བསམ་བཞག་གི་སྤྲོས་པས་མཚམས་སྦྱར་བ།

འདས་ཟིན་ལོ་ཟླར་ཕྱིར་དྲན་ཐེངས་ཤིག་བྱས་པས།།

ད་ལྟའི་དངོས་མཚན་འདི་ལ་ཡིད་ཆེས་རྙེད་དེ།།

མ་འོངས་མཛེས་སྡུག་བསུ་བའི་མགྲོན་འབོད་བྱེད་པ།།

ཐུན་མོང་མི་བུའི་ཁྱད་ཆོས་སྤྱི་རུ་རྒྱུག་གོ།

   ཁར་རྩང་ཡོང་བའི་ཤུལ་ན་ཕྱིར་འདང་རེ་རྒྱག་པ་དང་།དེ་རིང་གི་གནས་བབ་ལ་བསམ་གཞིག་གིས་འཚོ་ཞིང་།

 མ་འོངས་པའི་དུས་ཀྱི་གསང་བ་ལ་ཚོད་བགམ་ནན་མོ་རེ་བྱེད་བཞིན་མདུན་ཕྱོགས་ཀྱི་ལམ་ན་

ཞུགས་པ་ནི་འཚོ་ཁམས་ཤིག་ལ་ཆགས་པའི་མི་བུ་ཡོངས་ཀྱི་སྤྱི་འགྲོས་རེད།

         ཡ་ཐོག་ཞང་ཞུང་མི་བུའི་རིག་རྩལ་རང་གཟུགས།།

         ལྷུན་བརྩེགས་གངས་དཀར་ཏི་སེའི་མགུལ་ན་བྲིས་པས།།

         ལྷད་མེད་གཙང་ཆབ་མ་ཕམ་གཡུ་མཚོའི་འགྲམ་ནས།།

         རིག་པའི་གླིང་བུ་སྤུར་བའི་སྒྱུ་རྩལ་རྙེད་ཟིག།

ཆེས་སྔ་བའི་དུས་ཤིག་ན། འཛམ་གླིང་གོ་ལ་ཟླུམ་པོའི་དབུ་རྩེ་ཞང་ཞུང་བོན་གྱི་བླ་རི་ངོ་མ་རི་ཡི་རྒྱལ་པོ་

གངས་དཀར་ཏི་སེ་ཡི་འདབས་རོལ། གྲགས་སྙན་དབྱར་གྱི་རྔ་གསང་ཕྱོགས་ཕྱོགས་ནས་ལྡིར་ཞིང་དྭངས་གསལ་

ཡན་ལགས་བརྒྱད་དང་ལྡན་པའི་མ་ཕམ་གཡུ་ཡི་མཚོ་མོའི་འགྲམ་ངོགས།

གླིང་ཆེན་འདིར་ཤེས་རིག་གི་འགོ་མོ་ཐོག་མར་ཁ་འབུས་པའི་ཕ་ཡུལ་གཅིག་པུ། སྲིད་གསུམ་དབང་ལ་སྒྱུར་བའི་

རྒྱལ་རབས་བྱ་རུ་ཅན་གྱི་རྒྱལ་པོ་བཅོ་བརྒྱད་སོགས་རིམ་པར་བྱོན་པའི་ཆབ་ཁོངས། 

གནས་འདི་ན་རྣམ་འདྲེན་རྒྱལ་བ་སྟོན་པ་དམུ་རྒྱལ་སྲས་བཅས་སྐུ་དངོས་སུ་ཕེབས་ཏེ་རྒྱུ་འབྲས་བདེན་པའི་

བོན་འཁོར་བསྐོར་ཞིང་མི་རྣམས་ལ་རིག་པའི་གནས་ཀྱི་ལམ་བུ་བསྟན་པའི་དུས་དེ་ཙམ་ན། 

ང་ཚོའི་མི་རིགས་འདི་ཉིད་ཀྱང་སྟོན་མཆོག་གང་དེའི་ཐུགས་རྗེའི་སྐྱབས་འོག་ན་ཚུད་པའི་ལྷ་སྡེ་རུ་གྱུར་ཟིན།།

      ཚད་གསུམ་སྲོང་ལ་གཞལ་བའི་དེབ་རྙིང་སྔོན་པོར།།

      བཅོས་མིན་དྭངས་གསལ་རིག་པ་ཐད་ཀར་སྦྲེལ་ཚེ།།

      གོ་ལའི་གཙུག་ནོར་ཕ་བཟང་བུ་ཚོའི་གམ་དུ།།

      རང་སྣང་སྤྲོ་བས་བཀྱགས་པའི་གཏམ་རྒྱུད་བཤད་བཞག།

མ་ཚད་འདྲེན་མཆོག་གང་དེས་བཞགས་པའི་ཤེས་རིག་གི་ནོར་བུ་རིན་པོ་ཆེ་ལ་བདག་གཉེར་བྱེད་པའི་

བགོ་སྐལ་བཟང་པོ་ངེད་ཚོ་ལ་བབས་ཏེ་དེ་དག་ལོངས་སུ་སྤྱོད་པའི་གོ་སྐབས་རྙེད་ཡོད་ཅིང་དེ་ནས་

མི་རབས་རིམ་བྱུང་གི་དུས་ཡུན་རིང་པོར་ཁ་བ་རི་པའི་མི་བུ་བློ་རིག་ཅན་རྣམས་ཀྱིས་མཛད་རྗེས་

བླ་ན་མེད་པ་བཞགས་ཡོད་པའི་ཚུལ་ནི་ད་ཡོད་བོད་པའི་ལོ་རྒྱུས་རྣལ་མ་དག་དང་དངོས་སྟོབས་ཀྱི་

རིགས་པ་བཅས་ལ་ལེགས་པར་འཇུག་ཚེ་བདེན་དོན་ཀྱི་སྙིང་པོ་གབ་གསང་མེད་པར་ཚུལ་ལ་ར་སྤྲོད་

བྱེད་ངེས་ཡིན་ལ། དེང་གི་དུས་ན་ཡང་བསྟན་འཛིན་སྐྱེས་མཆོག་དུ་མས་གོང་མའི་མཛད་ཕྲིན་

གསེར་གྱི་ཉི་མའི་ཟེར་ཐག་ལ་འཇུས་ནས་ཤེས་རིག་ལ་བཀའ་དྲིན་སྐྱོང་བཞིན་ཡོད་པའི་ཁྲོད་ནས་

དམིགས་ཀྱིས་བསལ་ཏེ་ཧི་བོན་དྲ་བའི་ལས་འཛིན་གཙོ་སྐྱོང་པ་རྣམས་སྐུ་ཚེ་རྒྱལ་མཚན་བརྟན་ཞིང་

དགོངས་དོན་ཡིད་བཞིན་དུ་འགྲུབ་པའི་སྨོན་འདུན་ཞུ་རྒྱུ་དང་ཆབས་ཅིག་

ཕྲན་རང་ཧི་བོན་ཟིན་བྲིས་འབྲི་བ་ལ་གོམ་པ་དང་པོ་འདི་ནས་སྤོ་ཨ།།