགས། བོན་སྨྱུག་ནས།