ནམ་མཁའ་རང་གྲོལ་རྩལ་གྱི་མགུར་མ་ཁོང་གིས་སློབ་དཔོན་བསྟེན་ཚུལ།

གཞི་སྣང་ཀ་དག་ཆེན་པོ་ཀུན་བཟང་གི་དགོངས་པར། །

འཁོར་འདས་བོན་རྣམས་ཐམས་ཅད་རང་རྩལ་དུ་སྣང་འདུག །

སྣང་བ་ཇི་བཞིན་ཐམས་ཅད་ངོས་འཛིན་དུ་ཟད་ནས། །

སྣ་ཚོགས་དྲན་ཤར་བློ་འདས་སེམས་ཉིད་དུ་རྟོགས་པས། །

སྣང་ཚད་ཐམས་ཅད་བདག་གི་སློབ་དཔོན་ཡང་ཡིན་འདུག །

རེ་བ་མི་གདའ་རང་སེམས་དང་པོ་ཡི་གཞི་ཡིན། །

དོགས་པ་མེད་པ་འཁྲུལ་སྣང་རང་སེམས་ཀྱི་རྩལ་ཡིན། །

རང་སེམས་རྣམ་རྟོག་དྲན་རྒྱུ་མཁན་པོ་ལ་བལྟ་དུས། །

བལྟ་མེད་སྟོང་པའི་རང་སེམས་རྗེན་པ་རུ་རྟོགས་པས། །

རྣམ་པར་རྟོགས་ཚད་བདག་གི་སློབ་དཔོན་ཡང་ཡིན་འདུག །

སྣང་སྲིད་ཐམས་ཅད་རང་སྣང་གར་བསྒྱུར་གྱི་རྩལ་ལས། །

བདེན་པར་མ་གྲུབ་སྒྱུ་མའི་རང་བཞིན་དུ་རྟོགས་ཏེ། །

ངེས་འབྱུང་ཡིད་ཆེས་ཉམས་ལེན་སེམས་གཏིང་ནས་སྐྱེས་སོང་། །

གཞན་སྣང་ཤར་ཚད་བདག་གི་སློབ་དཔོན་ཡང་ཡིན་འདུག །

རྒྱུད་དང་ལུང་དང་ཚིག་གི་མཚན་མ་རུ་མི་གཟུང་། །

རང་སེམས་སྟོང་པའི་རིག་པ་རྐྱང་དེད་དུ་བལྟ་དུས། །

བོན་སྒོ་བརྒྱད་ཁྲིའི་མཐར་ཐུག་རྫོགས་ཆེན་གྱི་དགོངས་པ། །

བདག་གི་སེམས་ལ་ཐོབ་པའི་སློབ་དཔོན་ཡང་ཡིན་འདུག །

ཐོལ་བྱུང་སྤྲང་ཕྲུག་བདག་གི་ཉམས་ལེན་གྱི་སེམས་ལ། །

ཤར་ཚད་ཐམས་ཅད་སྐྱོན་མེད་ཡི་གེ་རུ་བཀོད་འདི། །

རང་སེམས་སངས་རྒྱས་རྟོགས་པའི་སློབ་དཔོན་ཡང་ཡིན་འདུག །

ཅེས་པ་འདི་ནི་སྔགས་འཆང་ཀུན་བཟང་བསྟན་འཛིན་མཆོག་ལ་སློབ་མ་འགས་བསྐུལ་ཏེ་སྒྲ་ཕབ་ཏུ་བཅུག་པ་ལས་ཞལ་བཤུས་པའོ། །